1 Famiɛn Mun

7 Salomɔn kplɛnnin i bɔbɔ i sua* liɛ’n.+ I sua wunmuan’n i kplanlɛ’n dili afuɛ blu-nin-nsan (13).+

2 Ɔ kplannin Liban Bo Sua’n.+ I tɛnndɛn nun’n ti kude* ya kun (100), i tɛtrɛ nun’n ti kude ablenun (50), yɛ i nglonglo su’n ti kude ablasan (30). Sua’n taka sɛdri waka mlomlo ɲanman nnan su. Yɛ sɛdri waka floloflolo+ wie mun be o i ja’m be su. 3 Be fali sɛdri waka wie mun siesieli i waka nga be o sua ja mlomlo’m be su’n be ti su nglo. Waka sɔ’m be ti ablanan-nin-nnun (45). Waka’m be lɔngɔlɔngɔ su, ɲanman kun nun waka’m be ti blu-nin-nnun (15). 4 Be yoli fenɛtri mɔ be le kadri’n, be lɔngɔ su nsannsan sɔ ɲanman nsan. Fenɛtri nga be o bue kun su’n, ɔ nin nga be o bue uflɛ su lɔ’n, be ɲin’n wɔ su. 5 Anuan’m be kwlaa, ɔ nin be kadri mun, be bue nga be ɲin’n wɔ su’n be sɛ. Ɔ yoli be kɛ fenɛtri nga be ɲin’n wɔ su’n be ɲrun’n sa.

6 Ɔ kplannin sua nga be flɛ i kɛ Sua Ja’m be Sua’n. I tɛnndɛn nun’n ti kude ablenun (50), yɛ i tɛtrɛ nun’n ti kude ablasan (30). Yɛ i ɲrun lɛ’n, be yoli lika fleiin nga be sin i bo’n, i ti su’n ti gbagblagba, yɛ ɔ le ja mun.

7 Asa ekun’n, ɔ kplannin Famiɛn Bia’n+ i Sua’n.* Lɛ yɛ ɔ di jɔlɛ-ɔ. Be flɛ i ekun kɛ Jɔlɛ Dilɛ+ Sua. Be fali sɛdri waka kɛtɛli i talɛ’n i wun. Ɔ fɛ i asiɛ wun lele fa ju sua’n i ti nun lɔ.

8 Sua* nga Salomɔn wá trán nun’n, ɔ o awlo uflɛ nun.+ Ɔ o Famiɛn Bia’n i Sua’n i wun mmua kan, be yoli be wafa kunngba. Salomɔn kplannin sua wafa kunngba sɔ’n wie mannin Faraɔn i wa bla m’ɔ fɛli i yoli i yi’n.+

9 Be fali yɔbuɛ nga be le gua’n+ yɛ be fa kplannin sua sɔ’m be kwlaa-ɔ. Kɛ bé sɛ́ be’n, be sunnzun be. Be fali ninnge nga be fa sɛ yɔbuɛ’n be sɛli yɔbuɛ’m be bue kwlakwla. Kɛ ɔ fɛ i sua’n i bo ase wlalɛ’n su lele m’ɔ́ fá jú i ti su nglo lɔ’n, i sɔ yɔbuɛ mun yɛ be fali-ɔ. Yɔbuɛ sɔ’m be wie yɛ be fa kplannin awlo klun dan’n+ i talɛ’n niɔn. 10 Be fali yɔbuɛ dandan wie mɔ be le gua kpa’n yɛ be fa wlali sua’m be bo ase-ɔ. Yɔbuɛ wie’m be ti kude blu yɛ wie’m be ti kude mɔcuɛ. 11 Be fali yɔbuɛ wie mɔ be le gua kpa’n be siesieli yɔbuɛ sɔ’m be su, ɔ nin sɛdri waka. Be sɛli yɔbuɛ sɔ mun. Kɛ bé sɛ́ be’n, be sunnzun be. 12 Be fali yɔbuɛ wie mɔ be sɛli be’n be lɔngɔli su ɲanman nsan be fa yoli awlo klun dan’n. Be sieli su sɛdri waka floloflolo, ɔ ti ɲanman kun. Be yoli i kɛ nga be fa yoli Zoova i sua’n i awlo klun kaan’n+ sa, ɔ nin sua’n i lika fleiin nga be sin i bo’n sa.+

13 Famiɛn Salomɔn sunmannin sran Iramun+ sin. Ɔ maan ɔ fɛli i Tir lɔ bali. 14 Ɔ ti angbeti bla kun m’ɔ fin Nɛftali akpasua’n su’n i wa. I si ti Tirfuɛ, yɛ ɔ di aaba nun junman.+ Ɔ si like yo kpa, ɔ ti akunndanfuɛ,+ yɛ ɔ si aaba* nun junman kwlaa di. Ɔ maan ɔ bali Famiɛn Salomɔn sin, yɛ ɔ dili i junman’n kwlaa.

