Marpangkorhon do Hata ni Debata

1. Aha do na patuduhon na marpangkorhon do Hata ni Debata? (Ida gombar di mula ni parsiajaran.)

POS do roha ni naposo ni Jahowa ’na marngolu jala na marpangkorhon’ do hataNa. (Heb. 4:12) Tahilala do i di parngoluonta. Andorang so gabe Sitindangi Ni Jahowa adong do na hea gabe panangko, parnarkoba, manang mangulahon seks na so patut. Adong do muse na hea gabe halak na mamora jala sangap, alai tongtong dope ndang martujuan ngoluna. (Pjm. 2:3-11) Las do rohanta ala ujungna martujuan do ngolu ni nasida jala marpangkirimon. Di Joujou Paboahon, nunga tajaha angka pengalaman sisongon i di artikel ”Bibel Mambahen Denggan Ngolungku”. Alai nang pe nunga tardidi, ingkon tongtong do tapatogu paralealeonta tu Jahowa marhite Bibel.

2. Songon dia do Hata ni Debata marpangkorhon tu angka halak di abad na parjolo?

² Dung mananda hasintongan, godang do halak na mambahen hamubaon na balga. Songon na masa tu angka donganta di abad na parjolo na marpangkirimon tu surgo. (Jaha 1 Korint 6:9-11.) Tingki dipajojor si Paulus taringot pangalaho ni halak na so dohot manean Harajaon ni Debata, didok ibana do, ”Angka sisongon i do hamu deba najolo.” Aha do na mambahen nasida marhamubaon? Hata ni Debata dohot tondi parbadia. Alai, nang pe nunga gabe halak Kristen, adong do sian nasida na mangulahon dosa na balga na manegai paralealeonna tu Jahowa. Songon na masa tu donganta baoa na miniahan. Mangulahon dosa do ibana jala ingkon dipabali manang dipecat sian huria. Dung pigapiga leleng, marhamubaon do ibana jala dijalo ma muse di huria. (1 Kor. 5:1-5; 2 Kor. 2:5-8) Godang do angka donganta boi marhamubaon alani Hata ni Debata. Tontu dipatogu do haporseaonta mamboto on.

3. Aha do na laho taulas di parsiajaran on?

³ Dilehon Jahowa do Bibel tu hita jala marpangkorhon do i. Alani i, denggan ma i tapangke. (2 Tim. 2: 15) Di parsiajaran on taulas ma songon dia Bibel mangkorhon (1) di parngoluonta, (2) di ulaonta marbarita, jala (3) tu caranta mangajar di huria. Jala taulas ma songon dia hita patuduhon holong jala mandok mauliate tu Debata, na mangajarhon angka na denggan tu hita.​—Jes. 48:17.

DI PARNGOLUONTA

4. (a) Aha do na ingkon taulahon asa mangkorhon Hata ni Debata tu hita? (b) Di tingki sadihari do hamu manjaha Bibel?

⁴ Asa boi mangkorhon Hata ni Debata di parngoluonta, ingkon tajaha do Bibel ganup ari. (Jos. 1:8) Tutu, godang do ulaonta alai ingkon taharingkothon do manjaha Bibel. Unang ma alani tanggung jawab manang ulaon na asing, gabe sundat hita manjaha Bibel. (Jaha Epesus 5:15, 16.) Boi do tajaha Bibel tingki manogot, arian, manang tingki borngin. Gabe dos ma pangkilalaanta songon panurat psalmen na mandok, ”Mansai huhaholongi do patikmi, sai i do hupingkirpingkiri manipat ari.”​—Ps. 119:97.

5, 6. (a) Boasa ingkon tarimangi aha naung tajaha? (b) Songon dia do caranta mangarimangi? (c) Aha do laba na hea dihilala hamu ala manjaha jala mangarimangi Bibel?

