1 Famiɛn Mun
21 Kɛ sa sɔ’m be sinnin’n, ndɛ kun tɔli Nabɔtu m’ɔ ti Zizreɛlifuɛ’n i viɲin fie’n su. Fie sɔ’n wo Zizreɛli+ lɔ, ɔ o Akabu m’ɔ ti Samari famiɛn’n i famiɛn sua’n i wun lɛ. 2 Akabu seli Nabɔtu kɛ: “Fa ɔ viɲin fie’n man min naan n fa yo min tro fie, afin ɔ o min sua’n i wun koko. Kpɛkun ń má fá viɲin fie kpa kun ń mán wɔ naan a fa sie i osu. Annzɛ sɛ a klo’n, ń mán wɔ i ti sika.” 3 Sanngɛ Nabɔtu seli Akabu kɛ: “Zoova ɲrun’n, ɔ timan su kɛ n fa min nannan’m be aja like’n n man wɔ.”+ 4 Ɔ maan Akabu sɛli i sin ɔli i awlo. Ɔ fali ya yɛ i sa sin bubuli i, afin Nabɔtu m’ɔ ti Zizreɛlifuɛ’n seli i kɛ: “N su faman min nannan’m be aja like’n n manman wɔ.” I sin’n, ɔ lɛli i bɛ’n su, yɛ ɔ kpɛli i ɲin talɛ’n su lɔ, i waan ɔ diman like.
5 I yi Zezabɛli+ wluli i sin lɔ, yɛ ɔ usɛli i kɛ: “?Ngue ti yɛ ɔ wla w’a bo ɔ wun mɔ i ti ɔ waan a diman like-ɔ?” 6 Ɔ tɛli i su kɛ: “N seli Nabɔtu m’ɔ ti Zizreɛlifuɛ’n kɛ: ‘Fa ɔ viɲin fie’n man min maan n to. Annzɛ sɛ a klo’n ń fá viɲin fie uflɛ ń mán wɔ ń fá síe i osu.’ Sanngɛ ɔ seli kɛ: ‘N su faman min viɲin fie’n n manman wɔ.’” 7 Yɛ i yi Zezabɛli seli i kɛ: “?Nán wɔ yɛ a ti famiɛn Izraɛli wa-ɔ? Jaso naan di like, maan ɔ wla gua ase. Ń má fá Nabɔtu m’ɔ ti Zizreɛlifuɛ’n i viɲin fie’n ń mán wɔ.”+ 8 Ɔ maan ɔ klɛli fluwa kun Akabu i dunman nun, ɔ fali Akabu i sa ti nzɔliɛ’n+ sieli su, kpɛkun ɔ fali fluwa’n ko mannin kpɛnngbɛn mun+ nin sran dandan nga be tran Nabɔtu i klɔ’n su lɔ’n. 9 Ɔ klɛli i fluwa’n nun kɛ: “Amun se nvlefuɛ’m be kɛ be ci nglɛmun, yɛ amun fa Nabɔtu tran nvlefuɛ’m be kwlaa be ɲrun. 10 Yɛ maan amun fa finfinfuɛ nɲɔn be trɛn i ɲrun lɛ naan be tɔn i suɛn+ be se kɛ: ‘A boli Ɲanmiɛn nin famiɛn’n be sannzan!’+ I sin’n, amun fɛ i be wɔ klɔ’n i sin lɔ, yɛ an finfin i yɔbuɛ naan ɔ wu.”+
11 Ɔ maan Nabɔtu i klɔ’n su yasua mun, nin kpɛnngbɛn mun, ɔ nin sran dandan nga be trɛn i klɔ’n su’n, be yoli like nga Zezabɛli klɛli i fluwa’n nun ko mannin be’n. 12 Be seli nvlefuɛ’m be kɛ be ci nglɛmun, kpɛkun be fali Nabɔtu trɛnnin i nvlefuɛ’m be ɲrun. 13 I sin’n, finfinfuɛ nɲɔn be bali be wa trɛnnin i ɲrun lɛ, kpɛkun be tɔnnin i suɛn nvlefuɛ’m be ɲrun. Be seli kɛ: “Nabɔtu boli Ɲanmiɛn nin famiɛn’n be sannzan!”+ Kɛ ɔ yoli sɔ’n, be fɛ i ɔli klɔ’n i tiwa lɔ, kpɛkun be finfinnin i yɔbuɛ be kunnin i.+ 14 I sin’n, be ko seli Zezabɛli kɛ: “B’a finfin Nabɔtu i yɔbuɛ b’a kun i.”+
15 Kɛ Zezabɛli tili i kɛ b’a finfin Nabɔtu i yɔbuɛ b’a kun i’n, ɔ seli Akabu kɛ: “Jaso ko fa viɲin fie nga Nabɔtu m’ɔ ti Zizreɛlifuɛ’n+ waan ɔ yomɛn i atɛ ɔ sa nun’n, afin Nabɔtu nunman nguan nun kun. W’a wu.” 16 Kɛ Akabu tili i kɛ Nabɔtu w’a wu’n, ɔ jaso ɔli Nabɔtu m’ɔ ti Zizreɛlifuɛ’n i viɲin fie’n nun lɔ naan ɔ́ kó fá yó i liɛ.