15 Iramun kloli aaba fa yoli sua ja mlomlo nɲɔn.+ Be tinuntinun be nglonglo su’n ti kude blu-nin-mɔcuɛ (18). Ɲanman kun mɔ i tɛnndɛn nun’n ti kude blu-nin-nɲɔn’n (12) yɛ be kwla fa bo sin yia be tinuntinun-ɔn.*+ 16 Ɔ kloli aaba fa yoli like kukluuklu nɲɔn naan ɔ́ fá be síe sua ja mlomlo’m be ti su nglo. Be tinuntinun be nglonglo su’n ti kude nnun. 17 Ɔ fali jrɔkɔ wuli ninnge wie mun kɛ tɛ sa sua ja mlomlo’m be ti su like kukluuklu’m be wun.+ Ɔ yoli kun liɛ nso yɛ ɔ yoli kun liɛ nso. 18 Ɔ yoli grenadie mma ɲanman nɲɔn fa siesieli i like ng’ɔ ti kɛ tɛ sa’n be tinuntinun be wun. Ɔ yoli sɔ naan ɔ́ fá káta like kukluuklu nga be o sua ja mlomlo’n be ti su’n be wun. Ɔ yoli i sɔ like kukluuklu nɲɔn’n be wun. 19 Like kukluuklu nga be ti kɛ ijre nɲrɛ nga be flɛ i kɛ lisi’n sa’n, mɔ be o sua ja mlomlo nga be o sua’n i lika ng’ɔ ti fleiin kpa’n i ɲrun lɛ’n be su’n, be tɛnndɛn nun’n ti kude nnan. 20 Like kukluuklu sɔ’m be o sua ja mlomlo nɲɔn’n be su, be bue kun o lika ng’ɔ ti lokloo mɔ tɛ’n o lɛ’n i ti su nglo. Yɛ grenadie mma ya nɲɔn’n (200) be lɔngɔ su tɛɛn like kukluuklu’m be tinuntinun be wun.+

21 Ɔ kplannin sua ja mlomlo mɔ be o Ɲanmiɛn sua’n* i lika ng’ɔ ti fleiin kpa’n+ i ɲrun lɛ’n. Ɔ takali fama su liɛ’n,* yɛ ɔ flɛli i kɛ Zakɛn.* Ɔ takali bɛ su liɛ’n,* yɛ ɔ flɛli i kɛ Boazi.*+ 22 Sua ja mlomlo’m be ti su nglo’n ti kɛ ijre nɲrɛ nga be flɛ i kɛ lisi’n sa. Kɛ sua ja mlomlo’m be su junman’n wieli kɛ ngalɛ’n sa.

23 I sin’n, ɔ kloli aaba yoli Jenvie’n.*+ Ɔ ti kukluku. Kpongbo sɔ’n i nuan’n i tɛtrɛ nun’n ti kude blu, i nglonglo su’n ti kude nnun. Ɲanman ng’ɔ ju kude ablasan’n (30) yɛ ɔ kwla bo sin yiɛ i-ɔ.*+ 24 I nuan su’n i bo lɛ’n, ɔ yoli towa+ wie mun be desɛn. Be bo sin yiɛ i. Kude kun su’n ɔ yoli blu, kude kun su’n be yoli blu, ɔ yoli i sɔ sin yiali Jenvie’n. Ɔ yoli towa ɲanman nɲɔn, be nin Jenvie’n be sa su kunngba. 25 Ɔ taka nannin tola+ blu-nin-nɲɔn (12) mɔ be yoli be’n be su. Nsan be ɲin kaci nglo lɔ, nsan be ɲin kaci wia atɔliɛ lɔ, nsan ekun be ɲin kaci ngua lɔ, yɛ nsan be ɲin kaci wia afiliɛ lɔ. Be kwlaa be bo lika’n kaci Jenvie’n i bo lɔ lika’n i afiɛn lɔ. 26 Jenvie’n i kpikplikpi’n ti palmun kun.* Be yoli i nuan su’n kɛ klowa wie i nuan su’n sa, yɛ be yoli i kɛ ijre nga be flɛ i lisi’n i nɲrɛ’n sa. Ɔ ju bati* akpi nɲɔn (2.000).

