Marsiajar Bibel dohot Saksi Jahowa mangurupi hamu mangattusi hasittongan. Gabe boi ma hamu jonok tu Debata. Diboto hamu ma janjina tu ari na naeng ro, i ma mambahen tano on gabe paradeiso marhite Harajaon ni Debata. Nungnga diulahon hamu be akka prinsip ni Bibel. Jala dihilala hamu do godang pasu-pasu ala nungnga mardongan dohot akka dongan di huria. Jala nungnga lam diattusi hamu songon dia Jahowa mangurupi naposona saonari.​—Sak. 8:23.

Asa rade hamu lao tardidi, porlu do akka sintua mangulas dasar ni haporseaon ni halak Kristen rap dohot hamu. (Heb. 6:1-3) Sai anggiat ma dipasu-pasu Jahowa upayamuna lao mananda Ibana. Jala sai anggiat ma dilehon Ibana pasu-pasu naung dijanjihonna i.​—Joh. 17:3.

1. Boasa lomo rohamuna tardidi?

2. Ise do Jahowa?

   • “Jahowa do Debata na sittong di langit dohot di tano on. Dang adong na songon Ibana.”​—5 Mus. 4:39.

   • “Ho do na margoar Jahowa, holan Ho do Natumimbul di saluhut tano on.”​—Ps. 83:18.

3. Boasa ikkon tajou goar ni Debata?

   • “Songon on ma hamu martangiang: ‘Ale Amanami na di banua ginjang, sai dipabadia ma goarmu.’”​—Mat. 6:9.

   • “Malua do ganup halak na manjou goar ni Debata, i ma Jahowa.”​—Rom 10:13.

4. Songon dia do Jahowa digombarhon di Bibel?

   • “Debata na toktong adong sahat tu saleleng ni lelengna do Jahowa Sitoppa saluhut na di tano on.”​—Jes. 40:28.

   • “Ale Amanami na di banua ginjang.”​—Mat. 6:9.

   • “Holong do Debata.”​—1 Joh. 4:8.

5. Aha do na ikkon lehononmu tu Jahowa?

   • “Ikkon haholonganmu do Jahowa Debatamuna sian nasa rohamuna, sian nasa ngolumuna, sian nasa pikkiranmuna, dohot sian nasa gogomuna.”​—Mrk. 12:30.

   • “Jahowa Debatam do na ikkon sombaonmu jala ikkon holan tu Ibana do lehononmu ngolum.”​—Luk. 4:8.

6. Boasa olo hamu setia tu Jahowa?

   • “Ale anakku, marbisuk ma ho jala bahen ma las rohakku, asa boi hualusi manang ise na mangarehei au.”​—Poda 27:11.

7. Tu ise do hamu martangiang, jala di bagasan goar ni ise do dipasahat hamu tangiangmuna?

   • “Tutu do na hudok on tu hamu, molo dipangido hamu manang aha tu Damang i di bagasan goarhu, lehononna do i tu hamu.”​—Joh. 16:23.

8. Akka aha do na boi ditangiakkon hamu?

   • “Songon on ma hamu martangiang: ‘Ale Amanami na di banua ginjang, sai dipabadia ma goarmu. Sai ro ma Harajaonmu. Sai saut ma lomo ni roham di tano on songon na di banua ginjang. Lehon ma di hami sipanganon sadari on. Sesa ma dosanami songon hami naung manesa dosa ni halak na mardosa tu hami. Urupi ma hami asa unang targoda jala palua ma hami sian Sibolis.’”​—Mat. 6:9-13.

   • “On do pos ni rohatta tu Debata: Manang aha na tapangido sesuai tu lomo ni rohana, tangihononna do hita.”​—1 Joh. 5:14.

9. Boasa adong tangiang na so ditangihon Jahowa?

   • “Tikki i, jou-jou ma nasida tu Jahowa mangido asa diurupi, alai dang alusanna nasida . . . Ai akka na jahat do diulahon nasida.”​—Mik. 3:4.

   • “Diparrohahon Jahowa do halak na mangulahon na sittong jala ditangihon do pangidoan ni nasida. Alai sogo do roha ni Jahowa tu akka halak na mangulahon na jahat.”​—1 Ptr. 3:12.

