“Takkas ma Dipatorang”

1. Boasa pos roha ni si Paulus dohot akka donganna na lao sahat nasida di Rom?

HIRA-HIRA taon 59 M adong ma sada kapal na balga mamboan biji-bijian, marlayar sian Pulo Malta tu Italia mangalewati Laut Tengah. Dibahen do lambang ni “Akka Anak ni Zeus” di kapal i. Kapal i do na mamboan si Paulus dohot akka tahanan na asing. Ketat do nasida dijaga. Si Lukas dohot si Aristarkus ma na mandongani si Paulus. (Ul. 27:2) Sude do anak buah ni kapal i mangandalhon akka anak ni Zeus, dewa ni halak Junani, i ma si kembar Kastor dohot si Poluks. (Ida keterangan tambahan sian nwtsty-IN di Ul. 28:11.) Alai anggo si Paulus dohot akka donganna, Jahowa do na diandalhon nasida. Pos do rohana na lao sahat nasida di Rom, jala nungnga dipaboa Jahowa hian, na lao paboaon ni si Paulus barita na uli di jolo ni kesar.—Ul. 23:11; 27:24.

2, 3. Rute na dia do na dilewati kapal ni si Paulus, jala bantuan aha do na dapot ni si Paulus sian awal sahat tu akhir?

² Singgah ma nasida di Sirakus, kota na uli di Sisilia, na hampir sarupa songon Atena dohot Rom. Dung tolu ari disi, marlayar ma nasida tu Regium, di ujung selatan ni semenanjung Italia. Mangullus ma alogo sian selatan, marlayar ma kapal i 320 kilometer, jala sahat ma di pelabuhan Potioli, Italia (saonari jonok do i tu Napoli). Sahat do nasida di ari paduahon, ukkatop sian na biasana.—Ul. 28:12, 13.

³ Sahat ma si Paulus di Rom. Diboan nama ibana tu jolo ni Kesar Nero. Torus do didongani “Debata Sipangapul na sumurung” i si Paulus sian awal sahat tu akhir. (2 Kor. 1:3) Jadi dang mandele si Paulus manang gabe dang semangat ibana marbarita.

‘Martangiang ma si Paulus jala Tamba ma Pos ni Rohana’ (Ul. 28:14, 15)

4, 5. (a) Songon dia do akka dongan na di Potioli patuduhon holong tu si Paulus dohot akka donganna, jala boasa dipaloas ibana manjuppangi akka dongan? (b) Aha do manfaatna ala denggan pangalaho ni akka donganta na di penjara?

⁴ Pajuppang ma si Paulus, si Lukas, si Aristarkus di Potioli dohot “akka dongan sahaporseaon”, jala dijujui akka dongan i do asa tinggal nasida disi “saleleng pitu ari”. (Ul. 28:14) Massai denggan do sikap ni akka dongan i. Pasti dipatogu si Paulus dohot akka donganna i do nasida. Boasa dipaloas si Paulus pajuppang dohot akka dongan, hape tahanan do ibana? Mungkin ala burju do si Paulus, gabe pos ma roha ni akka tentara i tu ibana.

⁵ Saonari pe tikki dipenjarahon akka naposo ni Jahowa, manang dibahen tu kamp konsentrasi, jotjot do dilehon tu nasida kelonggaran ala denggan pangalahona. Misalna, di Rumania adong sahalak pangarampok na dihukum 75 tahun penjara. Marsiajar Bibel ma ibana disi, gabe muba ma pangalahona. Diida panjaga ni penjara do naung muba ibana, jala hea do disuru ibana lao tu kota manuhor keperluan ni penjara tanpa pengawasan. Sian pengalaman on taboto ma, boi do pangalahotta na denggan parohon hamuliaon tu Jahowa.—1 Ptr. 2:12.

6, 7. Songon dia do akka dongan na di Rom patuduhon holong na luar biasa?

⁶ Sian Potioli, mardalan pat ma si Paulus dohot akka donganna hira-hira 50 kilometer tu Kapua mangalewati Dalan Appia na mengarah tu Rom. Terkenal do dalan on, dibahen do batu na sian gunung berapi melapisi dalan i. Balga-balga do batu i, alai tipis. Tarida do sian i Laut Tengah dohot akka huta na massai uli di Italia. Sian dalan on dilewati do Rawa Pontin, sekitar 60 kilometer sian Pasar Appiporum na di Rom. Didok si Lukas, tikki ‘dibege akka dongan na di Rom naung ro nasida’, didapotton akka dongan i ma nasida. Deba nai paimahon di Tolu Kode, sekitar 50 kilometer sian Rom. Luar biasa do holong ni akka dongan i!—Ul. 28:15.

