Sala do Molo Martangiang Au tu Akka Santo?

Na Didok Bibel

Sala. Didok di Bibel, ikkon holan tu Debata do hita martangiang jala di bagasan goar ni Jesus. Didok Jesus do tu akka siseanna, “Songon on ma tangiangmuna: Ale Amanami na di banua ginjang! Sai pinarbadia ma Goarmu!” (Mateus 6:9, Lembaga Alkitab Indonesia) Dang hea disuru Jesus akka siseanna asa martangiang tu akka santo, tu suru-suruan, manang na tu ise pe asing ni tu Debata.

Didok Jesus do muse tu akka siseanna, “Ahu do dalan i dohot hasintongan dohot hangoluan. Ndang adong na sahat tu Ama i, ia so marhite sian Ahu.” (Johannes 14:6, LAI) Holan tu Jesus do dilehon Debata hak lao gabe parhitean ni jolma dohot Debata.​—Heber 7:25.

Boi do au martangiang tu Debata alai martangiang muse tu santo?

Tikki digoda Sibolis Jesus, didok Jesus do tu ibana, “Ai didok Surat i do: “Tuhan Debatam do sisombaonmu, Sasadasa do sioloanmu!”” (Mateus 4:10, LAI) Dipangido Debata do tu hita asa holan Ibana na tasomba, termasuk ma tikki martangiang hita. Ikkon holan tu Ibana do hita martangiang.​—Jesaya 48:11.

Molo martangiang hita tu akka na asing, termasuk ma i tu santo, manang tu suru-suruan, on mambahen haccit roha ni Debata. Tikki naeng marsomba apostel Johannes tu suru-suruan, dang olo suru-suruan i jala didok do tu ibana, “Unang ma songon i! Donganmu naposo do ahu jala dongan ni angka hahaanggim, angka naung manjalo panindangion sian Jesus. Debata do sisombaonmu!”​—Pangungkapon 19:10, LAI.