Job
22 Didok si Elipas+ halak Teman i ma,
2 “Ai marguna do haroa jolma di Debata?
Adong haroa halak na marbisuk na marguna di Ibana?+
3 Gabe las haroa roha ni Pargogo na So Hatudosan i molo tigor ho marroha?
Manang adong haroa dapotna laba molo setia ho tu Ibana?+
4 Dang mungkin hukumon ni Debata ho
Jala boanonna ho tu pengadilan molo dipasangap ho Ibana.
5 Ala godang do hajahatonmu umbahen na dihukum Ibana ho
Jala ala torus diulahon ho na sala.+
6 Lomo-lomom do mambuat arta ni haha anggim lao gabe jaminan,
Jala dibuat ho do abit ni halak na pogos, gabe dang marpakkean be nasida.+
7 Dang dilehon ho minum halak na loja,
Jala dang dilehon ho mangan halak na male.+
8 Akka halak na gogo do nappunasa tano,+
Jala halak na sangap do na tinggal disi.
9 Alai dipalao ho do akka na mabalu jala so adong diboan manang aha,
Diropukkon ho do tangan ni halak na so marama.*
10 Alani i ma gabe godang jorat+ di sakalilingmu,
Jala gabe mabiar ho ala toppu ro jea tu ho.
11 Dang boi be idaonmu manang aha ala nungnga holom sude,
Jala gabe maup ma ho alani banjir.
12 Dang na di langit na untimbo Debata?
Jala ida ma, timbo do sude bintang.
13 Alai didok ho do, ‘Aha ma haroa na binoto ni Debata?
Boi do haroa Ibana mangadili sian inganan na massai holom?
14 Ai tikki mardalan Ibana di langit na untimbo
Dang boi diida Ibana manang aha ala ditutupi ombun.’
15 Naeng diihutton ho do dalan ni parjahat
Na dibolus nasida najolo?
16 Mate do nasida andorang so dapot tikkina,
17 Didok nasida do tu Debata na sittong, ‘Unang ganggu hami!’
Jala didok nasida do, ‘Aha ma haroa na boi bahenon ni Pargogo na So Hatudosan i tu hami?’
18 Hape Ibana do na mangalehon akka na denggan tu jabu ni nasida.
(Dang hea sarupa pikkiranku tu pikkiran ni akka parjahat i.)
19 Idaon ni halak na tigor marroha ma i jala marlas ni roha ma nasida,
Direhei halak na so marsala ma nasida jala didok ma,
20 ‘Nungnga diropukkon akka musutta,
Jala lao tartutung do akka na tinggal.’
21 Marale-ale ma jo ho tu Ibana asa dame ngolum,
Jala asa dapotmu akka na denggan.
22 Jalo ma paretta na nilehonna,
Jala sippan ma hatana di bagasan roham.+
23 Molo mulak ho tu Pargogo na So Hatudosan i, denggan ma muse ngolum.+
Molo dibolokkon ho akka na jahat sian kemahmu,
24 Molo dibolokkon ho masmu tu orbuk
Jala dibolokkon ho masmu na sian Opir+ tu lombang* na marbatu-batu,
25 Pargogo na So Hatudosan i ma na gabe masmu,
Jala Ibana ma na gabe perakmu na dumenggan.
26 Dung i Pargogo na So Hatudosan i ma na gabe haroro ni las ni roham,
Jala manatap ma ho tu Debata na di ginjang.
27 Molo martangiang ho tu Ibana, tangihononna do ho,
Jala boi ma pasautonmu janjim.
28 Marhasil ma sude keputusan na binahenmu,
Jala tiur ma akka dalanmu.
29 Ai pailaonna do ho molo ginjang roham tikki makkatai,
Alai jagaonna do halak na serep marroha.
30 Paluaonna do halak na so marsala,
Molo dang diulahon ho akka na jahat,* pasti paluaonna do ho.”