Toktong ma Jaga asa Boi Menolak Godaan

1-2. (a) Sipasingot aha do na dilehon Jesus tu akka siseanna? (b) Boasa ditinggalhon akka sisean i Jesus? (Ida gambar.)

JESUS mandok, “Anggo roha i naeng do nian mangulahon na sittong, alai gale do daging i.” (Mat. 26:41b) Sian hatana i diattusi Jesus do jolma na so sempurna do hita jala pasti mambahen kesalahan. Alai dipasingot Jesus do hita asa unang terlalu percaya diri jala marpikkir pasti sai taulahon do na sittong. Piga-piga jom andorang so didok Jesus hatana i, didok akka siseanna do dang na lao tinggalhonon ni nasida Jesus. (Mat. 26:35) Lomo do roha ni akka sisean i mangulahon na sittong. Alai dang disadari nasida boi do hatop moru tekad ni nasida lao mangulahon na sittong tikki mangadopi situasi na borat. Alani i, dipasingot Jesus ma nasida, “Toktong ma hamu dungo jala sai martangiang, asa unang targoda rohamuna lao mangulahon dosa.”—Mat. 26:41a.

² Alai dang diulahon akka sisean i paretta ni Jesus. Tikki ditakkup Jesus, mabiar do nasida jala melarikan diri ala dang toktong jaga nasida. Dang ditepati nasida janji ni nasida i tu Jesus.—Mat. 26:56.

3. (a) Asa toktong hita setia tu Jahowa, boasa dang boi hita terlalu percaya diri? (b) Aha do na lao tabahas di artikel on?

³ Unang ma hita terlalu percaya diri jala marpikkir pasti sai taulahon do na sittong. Memang bertekad do hita asa unang mangulahon aha pe na dihasogohon Jahowa. Alai taingot ma, jolma na so sempurna dope hita jala mura targoda mangulahon na sala. (Rom 5:12; 7:​21-23) Asing ni i, olo do ro toppu godaan lao mangulahon na sala. Jadi asa toktong hita setia tu Jahowa dohot tu Jesus, ikkon taihutton do nasehat ni Jesus asa toktong jaga jala menolak godaan. On ma na lao tabahas di artikel on. Na parjolo, lao tabahas ma di situasi na songon dia do hita ikkon toktong jaga. Dung i, songon dia carana manjaga diritta asa unang targoda. Jala na parpudi, songon dia carana asa toktong jaga.

SADARI MA HAGALEONMUNA

4-5. Boasa ikkon manat hita asa unang taulahon kesalahan na so pola serius?

⁴ Adong do memang piga-piga kesalahan na so pola serius. Nang pe songon i, akka kesalahan i tong do boi mambahen gale hubungatta tu Jahowa jala ujungna mambahen hita mangulahon dosa na serius.

⁵ Sude hita boi do targoda mangulahon na sala. Alai, ganup hita marasing-asing do hagaleonna. Contohna, olo do sasahalak targoda mangulahon seks na so patut. Na asing targoda lao mangulahon ulaon na ramun songon masturbasi dohot mangida pornografi. Adong muse na mabiar tu halak, ginjang roha, jala mura-mura muruk. Songon na dipaboa si Jakobus, “Diuji do ganup halak ala ditarik jala dijorat sakkap-sakkapna sandiri.”—Jak. 1:14.

6. Aha do na ikkon tasadari?

⁶ Disadari hamu do hagaleonmuna? Unang ma taabaihon hagaleonta manang tarippu sanggup do hita menolak godaan. (1 Joh. 1:8) Ingot ma didok si Paulus haru “akka na ditogu-togu tondi parbadia” pe olo do targoda lao mangulahon dosa molo dang marjaga-jaga. (Gal. 6:1) Jadi ikkon jujur do hita tu diritta jala tasadari ma aha do hagaleonta.—2 Kor. 13:5.

