5 Didia Jala Andigan do Hita Boi Martangiang?

PASTI hea do diida hamu adong agama na mangajarhon molo hita ikkon martangiang di sada bangunan na bagak jala nungnga ditottuhon tikkina. Alai adong do dipaboa di Bibel ikkon di inganan na songon dia jala andigan hita martangiang?

Memang dipaboa do di Bibel, adong tikki na pas lao martangiang. Contohna, sebelum mangan Jesus rap dohot akka muridna, martangiang do ibana mandok mauliate tu Debata. (Lukas 22:17) Jala tikki marpungu akka muridna lao manomba Debata, rap do nasida martangiang. Alani i do nasida toktong martangiang di akka sinagoga ni halak Jahudi, manang di bagas joro na di Jerusalem. Lomo do roha ni Debata mambahen bagas joro i gabe “jabu partangiangan ni sude bangso”.​—Markus 11:17.

Tikki rap marpungu akka naposo ni Debata jala martangiang, dialusi Jahowa do tangiang ni nasida. Molo dos roha ni nasida, jala pangidoanna sadalan tu hata ni Bibel, las do roha ni Jahowa mambege tangiang i. Olo do gabe dilehon Debata pangidoan ni nasida alani tangiang i. (Heber 13:18, 19) Taratur do Saksi Jahowa martangiang di ganup parpunguan ni nasida. Ro ma hamu tu inganan parpunguan ni nasida asa boi dibege hamu sandiri tangiang ni nasida.

Alai dang adong ditottuhon di Bibel andigan manang didia hita ikkon martangiang. Alana akka sisomba Jahowa najolo pe bebas do martangiang manang didia pe, jala tikkina pe bebas do. Jesus mandok, “Molo martangiang ho, lao ma ho tu kamarmu jala tutup ma pintu. Martangiang ma ho tu Amangmu na mangida ho sian ingananna na buni i.”​—Mateus 6:6.

Las do rohamuna mamboto i, dang i? Boi hamu makkatai manang sadihari pe dohot Debata na marhuaso di saluhutna. Boi do hamu makkatai tikki sahalakmuna jala pos ma rohamuna, dibege Ibana do hamu. Jotjot do Jesus tu inganan na buni lao martangiang. Hea do ibana martangiang saborngin manipat, lao mangido tudu-tudu sian Debata tikki naeng mambahen keputusan na penting.​—Lukas 6:12, 13.

Akka naposo ni Jahowa najolo pe, martangiang do tikki naeng mambahen keputusan na penting manang tikki adong masalah na borat. Sipata marsoara do nasida martangiang, sipata di bagas roha. Adong do na martangiang rap dohot na asing, adong do na martagiang sahalakna. Alai na terpenting, martangiang do nasida. Ai didok Debata do tu akka na manomba Ibana, “Torus ma hamu martangiang.” (1 Tessalonik 5:17) Sai rade do Debata mambege tangiang ni akka halak na mangulahon lomo ni rohana. On ma bukti na holong do rohana tu hita, dang i?

Memang godang do halak na sukkun-sukkun di rohana, ‘Adong do gunana martangiang?’ Jala hamu pe songon i do ra.