⁷ Sebenarna dang cocok Pasar Appiporum on gabe tempat istirahat, apalagi tu akka halak na sian inganan na dao. Sahalak penyair Romawi si Horatius paboahon molo di pasar i “godang do akka pelaut, jala biasana kasar do pemilik ni penginapan”. Jala “aekna pe kotor” do, magigi ibana mangida. Bahkan mangan disi pe dang olo ibana! Alai nang pe songon i, semangat do akka rombongan na sian Rom i paimahon si Paulus dohot akka donganna.

8. Boasa mandok mauliate si Paulus tu Debata tikki “diida” akka dongan i?

⁸ Didok di Bibel, “Dung diida si Paulus nasida, didok ibana ma mauliate tu Debata jala lam tamba ma pos ni rohana.” (Ul. 28:15) Holan mangida akka dongan i pe, nga las rohana. Nga ditanda ibana ra piga-piga sian nasida. Mandok mauliate do si Paulus tu Debata tikki diida akka dongan i. Ai diboto si Paulus do, tondi parbadia do na mangonjar roha ni nasida patuduhon holong i. (Gal. 5:22) Saonari on pe diurupi tondi parbadia do halak Kristen asa rela berkorban mangurupi akka dongan na susa.—1 Tes. 5:11, 14.

9. Boha do caratta maniru semangat ni akka dongan na di Rom?

⁹ Tondi parbadia do na mangonjar roha ni piga-piga halak di huria lao patuduhon burju ni roha. Rela do nasida paradehon akka na porlu tu pengawas wilayah, utusan injil, dohot tu akka pelayan sepenuh waktu, ala berkorban do nasida asa boi melayani Jahowa. Jadi pikkirhon ma, ‘Aha do na boi huulahon lao mendukung kunjungan pengawas wilayah? Boi do au mengundang nasida mangan manang menginap di jabunami? Boi do huatur jadwalhu asa rap marbarita dohot nasida?’ Pasti godang do pasu-pasu na tajalo molo taulahon i. Alana las do roha ni akka dongan na di Rom i tikki dibege nasida pengalaman na patoguhon sian si Paulus dohot akka donganna.—Ul. 15:3, 4.

“Sude do Halak Mangalo Sekte on” (Ul. 28:16-22)

10. Songon dia do dibahen tu si Paulus dung sahat ibana di Rom, jala aha do na diulahon ibana disi?

¹⁰ Ujungna, sahat ma rombongan ni si Paulus di Rom. “Diloas do disi tinggal si Paulus sahalakna dohot sahalak tentara na manjaga ibana.” (Ul. 28:16) Biasana diratte do tangan ni sahalak tahanan rumah asa unang lari, jala tarsambung do ratte i tu sahalak panjaga. Alai nang pe tarratte tangan ni si Paulus, tetap do ibana marbarita na uli. Dung tolu ari disi, dijou ma marpungu akka halak Jahudi na sangap, dipatandahon ma dirina, jala marbarita ma ibana.

11, 12. Boha do cara ni si Paulus tikki makkatai dohot halak Jahudi na di Rom?

¹¹ Didok si Paulus ma, “Hamu akka dongan, nang pe dang adong hualo bangsotta manang hasomalan ni akka omputta, alai dipenjarahon do au di Jerusalem jala dipasahat tu halak Rom. Dung dipareso, naeng dipalua halak Rom i ma au. Ai dang adong na sala ulaonku dapot ni nasida na mambahen au patut dihukum mate. Nang pe songon i, dialo halak Jahudi do keputusan i. Terpaksa ma naik banding au tu Kesar. Alai huulahon pe songon i, dang na lao mangaluhon bangsokku au disi.”—Ul. 28:17-19.

¹² Disapa si Paulus do halak Jahudi “akka dongan”. Jadi dilului si Paulus do persamaan dohot nasida, jala on boi mambolokkon pikkiran negatif taringot ibana. (1 Kor. 9:20) Asing ni i dipaboa ibana do tujuanna tu Rom, dang na lao mangaluhon bangsona, alai naeng naik banding do tu kesar. Alana dang dipaboa halak Jahudi na di Judea dope tu halak Jahudi na di Rom na lao naik banding si Paulus. (Ul. 28:21) Boasa boi songon i? Sada bukku referensi mandok, “Kapal ni si Paulus termasuk kapal na parjolo sahat di Italia dung musim dingin. Jadi dang sahat dope perwakilan ni halak Jahudi na di Jerusalem tu Rom, manang dang sahat dope surat sian nasida.”

13, 14. Boha do cara ni si Paulus tikki naeng mambahas Harajaon ni Debata, jala songon dia do hita maniru ibana?