7. Paboa ma contoh na patuduhon ikkon marsitutu hita mangatasi hagaleonta.

⁷ Molo nga tasadari adong situasi na mambahen hita targoda, aha do na porlu taulahon? Marsitutu ma menolak godaan i. Pikkirhon ma contoh on. Najolo bagian ni tembok kota na paling mura diserang, i ma gerbangna. Jadi ikkon dibahen do godang panjaga di gerbang lao manjaga kota i. Sarupa songon i ma, ikkon manat do hita jala marsitutu mangatasi hagaleonta, tarlumobi molo nga taboto adong situasi na mambahen hita targoda.—1 Kor. 9:27.

CARA MENOLAK GODAAN

8-9. Boasa doli-doli na dipaboa di Poda bindu 7 gabe mangulahon dosa na balga? (Poda 7:​8, 9, 13, 14, 21)

⁸ Boha do carana menolak godaan? Asa taboto alusna, taida ma jo sada cerita taringot sahalak doli-doli na disurat di Poda bindu 7. Ibana mangulahon seks na so patut dohot sahalak boru-boru na so hasea. Di ayat 22 didok, “Pittor diihutton ibana ma boru-boru i.” Alai molo taida di akka ayat na sebelumna, nungnga dibahen ibana piga-piga keputusan na so denggan, na ujungna mambahen ibana gabe mangulahon dosa.

⁹ Aha do haroa na diulahon doli-doli i sebelumna? Na parjolo, tikki botari ‘mamolus do ibana sian dalan na jonok tu jabu ni boru-boru na so hasea i’. Jala torus do ibana mandapotton jabuna. (Jaha Poda 7:​8, 9.) Dung i, tikki diida ibana borua i, dang pittor lao ibana. Gariada olo do ibana diumma borua i. Jala, dibege ibana do borua i mandok nungnga dilehon borua i pelean pardamean. Bisa jadi lomo do roha ni borua i asa doli-doli i marpikkir borua na burju do ibana. (Jaha Poda 7:​13, 14, 21.) Sasittongna molo dang songon i hian keputusan ni doli-doli i, pasti ummura do ibana menolak godaan jala dang mangulahon dosa.

10. Songon dia do sasahalak boi mambahen kesalahan na sarupa songon doli-doli i?

¹⁰ Sian ilustrasi na dibahen si Salomo on, taboto ma boi do on masa tu sude naposo ni Jahowa. Halak na mangulahon dosa na balga olo do merasa ala na toppu ro godaan umbahen na diulahon ibana dosa i. Alai molo dirimangi ibana muse na terjadi, sasittongna mardosa pe ibana ala nungnga dibahen ibana piga-piga keputusan na so denggan sebelumna. Misalna dipillit ibana do ra dongan na so makkaholongi Jahowa, manang lao tu tempat na so denggan. Asing ni i, dipillit ibana do ra situs web manang hiburan na so pantas di halak Kristen. Olo do ra dang martangiang be ibana tu Jahowa, dang manjaha Bibel, marpungu, manang marbarita. Songon doli-doli na dibahas di bukku Poda i, mardosa pe ibana ala nungnga dibahen ibana piga-piga keputusan na so denggan sebelumna.

11. Aha do na ikkon taulahon asa unang mangulahon dosa?

¹¹ Aha do parsiajaranna tu hita? Memang ikkon berupaya do hita asa unang mangulahon dosa. Alai, ikkon berupaya do tong hita asa unang taulahon akka ulaon na ujungna boi mambahen hita mangulahon dosa. On ma na dipatakkas si Salomo dukkon paboahon aha na masa tu doli-doli dohot boru-boru na so hasea i. Didok ibana, “Unang ma ihutton akka lakkana.” (Poda 7:25) Taringot tu borua i, didok si Salomo do muse, “Padao ma dirim sian ibana, unang ma pajonok tu pintu ni jabuna”. (Poda 5:​3, 8) Asa unang taulahon dosa, ikkon tahindari do akka ulaon dohot situasi na ujungna mambahen hita mangulahon dosa, bahkan nang pe ulaon i dang sala diulahon halak Kristen.a—Mat. 5:​29, 30.