⁵ Alai, ndang boi molo holan manjaha Bibel sambing. Ingkon bagas do tapingkiri jala tarimangi aha naung tajaha. (Ps. 1:1-3) Dung i, boi ma taulahon angka poda ni Bibel di parngoluonta. Lomo do rohanta asa boi Bibel paubahon ngolunta lam tu dengganna. Dos do pangkorhon ni na manjaha Bibel tercetak manang manjaha Bibel elektronik.

⁶ Songon dia do caranta mangarimangi? Tingki manjaha, paso ma satongkin jala sungkun ma di rohamuna, ”Sian panjahaion on, aha do na huboto taringot Jahowa? Hea do huulahon na tarsurat on? Adong do hamubaon na porlu hu bahen?” Molo tarimangi Hata ni Debata jala tatangiangkon aha naung tajaha gabe taronjar ma rohanta mangulahon i. Boi ma tahilala pangkorhon ni Bibel di ngolunta.​—2 Kor. 10:4, 5.

DI ULAONTA MARBARITA

7. Songon dia do caranta mamangke Bibel tingki marbarita?

⁷ Ringkot do jotjot mamangke Bibel tingki marbarita. Sahalak donganta baoa mandok, ”Umpamana ma jo, molo rap marbarita hita dohot Jahowa, ise do na mangkatai? Hita do manang Jahowa?” Tingki tajahahon Bibel tu sasahalak, dos do i songon Jahowa na mangkatai tu nasida. Molo denggan tapillit ayat, umbalga do pangkorhon ni i tu halak na tajumpangi sian hatanta sandiri. (1 Tes. 2:13) Tingki marbarita, olo do hita jotjot manjahahon Bibel tu angka halak?

8. Boasa ingkon tapatorang ayat na tajahahon tingki marbarita?

⁸ Unang ma holan tajahahon sambing. Songon na masa di abad na parjolo, ndang godang halak mangantusi na tarsurat i. (Rom 10:2) Alani i, tingki tajahahon Bibel, unang ma didok rohanta nunga diantusi parjabu na tajaha i. Alai taurupi ma nasida asa boi mangantusi. Carana? Jahahon ma muse hata manang kalimat na ringkot di ayat i. Dung i, patorang ma tu nasida. Molo taulahon on, boi ma Hata ni Debata hona tu roha dohot pingkiran ni nasida.​—Jaha Lukas 24:32.

9. Songon dia do hita boi mangurupi parjabu asa patuduhon pangargaion tu Bibel?

⁹ Hata na tadok andorang so manjahahon sada ayat, boi do mangurupi parjabu asa patuduhon pangargaion tu Bibel. Umpamana, boi do tadok, ”Taida ma aha na nidok ni Sitompa hita taringot on”. Manang tingki mangkatahatai tu na so Kristen boi do tadok, ”Taida ma aha na didok di Kitab Suci”, manang tingki pajumpang dohot halak na so pola mangkaringkothon agama boi do tadok, ”Hea do dibege hamu poda najolo na mandok songon on?” Ingot ma, marragam do haporseaon ni angka halak. Alani i, marsitutu ma hita mambahen las roha ni nasida tingki marbarita.​—1 Kor. 9:22, 23.

10. (a) Paboa ma pengalaman ni sahalak donganta baoa. (b) Paboa ma pengalamanmuna tingki mamangke Bibel di ulaon marbarita.

¹⁰ Sian pengalaman ni angka dongan, balga do pangkorhonna molo tajahahon Bibel tingki marbarita. Umpamana songon na masa tu sahalak donganta baoa. Saleleng martaontaon jotjot do ibana mangalehon sijahaon tu sahalak baoa naung matua. Alai sada tingki, andorang so mangalehon Joujou Paboahon dijahahon ibana ma 2 Korint 1: 3, 4. Ayat i mandok, ”Ama Parasiroha situtu jala Debata, Sipangapul na sumurung! Ai diapul do hami di bagasan saluhut haporsuhonnami.” Mansai hona do ayat on tu roha ni parjabu i. Jala disuru ma donganta i asa manjahahon ayat i muse. Dung i, dipaboa ma na porlu do ibana dohot tungganeboruna diapuli saonari. Alani ayat i gabe lomo ma rohana marsiajar Bibel. Tangkas ma, balga do pangkorhonna molo tapangke Bibel tingki marbarita!​—Ul. 19:20.

