Songon dia do Sasittongna Halak Kristen i?​—Aha do na Didok Bibel Taringot i?

Saonari on godang do halak na mangakku dirina Kristen. Alai molo taida pangalahona, jotjot do nasida mambahen na jahat tu halak na asing. Misalna godang do sian nasida na holan mamikkiri dirina sandiri, dang jujur, jala dang parduli tu halak na asing. Adong do muse na so setia tu pasanganna. Alani i gabe sukkun-sukkun ma roha ni halak, ‘Songon dia do sasittongna halak Kristen i?’

Na Didok Bibel Taringot Halak Kristen

Sude do halak boi mangakku dirina Kristen. Alai adong do na porlu taulahon asa cocok hita digoari halak Kristen. Molo tajaha di Bibel, akka sisean ni Jesus do na digoari halak Kristen. (Ulaon ni Apostel 11:26) Jesus pe mandok, “Molo diihutton hamu hatakku, tutu ma hamu akka siseanku.” (Johannes 8:31) Memang dang adong halak na boi mangihutton sude paretta ni Jesus. Alai pasti berupaya do halak Kristen lao mangihutton hata ni Jesus jala boi do i tarida sian parngoluonna siganup ari. Taida ma piga-piga contohna.

Marsihaholongan do halak Kristen

Didok Jesus, “Hulehon ma tu hamu paretta na imbaru, marsihaholongan ma hamu. Ikkon dihaholongi hamu do akka donganmuna na asing dos songon carakku makkaholongi hamu. Molo marsihaholongan hamu, botoon ni sude jolma ma na siseanku hamu.”—Johannes 13:34, 35.

Na diulahon Jesus: Dihaholongi Jesus do sude halak dang soal na mamora manang na pogos ibana, sian dia hutana, manang suku aha ibana. Dipamalum ibana do akka na marsahit, dilehon ibana do mangan akka na male, jala dilehon ibana do ngoluna humokkop sude halak.—Mateus 14:14-21; 20:28.

Halak Kristen na sittong: Dang holan mamikkiri dirina sandiri nasida. Buktina burju do nasida tu halak na asing, dang dibeda-bedahon nasida halak, jala olo do nasida mengampuni halak na asing. Olo do nasida mangurupi halak na susa jala rela berkorban do nasida.—1 Johannes 3:16.

Jujur do halak Kristen

Didok Jesus, “Au do . . . hasittongan.”—Johannes 14:6.

Na diulahon Jesus: Jujur do Jesus tikki makkatai jala sittong do na diulahon ibana. Dang hea ibana mangoto-otoi halak manang margabus. Ditanda do ibana halak na jujur nang pe gabe sogo roha ni halak tu ibana alani i.—Mateus 22:16; 26:63-67.

Halak Kristen na sittong: Dang olo nasida margabus. Digarar nasida do pajak, dang olo nasida manakko, ringgas jala jujur do nasida tikki karejo. (Rom 13:5-7; Epesus 4:28) Dang olo nasida manipu, mancontek, manang mangalean informasi na so sittong tikki mangalului karejo manang tikki mangisi formulir na asing.—Heber 13:18.

Burju do halak Kristen

Didok Jesus, “Ro ma hamu tu au, hamu akka na loja jala na mamboan boban na borat, asa hupargogoi hamu. Tuhuk hamu ma augakku jala marsiajar ma hamu sian au asa marlas ni roha hamu. Ai na lambok jala na serep roha do au. Ai lambok do augakku jala neang do bobanku.”—Mateus 11:28-30.

Na diulahon Jesus: Burju do Jesus tu akka halak jala lomo do roha ni akka halak makkatai tu ibana. Lomo do rohana tu dakdanak, diapuli ibana do akka na marsak, jala diargai ibana do halak na asing.—Markus 10:13-15; Lukas 9:11.

Halak Kristen na sittong: Burju do nasida tikki makkatai tu akka halak. Dang kasar nasida tikki makkatai jala dang olo nasida mangaleai halak. (Epesus 4:29, 31, 32) Parduli do nasida tu halak na asing jala berupaya do nasida mangurupi halak.—Galatia 6:10.

Setia do halak Kristen tu pasanganna

Didok Jesus, “Naung dipasada Debata, dang boi sirangon ni jolma.”—Markus 10:9.

Na diulahon Jesus: Nang pe dang menikah Jesus, alai dijujui ibana do akka halak asa setia tu pasanganna. (Mateus 19:9) Jala dipaboa ibana do aha na boi mambahen sasahalak gabe mangalakkup, na boi mambahen sega perkawinanna.—Mateus 5:28.

Halak Kristen na sittong: Dang olo nasida mangulahon manang aha pe na boi mambahen sega perkawinan ni nasida. (Heber 13:4) Dihaholongi jala diargai nasida do pasanganna.—Epesus 5:28, 33.