Haporseaon​—Parange na Mambahen Hita Togu

HAPORSEAON boi mambahen hita margogo. Umpamana, nang pe Sibolis sai manegai parale-aleonta tu Jahowa, haporseaon boi mangurupi hita asa “pamatehon api na sian panah ni Sibolis”. (Eps. 6:16) Marhite haporseaon, boi do hita mangadopi hasusaan na mansai balga na dipatudos songon dolok. Didok Jesus tu angka siseanna, “Molo adong haporseaonmu nasa batu ni siarum, boi do dohononmu tu dolok on, ‘Pinda ma ho tusan,’ pinda do i.” (Mat. 17:20) Ala haporseaon boi patoguhon parale-aleonta tu Jahowa, ingkon tapingkirhon do angka sungkun-sungkun on: Aha do lapatan ni haporseaon? Aha do pengaruhna tu haporseaonta molo taargai hasintongan? Songon dia hita boi patoguhon haporseaonta? Jala tu ise do hita ingkon marhaporseaon?​—Rom 4:3.

AHA DO LAPATAN NI HAPORSEAON?

Haporseaon i, ndang holan porsea manang mamboto aha na didok Bibel. Alana “suru-suruan na jahat pe porsea do [adong Debata] jala mabiar”. (Jak. 2:19) Molo songon i, aha do haporseaon i?

Bibel paboahon, adong dua bagian taringot haporseaon. Na parjolo, “haporseaon, i ma pos ni roha na togu na ingkon saut do na tahirim i”. (Heb. 11:1a) Molo marhaporseaon hamu, pos ma rohamuna na laho saut do sude janji ni Jahowa. Umpamana, didok Jahowa tu halak Israel, “Tung sura mansohot bahenonmuna aturan na hubahen i taringot tu arian dohot taringot tu borngin, gabe ndang be masa arian dohot borngin di tingkina be. Mansadi ma dohot padanhu tu si Daud naposongki.” (Jer. 33:20, 21) Hea do hamu mabiar ndang binsar mata ni ari jala ndang adong be arian dohot borngin? Tontu porsea do hamu tu hukum alam na mangatur asa tongtong adong arian dohot borngin jala tano on tongtong mangkaliangi mataniari. Suang songon i ma, ingkon porsea do hita na laho saut do sude janji na dipaboa Debata Sitompa hukum alam i.​—Jes. 55:10, 11; Mat. 5:18.

Na paduahon, haporseaon i ma “na patuduhon na tutu do na tahaporseai i nang pe ndang tarida”. Haporseaon i didok do, “na patuduhon” manang “bukti na paposhon roha” tu angka na so boi taida alai tahaporseai. (Heb. 11:1b; surat na di toru.) Aha ma contohna? Molo disungkun dakdanak hamu, ‘Sian dia diboto hamu na adong udara?’ Nang pe ndang hea taida udara, boi do dipaboa hamu bukti tu dakdanak i na adong do udara i. Contohna, tingki marhosa, tingki mangullus alogo dohot na asing. Tontu, gabe porsea do dakdanak i na adong udara nang pe ndang diida ibana. Suang songon i ma, haporseaon i tubu ala adong bukti na tangkas.​—Rom 1:20.

MANGARGAI HASINTONGAN

Haporseaon i tubu ala adong bukti na tangkas. Alani i, ingkon parjolo do tadapot “parbinotoan na bagas taringot tu hasintongan”. (1 Tim. 2:4) Alai ndang sae holan i. Apostel Paulus mandok, “Ingkon patuduhononna do haporseaon na sian roha.” (Rom 10:10) Halak na marhaporseaon, ndang holan porsea tu hasintongan. Alai diargai ibana do i. On ma na boi mangonjar rohana laho patuduhon haporseaon marhite parniulaonna. (Jak. 2:20) Halak na so mangargai hasintongan, ndang porsea nang pe adong bukti na tangkas. Jala marsidalian do ibana asa boi mangulahon na sala. (2 Ptr. 3:3, 4; Jud. 18) I do alana, najolo ndang sude halak na mangida mukjizat patuduhon haporseaon. (4 Mus. 14:11; Joh. 12:37) Tondi parbadia, holan mangurupi halak na mangargai hasintongan asa boi marhaporseaon.​—Gal. 5:22; 2 Tes. 2:10, 11.

HAPORSEAON NI SI DAUD NA TOGU

Sada contoh na denggan taringot haporseaon, i ma Raja Daud. (Heb. 11:32, 33) Alai, ndang sude halak di keluargana patuduhon haporseaon. Umpamana, si Eliab abang ni si Daud siangkangan. Leas do rohana mangida si Daud tingki naeng mangalo si Goliat. (1 Sam. 17:26-28) Haporseaon ni sasahalak ndang diboan sian tubu jala ndang warisan sian natua-tua. Alani i, boi do si Daud marhaporseaon ala togu parale-aleonna tu Debata.

Di Psalmen 27, dipaboa si Daud boasa boi togu haporseaonna. (Ayat 1) Dirimangi si Daud do pengalamanna jala songon dia Jahowa mangurupi ibana mangadopi angka musuna. (Ayat 2, 3) Diargai ibana do ibadat tu Jahowa. (Ayat 4) Lomo do roha ni si Daud manomba Jahowa rap dohot dongan sahaporseaon di bagas joro. (Ayat 6) Ringgas do ibana martangiang tu Jahowa. (Ayat 7, 8) Jala lomo do roha ni si Daud mangihuthon poda sian Debata. (Ayat 11) Ringkot do di si Daud haporseaonna. Alani i didok do, ndang mararga ngoluna molo ndang adong haporseaonna.​—Ayat 13.

