2 Famiɛn Mun

14 Kɛ Zoakazi i wa Zoasi+ kacili Izraɛli famiɛn’n, i afuɛ nɲɔn’n su yɛ Zoasi m’ɔ ti Zida famiɛn’n i wa Amazia kacili famiɛn-ɔn. 2 Kɛ ɔ́ káci famiɛn’n, nn ɔ le afuɛ ablaɔn-nin-nnun (25). Ɔ dili famiɛn afuɛ ablaɔn-nin-ngwlan (29) Zerizalɛmun lɛ. I nin’n suan Zoadinin, ɔ fin Zerizalɛmun.+ 3 Ɔ yoli sa ng’ɔ ti kpa Zoova ɲrun’n titi, sanngɛ w’a yoman kɛ i nannan Davidi sa.+ Ɔ yoli like kwlaa nga i si Zoasi yoli’n wie.+ 4 Sanngɛ lika nglonglo’m be kali lɛ.+ Ɔ maan nvlefuɛ’m be yi tɛ lika nglonglo’m be su titi, yɛ be yo maan wunsrɛn fin lika nglonglo’m be su fite.+ 5 Kɛ ɔ yoli mɔ i famiɛn dilɛ’n takali kpa cɛ’n, ɔ kunnin i sufuɛ nga be kunnin i si m’ɔ ti famiɛn’n.+ 6 Sanngɛ w’a kunman sran kunfuɛ sɔ’m be mma mun wie. Ɔ nantili Zoova i mmla m’ɔ klɛ Moizi Mmla fluwa’n nun’n su. Mmla sɔ’n se kɛ: “Ɔ fataman kɛ be kun siɛ mun, ba’m be sa tɛ’n ti. Yɛ ɔ fataman kɛ be kun ba mun, siɛ’m be sa tɛ’n ti. Sran ng’ɔ yo sa tɛ’n, i yɛ ɔ fata kɛ be kun i-ɔ.”+ 7 Ɔ kunnin Edɔmunfuɛ mun+ Njin Kongo’n+ nun lɔ, ɔ kunnin yasua akpiakpi blu (10.000). Ɔ fali Sela klɔ’n alɛ sɔ’n nun.+ Kɛ ɔ fɛ i lɛ’n be flɛli klɔ sɔ’n kɛ Zɔkuteɛli.

8 I sin’n, Amazia sunmannin sran wie mun naan be ko se Zoasi m’ɔ ti Zoakazi i wa’n, mɔ i kusu ti Zei m’ɔ ti Izraɛli famiɛn’n i wa’n kɛ: “Bla maan e kun alɛ.”*+ 9 Zoasi m’ɔ ti Izraɛli famiɛn’n kusu toli Amazia m’ɔ ti Zida famiɛn’n i ngaliɛ. Ɔ seli i kɛ: “Liban lɔ ijre m’ɔ ti owieowie’n ko seli Liban lɔ sɛdri waka’n kɛ: ‘Fa ɔ wa bla’n man min wa yasua’n naan ɔ jɛ i.’ Sanngɛ Liban bo’n nun nnɛn kun sinnin lɛ, ɔ tiatiali ijre m’ɔ ti owieowie’n su. 10 Nanwlɛ, a kwlali Edɔmunfuɛ mun,+ ɔ maan a su yo ɔ wun dandan. I yo, fa ɔ ɲrun mɔ a ɲɛnnin i sɔ’n di ɔ nuan, sanngɛ ka ɔ awlo* lɔ. ?Ɔ waan á fá ɲrɛnnɛn yí ɔ bɔbɔ ɔ su naan á tɔ́ naan a nin Zidafuɛ mun be wun be ɲrun likawlɛ?” 11 Sanngɛ Amazia w’a tieman.+

Ɔ maan Zoasi m’ɔ ti Izraɛli famiɛn’n ɔli, ɔ nin Amazia m’ɔ ti Zida famiɛn’n be ko kunnin alɛ Bɛti-Semɛsi+ lɔ, Zida asa’n su lɔ.+ 12 Izraɛlifuɛ’m be kwlali Zidafuɛ mun. Ɔ maan be wanndi ɔli be awlo’m* be nun sɛsɛsɛ. 13 Zoasi m’ɔ ti Izraɛli famiɛn’n trali Amazia m’ɔ ti Zida famiɛn’n, m’ɔ ti Zoasi i wa’n, mɔ i kusu ti Akazia i wa’n. Ɔ trɛli i Bɛti-Semɛsi lɔ. I sin’n be ɔli Zerizalɛmun, kpɛkun ɔ bubuli Zerizalɛmun i wun talɛ ng’ɔ fɛ i Efraimun Anuan’n+ su lele fa ju Cɔnjɔ su Anuan’n+ su lɔ’n. Lika ng’ɔ bubuli i’n ti kude ya nnan (400).* 14 Ɔ fali sika ɔkwlɛ’n nin sika’n kwlaa, ɔ nin ninnge kwlaa nga be o Zoova i sua’n nun lɔ’n, ɔ nin nga be o famiɛn’n i sua’n nun lɔ ninnge kpakpa’m be siewlɛ’m be nun’n, ɔ nin sran ng’ɔ trali be’n. Kpɛkun ɔ sɛli i sin Samari.