¹³ Saonari, mulai ma dibahas si Paulus taringot Harajaon ni Debata. Asa penasaran akka halak na mambege i, didok ma, “Alani i do hupangido asa pajuppang jala makkatai au dohot hamu. Ai diratte pe au, holan alani sasahalak na dipaima-ima bangso Israel i do.” (Ul. 28:20) Na dipaima-ima bangso Israel, i ma Messias dohot Harajaonna, songon na dibaritahon halak Kristen. Ujungna didok sintua ni halak Jahudi ma, “Naeng dibege hami do songon dia pandapotmu. Ai huboto hami do, sude do halak mangalo sekte on manang didia pe.”—Ul. 28:22.

¹⁴ Tatiru ma cara ni si Paulus tikki marbarita. Tapaboa ma hatorangan manang sukkun-sukkun na mambahen halak tertarik mambege barita na tapasahat. Akka saran na denggan adong di bukku Bertukar Pikiran mengenai Ayat-Ayat Alkitab, Memperoleh Manfaat dari Pendidikan Sekolah Pelayanan Teokratis, dohot Cara Asa Lam Denggan Manjaha dohot Mangajari. Dipakke hamu do akka alat bantu on asa lam terampil marbarita dohot mangajari?

Tatiru ma si Paulus na ‘Takkas Patorakkon’ (Ul. 28:23-29)

15. Aha do opat hal na penting na boi taida sian hatorangan ni si Paulus i?

¹⁵ Ditottuhon nasida ma sada ari lao pajuppang dohot si Paulus, jala unggodang do muse halak Jahudi na ro tusi. “Mulai sian manogot sahat tu borngin, takkas ma dipatorang ibana tu nasida taringot tu Harajaon ni Debata. Dipatorang ibana ma i sian Patik ni si Musa dohot sian na Sinurat ni Akka Panurirang asa porsea nasida tu Jesus.” (Ul. 28:23) Adong opat hal na penting na boi taida sian hatorangan ni si Paulus i, jala gabe teladan do on tu hita. Na parjolo, taringot Harajaon ni Debata do na uppetting dipaboa ibana. Na paduahon, berupaya do si Paulus mambahen porsea halak na mambege i. Na patoluhon, dipakke do hatorangan sian Surat na Badia tikki makkata-hatai. Na paopatton, rela berkorban do ibana. Marbarita do ibana “mulai sian manogot sahat tu borngin”. Boha do hasilna? “Adong do na porsea”, alai na deba nai dang porsea. Ala gabe marsalisi do nasida, “ditadikkon” nasida ma inganan i.—Ul. 28:24, 25a.

16-18. Boasa dang pola tarsonggot si Paulus tu tanggapan ni halak Jahudi i, jala songon dia do hita boi maniru si Paulus molo ditolak barita na tapasahat?

¹⁶ Dang pola tarsonggot si Paulus tu tanggapan ni akka jolma i. Alana nga hea dijuppangi ibana halak sisongon i, jala nga disurirakkon Bibel hian taringot i. (Ul. 13:42-47; 18:5, 6; 19:8, 9) Alani i, didok ibana ma tu akka halak na naeng manadikkon ibana, “Sittong ma hata na didok tondi porbadia tu akka ompumuna marhite Panurirang Jesaya. Ai ninna do, ‘Lao ma ho jala dok ma tu bangso i, “Dibege hamu do nian, alai dang diattusi hamu lapatanna. Diida hamu do nian, alai dang diattusi hamu. Ai nungnga tutup be roha ni bangso on.”’” (Ul. 28:25b-27) Di terjemahan aslina, hata “tutup” digombarhon songon roha na “marhapal” manang na “ditutupi tabo-tabo”, alani i ma dang boi sahat barita na uli i tu roha ni nasida. (Ul. 28:27) Tung massai parah do i sebenarna!

¹⁷ Dang songon halak Jahudi na manolak barita i, anggo ‘akka bangso na asing ditangihon do’. (Ul. 28:28; Ps. 67:2; Jes. 11:10) Dipaboa si Paulus do i tu nasida, ala nungnga diida ibana godang halak sian bangso na asing manjalo barita na uli.—Ul. 13:48; 14:27.

¹⁸ Songon si Paulus, unang ma tersinggung hita molo ditolak barita na uli na tapasahat. Ai nungnga taboto holan saotik do halak na mardalan di dalan hangoluan i. (Mat. 7:13, 14) Jala molo adong halak na tulus rohana mangihutton ibadat na sittong, marlas ni roha ma hita menyambut nasida.—Luk. 15:7.

“Paboahon Taringot tu Harajaon ni Debata” (Ul. 28:30, 31)

19. Aha do na diulahon si Paulus saleleng gabe tahanan rumah?

¹⁹ Di ujung ni bukku Ulaon ni Apostel, disurat si Lukas ma, “Dua taon ma si Paulus tinggal di jabu na disewana i. Las do rohana manjalo sude halak na ro manjuppangi ibana. Barani do ibana paboahon taringot tu Harajaon ni Debata dohot mangajarhon taringot tu Tuan Jesus Kristus tu nasida. Jala dang adong biar ni rohana mangulahon i.” (Ul. 28:30, 31) Teladan na denggan do si Paulus tikki patuduhon burju ni roha, haporseaon, dohot semangat!

