Harapan na Massai Denggan na Lao Saut di Ari na Naeng Ro
Menurut hamu, lam denggan do situasi ni portibi on di ari na naeng ro? Nang pe godang masalah na borat diadopi saonari on, alai godang do halak tetap berharap na lam denggan situasi ni portibi on di ari na naeng ro. Alai masuk akkal do harapan sisongon i? Masuk akkal! Alana adong do harapan na massai denggan tu hita sude na dipaboa di Bibel, jala boi do tahaporseai janji i.
Harapan na songon dia do na lao terjadi na dipaboa di Bibel?
Nungnga dipaboa di Bibel na lao borat masalah na lao diadopi akka jolma. Alai dipaboa do muse dang torus adong salelengna akka masalah i. Misalna songon akka masalah na di toru on:
Masalah tempat tinggal
Na didok Bibel: “Dibangun nasida ma jabu jala nasida ma na mangingani.”—Jesaya 65:21.
Artina: Lao marjabu ma setiap halak di ari na naeng ro.
Masalah parkarejoan dohot hapogoson
Na didok Bibel: “Marlas ni roha situtu ma akka halak na hupillit i alani hasil ni ulaon ni nasida.”—Jesaya 65:22.
Artina: Sude ma halak merasa puas alani parkarejoanna jala boi menikmati hasil kerja keras ni nasida.
Masalah ketidakadilan
Na didok Bibel: “Adong nama sada raja na mangarajai di bagasan hasittongan.”—Jesaya 32:1.
Artina: Dang adong be na mambahen na so adil tu hita alani status ekonomi na berbeda dohot suku na berbeda. Adil do dibahen tu sude halak.
Masalah kurang gizi dohot maol mangalului sipanganon
Na didok Bibel: “Godang ma tubu sipanganon di ladang, haru di pussu ni dolok pe godang do tubu suan-suanan.”—Psalmen 72:16.
Artina: Na lao godang ma sipanganon. Setiap halak boi mangallang sipanganon na sehat. Dang adong be na maol mangalului sipanganon manang na hurang gizi.
Masalah kejahatan
Na didok Bibel: “Ganup halak hundul ma di toru ni hau anggurna be dohot di toru ni hau arana be, dang adong be na mambahen nasida mabiar.”—Mika 4:4.
Artina: Na lao aman jala tenang ma dihilala sude halak ala dang adong be halak na jahat, jala holan “halak na tigor marroha” nama na tinggal di tano on.—Psalmen 37:10, 29.
Masalah porang
Na didok Bibel: “Dang buaton ni akka bangso be podang lao mangalo bangso na asing, jala dang marsiajar marporang be nasida.”—Jesaya 2:4.
Artina: Na lao dame ma sude liat portibi on. (Psalmen 72:7) Dang lao adong be na marlungun ni roha ala mate dongan manang keluarga ni nasida di parporangan, jala dang adong be na lao mengungsi alani porang.
Masalah penyakit
Na didok Bibel: “Dang adong nanggo sahalak pe . . . na mandok, ‘Marsahit do au.’”—Jesaya 33:24.
Artina: Dang lao adong be na marsahit manang na cacat. (Jesaya 35:5, 6) Jala adong do janji disurat di Bibel na so “adong be hamatean” di tano on.—Pangungkapon 21:4.
Masalah lingkungan na sega
Na didok Bibel: “Marlas ni roha ma gurun pasir dohot tano na harsang, marlas ni roha ma gurun jala gok ma akka bunga disi.”—Jesaya 35:1.
Artina: Sude tano on gabe songon Taman Eden jala marlas ni roha ma akka jolma songon lomo ni roha ni Debata di mulana i.—1 Musa 2:15; Jesaya 45:18.
Boi do tahaporseai janji na dipaboa di Bibel i?
Wajar do molo ragu dope hamu tu janji na disurat di Bibel. Alai coba ma lului hamu unggodang akka janji na disurat di Bibel taringot ari na naeng ro. Boasa? Alana akka janji na disurat di Bibel i asing do sian janji manang ramalan na dibahen jolma. Sude janji na di Bibel i sian Debata do. Adong dua alasan na mambahen hita boi porsea tu janji ni Debata:
Debata “na so margabus” do Ibana. (Titus 1:2) Asing ni i muse, holan Debata do na sanggup paboahon aha na lao masa di ari na naeng ro. (Jesaya 46:10) Godang do contoh di Bibel na patuduhon na torus terjadi aha na didok Debata. Lao mamboto hatorangan on, tonton hamu ma video Songon dia do Hita Boi Porsea na Sintong Isi ni Bibel?
Sanggup do Debata pasaehon sude masalahta. Didok di Bibel, sanggup do Debata mangulahon “manang aha pe lomo ni rohana”. (Psalmen 135:5, 6) Jadi, dang adong na boi mangabbati Debata lao pasautton janjina. Asing ni i, lomo do roha ni Debata mangurupi hita ala holong rohana tu hita.—Johannes 3:16.
Alai mungkin ro do tu pikkiranmuna, ‘Molo tutu do sanggup Debata mangurupi hita, boasa ma godang masalah sahat tu saonari?’ Lao mamboto alusna, tonton ma video Boasa Dipaloas Debata Masa Hasusaan?
Aha do na lao dibahen lao pasautton janji on?
Bahenon ni Debata ma Harajaonna lao pasautton sude janjina i. Harajaonna i mamaretta sian surgo, nungnga dipillit Ibana Jesus Kristus lao Raja ni Harajaon i. Jala nungnga dilehon Ibana huaso tu Jesus lao mangurus tano on dohot sude halak na tinggal di tano on. Najolo tikki mangolu Jesus di tano on, dipamalum ibana do na marsahit, dilehon ibana do mangan akka na male, dikendalihon ibana do cuaca jala dipahehe ibana do halak na mate. (Markus 4:39; 6:41-44; Lukas 4:40; Johannes 11:43, 44) Jadi ala ibana do Raja ni Harajaon ni Debata, songon i ma na lao bahenonna muse di tano on.
Lao mamboto aha do na lao ulahonon ni Harajaon ni Debata tu akka jolma, tonton ma video Aha do Harajaon ni Debata I?
Andigan do terjadi janji i?
Satokkin nai nama i saut. Alana nungnga dipaboa di Bibel akka peristiwa na gabe tanda naung mulai mamaretta Harajaon ni Debata. (Lukas 21:10, 11) On paposson rohatta, satokkin nai na lao saut nama janji ni Debata.
Lao mamboto godang taringot on, jaha ma artikel “Andigan do Harajaon ni Debata i Mamaretta di Tano on?”
Aha do manfaatna molo taboto janji na sian Bibel i?
Sahalak sian panurat ni Bibel mandok, dos do janji na adong di Bibel i “songon jangkar ni kapal”. (Heber 6:19) Songon jangkar ni kapal na boi mambahen kapal i tetap stabil tikki ro badai, songon i do nang janji na sian Bibel i. Boi do i mangurupi hita martahan di tikki adong masalah. Janji na sian Bibel i boi mambahen perasaan dohot pikkiratta tetap stabil jala mambahen hita gabe sehat.—1 Tessalonik 5:8.