Songon dia do Carana Asa Dibege Tangiangta?
“Sitangihon tangiang” do Debata Jahowa. (Psalmen 65:2) Boi do hita martangiang tu Ibana manang na didia pe jala sadihari pe. Jala boi do hita martangiang marsoara manang di bagasan roha. Lomo do roha ni Jahowa asa tajou Ibana ‘Ama’. Sasittongna, Ibana do Bapak na dumenggan. (Mateus 6:9) Ala holong roha ni Jahowa tu hita, dipaboa Ibana do tu hita songon dia asa dibege tangiangta.
MARTANGIANG MA TU DEBATA JAHOWA DI BAGASAN GOAR NI JESUS
“Molo dipangido hamu manang aha tu Damang i di bagasan goarhu, lehononna do i tu hamu.”—Johannes 16:23.
Takkas do sian hata ni Jesus i, lomo roha ni Jahowa asa martangiang hita tu Ibana di bagasan goar ni Jesus. Dang marhite akka patung sisombaon, akka santo, akka suru-suruan, manang marhite akka omputta naung mate. Molo martangiang hita tu Debata di bagasan goar ni Jesus, patuduhon na taargai do naung dibahen Jesus tu hita. Jesus mandok, “Dang adong na boi ro tu Damang i molo so marhite au.”—Johannes 14:6.
SIAN NASA ROHA MA MARTANGIANG
“Paboa hamu ma sude na di bagasan rohamuna tu Ibana.”— Psalmen 62:8.
Tikki martangiang hita tu Jahowa, tabahen ma Ibana gabe songon bapakta. Unang ma songon na manjaha bukku manang taapil-apil akka hata na lao tadok. Alai sian nasa rohatta ma hita martangiang tu Ibana jala sangap ma hita tikki makkatai tu Ibana.
MARTANGIANG MANGIHUTTON LOMO NI ROHA NI DEBATA
“Manang aha na tapangido sesuai tu lomo ni rohana, tangihononna do hita.”—1 Johannes 5:14.
Dipaboa Debata Jahowa do di Bibel, aha na lao bahehonna tu hita jala aha na ikkon bahenotta. Asa dijalo Debata tangiangta, ikkon “sesuai tu lomo ni rohana” do tangiangta i. Asa boi hita mangulahon i, porlu hita marsiajar Bibel asa boi tatanda Ibana. Molo taulahon i, dijalo Ibana ma tangiangta.
AKKA AHA MA NA BOI TATANGIAKKON?
Manangiakkon na tahaporluhon. Boi do tatangiakkon tu Debata na tahaporluhon siganup ari songon sipanganon, pakkean manang inganatta tinggal. Boi do muse hita martangiang asa marbisuk hita tikki mambahen keputusan jala asa margogo hita tikki adong sitaonon. Boi do muse tatangiakkon asa togu haporseaotta, asa disesa dosatta, jala asa diurupi Debata hita.—Lukas 11: 3, 4, 13; Jakobus 1:5, 17.
Manangiakkon na asing. Lomo do roha ni natua-tua molo masihaholongan gellengna. Dos songon i ma Jahowa, lomo rohana molo akka gellengna na di tano on parduli tu na asing. Denggan do molo tatangiakkon istritta, suamitta, gellengta, keluargatta, dohot akka donganta na asing. Songon na didok Bibel, denggan do molo hita “masitangiangan”.—Jakobus 5:16.
Mandok mauliate tu Ibana. Didok Bibel, dibahen Debata do “akka ulaonna na denggan. Dilehon do tu hamu udan dohot musim panen. Diparade Ibana do sipanganon asa puas hamu jala asa las rohamuna”. (Ulaon ni Apostel 14:17) Molo tapikkiri sude na dibahen Debata tu hita, gabe olo ma hita mandok mauliate tu Ibana. Jala molo taoloi hatana, patuduhon na mandok mauliate do hita tu Debata.—Kolosse 3:15.
SABAR MA JALA TOKTONG MA MARTANGIANG
Sipata, olo do lungun rohatta molo dang dialusi tangiangta. Alai, boi do pittor tadok na so parduli Debata tu hita? Dang songon i! Taida ma akka pengalaman na patuduhon rikkot ni toktong martangiang.
Didok si Steve na dipaboa nakkin, “Molo dang alani tangiang, nga mandele au piga-piga taon naung salpu.” Aha ma na mangurupi ibana? Mulai ma ibana marsiajar Bibel jala diparsiajari ibana ma boasa porlu toktong martangiang. Didok si Steve muse, “Martangiang ma au tu Debata, mandok mauliate ma au tu Ibana ala dilehon akka dongan na sai mangurupi au. Balga hian las ni rohakku saonari.”
Si Jenny na hea makkilala dang mararga dirina mandok, “Tikki mandele au, martangiang ma au tu Debata. Hupangido ma asa diurupi au mangattusi boasa songon i pakkilalaanku.” Aha ma hasilna? Didok ibana muse, “Tikki martangiang au tu Debata, gabe boi ma denggan carakku marpikkir. Gabe boi ma huboto, nang pe hira na so mararga dirikku huhilala, alai arga do au di Ibana. On boi mangurupi au asa unang mandele. Ala toktong au martangiang, gabe boi ma huhilala holong ni Jahowa. Gabe Bapakku, Ale-alekku jala Debata na manarihon au ma Ibana. Sai rade do Ibana mangurupi au tikki marsitutu au mangulahon lomo ni rohana.”
Tikki diida si Isabel na toktong marlas ni roha si Gerard anakna i nang pe cacat ibana, didok ibana ma, “Dialusi do tangiakku, gabe sada pasu-pasu do anakki di au”
Taida ma muse pengalaman ni si Isabel. Tikki hamil ibana, didok dokter cacat do anak na lao ditubuhon ibana. Gabe marsak ma ibana. Piga-piga donganna mandok asa digugurhon i. Didok ibana ma, “Gabe naeng mate ma huhilala alani arsak ni rohakki.” Aha ma na diulahon ibana? Didok ibana, “Martangiang ma au tu Debata jala hupangido ma asa diurupi au.” Tikki tubu anakna si Gerard, cacat do memang anakna i. Jadi gabe didok si Isabel do, na so dialusi Debata tangiangna? Didok ibana, “Saonari nungnga marumur 14 taon anakki. Sai toktong do marlas ni roha ibana huida nang pe cacat ibana. Huboto ma, dialusi Debata do tangiakku. Gabe sada pasu-pasu do huhilala anakki di au.”
Akka pengalaman on patuduhon na tutu do hata ni panurat psalmen na mandok, “Tangihononmu do pangidoan ni halak na lambok roha, ale Jahowa. Patoguonmu do roha ni nasida jala sai diparrohahon Ho do nasida.” (Psalmen 10:17) On ma na mambahen boasa porlu hita toktong martangiang!
Godang do tangiang ni Jesus na disurat di Bibel. Sada tangiangna na takkas taboto, i ma na diajarhon ibana tu akka siseanna. Aha ma na boi taparsiajari sian tangiangna i?