CARA ASA UNANG SAI MARSAK
Na Ikkon Taulahon Tikki Marsak
Molo marsak manang stres hita, porlu do tapikkirhon songon dia kesehatanta, songon dia sikapta tu halak na asing, jala aha do na urrikkot di ngolutta. Di artikel on, dipaboa do akka prinsip na boi mangurupi hita tikki marsak, jala asa boi lam moru stresta.
Unang Holsohon Ari Sogot
“Unang ma holsohon hamu taringot tu ari sogot, ai asing do na taholsohon tu ari sogot.”—MATEUS 6:34.
Lapatanna: Sai adong do na taholsohon ganup ari. Alai unang ma paholsohu hita tu akka na lao masa di ari sogot. Sae ma holan mamikkirhon akka na porlu sadari on.
Ala marsak, olo do gabe sai holsoan hita. Jadi ingot ma on: Na parjolo, porlu do botoonmuna sipata adong do parsoalan na so boi tapasiding. Molo sai torus do tapikkirhon i, gabe lam marsak ma hita. Na paduahon, ingot ma, jotjotan do akka na tahabiari i dang tutu songon i na masa.
Ikkon Masuk Akkal Do Hamu
“Jumpang do hapistaran di halak na serep marroha.”—PODA 11:2.
Lapatanna: Dang ikkon sempurna sude na taulahon. Unang ma pagodanghu na taharaphon sian diritta dohot sian halak na asing.
Ikkon serep do rohatta jala ikkon masuk akkal. Taingot ma, dang sude boi taulahon, songon i nang halak na asing. Molo taulahon i, gabe lam moru ma stresta jala boi do gabe marhasil akka ulaotta. Asing ni i, porlu do margait hita sahali-sahali. Nang pe sipata adong parsoalan, molo mekkel hita gabe dang paborathu be parsoalan i tahilala.
Lului ma Aha na Mambahen Hamu Gabe Marsak
“Manat do mandok hata halak na malo.”—PODA 17:27, Bibel siganup ari.
Lapatanna: Molo sai jut do rohatta, boi do gabe dang denggan hita marpikkir. Jadi, tenang ma hamu.
Rimangi ma aha na mambahen hamu gabe marsak. Jala boha do hamu mangadopi i saleleng on. Misalna molo marsak hamu, parrohahon ma aha na dipikkiri hamu, na dihilala hamu, jala songon dia caramuna mangadopi i. Boi do disurat hamu i, asa diboto hamu cara na dumenggan lao mangadopi situasi i. Jala pikkirhon ma boha carana pasidikkon parsoalan i. Alai molo dang boi, lului ma cara asa unang lam balga parsoalan i. Misalna lului ma cara na dumenggan lao mangulahon sada tugas manang lao mangatur tikkimuna.
Tapauba ma cara marpikkirta. Adong do ra parsoalan na mambahen hita marsak, alai molo di dongan na asing parsoalan biasa do i. Jadi tergantung songon dia do hita mangida sada situasi. Ingot ma na tolu on:
Unang ma pittor hatop manguhumi halak. Misalna, adong halak na mamotong antrianmuna. Molo pittor didok rohamu, “Ai roa ma pangalaho ni on,” gabe jut ma rohamuna. Alai, porlu do dipikkirhon hamu, ra adong do tujuan na denggan boasa dibahen ibana songon i.
Lului ma cara na denggan lao mangadopi sada situasi. Umpamana, tikki paimahon dokter manang tikki di bandara, asa unang marsak hita, boi do tapakke tikki lao manjaha-jaha manang mambukka email.
Manat ma tapikkiri masalah na taadopi i. Tasukkun ma diritta, “Hira-hira gabe lam balga do masalah on tu ari sogot?” Porlu do tabagi, dia masalah na serius jala dia masalah na so pola serius.
Ikkon Taratur do Hamu
“Ingkon denggan do sude mardalan jala taratur.”—1 KORINT 14:40.
Lapatanna: Bahen ma ngolumuna asa taratur.
Lomo do rohatta asa taratur ngolutta. Alai boi do gabe dang taratur ngolutta, molo dang pittor taulahon akka ulaotta. Boi do gabe lam stres hita alani i. Lam godang ma akka ulaon na so sae takarejohon. Jadi ulahon ma na dua on:
Bahen ma jadwal, jala ihutton ma i.
Pikkirhon ma akka parange dia do na porlu paubaonmu, asa unang marlambat-lambat hamu mangulahon tugasmuna.
Toktong ma Seimbang
“Denggan ma ganup hita mangan, minum, jala mangkalashon na taula.”—PARJAMITA 3:13, Bibel siganup ari.
Lapatanna: Molo torus hamu karejo jala dang olo istirahat, dang boi hamu menikmati hasil karejomuna, ala nga habis be tikki dohot gogomuna.