10. Ise do Jesus Kristus?

    • “Dialusi si Simon Petrus ma, ‘Kristus i do ho, Anak ni Debata na mangolu i.’”​—Mat. 16:16.

11. Boasa ro Jesus tu tano on?

    • “Songon Anak ni jolma i, dang na lao dihobasi ibana umbahen na ro. Alai ro do ibana lao marhobas tu na asing jala mangalehon ngoluna lao manobus godang jolma.”​—Mat. 20:28.

    • “Di akka kota na asing pe ikkon baritahonokku do barita na uli taringot tu Harajaon ni Debata, ai alani i do au disuru.”​—Luk. 4:43.

12. Songon dia hamu patuduhon na diargai hamu do tobusan ni Jesus?

    • “Mate do ibana humokkop sude jolma. Alani i dang mangolu tu dirina sandiri be sude jolma, alai mangolu tu Kristus naung mate jala naung dipahehe i do.”​—2 Kor. 5:15.

13. Huaso aha do naung dilehon tu Jesus?

    • “Nungnga dipasahat tu au saluhut huaso na di banua ginjang dohot na di tano on.”​—Mat. 28:18.

    • “Dilehon [Debata] do tu ibana inganan na untimbo sian ingananna hian. Jala dilehon do tu ibana goar na ussangap sian sude goar.”​—Plp. 2:9.

14. Porsea do hamu molo Punguan na Mangaradoti Organisasi ni Saksi Jahowa do “naposo haposan jala na marbisuk” na dilantik Jesus?

    • “Ise do sasittongna naposo haposan jala na marbisuk, na pinillit ni tuanna lao mangaradoti akka naposona na asing, na mangalehon nasida mangan di tikkina?”​—Mat. 24:45.

15. Aha do tondi parbadia i?

    • “Dialusi suru-suruan i ma ibana, ‘Na lao songgop ma tondi parbadia tu ho jala huaso ni Debata ma na mangalinggomi ho. Alani i, badia ma dakdanak i jala na lao didok ma ibana Anak ni Debata.’”​—Luk. 1:35.

    • “Alani i, gari hamu nang pe jahat diboto hamu do mangalehon na denggan tu anakkonmuna. Tarlumobi ma Ama na di banua ginjang i, lehononna do tondi parbadia tu halak na mangido tu Ibana!”​—Luk. 11:13.

16. Songon dia do Jahowa mamakke tondi parbadiana?

    • “Marhite hata ni Jahowa, ditoppa Ibana do langit, jala marhite hosana, dibahen Ibana do sude na adong disi.”​—Ps. 33:6.

    • “Molo dung ro tondi parbadia i tu hamu gabe margogo ma hamu. Paboaonmuna ma taringot tu au . . . sahat tu ujung ni tano on.”​—Ul. 1:8.

    • “Dang adong na dipaboa Debata di Surat na Badia i na ro sian pikkiran ni jolma. Ai dang hea na nidok ni Debata ro sian lomo ni roha ni jolma. Alai sian Debata do ro na nidok ni nasida marhite panogu-noguon ni tondi parbadia.”​—2 Ptr. 1:20, 21.

17. Aha do Harajaon ni Debata i?

    • “Pajongjongon ni Debata na di surgo i ma sada harajaon na so boi dihancurhon. Dang na lao pasahatonna harajaon i tu bangso na dia pe. Alai na lao dihancurhon jala diropukkon harajaon i do sude harajaon na parjolo i. Jala hot do harajaon i saleleng ni lelengna.”​—Dan. 2:44.

18. Pasu-pasu aha do na tahilala di Harajaon ni Debata?

    • “Apusan ni Debata ma nasa ilu-ilu sian mata ni nasida. Dang adong be hamatean nang arsak ni roha, nang angguk-angguk, nang na haccit, dang disi be. Ai nungnga salpu na parjolo i.”​—Pgk. 21:4.