27 I sin’n, ɔ fali aaba yoli ninnge wie mɔ be ti kɛ kakaklolo*+ sa’n. Ɔ yoli i sɔ blu. Be tinuntinun be tɛnndɛn nun’n ti kude nnan, be tɛtrɛ nun’n ti kude nnan, yɛ be nglonglo su’n ti kude nsan. 28 Wafa ng’ɔ fa yoli kakaklolo mun’n yɛ: Ɔ yoli like paplaapla wie mun kakaklolo’m be wun, yɛ ninnge wie’m be jaja be afiɛn. 29 Asɔmɔli+ nin nannin tola, ɔ nin seribɛn’m+ be desɛn o like paplaapla’m be su. Like paplaapla sɔ’m be o ninnge nga be jaja kakaklolo’m be wun’n be afiɛn. Ninnge nga be jaja kakaklolo’m be wun’n be ti su nglo’n, ɔ yili desɛn kunngba’n. Asɔmɔli mun nin nannin tola’m be ti su nglo ɔ nin be ja ngua’n ɔ yoli ɲanman nglanman wie mun. 30 Kakaklolo kun i ja’m be ti nnan. Aaba yɛ ɔ fa yoli be-ɔ. Aaba floloflolo wie’m be o i ja’m be afiɛn. I ja’m be ase tralɛ ninnge’m be o i cɔnjɔ nnan’m be su. Kpongbo dan’n i ja’m be wun’n, ɔ yoli ɲanman nglanman wie mun. 31 Kpongbo dan’n i nuan’n o like kun m’ɔ ti kɛ famiɛn kle sa’n nun. Kɛ ɔ fɛ i i bo lɔ lele m’ɔ́ fá jú i nuan su’n, ɔ ti kude kun. Kpongbo dan’n i nuan’n ti kukluku. Kɛ ɔ fɛ i i ja’m be su lele m’ɔ́ fá jú famiɛn kle’n i ti su lɔ’n, ɔ ti kude kun nin sin. Ɔ yili desɛn wie mun famiɛn kle’n i nuan su. Like paplaapla ng’ɔ yoli be kakaklolo’n i wun’n be bue’n ti nnan, yɛ be bue nga be wɔ su’n be sɛ. Be timan kukluuklu. 32 Kakaklolo’m be ja nnan’n be o ninnge paplaapla nga be o kakaklolo’m be wun’n be bo. Ninnge nga be tra be ja’m be ase’n be tata kakaklolo’n su. Be ja’m be tinuntinun be nglonglo su’n ti kude kun nin sin. 33 Be ja’m be ti kɛ kakaklolo kpakpa’m be ja mun sa. Ɔ kloli aaba yoli ninnge nga be tra be ja’m be ase’n, nin be kondokaa mun, nin be rɛyɔn mun. 34 Kakaklolo’m be kwlaa be cɔnjɔ nnan’n be su’n, ɔ siesieli be ja’m be ase tralɛ like nnan. Be nin kakaklolo’m be sa su kunngba. 35 Kakaklolo’n i nglo lɔ’n be yoli like wie fa cili i nuan su tɛɛn sin yiali nun. I nglonglo su’n ti kude sin kun. I wun ninnge nga be jaja nun’n nin i wun ninnge paplaapla mun be kwlaa be sa su kunngba. 36 Ninnge nga be jɛjɛ i wun’n nin i wun ninnge paplaapla mun be su’n, ɔ yili asɔmɔli nin seribɛn, nin nglesia waka wie’m be desɛn. Sɛ lika’n ti kaan annzɛ ɔ ti dan’n i su yɛ ɔ nian yi desɛn’n niɔn. Ɔ yoli ɲanman nglanman wie mun bo sin yiali be.+ 37 Kɛ ɔ yoli kakaklolo+ blu mun kɛ ngalɛ’n sa. Ɔ yoli be kwlaa wafa kunngba.+ Be kwlaa be sɛ, yɛ be wafa’n ti kun.