17 Sanngɛ Zoova seli Eli+ m’ɔ ti Tisibefuɛ’n kɛ: 18 “Jaso naan kɔ ko wun Akabu m’ɔ ti Izraɛli famiɛn’n m’ɔ o Samari+ lɔ’n i wun. Ɔ o Nabɔtu i viɲin fie’n nun lɔ, w’a wɔ fie sɔ’n i falɛ. 19 Se i kɛ: ‘Ndɛ nga Zoova kan’n yɛ: “?Á kún sran kun+ naan ɔ kunngba’n w’a fɛ i asiɛ’n?”’+ I sin’n, se i kɛ: ‘Ndɛ nga Zoova kan’n yɛ: “Lika nga alua’m be tafili Nabɔtu i mmoja’n lɛ’n, alua’m bé táfi ɔ mmoja liɛ’n lɛ wie.”’”+
20 Akabu seli Eli kɛ: “Min kpɔfuɛ,+ w’a ɲan min!” Ɔ tɛli i su kɛ: “Ɛɛn-ɛn, m’an ɲan wɔ. ‘Kɛ mɔ w’a fua kpa* kɛ á yó like ng’ɔ ti tɛ Zoova ɲrun’n ti’n,+ 21 ń má fá ɲrɛnnɛn ń yí ɔ su. Ń má núnnún ɔ sin yɛiin, ń núnnún Akabu i awlo’n nun yasua’m* be kwlaa.+ Be nun nga be leman ɲrun Izraɛli mɛn’n nun bɔbɔ’n ń núnnún be wie.+ 22 Ń má yó wɔ awlo’n kɛ Nebati i wa Zeroboamun i awlo’n sa,+ ń yó i kɛ Aia i wa Baasa i awlo’n sa,+ afin a klɔklɔli min ya’n yɛ a yoli maan Izraɛlifuɛ’m be yoli sa tɛ.’ 23 Asa ekun’n, Zoova kannin Zezabɛli i ndɛ seli kɛ: ‘Alua’m bé wá dí Zezabɛli fie ng’ɔ o Zizreɛli lɔ’n nun.+ 24 Akabu i awlo’n nun sran kwlaa ng’ɔ wu klɔ’n nun’n, alua’m bé dí i fuɛn’n. Nga kusu m’ɔ wu blo lɔ’n, anunman mɔ be tu sin nglo lɔ’n bé dí i fuɛn’n.+ 25 Nanwlɛ, be nin-a wunman sran kɛ Akabu sa le.+ Ɔ fuali kpa* kɛ ɔ́ yó like ng’ɔ ti tɛ Zoova ɲrun’n. I yi Zezabɛli+ yɛ ɔ wlɛwlɛli i-ɔ. 26 Ɔ yoli tete sa dan, yɛle kɛ ɔ sɔli amuin mɔ be ti like kain’n* kɛ nga Amɔɔfuɛ mɔ Zoova fuannin be Izraɛlifuɛ’m be ɲrun’n be fa yoli’n sa.’”+
27 Kɛ Akabu tili ndɛ sɔ’n, ɔ titili i tralɛ’m be nun, kpɛkun ɔ fali bajɛ tralɛ wlɛli i wun. Ɔ cili nglɛmun, bajɛ tralɛ yɛ ɔ fa la-ɔ. I wla mɔ w’a bo i wun’n ti’n, ɔ nanti sa blɛblɛblɛ. 28 Yɛ Zoova seli Eli m’ɔ ti Tisibefuɛ’n kɛ: 29 “?A wun wafa nga min ti’n, Akabu kɛnnin i wun ase’n?+ Kɛ m’ɔ kɛnnin i wun ase min ɲrun’n ti’n, blɛ mɔ i ɲin o su’n, n su faman ɲrɛnnɛn n yiman be su. I wa’n i blɛ su yɛ ń fá ɲrɛnnɛn ń yí i awlo’n su-ɔ.”+