TU CARANTA MANGAJAR DI HURIA

11. Aha do tanggung jawab ni angka donganta baoa na mangajar di huria?

¹¹ Lomo do rohanta ro tu parpunguan manang tu kebaktian, ala i ma tingkina manomba Jahowa. Jala lomo do rohanta mandapot parsiajaran na denggan disi. Alani i, balga do tanggung jawab ni angka dongan na mandapot tugas laho mangajar. (Jak. 3:1) Ingkon marojahan tu Bibel do pangajarion ni nasida. Molo hamu mandapot tugas laho mangajar di huria, songon dia do bahenonmuna asa boi Hata ni Debata mangkorhon tu halak na ro?

12. Songon dia do sahalak parjamita mamangke Bibel tingki mangajar?

¹² Mansai ringkot do ayat ni Bibel tingki marjamita. (Joh. 7:16) Alani i, unang ma bahen gabe rumingkot pengalaman manang tudosan sian ayat ni Bibel. Mamangke Bibel tingki mangajar ndang dos songon na manjaha Bibel. Alani i, unang ma pagodanghu jaha ayatna, alana gabe lupa do annon halak. Denggan ma pillit angka ayat na laho pangkeonmuna. Jahahon ma i, patorang, bahen ma tudosan, jala paboa ma songon dia nasida boi mangulahon. (Neh. 8:8) Molo mamangke rangka do hamu marjamita, denggan ma parsiajari rangkana. Ida ma partalian ni sada ayat tu hatorangan na di rangka i. Dung i, pillit ma pigapiga ayat sian i laho patorangkon hatorangan na di rangka i. (Laho mamboto gumodang hatorangan ida ma parsiajaran 21 sahat tu 23 sian buku Memperoleh Manfaat dari Pendidikan Sekolah Pelayanan Teokratis.) Alai na rumingkot sian i, jalo ma pangurupion sian Jahowa laho pasahathon hataNa na sian Bibel.​—Jaha Esra 7:10; Poda 3:13, 14.

13. (a) Songon dia do sada ayat na dijahahon di parpunguan mangkorhon tu sahalak donganta borua? (b) Hea do dihilala hamu sisongon i? Paboa ma pengalamanmuna.

¹³ Parohahon ma na masa tu sahalak donganta borua di Australia. Tingki dakdanak godang do hasusaan na masa tu ibana. Nang pe nunga mananda Jahowa, alai ndang pos rohana na holong do roha ni Jahowa tu ibana.a Sada tingki di parpunguan, dibege ibana ma dijahahon sada ayat. Hona do i tu rohana, dirimangi ibana ma ayat i jala disulingkiti. Gabe pos ma rohana na holong do roha ni Jahowa tu ibana. Hea do dihilala hamu sisongon i tingki ro tu parpunguan manang kebaktian?​—Neh. 8:12.

14. Songon dia do hita patuduhon holong dohot pangargaion tu hata ni Jahowa.

¹⁴ Tontu mandok mauliate do hita ala nunga dilehon Jahowa hataNa tu hita, i ma Bibel. Marjanji do Ibana sai na hot do hataNa. Jala digohi Ibana do janjiNa i. (1 Ptr. 1:24, 25) Alani i, marsitutu ma hita manjaha Bibel ganup ari, mangulahon i di parngoluonta, jala tapangke ma i mangurupi halak asa boi marpangkorhon hata ni Debata di ngolu ni nasida. Molo taulahon on, patar ma holongta tu Jahowa. Jala on patuduhon pangargaionta tu Bibel, tarlumobi tu Pangarangna i ma Debata Jahowa.