20, 21. Ise ma na mandapot manfaat sian pelayanan ni si Paulus di Rom?

²⁰ Las do roha ni si Paulus manjalo si Onesimus, sahalak budak na melarikan diri sian Kolosse. Diurupi si Paulus do ibana gabe halak Kristen. Gabe ‘dongan na setia jala na dihaholongi’ si Paulus ma ibana. Bahkan didok si Paulus do ibana songon ‘anakna’ jala si Paulus “songon amangna”. (Kol. 4:9; Plm. 10-12) Pasti dipatogu do roha ni si Paulus alani si Onesimus!a

²¹ Adong do muse na mandapot manfaat sian teladan ni si Paulus. Di suratna tu halak Pilippi, didok ibana do, “Gabe lam tarbarita do barita na uli alani na masa tu au. Ai sude do pengawal ni istana dohot halak na asing mamboto alani Kristus do au dipenjarahon. Jala ala na dipenjarahon i au, gabe lam togu do haporseaon ni godang donganta jala gabe lam barani do nasida paboahon hata ni Debata.”—Plp. 1:12-14.

22. Aha do na diulahon si Paulus selama gabe tahanan rumah di Rom?

²² Selama gabe tahanan rumah si Paulus di Rom, dibahen do akka surat na penting na gabe bagian sian Akka Bukku Junani Kristen.b Pasti godang do manfaat dapot ni halak Kristen di abad na parjolo sian akka surat i. Songon i ma nang hita, godang do manfaat na tadapot sian akka surat ni si Paulus, alana marguna dope i sahat tu saonari.—2 Tim. 3:16, 17.

23, 24. Songon dia do halak Kristen saonari maniru si Paulus nang pe dipenjarahon nasida?

²³ Ujungna dibebasson do si Paulus dung ditahan saleleng opat taon. Dua taon di Kaesarea, jala dua taon di Rom.c (Ul. 23:35; 24:27) Memang dang dipaboa taringot i di bukku Ulaon ni Apostel. Torus do semangat si Paulus. Dibahen ibana do segala cara lao melayani Debata. Saonari pe torus do semangat jala marlas ni roha naposo ni Jahowa marbarita, nang pe dipenjarahon nasida manang dibahen na so adil tu nasida alani haporseaonna. Contohna si Adolfo, dipenjarahon di Spanyol ala tetap netral. Sahalak petugas mandok tu ibana, “Heran do hami mangida ho. Dibahen hami do sengsara ngolum. Haccit do dibahen hami tu ho. Alai gabe lam tamba do semangatmu jala torus do ho ramah makkatai tu hami.”

²⁴ Di pudian ni ari, gabe dihaporseai do si Adolfo. Sappe olo do dipasombu tarbukka pintu ni selna, jala jotjot do panjaga ni penjara i ro manukkun taringot Bibel. Bahkan adong do sahalak panjaga ni penjara na ro tu sel ni si Adolfo manjaha Bibel. Jala gabe si Adolfo ma na manjaga ibana atik boha adong panjaga na asing na lewat. Gabe balik do, tahanan na gabe “manjaga”. Sai anggiat ma teladan ni donganta na setia songon si Adolfo, mambahen hita gabe lam ‘barani paboahon hata ni Debata’ nang pe borat situasina.

25, 26. Surirang na dia do na terjadi dang sappe 30 taon, jala songon dia do i masa saonari?

²⁵ Dipatogu do rohatta manjaha hata panutup ni bukku Ulaon ni Apostel. Nang pe gabe tahanan rumah Apostel Paulus, torus do ‘dipaboa ibana taringot Harajaon ni Debata’ tu sude halak na ro manjuppangi ibana. Di pasal na parjolo, nga tabahas dilehon Jesus do tugas tu akka siseanna. Didok do, “Molo dung ro tondi parbadia i tu hamu gabe margogo ma hamu. Paboaonmuna ma taringot tu au di Jerusalem, di sude luat na di Judea, di Samaria, sahat tu ujung ni tano on.” (Ul. 1:8) Dang sappe 30 taon dukkon i, nga dibaritahon be barita Harajaon i “tu sude toppaan na di tano on”.d (Kol. 1:23) On ma buktina diurupi tondi parbadia do nasida!—Sak. 4:6.

²⁶ Saonari on pe diurupi tondi parbadia ni Debata do akka anggi ni Jesus na di tano on. Rap kerja sama do nasida dohot akka ‘biru-biru na asing’, asa boi ‘paboahon barita Harajaon ni Debata’ di 240 negeri! (Joh. 10:16; Ul. 28:23) Dohot do hamu mendukung ulaon i?