2 Samiɛli

16 Kɛ Davidi juli oka’n i ti su lɔ m’ɔ trali su kan’n,+ ɔ́ nían-ɔn, Ziba+ m’ɔ ti Mefibosɛti+ i sufuɛ’n yɛ ɔ o yɛ. Ɔ fali aflunmun nɲɔn bɛli i atin kpalɛ. Kpanwun ya nɲɔn (200), nin viɲin mma gato ya kun (100), nin figie nin nglesia mma gato ya kun (100), nin duvɛn sɛ dan kun, be o aflunmun sɔ’m be su.+ 2 Yɛ famiɛn’n usali Ziba kɛ: “?Ngue ti yɛ a suali ninnge nga mun bali-ɔ?” Ziba tɛli su kɛ: “Famiɛn, n fali aflunmun mun n bali naan ɔ awlofuɛ’m be fu su. N fali kpanwun nin waka mma mun n bali naan gbanflɛn’m be di. Duvɛn’n liɛ’n, n fa bali naan be nga be fɛ aawlɛ flɛnnɛn’n nun’n be nɔn.”+ 3 Famiɛn’n usɛli i kɛ: “?Ɔ min’n i wa’n* wo nin?”+ Yɛ Ziba tɛli famiɛn’n su kɛ: “Ɔ kali Zerizalɛmun lɔ. Afin i waan andɛ’n Izraɛlifuɛ’m bé síe i famiɛn kɛ i nannan’n sa.”+ 4 Yɛ famiɛn’n seli Ziba kɛ: “Ninnge nga be ti Mefibosɛti liɛ’n, fa be kwlaa.”+ Ziba tɛli su kɛ: “Famiɛn, min min, m’an koto ɔ bo. Si min aunnvɔɛ sɔ titi.”+

5 Kɛ Famiɛn Davidi juli Baurimun’n, Saili i osu’n nunfuɛ kun fin lɔ fiteli. Ɔ suan Simei,+ Gera i wa-ɔ. Kɛ ɔ́ wúnnge Davidi i wun lɔ’n, nn ɔ́ bó i sannzan.+ 6 Asa ekun’n, ɔ totoli Famiɛn Davidi nin i sufuɛ’m be kwlaa be yɔbuɛ. Ɔ totoli safuɲrɛn nga be o Davidi i fama su nin i bɛ su’n nin sran onga’m be kwlaa be yɔbuɛ wie. 7 Kɛ Simei bó Davidi i sannzan’n, nn ɔ́ sé kɛ: “Kɔ ɔ ɲrun, kɔ ɔ ɲrun! Sran kunfuɛ, finfinfuɛ. 8 Saili i awlofuɛ kwlaa nga a kunnin be’n, nin famiɛn dilɛ nga a deli i sa nun’n ti’n, Zoova w’a tua ɔ kalɛ. Zoova w’a fa famiɛn dilɛ’n w’a wla ɔ wa Absalɔmun sa nun. Ɲrɛnnɛn’n yɛ w’a tɔ ɔ su siɛn’n yɛ, afin a ti sran kunfuɛ.”+

9 Yɛ Abisai m’ɔ ti Zeruya i wa’n+ seli famiɛn’n kɛ: “?Alua fuɛn+ nga yɛ ɔ jaso lɔ wa bo min famiɛn’n i sannzan+ sa-ɔ? Jran maan n ko kpɛ i ti’n ke!”+ 10 Sanngɛ famiɛn’n seli kɛ: “?Zeruya i mma mun,+ amun ndɛ o nun sɛ? Amun yaci i nun maan ɔ bo min sannzan,+ afin Zoova seli i kɛ:+ ‘Bo Davidi i sannzan!’ I sɔ’n ti’n, sran kun kwla se i kɛ: ‘?Ngue ti yɛ a yo sɔ-ɔ?’” 11 I sin’n, Davidi seli Abisai nin i sufuɛ’m be kwlaa kɛ: “Min bɔbɔ min klun ba’n kunndɛ kɛ ɔ́ kún min+ naan se kɛ Bɛnzamɛnfuɛ.+ Amun yaci i nun maan ɔ bo min sannzan, afin Zoova yɛ ɔ seli i kɛ ɔ yo sɔ-ɔ! 12 Atrɛkpa’n, Zoova wún ɲrɛnnɛn ng’ɔ o min su’n.+ Ɔ maan sannzan nga be su bo min andɛ yɛ’n, atrɛkpa’n Zoova fá káci muae mán min.”+ 13 Kɛ Davidi nin i sran’m bé kɔ́’n, Simei kusu sin oka’n i bue kun yɛ ɔ nin be kɔ-ɔ. Ɔ́ kɔ́’n, nn ɔ́ bó Davidi i sannzan,+ nn ɔ́ tótó i yɔbuɛ, nn ɔ́ tú ndutre’n gúɛ i wun.

14 Famiɛn’n nin i sran’m be kwlaa be ɔli lele be juli lika nga be su kɔ’n nun. Kɛ bé jú lɔ’n, nn b’a fɛ kpa. Ɔ maan be loli wunmiɛn lɛ.

15 Kɛ ɔ́ yó sɔ’n, nn Absalɔmun nin Izraɛlifuɛ kwlaa nga be o i sin’n, b’a ju Zerizalɛmun lɔ. Yɛ Aitofɛli+ o i wun lɛ. 16 Kɛ Davidi i janvuɛ Usai+ m’ɔ ti Aakifuɛ’n+ toli Absalɔmun lɔ’n, ɔ seli i kɛ: “Famiɛn, maan wie’n wla fi wɔ!+ Famiɛn, maan wie’n wla fi wɔ!” 17 Yɛ Absalɔmun seli Usai kɛ: “?Yoo kɛ a klo ɔ janvuɛ’n kɛ nga sa? ?Ngue ti yɛ w’a suman ɔ janvuɛ’n su-ɔ?” 18 Yɛ Usai seli Absalɔmun kɛ: “Sran nga Zoova nin be nga be o yɛ’n, nin Izraɛlifuɛ’m be kwlaa be fɛli i’n, i sin yɛ n jran-ɔn. Ń trɛ́n i wun wa. 19 ?Asa kusu’n, wan yɛ ɔ fata kɛ n su i-ɔ? ?Nán wɔ mɔ a ti i wa’n niɔn? Wafa nga n fa suli ɔ si’n, i kunngba’n yɛ ń fá sú wɔ-ɔ.”+

20 Yɛ Absalɔmun seli Aitofɛli kɛ: “?Ngue yɛ ɔ fata kɛ e yo-ɔ? Kan kle min.”+ 21 Yɛ Aitofɛli seli Absalɔmun kɛ: “A nin ɔ si i yi*+ ng’ɔ yacili be wa naan be nian sua’n i lika’n,+ be la. I liɛ’n, Izraɛlifuɛ’m be kwlaa bé tí i kɛ w’a lo ɔ si’n i ngasi dan. Ɔ maan be nga be o ɔ sin’n, bé ɲán wunmiɛn.” 22 I sɔ’n ti’n, be siesieli tannin sua kun sua’n i ti su nglo lɔ.+ Kpɛkun Absalɔmun nin i si i yi mun* be lali+ Izraɛlifuɛ’m be kwlaa be ɲrun lɛ.+

23 Blɛ sɔ’n nun’n, kɛ Aitofɛli man afɔtuɛ’n,+ sran’m be fa su kɛ* Ɲanmiɛn Kpli i nuan ndɛ wie sa. I Davidi-o, i Absalɔmun-o, kɛ ngalɛ’n sa yɛ be bu Aitofɛli i afɔtuɛ’m be kwlaa-ɔ.