19. Boasa pos rohamuna na lao ro nama Harajaon ni Debata i tu tano on satokkin nai?

    • “Ro ma akka siseanna mandapotton ibana. Tikki i, dang adong be halak na asing disi. Disukkun nasida ma Jesus, ‘Andigan do masa akka i? Jala aha do tanda ni harorom dohot tanda ni panutup ni jaman on?’ Dialusi Jesus ma nasida, ‘. . . Marporang ma bangso tu bangso jala harajaon tu harajaon. Masa ma haraparon dohot gempa di godang inganan. Jala dibaritahon ma barita na uli taringot tu Harajaon i di liat portibi on, asa saluhut bangso mambege barita i. Dung masa i ro ma ujungna.’”​—Mat. 24:3, 4, 7, 14.

    • “Na ro ma tikki hasusaan di ari parpudi. Ai makkaholongi dirina sandiri ma jolma, holongan di hepeng, marhata manggang, ginjang rohana, mangaleai, dang mangoloi natorasna, dang diboto mandok mauliate, dang setia, dang marroha holong, dang olo mardos ni roha, paroa-roahon donganna, dang diboto mangorom diri, parmuruk-muruk, makkasogohon na denggan, mangulahon na jahat tu donganna, sijogal rukkung, sombong, unlomo do rohana mangoloi giot-giot ni rohana sian apala mangoloi Debata, disomba nasida do Debata idaon, alai di parngoluonna dang dipatudu na disomba nasida Debata.”​—2 Tim. 3:1-5.

20. Songon dia do caramuna patuduhon molo Harajaon ni Debata i do na uppetting di ngolumuna?

    • “Sai parjolo ma lului Harajaon ni Debata dohot akka na sittong na dihalomohon rohana.”​—Mat. 6:33.

    • “Ninna Jesus ma tu akka siseanna, ‘Manang ise na naeng mangihutton au, ikkon disoadahon do dirina jala ikkon dituhuk ibana do hau partinaonan i jala toktong ma diihutton au.’”​—Mat. 16:24.

21. Ise do Sibolis dohot akka suru-suruan na jahat?

    • “Sibolis do amangmuna . . . Pambunu do ibana sian mulana.”​—Joh. 8:44.

    • “Didabuhon ma naga na balga i tu tano on. Ibana do ulok na parjolo i, na laos margoar Sibolis dohot Setan. Ibana do na mangaliluhon sude portibi on. Dohot do akka suru-suruanna i didabuhon rap dohot ibana.”​—Pgk. 12:9.

22. Aha do gabus na didok Sibolis taringot tu Jahowa dohot tu akka naposona?

    • “Dialusi borua i ma, ‘Boi do panganonnami akka parbue ni hau na di taman on. Alai molo parbue ni hau na di tonga-tonga ni taman i, didok Debata do, “Unang pangan parbue ni hau i jala unang jama hamu i, asa unang mate hamu.”’ Dung i didok ulok i ma tu borua i, ‘Dang tutu i, dang na lao mate hamu. Ai na diboto Debata do sadari dipangan hamu parbue ni hau i, tarbukka ma matamuna. Jala gabe songon Debata ma hamu mamboto na denggan dohot na roa.’”​—1 Mus. 3:2-5.

    • “Didok Sibolis ma tu Jahowa, ‘Holan dirina sandiri do na dipikkiri jolma. Lehononna do manang aha pe na di ibana asal ma boi mangolu.’”​—Job 2:4.

23. Songon dia caramuna patuduhon na so tutu gabus ni Sibolis i?

    • “Somba ma [Debata] sian nasa roham.”​—1 Kron. 28:9.

    • “Sappe mate au, toktong do au setia tu Debata!”​—Job 27:5.

24. Boasa mate jolma?

    • “Masuk do dosa i tu portibi on marhite sada jolma jala dosa i parohon hamatean. Nungnga rarat hamatean i tu sude jolma, ala nungnga mardosa sude jolma.”​—Rom 5:12.

25. Songon dia do keadaan ni halak naung mate?

    • “Diboto halak na mangolu do na lao mate nasida. Alai anggo na mate, dang diboto agia aha.”​—Pjm. 9:5.

