2 Samiɛli

6 Davidi yiali Izraɛli nvle’n nun sonja’m be nun kpakpa mun ekun. Be ti sran akpiakpi ablasan (30.000). 2 Kpɛkun Davidi nin i sran’m be kwlaa be ɔli Baale-Zida naan bé kó fá Ɲanmiɛn Kpli i Alaka’n.+ Alaka sɔ’n i ɲrun lɛ yɛ sran’m be bo flɛ Zoova m’ɔ ti sonja’m be su kpɛn’n,+ m’ɔ ti i famiɛn bia’n su, seribɛn’m+ be ti su nglo lɔ’n* i dunman’n niɔn. 3 Kɛ ɔ́ yó sɔ’n, nn Alaka’n wo kpɔlɛ’n su lɛ, Abinadabu i sua’n nun+ lɔ. Sanngɛ be fali Ɲanmiɛn Kpli i Alaka’n be sieli i kakaklolo uflɛuflɛ kun su.+ Yɛ Abinadabu i wa Uza nin Aio be yɛ be nian kakaklolo’n su yɛ be kɔ-ɔ.

4 Kɛ be ko fali Ɲanmiɛn Kpli i Alaka’n kpɔlɛ’n su lɛ, Abinadabu i sua’n nun lɔ mɔ bé kɔ́’n, Aio yɛ ɔ dun Alaka’n i ɲrun mmua-ɔ. 5 Davidi nin Izraɛlifuɛ’m be kwlaa be toli jue, yɛ be sili su able Zoova ɲrun. Kɛ bé yó sɔ’n, be fali miziki bolɛ ninnge kwlaa nga zenevrie waka yɛ be fa yoli’n, nin jru, nin miziki bolɛ ninnge wie mun ekun mɔ be le ɲanman’n,+ nin klɛn,+ nin sɛkɛsɛkɛ, ɔ nin sɛnbali.*+ 6 Sanngɛ kɛ be juli Nakɔn lɔ ble nin ɔɔzu bowlɛ’n nun lɛ’n, Uza toli i sa’n naan w’a tra Ɲanmiɛn Kpli i Alaka’n,+ afin ɔ ka kan naan nannin’m b’a yi i ase. 7 I sɔ’n ti’n, Zoova fali Uza i wun ya dan kpa. Ɔ maan Ɲanmiɛn Kpli kunnin i+ lɛ, afin i ɲin w’a yimɛn i.+ Uza wuli Ɲanmiɛn Kpli i Alaka’n i wun lɛ. 8 Sanngɛ kɛ Zoova fali Uza i wun ya m’ɔ kunnin i’n, i sɔ’n w’a yoman Davidi i fɛ. Andɛ nin andɛ’n, be te flɛ lika sɔ’n kɛ Perɛzi-Uza.* 9 Ɔ maan Davidi sroli Zoova+ cɛn sɔ’n nun. Yɛ ɔ seli kɛ: “?Yɛ ń yó sɛ naan Zoova i Alaka’n w’a ju min klɔ’n su lɔ?”+ 10 Davidi waan ɔ faman Zoova i Alaka’n fa kɔman Davidi Klɔ’n m’ɔ ti i tranwlɛ’n su lɔ kun.+ Sanngɛ ɔ fa ko sieli i Obɛdi-Edɔmun+ m’ɔ fin Gati’n i sua’n nun lɔ.

11 Zoova i Alaka’n kali Obɛdi-Edɔmun m’ɔ fin Gati’n i sua’n nun lɔ anglo nsan. Blɛ sɔ’n nun’n, Zoova yrali Obɛdi-Edɔmun nin i awlofuɛ’m be kwlaa be su.+ 12 Cɛn kun’n, be seli Famiɛn Davidi kɛ: “Zoova w’a yra Obɛdi-Edɔmun i awlofuɛ’m be su, yɛ i sa nun ninnge kwlaa be yo ye. Afin Ɲanmiɛn Kpli i Alaka’n wo i wun lɔ.” I sɔ’n ti’n, Davidi ko fali Ɲanmiɛn Kpli i Alaka’n Obɛdi-Edɔmun i sua’n nun lɔ naan w’a fa wɔ Davidi Klɔ’n su lɔ aklunjɔɛ’n nun.+ 13 Kɛ Zoova i Alaka’n i suafuɛ’m+ bé kɔ́ mɔ be tuli be ja nsiɛn’n, Davidi kunnin nannin tola kun nin nnɛn kun ekun mɔ w’a lo kpa’n fa yili tɛ.