38 Ɔ fali aaba yoli kpongbo dandan blu.+ Be tinuntinun be ju bati ablanan (40). Yɛ be tinuntinun be ti kude nnan.* Kpongbo dan kun o kakaklolo blu’m be tinuntinun be su. 39 I sin’n ɔ fali kakaklolo nnun sieli sua’n i fama su, ɔ fali nnun ekun sieli sua’n i bɛ su. Kpɛkun ɔ sieli Jenvie’n sua’n i fama su, wia afiliɛ lɔ lika’n nun.+

40 Iramun+ yoli kpongbo dandan wie mun ekun, ɔ nin peli mun,+ nin kpongbo ba mun.+

Ɔ maan Zoova i sua’n nun junman kwlaa nga Famiɛn Salomɔn fa mannin Iramun kɛ ɔ di’n, kɛ ɔ wieli i di kɛ ngalɛ’n sa. Ninnge ng’ɔ yoli be’n be yɛ:+ 41 Sua ja mlomlo nɲɔn mun,+ nin like kukluuklu kɛ kpongbo ba mun sa mɔ be takataka sua ja mlomlo nɲɔn sɔ’m be ti su’n, nin like nɲɔn mɔ be wafa’n ti kɛ tɛ sa+ mɔ be kata like kukluuklu kɛ kpongbo ba sa mɔ be takataka sua ja mlomlo’m be ti su’n be wun’n. 42 Ɔ yoli like kɛ grenadie mma+ sa i sɔ ya nnan (400) fa sieli i like nɲɔn mɔ be wafa’n ti kɛ tɛ sa’n be su. Grenadie mma ɲanman nɲɔn be o kun su, grenadie mma ɲanman nɲɔn be o kun su. Kpɛkun ɔ fa katali like nɲɔn mɔ be ti kɛ kpongbo ba kukluuklu mun sa mɔ be takataka sua ja mlomlo nɲɔn’m be ti su’n be wun. 43 Ɔ yoli kakaklolo+ blu, nin kpongbo dandan+ blu kakaklolo sɔ’m be su, 44 nin Jenvie’n,+ nin nannin tola blu-nin-nɲɔn (12) Jenvie’n i bo lɔ, 45 ɔ nin nzuɛn guawlɛ mun, nin peli mun, nin kpongbo mun, ɔ nin ninnge kwlaa nga Iramun fali aaba nga be yoli i wun treketreke’n yo mannin Famiɛn Salomɔn naan ɔ fa be sie Zoova i sua’n nun’n. 46 Famiɛn’n yoli maan be kpɛli buɛ wie mun asiɛ wun, Zurdɛn asa’n su lɔ, Sukɔtu nin Zaatan be afiɛn’n nun. Kpɛkun be kloli aaba guɛli i buɛ sɔ’m be nun naan b’a yi ninnge sɔ mun.

47 Salomɔn w’a kwlá sunnzunman ninnge kwlaa sɔ mun, afin be sɔnnin kpanngban kpa. Ɔ maan b’a siman aaba nga be fa yoli be’n i nɔnnin’n i nuan.+ 48 Salomɔn yoli Zoova i sua’n nun ninnge’m be kwlakwla: Sika ɔkwlɛ tɛ yiwlɛ’n,+ nin sika ɔkwlɛ tabli+ mɔ be fa kpanwun nga be fa man Ɲanmiɛn’n be sie be su’n. 49 Kannin siewlɛ+ mɔ be fali sika ɔkwlɛ jrɛiin be yoli be’n, ɔ sieli nnun fama su, yɛ ɔ sieli nnun bɛ su, sua ba m’ɔ o sua’n i klun mmua lɔ’n i ɲrun, yɛ waka nɲrɛ mun,+ nin kannin mun, nin pɛnsi mun, mɔ be ti sika ɔkwlɛ’n.+ 50 Kpongbo dandan mun, nin ninnge wie mɔ be ti kɛ sizo sa’n,+ nin kpongbo ba mun, nin klowa mun,+ nin sin guawlɛ mun,+ sika ɔkwlɛ jrɛiin yɛ ɔ fa yoli be-ɔ. Sua ba m’ɔ o sua’n i klun mmua lɔ’n,+ yɛle kɛ Sua Ba Ngunmin Kun m’ɔ ti Ɲanmiɛn liɛ Klonglo’n i anuan’m be takawlɛ mun, ɔ nin Ɲanmiɛn sua’n i anuan’m+ be takawlɛ mun, sika ɔkwlɛ yɛ ɔ fa yoli be-ɔ.

51 Zoova i sua’n i su junman kwlaa ng’ɔ fata kɛ Salomɔn di’n, ɔ wieli i di. Kɛ ɔ yoli sɔ’n, ɔ fali ninnge nga i si Davidi yoli be sanwun’n+ bali. Ɔ fali sika’n nin sika ɔkwlɛ’n nin ninnge onga mun sieli be Zoova i sua’n nun lɔ ninnge siewlɛ’m be nun.+