26. Aha do janji ni Debata taringot halak naung mate?

    • “Na lao dipahehe Debata do halak na burju dohot halak na jahat.”​—Ul. 24:15.

27. Sadia godang do halak na lao tu surgo naeng mamaretta rap dohot Jesus?

    • “Huida ma Anak ni Biru-Biru i jongjong di Dolok Sion. Rap do ibana dohot 144.000 halak, jala tarsurat do goarna dohot goar ni Amana di dahi ni nasida.”​—Pgk. 14:1.

Dung marsiajar Bibel hamu, gabe diboto hamu ma aha do na dipangido Jahowa sian hamu. Diboto hamu ma muse songon dia do carana mangihutton akka aturanna na sittong i. Nungnga dipauba hamu pangalahomuna, jala saonari nungnga diargai hamu be hangoluan. Ala nungnga marsitutu hamu mangihutton akka aturan ni Jahowa, memenuhi syarat ma hamu gabe parbarita na uli.

Sukkun-sukkun na mangihut mangurupi hamu mangattusi standar ni Jahowa. Jala diurupi ma hamu mamboto aha do syaratna asa boi hamu gabe Saksi Jahowa. Hatorangan on pe paingotton hamu, massai penting do manjaga pangalahomuna asa denggan panggora ni rohamuna jala dipasangap ma Jahowa.​—2 Kor. 1:12; 1 Tim. 1:19; 1 Ptr. 3:16, 21.

Dung diparsiajari hamu akka standar ni Jahowa i, las do rohamuna unduk tu Jahowa jala olo gabe bagian sian organisasina. Sukkun-sukkun dohot ayat referensi na adong dison mangurupi hamu asa lam unduk tu pengaturan na dibahen Jahowa di huria, di keluarga, manang na berhubungan tu pamarettaon na di portibi on. Gabe lam diargai hamu ma sude naung dibahen Jahowa lao mangajari jala patoguhon haporseaon ni naposona. Boi do dipatudu hamu i molo ro tu parpunguan jala mangalehon komentar.

Asing ni i, di bagian on diulas ma boasa massai penting marbarita na uli, mangurupi halak mananda Jahowa, jala paboahon janji ni Debata tu akka jolma. (Mat. 24:14; 28:19, 20) Dung i, diurupi ma hamu mangattusi massai serius do mangalehon diri tu Jahowa jala tardidi. Pos ma rohamuna, diargai Jahowa do sude na diulahon hamu ala olo mangalehon diri tu Ibana.

1. Aha do aturan ni Debata taringot perkawinan? Jala menurut Bibel, aha do dasar ni sasahalak boi marsirang?

   • “Na so hea do dijaha hamu, sian mulana i do ditoppa Debata bawa dohot borua? Jala didok do, ‘Alani i, ikkon tadikkonon ni bawa ma omakna dohot bapakna, asa toktong rap dohot istrina jala gabe sada daging ma nasida na dua.’ Jadi, dang dua be nasida alai sada nama. Alani i, naung dipasada Debata, dang boi sirangon ni jolma. . . . Manang ise na manirakkon istrina molo so alani na mangulahon seks na so patut jala mangoli muse tu na asing, na mangalakkup do ibana disi.”​—Mat. 19:4-6, 9.

2. Boasa ikkon dipastihon suami istri naung sah perkawinan ni nasida menurut hukum ni pamaretta? Molo nungnga menikah hamu, nungnga sah perkawinanmuna i menurut hukum ni pamaretta jala nungnga diakkui pamaretta i?

   • “Toktong ma paingot nasida asa mangoloi jala unduk tu pamaretta dohot tu akka parhuaso.”​—Tit. 3:1.

   • “Ikkon sangap do pardongan saripeon dibahen sude halak. Ikkon setia do sahalak suami dohot sahalak istri tu janji ni nasida. Ai hukumon ni Debata do halak na mangulahon seks na so patut dohot halak na mangalakkup.”​—Heb. 13:4.

3. Aha do tanggung jawabmuna di keluarga?

   • “Ale anakku, tangihon ma na diajarhon bapakmu, jala unang ma leas roham tu poda ni omakmu.”​—Poda 1:8.