14 Davidi wlɛli i wun ase sili able Zoova ɲrun lɛ lele. Kɛ ɔ́ sí able’n, nn ɔ́ kpɛ́ i wun. Efɔdu nga be fali lɛn be yoli’n yɛ ɔ wla Davidi wun-ɔn.*+ 15 Kɛ Davidi nin Izraɛlifuɛ’m be kwlaa bé fá Zoova i Alaka’n+ bá’n, nn bé bó awɛ’n.+ Yɛ be bo sroman aɔwi, aklunjɔɛ’n ti.+ 16 Sanngɛ kɛ Zoova i Alaka’n wluli Davidi Klɔ’n nun’n, mɔ Saili i wa Mikali+ niannin fenɛtri’n nun’n, ɔ wunnin Famiɛn Davidi. Kɛ ɔ́ yó sɔ’n, nn Davidi tú kpɛ́n, nn ɔ́ sí able. Yɛ ɔ kpɛ i wun bo sin yia nun Zoova ɲrun lɛ. Kɛ ɔ wunnin i sɔ’n, Davidi i wun yoli i tɛ i awlɛn’n nun lɔ.+ 17 Be fali Zoova i Alaka’n be wluli klɔ’n nun lɔ. Kpɛkun be fa ɔli tannin sua nga Davidi kplannin naan be fa sie nun’n i nun.+ I sin’n, Davidi yili tɛ nga kɛ bé yí’n be yra nnɛn’n i kɔlikɔli’n,+ nin bo kun yolɛ tɛ’n+ Zoova ɲrun lɛ.+ 18 Kɛ Davidi yili tɛ nga kɛ bé yí’n be yra nnɛn’n i kɔlikɔli’n nin bo kun yolɛ tɛ mun’n, ɔ boli muae mannin sran mun Zoova m’ɔ ti sonja’m be su kpɛn’n i dunman nun. 19 Asa ekun’n, ɔ fali kpanwun kukluuklu mun,* nin nglesia mma kee gato mun, nin viɲin mma kee gato mun, kpɛkun ɔ fa cɛcɛli sran’m be kwlaa. Izraɛlifuɛ’m be kwlaa kpan, i yasua-o i bla-o, be ɲannin kunngunngun. I sin’n, be ɔli be awlo’m be nun sɛsɛsɛ.

20 Kɛ Davidi ɔli i awlo naan ɔ́ bó muae mɛ́n i awlofuɛ mun’n, Saili i wa Mikali+ bɛli i atin kpalɛ. Ɔ seli Davidi kɛ: “Izraɛli famiɛn’n w’a ɲan ɲrun-o! Ɔ yili i wun ngbɛn andɛ i sran’m be sufuɛ bla’m be ɲrun kɛ sinnglinfuɛ wie yɛ w’a yi i wun ngbɛn nzra nun sa.”+ 21 Yɛ Davidi seli Mikali kɛ: “Zoova ɲrun yɛ n su yi min aklunjɔɛ’n i nglo-ɔ. Zoova yacili ɔ si nin i awlofuɛ’m be kwlaa be lɛ. Kpɛkun ɔ fali min kɛ n sie Izraɛli m’ɔ ti i nvle’n.+ I sɔ’n ti’n, ń yí min aklunjɔɛ’n i nglo Zoova ɲrun. 22 Yɛ ń má gúa min bɔbɔ min ɲin ase trá nga. Ń yó min wun finfin. Sanngɛ min sran’m be sufuɛ bla nga a kannin be ndɛ’n, be yɛ bé yí min ayɛ-ɔ.” 23 Saili i wa Mikali+ w’a wuman ba le naan w’a wu.