15 Zoasi i su ndɛ’n i onga’n, like ng’ɔ yoli’n nin i kwlalɛ’n, ɔ nin alɛ ng’ɔ nin Famiɛn Amazia m’ɔ ti Zida famiɛn’n be kunnin’n, be klɛli be fluwa ng’ɔ kan Izraɛli famiɛn’m be ndɛ’n i nun. 16 I sin’n Zoasi wuli.* Be sieli i kan be sie Izraɛli famiɛn mun lɔ’n, Samari lɔ.+ I wa Zeroboamun*+ sinnin i osu kacili famiɛn.

17 Kɛ Zoakazi i wa Zoasi+ m’ɔ ti Izraɛli famiɛn’n wuli’n, Zoasi i wa Amazia+ m’ɔ ti Zida famiɛn’n dili afuɛ blu-nin-nnun (15) ekun.+ 18 Amazia i su ndɛ’n i onga’n, be klɛli be fluwa ng’ɔ kan Zida famiɛn’m be ndɛ’n i nun. 19 I sin’n be cicili i wun ndɛ+ Zerizalɛmun lɔ, ɔ maan ɔ wanndi ɔli Lakisi. Sanngɛ be sunmannin sran wie mun i sin Lakisi lɔ naan b’a ko kun i. 20 Kpɛkun be fɛli i nnɛn kpanngɔ wie’m be su be sali be sin, be sieli i Zerizalɛmun lɔ, kan be sieli i nannan’m be lɔ’n, Davidi Klɔ+ lɔ. 21 Kɛ ɔ yoli sɔ’n, Zidafuɛ’m be kwlaa be sieli Azaria*+ famiɛn i si Amazia i osu.+ Blɛ sɔ’n nun’n nn ɔ le afuɛ blu-nin-nsiɛn (16).+ 22 Kɛ famiɛn’n* wuli’n,* ɔ kplannin Elati klɔ’n+ i uflɛ kpɛkun ɔ fa mannin Zidafuɛ mun ekun.+

23 Kɛ Zoasi i wa Amazia kacili Zida famiɛn’n i afuɛ blu-nin-nnun (15) su’n, Zoasi m’ɔ ti Izraɛli famiɛn’n i wa Zeroboamun+ kacili famiɛn Samari lɔ. Ɔ dili famiɛn afuɛ ablanan-nin-kun (41). 24 Ɔ yoli like ng’ɔ ti tɛ Zoova ɲrun’n titi. W’a yaciman sa tɛ nga Nebati i wa Zeroboamun ti’n Izraɛlifuɛ’m be yoli’n i yolɛ.+ 25 Ɔ yoli maan Izraɛli mɛn’n i awɛ’n sinnin i osu’n nun. Ɔ fɛ i Lebo-Amati*+ lele fa ju Araba Jenvie’n*+ su lɔ. Ɔ maan ndɛ nga Zoova m’ɔ ti Izraɛli Ɲanmiɛn’n sinnin Amitai i wa Zonasi+ m’ɔ ti i sufuɛ’n i lika kannin’n ɔ kpɛnnin su. Zonasi ti Ɲanmiɛn nuan ijɔfuɛ Gati-Efɛɛ+ lɔ. 26 Afin Zoova wunnin afɛ dan ng’ɔ o Izraɛlifuɛ’m be su’n.+ Sran fi nunman lɛ naan w’a uka Izraɛlifuɛ mun. Be nga be leman ɲrun bɔbɔ’n b’a wunman be nun wie fi. 27 Sanngɛ Zoova tali nda kɛ Izraɛli dunman’n su nunnunman ɲanmiɛn’n bo wa.+ Ɔ maan ɔ sinnin Zoasi i wa Zeroboamun i lika deli be.+

28 Zeroboamun i su ndɛ’n i onga’n, ninnge kwlaa ng’ɔ yoli be’n, ɔ nin i kwlalɛ’n, alɛ ng’ɔ kunnin be’n, ɔ nin Damasi klɔ’n+ nin Amati klɔ’n+ m’ɔ deli be fa mannin Zida ekun Izraɛli lɔ’n, be klɛli be fluwa ng’ɔ kan Izraɛli famiɛn’m be ndɛ’n i nun. 29 I sin’n Zeroboamun wuli,* be sieli i kan be sie Izraɛli famiɛn mun lɔ’n. I wa Zakari+ sinnin i osu kacili famiɛn.