Ikkon seimbang do hamu di parkarejoan dohot di parhepengon. Godang pe hepeng dang gabe jaminan boi sonang ngolumuna jala moru stresmuna. Gariada, olo do gabe lam susa hamu alani i. Didok do di Parjamita 5:12 (Bibel siganup ari), “Ianggo na mora, nang pe butong ndang boi sonang modom.” Jadi porlu do seimbang hamu mamakke hepeng.
Pakke ma tikkimuna lao mangulahon akka na mambahen las rohamuna. Boi do i mangorui stres. Alai molo akka rekreasi songon na manonton TV, dang sai boi i mangorui stres.
Marbisuk ma hamu mamakke teknologi. Unang ma pajotjothu diida hamu email, SMS, manang media sosial. Molo dang porlu hian, unang pola sai dipareso hamu email sian kantor tikki dang karejo hamu.
Jaga ma Kesehatan
“[Adong] do guna ni mangalatik daging.”—1 TIMOTEUS 4:8.
Lapatanna: Molo ringgas hita marolahraga, gabe lam sehat ma hita.
Ulahon ma akka na boi mambahen hita gabe lam sehat. Molo marolahraga hita, boi do gabe las rohatta jala dang gabe mura hita marsahit tikki stres. Allang ma sipanganon na bergizi, taratur ma mangan jala unang lupa istirahat.
Unang ma lului hamu “cara” na sala lao mangorui stres. Songon marisap, mamakke narkoba, jala manginum alkohol. Alana di pudian ni ari, boi do gabe lam stres hamu alani i. Gabe marsahit ma hamu jala habis hepeng.
Molo lam borat do stresmuna i, porlu do marubat hamu tu dokter. Unang pola gabe maila hamu alani i.
Tontuhon ma Dia na Urrikkot
“[Ikkon] diboto hamu dia na rumingkot.”—PILIPPI 1:10.
Lapatanna: Manat ma hamu manontuhon dia na urrikkot.
Surat ma jo akka tugasmuna. Asa diboto hamu tugas dia do na ikkon parjolo diulahon, tugas dia na so pola mendesak, tugas dia na boi talehon tu na asing jala tugas dia na so pola porlu takarejohon.
Saleleng saminggu, pareso ma songon dia hamu mamakke tikki. Dung i lului ma cara songon dia asa lam denggan mamakke tikki. Lam taratur hamu mamakke tikki, lam moru ma stresmuna.
Lehon ma tikkimuna lao istirahat. Holan satokkin pe hamu istirahat, boi do i mangorui stres.
Porlu do Hamu Diurupi na Asing
“Diagohon biar do las ni roha, alai parohon las ni roha do hata na denggan.”—PODA 12:25, Bibel siganup ari.
Lapatanna: Hata na denggan sian dongan boi mangapuli rohatta.
Makkatai ma hamu tu ale-alemuna. Ra diboto nasida do songon dia carana lao mangadopi situasimuna. Holan tapaboa pe na di bagasan rohatta, gabe lam denggan ma pakkilalaanta.
Pangido ma tu na asing asa diurupi hamu. Adong do ra tugas na boi tabagi tu na asing.
Molo adong dongan sakarejomuna na mambahen hamu marsak, lului ma cara mangadopi situasi i. Misalna, denggan ma paboa pakkilalaanmuna tu ibana alani sikapna i. (Poda 17:27) Molo tong dang boi, unang pola pajotjothu hamu pajuppang jala makkatai tu ibana.
Patogu ma Parale-aleanmuna tu Debata
“Marlas ni roha ma na mamboto ringkot ni marale-ale tu Debata.”—MATEUS 5:3.
Lapatanna: Memang porlu do di hita sipanganon, pakkean dohot inganan parlinggoman. Alai na urrikkot i ma parale-aleotta tu Debata. Jadi asa boi marlas ni roha, ikkon talului cara lao marale-ale tu Debata.
Martangiang ma hita asa diurupi Debata. Didok Debata do tu hita, “Pasahat hamu ma sude holso ni rohamuna tu Ibana, ai disarihon do hamu.” (1 Petrus 5:7) Tikki martangiang jala tarimangi akka na denggan, boi do gabe lam dame rohatta.—Pilippi 4:6, 7.
Jaha ma akka sijahaon na boi mangurupi hamu lam jonok tu Debata. Sian Bibel do dibuat akka prinsip na adong di majalah on. On boi mangurupi hita asa lam jonok tu Debata. Gabe marbisuk ma hita jala taattusi aha na ikkon taulahon. (Poda 3:21) Bahen ma tikkimuna lao manjaha Bibel. Ra denggan do molo dijaha hamu mulai sian bukku Poda.