   • “Suami do ulu ni istrina, dos songon Kristus ulu ni huria . . . Hamu akka suami, sai haholongi ma istrimuna songon Kristus na makkaholongi huria i.”​—Eps. 5:23, 25.

   • “Hamu akka ama, unang ma bahen jut roha ni ianakkonmuna. Alai pagodang-godang ma nasida marhite mangajar-ajari jala mamodai nasida hombar tu lomo ni roha ni Jahowa.”​—Eps. 6:4.

   • “Hamu akka dakdanak, oloi hamu ma natua-tuamuna, ai i do na dihalomohon Debata.”​—Kol. 3:20.

   • “Hamu akka istri, unduk ma hamu tu suamimuna.”​—1 Ptr. 3:1.

4. Boasa ikkon taargai hangoluan?

   • “[Debata] do na mangalehon hangoluan, hosa, ro di saluhutna tu sude jolma. Alani Ibana do hita gabe adong, marhosa, jala mangolu.”​—Ul. 17:25, 28.

5. Boasa dang boi hita mambunu manang ise pe, termasuk manggugurhon kandungan?

   • “Molo adong dua halak na marbada, jala hona tu borua na hamil, . . . molo adong do na mate, ikkon hosa do gatti ni hosa.”​—2 Mus. 21:22, 23.

   • “Nungnga diida Ho au andorang so tubu dope au. Andorang so adong dope au, disurat Ho do i di bukkum, disurat Ho do mulai nandigan i adong.”​—Ps. 139:16.

   • “Na mambahen sogo roha ni Jahowa . . . mambunu halak na so marsala.”​—Poda 6:16, 17.

6. Aha do paretta ni Debata taringot mudar?

   • “Padao hamu ma dirimuna . . . sian mudar [dohot] sian binatang na mate na so jolo diseat.”​—Ul. 15:29.

7. Boasa ikkon holong rohatta tu dongan sahaporseaon?

   • “Hulehon ma tu hamu paretta na imbaru, marsihaholongan ma hamu. Ikkon dihaholongi hamu do akka donganmuna na asing dos songon carakku makkaholongi hamu. Molo marsihaholongan hamu, botoon ni sude jolma ma na siseanku hamu.”​—Joh. 13:34, 35.

8. Asa unang menular sahit ni sasahalak tu na asing: (a) Boasa halak na marsahit i dang pola porlu makkaol manang mangumma halak na asing? (b) Boasa unang pola haccit roha ni na marsahit i molo adong dongan na so manogihon ibana tu jabu ni nasida? (c) Boasa halak na marsahit i ikkon olo cek darah andorang so marhallet? (d) Boasa halak na marsahit i ikkon jolo paboahon sahitna tu koordinator punguan ni akka sintua andorang so tardidi ibana?

   • “Unang ma marutang hamu tu manang ise pe, alai masihaholongan ma hamu. . . . ‘Ikkon haholonganmu do donganmu jolma doshon dirim.’ Molo holong roha ni sasahalak tu donganna, dang ulahononna na jahat tu donganna i.”​—Rom 13:8-10.

   • “Unang ma holan mamparrohahon na porlu di hamu, alai parrohahon ma na porlu di na asing.”​—Plp. 2:4.

9. Boasa disuru Jahowa hita manalpuhon hasalaan ni na asing?

   • “Toktong ma hamu sabar tu na asing, jala rade ma hamu manalpuhon hasalaan ni nasida nang pe haccit rohamuna dibahen. Songon Jahowa na rade manalpuhon hasalaanmuna, songon i ma ulahon hamu.”​—Kol. 3:13.

10. Aha do na lao ulahononmuna molo adong dongan sahaporseaon na manipu manang memfitnah hamu?

    • “Molo mardosa donganmu, dapotton ma ibana jala paboa ma aha salana, holan hamu padua. Molo ditangihon ibana do ho, dapotmu ma muse donganmi. Alai molo dang ditangihon ho, togihon ma sahalak manang dua halak donganmu manjuppangi ibana. Ai molo adong hatorangan sian dua manang tolu saksi, boi do didok na tutu hatorangan i. Jala molo so ditangihon ibana dope nasida, paboa ma tu huria. Molo tong dope dang olo ibana manangihon huria, etong ma ibana songon sahalak sian bangso na asing manang songon sijalo pajak.”​—Mat. 18:15-17.

