1 Samuel
13 Marumur . . .* taon ma si Saul tikki gabe raja.+ Tikki i, nungnga dua taon ibana gabe raja di Israel. 2 Dipillit si Saul ma 3.000 halak sian halak Israel. Dibahen ma 2.000 halak mandongani ibana di Mikhmas dohot di akka huta na di Dolok Betel. Jala dibahen ma 1.000 halak mandongani si Jonatan+ di Gibea+ na di Benjamin. Alai na asing, disuru ma mulak tu kemahna be. 3 Dung i, dipamate si Jonatan ma tentara ni halak Palistim+ na adong di Geba.+ Jala dibege halak Palistim ma na masa i. Disuru si Saul ma asa diombus tarompet+ di sude luat, jala didok ma, “Hamu halak Heber, tangihon hamu ma!” 4 Sude ma halak Israel mambege barita on, “Nungnga dipamate si Saul be tentara ni halak Palistim. Jala sogo hian ma saonari roha ni halak Palistim tu halak Israel.” Alani i, dijou ma akka halak asa diihutton si Saul tu Gilgal.+
5 Marpungu ma halak Palistim lao marporang mangalo halak Israel. Adong do 30.000 kareta porangna, 6.000 tentarana na marhoda, jala songon pasir di topi ni laut ma godang ni tentarana.+ Lao ma nasida markemah di Mikhmas na di sabola timur ni Bet-apen.+ 6 Susa hian do dihilala halak Israel, ai dang boi be nasida lao manang na tudia. Alani i martabuni ma nasida tu gua,+ tu lubang, tu liang, tu holang-kolang ni akka batu na balga, dohot tu sumur na koring. 7 Gariada, adong do deba sian halak Heber i na menyeberangi Sunge Jordan jala lao tu huta ni marga Gad dohot tu Gilead.+ Sai di Gilgal do anggo si Saul, alai mabiar do sude na mandongani ibana. 8 Sai dipaima si Saul do saleleng pitu ari songon na diparettahon* si Samuel tu ibana. Alai dang marna ro si Samuel tu Gilgal, gabe marlarian ma akka halak na mandongani ibana. 9 Ujungna didok si Saul ma, “Boan ma tuson pelean situtungon dohot pelean pardamean* i.” Dung i dipelehon ibana ma pelean situtungon i.+
10 Dung sae si Saul mangalehon pelean situtungon i, sahat ma si Samuel. Didapotton si Saul ma ibana, jala disukkun ma songon dia kabarna.* 11 Dung i didok si Samuel ma, “Boasa dibahen ho songon on?” Dialusi si Saul ma, “Nungnga lao akka halak manadikkon au,+ hape so marna ro ho songon na nidokmi. Jala nungnga marpungu halak Palistim di Mikhmas.+ 12 Didok rohakku ma, ‘Naeng ro nama halak Palistim mangalo au tu Gilgal, hape dang husukkun dope songon dia lomo ni roha ni Jahowa.’ Alani i ma hupelehon pelean situtungon i.”
13 Didok si Samuel ma tu si Saul, “Ulaon ni halak na oto do na binahenmi. Dang dioloi ho paretta ni Jahowa Debatam.+ Molo dioloi ho hian parettana i, bahenon ni Jahowa do martahan harajaonmu di Israel saleleng ni lelengna. 14 Alai saonari, dang na lao martahan be harajaonmu.+ Luluan ni Jahowa ma halak na asing na boi mambahen las rohana.+ Jala suruon ni Jahowa ma ibana mamimpin bangsona.+ Ai dang dioloi ho paretta ni Jahowa.”+
15 Dung i, lao ma si Samuel sian Gilgal tu Gibea na di Benjamin. Dietong si Saul ma godang ni halak na mandongani ibana, adong ma hira-hira 600 halak.+ 16 Di Geba+ na di Benjamin dope si Saul, si Jonatan anakna, dohot akka halak na mandongani nasida. Alai, di Mikhmas+ do markemah halak Palistim. 17 Kaluar ma tolu punguan ni tentara ni halak Palistim sian perkemahan ni nasida. Punguan na parjolo lao ma tu dalan na tu Opra, na tu luat Syual. 18 Punguan na paduahon lao ma tu dalan na tu Bet-horon.+ Jala punguan na patoluhon lao ma tu dalan na tu parbatasan na di bariba ni Rura Zeboim, jala torus ma nasida lao tu padang gurun.
19 Di tikki i, dang adong tukkang logam di sude luat ni halak Israel. Ai didok halak Palistim do, “Unang ma sanga adong halak Heber na boi mambahen podang manang tombak.”* 20 Ikkon lao do sude halak Israel tu halak Palistim patajompon mata ni bajak ni nasida, baliung, kampak, dohot sasabi ni nasida. 21 Hira-hira ualu gram perak* ma lehonon ni halak Israel manggarar halak Palistim lao patajompon mata ni bajak, baliung, hudali, kampak, dohot padenggatton tukkot ni parmahan* ni nasida. 22 Alani i, dang adong podang manang tombak ni akka halak na mandongani si Saul dohot si Jonatan tikki marporang nasida.+ Holan si Saul dohot si Jonatan do na adong sinjatana.
23 Di tikki i, mardalan do tentara ni halak Palistim sian dalan na soppit di jurang na di Mikhmas.+