12. Aha do tekad ni si Job, jala songon dia do i mangurupi ibana lao menolak godaan? (Job 31:1)

¹² Ikkon tegas jala balga do tekadta asa unang mangulahon dosa. On ma na diulahon si Job. Dibahen ibana do ‘parjanjian tu matana’ asa unang dipanotnoti ibana borua na asing huhut marsakkap na so denggan. (Jaha Job 31:1.) Ala dibahen ibana tekad sisongon i, gabe diurupi ma ibana asa unang mangalakkup. Songon i ma hita, tabahen ma tekad na sarupa asa boi tatolak godaan manang aha pe.

13. Boasa ikkon tajaga pikkiranta? (Ida gambar.)

¹³ Asing ni i, ikkon tajaga do pikkiranta. (2 Mus. 20:17) Adong do halak na mandok dang pola boha mambayakkon diri ni nasida mangulahon na sala saleleng dang diulahon nasida i. Alai sala do cara marpikkir sisongon i. Alana, molo torus sasahalak mamikkirhon na sala, lam leleng gabe lomo ma rohana mangulahon i. Akibatna, gabe maol ma ibana menolak godaan. Memang, olo do toppu ro pikkiran na sala. Alai molo masa sisongon i, pittor hatop ma i tapasiding jala tapikkirhon ma akka na denggan. Hasilna, terlindung ma hita jala dang taulahon dosa na balga.—Plp. 4:8; Kol. 3:2; Jak. 1:​13-15.

14. Aha do muse na boi taulahon asa unang targoda?

¹⁴ Aha do muse na boi taulahon asa unang targoda? Ikkon tapapos do rohatta sai bermanfaat do molo taoloi paretta ni Jahowa. Olo do sipata dang sai sadalan cara marpikkir dohot perasaanta tu lomo ni roha ni Jahowa. Alai molo marsitutu hita mangulahon na dihalomohon Jahowa, gabe las ma rohatta.

15. Aha do manfaatna molo torus tapikkirhon akka na sittong?

¹⁵ Ikkon tapikkirhon do akka na sittong. Marsiajar ma hita ‘makkasogohon na jahat jala makkaholongi na denggan’. Hasilna, gabe lam balga ma tekadta lao mangulahon na sittong, jala boi ma tapasiding situasi na mambahen hita mangulahon dosa. (Am. 5:15) Jala molo tapikkirhon akka na sittong, boi ma tatolak godaan na toppu ro di tikki na so tarduga.

16. Aha do manfaatna molo taulahon akka kegiatan na mambahen lam balga holongta tu Jahowa? (Ida gambar.)

¹⁶ Boha do carana asa torus tapikkirhon akka na sittong? Taulahon ma akka kegiatan na boi mambahen lam balga holongta tu Jahowa. Misalna, molo marpungu hita jala marbarita, gabe lam balga ma tekadta lao pasonakkon Jahowa jala dang mura targoda hita lao mangulahon dosa. (Mat. 28:​19, 20; Heb. 10:​24, 25) Asing ni i, molo tajaha Bibel jala tarimangi isina, gabe lam balga ma holongta tu akka na denggan jala lam tahasogohon ma na jahat. (Jos. 1:8; Ps. 1:​2, 3; 119:​97, 101) Jala ingot ma na didok Jesus tu akka siseanna, ‘Sai martangiang ma hamu, asa unang targoda rohamuna lao mangulahon dosa.’ (Mat. 26:41) Jadi molo tabahen tikki lao martangiang tu Bapakta, gabe talehon do kesempatan di Ibana lao mangurupi hita jala lam balga ma tekadta lao pasonakkon Ibana.—Jak. 4:8.