11. Boha do pakkilalaan ni Jahowa tu akka dosa on?

    • ▪ Mangulahon seks na so patut

    • ▪ Manomba patung

    • ▪ Bawa na mangulahon seks dohot bawa manang borua tu borua

    • ▪ Manakko

    • ▪ Marjuji

    • ▪ Mabuk

    • “Unang hamu lilu. Halak na mangulahon seks na so patut, na manomba patung, na mangalakkup, bawa na olo ditogihon mangulahon seks dohot bawa, bawa na mangulahon seks dohot bawa, panakko, halak na hisap, parmabuk, pangaleai, dohot pangarampok, dang adong parbagiananna di Harajaon ni Debata.”​—1 Kor. 6:9, 10.

12. Aha do na ikkon ulahononmuna tu sude ulaon seks na so patut?

    • “Padao hamu ma dirimuna sian ulaon seks na so patut!”​—1 Kor. 6:18.

13. Asing ni ubat na sian dokter, boasa ikkon tapasiding akka ubat na boi mambahen kecanduan manang ubat na boi berpengaruh tu pikkiran?

    • “Pelehon hamu ma dirimuna gabe pelean na mangolu, na badia, jala na palasson roha ni Debata. Marhobas ma hamu tu Ibana sian nasa pikkiranmuna. Jala unang be tiru hamu akka halak na di portibi on. Alai muba ma hamu marhite paubahon pikkiranmuna, asa takkas diboto hamu lomo ni roha ni Debata na denggan, na sittong, jala na palasson rohana.”​—Rom 12:1, 2.

14. Akka ulaon spiritisme aha do na diorai Debata?

    • “Unang ma adong sian hamu . . . na mangaramal, na mamakke ilmu gaib, na mangido tanda sian datu, na mamakke ilmu sihir, parula-ula, na mangido tudu-tudu tu halak na boi makkatai tu na mate dohot tu peramal, manang na makkatai tu na mate.”​—5 Mus. 18:10, 11.

15. Molo adong na mangulahon dosa serius, alai lomo rohana mulak tu Jahowa, aha do na ikkon hatop ulahononna?

    • “Huakkui ma dosakku tu Ho. Dang hutabunihon be hasalaakku. Hudok ma, ‘Huakkui ma salakku tu Jahowa.’”​—Ps. 32:5.

    • “Adong do na marsahit di tonga-tongamuna? Dijou ibana ma akka sintua di huria, asa ditangiakkon jala dibahen miak tu ibana di bagasan goar ni Jahowa. Tangiang na di bagasan haporseaon ma na pamalum na marsahit i, jala pamalumon ni Jahowa ma ibana. Molo mangulahon dosa do ibana, sesaon ni Debata ma dosana.”​—Jak. 5:14, 15.

16. Molo diboto hamu adong dongan sahaporseaon na mangulahon dosa serius, aha ma na ikkon diulahon hamu?

    • “Molo adong halak na mangida donganna manang mamboto donganna mangulahon dosa, ibana ma na gabe saksi. Molo adong boa-boa na mandok asa ro saksi i lao paboahon taringot na masa i, alai dang olo ro saksi i lao paboahon, mardosa ma ibana jala ikkon dihukum do ibana alani salana i.”​—3 Mus. 5:1.

17. Molo adong dongan sahaporseaon na dipecat sian huria, boi dope hita bergaul tu ibana?

    • “Unang mardongan be hamu tu dongan sahaporseaon na mangulahon seks na so patut, na hisap, na manomba patung, pangaleai, parmabuk, dohot pangarampok. Gari mangan pe, dang boi rap hamu dohot halak sisongon i.”​—1 Kor. 5:11.

    • “Molo adong na ro tu hamu halak na so mamboan ajaran ni Kristus, unang ma jalo hamu ibana di jabumuna jala unang pakkulingi hamu ibana.”​—2 Joh. 10.

