Kotak na Gelleng na Marisi Akka na Patoguhon Haporseaon

Saonari nga unggodang be akka sijahaon versi elektonik dohot akka video na didapot Saksi Jahowa. Alai godang dope akka donganta di liat portibi on, na so mampu manuhor paket Internet, na deba adong do na tinggal di inganan na maol sinyal Internetna. Na deba, adong do na tinggal di inganan na jotjot mago sinyal Internetna. Na deba na i, adong do na lambat sinyal Internetna, manang dang adong Internet di inganan ni nasida.

Nang pe songon i, godang do akka donganta na boi man-download akka sijahaon versi elektronik dohot akka video nang pe dang adong Internet! Songon dia carana?

JW Box, i ma sada alat na gelleng na diparade tu akka huria na terbatas jaringan Internetna. Isi ni JW Box i, i ma alat router na dituhor sian perusahaan luar, jala programna dibahen Departemen Komputer di Betel, dohot publikasi elektronik nang video na adong di jw.org. Arga ni sada JW Box i, hira-hira sajuta lobi (75 dolar AS).

Tikki di Bale Harajaon disambukkon akka dongan ma HP-na be tu wifi ni JW Box, gabe boi ma nasida man-dowload akka publikasi dohot akka video na adong di JW Box i. Nang pe HP ni nasida HP naung leleng manang HP na mura, boi do tersambung HP ni nasida i tu JW Box. Alai boha molo maol sinyal Internet di huria i, songon dia asa adong akka publikasi dohot video na terbaru di JW Box i? Dipamasuk kantor cabang ma akka konten na terbaru na adong di jw.org tu bagasan sada flashdisk. Dung i, dikirim ma flashdisk i tu akka huria. Sada flashdisk, argana hira-hira 50.000 rupiah (4 dolar AS). Dung i, dipamasuk ma flashdisk i tu JW Box. Gabe adong ma akka konten na terbaru na adong di jw.org di bagasan JW Box i.

Songon dia do JW Box i marguna tu akka donganta? Si Nathan Adruandra, sahalak ama na tinggal di Republik Demokratik Kongo, mandok, “Sappe leleng do au mancoba man-download drama Tu Ho do Ahu Marhaposan Ale Jahowa dohot Ingot ma Nioli ni si Lot. Alai dang hea marhasil, gabe marsak ma au. Alai saonari nga boi be hu-download akka video tu HP-ku, jala on boi mangurupi hami lam denggan mangajari ianakkonnami.”

Sahalak donganta na mangurupi akka huria di Nigeria na mangoperasihon JW Box mandok, “Didok akka dongan do, molo JW Box on sada hadiah sian Jahowa. Las hian do roha ni nasida ala nga mura saonari nasida lao man-download akka publikasi dohot video sian Akka Alat Lao Mangajari.”

Lobi sian 1.700 JW Box nungnga dikirim tu akka donganta na di Afrika, Oseania dohot na di Amerika Selatan. Jala rencanana, lao dikirim do on muse tu akka huria na asing. Sian dia do biaya lao mambahen on sude? Sian akka sumbangan na dilehon sian liat portibi on. Jala godang do sumbangan i na dilehon marhite donate.jw.org. Mauliate ma tu sude akka sumbanganmuna i.