SONGON DIA HAMU PATOGUHON HAPORSEAON

Boi do togu haporseaonmuna molo ditiru hamu pingkiran dohot hasomalan ni si Daud na disurat di Psalmen 27. Sian parbinotoan na bagas do boi adong haporseaon. Alani i, molo lam jotjot hamu mamparsiajari Bibel dohot angka publikasinta, gabe lam mura ma hamu patuduhon haporseaon. On ma sada parange sian parbue ni tondi. (Ps. 1:2, 3) Manat ma rimangi aha na diparsiajari hamu. Molo diulahon hamu i, lam diargai hamu ma Jahowa. Jala on boi mangonjar rohanta patuduhon haporseaon marhite ringgas di parpunguan dohot marbarita na uli. (Heb. 10:23-25) Hita pe boi do patuduhon haporseaon molo “martangiang jala unang marnaloja”. (Luk. 18:1-8) Alani i, “sai martangiang ma hamu” tu Jahowa, jala pos ma rohamuna na “disarihon do hamu”. (1 Tes. 5:17; 1 Ptr. 5:7) Haporseaon boi mangonjar rohanta mangulahon na denggan. Jala molo taulahon i, gabe lam togu ma haporseaonta.​—Jak. 2:22.

PATUDU MA HAPORSEAON TU JESUS

Di borngin andorang so mate Jesus, didok ibana tu angka siseanna, “Porsea ma hamu tu Debata jala porsea ma hamu tu ahu.” (Joh. 14:1) Alani i, ndang holan tu Jahowa hita patuduhon haporseaon, dohot do tu Jesus. Songon dia hita boi patuduhon haporseaon tu Jesus? Taulas ma tolu carana.

Na parjolo, pingkirhon ma molo tobusan i sada silehon-lehon sian Debata tu hamu. Apostel Paulus mandok, “Mangihuthon haporseaonku tu Anak ni Debata i nama ahu mangolu, i ma na mangkaholongi ahu jala na mangalehon ngoluna humongkop ahu.” (Gal. 2:20) Molo dipatudu hamu haporseaon tu Jesus, gabe pos ma rohamu na marlangku do tobusan i tu hamu. Marhite i, gabe disesa ma dosamuna, adong pangkirimon mangolu salelengna, jala on ma tandana na mansai holong do roha ni Debata tu hamu. (Rom 8:32, 38, 39; Eps. 1:7) Molo songon i do na dihilala hamu, gabe boi ma dipasiding hamu angka pingkiran na so denggan.​—2 Tes. 2:16, 17.

Na paduahon, pajonok ma tu Jahowa marhite tangiang. Alani tobusan ni Jesus, “pos ma rohanta martangiang tu [Jahowa]. Dung i tahilala ma asi ni rohana dohot haburjuonna na mangurupi hita di tingki na tahaporluhon”. (Heb. 4:15, 16; 10:19-22) Molo tongtong hita martangiang, boi ma hita ndang tarela-ela mangulahon dosa.​—Luk. 22:40.

Na patoluhon, oloi ma Jesus. Didok apostel Johannes, “Manang ise na patuduhon haporseaon tu Anak i, dapotna do hangoluan na saleleng ni lelengna. Manang ise na so mangoloi Anak i, ndang dapotna hangoluan alai tongtong ma marrimas Debata tu ibana.” (Joh. 3:36) Parrohahon ma, dipaimbar si Johannes do patuduhon haporseaon dohot ndang mangoloi. Alani i, boi do hamu patuduhon haporseaon tu Jesus molo dioloi hamu ibana. Asing ni i, taihuthon ma “patik ni Kristus”, i ma sude na diajarhon dohot na diparentahon ibana. (Gal. 6:2) Boi do hamu muse mangoloi Jesus molo diihuthon hamu tudu-tudu na diparade marhite “naposo haposan jala na marbisuk”. (Mat. 24:45) Molo dioloi hamu Jesus, boi ma lam togu hamu mangadopi angka hasusaan na songon badai.​—Luk. 6:47, 48.

“PATOGU HAMU MA HAPORSEAONMUNA NA BADIA I”

Hea do sahalak baoa marsurak tu Jesus. Didok, “Porsea do ahu! Urupi ma ahu na hurang porsea on!” (Mrk. 9:24) Adong do haporseaon ni baoa i. Alai ala serep rohana, diboto ibana porlu do dipatogu haporseaonna. Songon baoa i, sipata di piga-piga situasi, ingkon tapatogu do haporseaonta. Alani i, ingkon sian saonari do i taulahon. Songon na taulas nangkin, hita boi patoguhon haporseaon marhite mamparsiajari Bibel jala mangarimangi i. On pe boi do mambahen hita lam mangargai Jahowa. Asing ni i, tasomba ma Jahowa rap dohot angka dongan, marbarita jala ringgas martangiang. Alai na rumingkot, molo togu haporseaonta tadapot ma pasu-pasu na balga. Bibel mandok, “Angka dongan na hinaholongan, patogu hamu ma haporseaonmuna na badia i . . . asa tongtong hamu di bagasan holong ni roha ni Debata.”​—Jud. 20, 21.