18. Boasa holan tu halak na makkaholongi Jahowa hamu marale-ale?

    • “Gabe marbisuk do manang ise na mardongan tu halak na marbisuk, alai gabe marjea do manang ise pe na mardongan tu halak na oto.”​—Poda 13:20.

    • “Unang ma olo hamu dioto-otoi. Molo mardongan hamu tu halak na so denggan, sega do pangalahomuna na denggan i.”​—1 Kor. 15:33.

19. Boasa ikkon netral Saksi Jahowa di politik?

    • “Dang sian portibi on nasida, songon [Jesus] na so sian portibi on.”​—Joh. 17:16.

20. Boasa ikkon unduk hamu tu pamaretta?

    • “Ikkon unduk do sude halak tu pamaretta, ai dang adong huaso na so ro sian Debata. Jala Debata do na mambahen pamaretta adong di ingananna be.”​—Rom 13:1.

21. Molo dang sesuai hukum ni jolma tu hukum ni Debata, aha do na ikkon diulahon hamu?

    • “Debata do parhuasonami. Urrikkot do di hami mangoloi Ibana sian jolma.”​—Ul. 5:29.

22. Tikki mamillit karejo hamu, ayat na dia do na boi mangurupi hamu asa tetap terpisah sian portibi on?

    • “Dang buaton ni akka bangso be podang lao mangalo bangso na asing, jala dang marsiajar marporang be nasida.”​—Mik. 4:3.

    • “Kaluar ma hamu sian ibana [Babel na Balga], hamu naposokku! Asa unang dohot hamu mangulahon akka dosana jala asa unang dohot hamu hona hukum.”​—Pgk. 18:4.

23. Hiburan dohot rekreasi na songon dia do pillitonmuna, jala na songon dia do na so boi diulahon hamu?

    • “Sogo do rohana [Jahowa] tu manang ise pe na makkaholongi ulaon ni halak na kejam.”​—Ps. 11:5.

    • “Ikkon sogo do rohamuna mangida na jahat, jala ikkon holong do rohamuna tu na denggan.”​—Rom 12:9.

    • “Toktong ma pikkirhon hamu akka na sittong, na rikkot, na hombar tu lomo ni roha ni Debata, na badia, na mambahen halak marholong ni roha, na patut sihataon, na denggan, dohot na patut sipujion.”​—Plp. 4:8.

24. Boasa dang boi Saksi Jahowa rap beribadat dohot agama na asing?

    • “Dang boi hamu rap mangan di ‘meja ni Jahowa’ jala laos rap mangan di meja ni suru-suruan na jahat.”​—1 Kor. 10:21.

    • “‘Padao hamu ma dirimuna sian nasida,’ ninna Jahowa, ‘unang be jama hamu na ramun’, ‘dung i jalookku ma hamu.’”​—2 Kor. 6:17.

25. Aha do prinsip ni Bibel na boi mangurupi hamu mambahen keputusan lao do hamu tu sada perayaan manang na dang?

    • “Mardongan do nasida tu bangso na asing i, jala diihutton nasida do hasomalan ni akka bangso i. Sai disomba nasida do patung na disomba akka bangso i, jala gabe jorat ma i di nasida.”​—Ps. 106:35, 36.

    • “Anggo na mate, dang diboto agia aha.”​—Pjm. 9:5.

    • “Dang sian portibi on nasida, songon au na so sian portibi on.”​—Joh. 17:16.

    • “Nungnga godang dipakke hamu tikkimuna najolo mangihutton lomo ni roha ni akka bangso. Diulahon hamu do ulaon ni halak na so umboto ila, hisap-hisap ni daging, mabuk, marpestai sahat tu na mabuk, martaru minum, jala manomba akka patung.”​—1 Ptr. 4:3.

26. Songon dia do contoh na disurat di Bibel mangurupi hamu mambahen keputusan taringot tu acara ulang tahun?

    • “Tolu ari dukkon i, marulang tahun ma si Firaun. Dibahen si Firaun do pesta jala diundang do sude pegawaina. Dipakaluar ibana do pangurus siinumon dohot pangurus sipanganon. Jala diboan do nasida tu jolo ni akka pegawaina i. Dipaulak si Firaun ma muse jabatan ni pangurus siinumon i . . . Alai digattung si Firaun do pangurus sipanganon i.”​—1 Mus. 40:20-22.