TOKTONG MA JAGA

17. Aha do hagaleon ni si Petrus?

¹⁷ Olo do ra tahilala nungnga marhasil hita mangatasi piga-piga hagaleonta. Alai mungkin porlu dope tikki di hita lao mangatasi hagaleon na asing. On ma na masa tu Apostel Petrus. Mabiar do ibana tu jolma. Buktina disoadahon ibana do Jesus sappe tolu hali. (Mat. 26:​69-75) Bisa jadi didok roha ni si Petrus, nungnga marhasil ibana mangatasi hagaleonna i. Alana di pudian ni ari, barani do ibana marbarita taringot tu Jesus di jolo ni Sanhedrin. (Ul. 5:​27-29) Alai piga-piga taon dukkon i, dang olo be ibana rap mangan dohot akka dongan sian bangso na asing ala “mabiar ibana tu akka halak Jahudi”. (Gal. 2:​11, 12) Hape mabiar dope si Petrus tu jolma. Jadi dang marhasil dope ibana mangatasi hagaleonna i.

18. Aha do na porlu tasadari taringot hagaleonta?

¹⁸ Songon si Petrus, olo do ra ikkon torus hita berjuang lao mangatasi hagaleonta. Misalna, sahalak donganta bawa mandok, “Nungnga sappulu taon au dang be manonton pornografi. Jadi huhilala nungnga marhasil au mangatasi hagaleokki. Alai di piga-piga situasi, olo do au targoda lao manonton i muse”. Tuani ma dang menyerah donganta on. Disadari ibana do ikkon berjuang do ibana ganup ari lao mangatasi hagaleonna i. Bisa jadi ikkon diulahon ibana do songon i saleleng mangolu dope ibana di portibi na jahat on. Saonari, diurupi istrina dohot akka sintua do ibana asa unang be manonton pornografi.

19. Aha do na boi taulahon molo adong hagaleonta na so marhasil dope taatasi?

¹⁹ Jadi aha do na ikkon taulahon lao mangatasi hagaleonta? Taihutton ma nasehat ni Jesus, “Toktong ma dungo.” Adong do ra tikkina tahilala hira naung marhasil hita mangatasi hagaleonta. Alai nang pe songon i, toktong ma tahindari akka situasi na boi mambahen hita targoda. (1 Kor. 10:12) Toktong ma taulahon akka cara na tabahen saleleng on lao mangatasi hagaleonta. Poda 28:14 mandok, “Marlas ni roha ma halak na sai manjaga pangalahona.”—2 Ptr. 3:14.

PASU-PASU NA LAO TADAPOT

20-21. (a) Pasu-pasu aha do na tadapot molo marsitutu hita menolak godaan? (b) Molo taulahon bagianta, aha do na dilehon Jahowa tu hita? (2 Korint 4:7)

²⁰ Pos ma rohatta dang marisuang upayatta lao menolak godaan. Taingot ma tikki taulahon dosa, holan ‘satokkin do hasonangan’ na tahilala. Alai molo taihutton paretta ni Jahowa, gabe las ma rohatta. (Heb. 11:25; Ps. 19:8) Boasa? Ala ditoppa Jahowa do hita lao mangihutton akka parettana. (1 Mus. 1:27) Jadi molo tabahen las roha ni Jahowa, gabe marlas ni roha ma hita ala ias panggora ni rohatta jala boi mangolu salelengna.—1 Tim. 6:12; 2 Tim. 1:3; Jud. 20, 21.

²¹ Gale do memang daging i. Alai dang berarti dang boi tabahen manang aha lao mangatasi hagaleonta. Rade do Jahowa mangalehon gogo na tahaporluhon. (Jaha 2 Korint 4:7.) Ingot ma gogo na dilehon Jahowa, i ma gogo na lobi sian gogo ni sahalak jolma. Alai parjolo sahali, ikkon taulahon do nasa tolapta lao menolak godaan. Molo nungnga taulahon bagianta, pos ma rohatta dialusi Jahowa do tangiangta jala lehononna do gogo na tahaporluhon. (1 Kor. 10:13) Marhite bantuan ni Jahowa, boi ma marhasil hita menolak godaan.