    • “Di pesta ari hatutubu ni si Herodes, manortor ma boru ni si Herodias jala massai las ma roha ni si Herodes. Marsumpa ma si Herodes na lehononna do manang aha pe pangidoan ni boru ni si Herodias. Dung i, dijujui omakna ma boruna i mandok tu si Herodes, ‘Lehon ma tu au ulu ni si Johannes Pandidi. Jala bahen ma i di atas ni talam.’ Disuru ma asa diponggol ulu ni si Johannes di penjara.”​—Mat. 14:6-8, 10.

27. Boasa olo hamu mangihutton petunjuk sian akka sintua?

    • “Oloi hamu ma akka na manguluhon hamu jala unduk ma hamu tu nasida. Ai dijaga nasida do hamu jala sesuai tu parniulaon ni nasida do hukuman ni Debata nasida. Molo diulahon hamu i, las ma roha ni nasida mangulahon ulaon ni nasida. Alai molo dang diulahon hamu i, marsak ma nasida jala dang parohon na denggan i tu hamu.”​—Heb. 13:17.

28. Boasa ikkon diatur hamu tikkimuna lao manjaha jala marsiajar Bibel rap dohot keluargamuna?

    • “Alai patik ni Jahowa do na dihalomohon rohana, dijaha jala dirimangi ibana do patik i arian nang borngin. Dos ma ibana songon hau na disuan di labbung ni sunge, na marparbue di tikkina, na so olo malos bulungna, jala sai marhasil do sude na niulana.”​—Ps. 1:2, 3.

29. Boasa lomo rohamuna ro tu parpunguan jala mangalehon komentar?

    • “Baritahonokku ma goarmu tu akka haha anggikku. Jala pujiokku ma Ho di tonga-tonga ni punguan i.”​—Ps. 22:22.

    • “Taparrohahon ma akka donganta, asa boi hita manjujui na asing lao patuduhon holong ni roha dohot mangulahon na denggan. Unang ma tatinggalhon parpunguanta songon na somal diulahon piga-piga halak, alai tapatogu ma akka donganta. Jala lam marsitutu ma hita mangulahon i, ai nungnga lam jonok ari i.”​—Heb. 10:24, 25.

30. Aha do tugas na uppetting na diparettahon Jesus tu hita?

    • “Alani i, lao ma hamu, bahen hamu ma saluhut halak sian nasa bangso gabe siseanku. Didi hamu ma nasida . . . Ajari hamu ma nasida mangulahon sude naung huparettahon tu hamu.”​—Mat. 28:19, 20.

31. Tikki talehon sumbangan tu ulaon ni organisasi manang sumbangan lao mangurupi akka dongan, boha do seharusna sikapta asa las roha ni Jahowa?

    • “Pasangap ma Jahowa mamakke akka barangmu na arga.”​—Poda 3:9.

    • “Lok ma sian na taronjar ni rohana sasahalak mangalehon silehononna, unang ma marungut-ungut manang ala na tarpaksa. Ai dihaholongi Debata do halak na mangalehon sian las ni rohana.”​—2 Kor. 9:7.

32. Akka hasusaan aha do na ikkon diadopi halak Kristen?

    • “Marlas ni roha ma halak na manaon na haccit alani hasittongan, ai nasida do nappunasa Harajaon banua ginjang. Marlas ni roha ma hamu molo dileai, molo dibahen na haccit tu hamu, jala molo diparoa-roa hamu alani au. Ai songon i do najolo ditaon akka panurirang. Marlas ni roha jala marolop-olop ma hamu, ai balga do upamuna di banua ginjang.”​—Mat. 5:10-12.

33. Boasa sada hasangapon na balga molo boi hita tardidi gabe Saksi Jahowa?

    • “Hatami do na mambahen las jala sonang rohakku. Ai dipillit Ho do au lao mamakke goarmi, ale Jahowa Pamimpin ni Akka Tentara.”​—Jer. 15:16.