2 Famiɛn Mun
22 Kɛ Zoziasi+ káci famiɛn’n, nn ɔ le afuɛ mɔcuɛ. Ɔ dili famiɛn afuɛ ablasan-nin-kun (31) Zerizalɛmun lɛ.+ Be flɛ i nin’n kɛ Zedida, ɔ ti Adaya m’ɔ fin Bɔzkati’n+ i wa bla. 2 Ɔ yoli sa ng’ɔ ti kpa Zoova ɲrun’n, ɔ niɛnnin i nannan Davidi i ajalɛ’n su*+ nantili, w’a ɔman fama su annzɛ bɛ su.
3 Kɛ Zoziasi kacili famiɛn’n i afuɛ blu-nin-mɔcuɛ (18) su’n, ɔ sunmannin Safan m’ɔ ti fluwa klɛfuɛ’n, m’ɔ ti Azalia i wa’n, mɔ i kusu ti Mesulamun i wa’n, Zoova i sua’n+ nun lɔ. Ɔ seli i kɛ: 4 “Kɔ Ilkia+ m’ɔ ti Ɲanmiɛn ɲrun jranfuɛ dan’n i sin naan ɔ ko fa sika kwlaa nga nvlefuɛ’m be fa ba Zoova i sua’n+ nun mɔ anuan sunianfuɛ’m be sɔ nun’n.+ 5 Maan be fa man be nga be sieli be kɛ be nian Zoova i sua’n nun junman’n su’n, naan be kusu be fa man junman difuɛ nga be o Zoova i sua’n nun lɔ m’ɔ fata kɛ be siesie sua’n i lika nga w’a saci’n* i ye’n.+ 6 Be yɛle ajuin difuɛ mun nin sua kplanfuɛ mun nin yɔbuɛ nun junman difuɛ mun. Maan be fa to waka nin yɔbuɛ nga be sɛli’n, naan be fa siesie sua’n i ye.+ 7 Sanngɛ sika nga be fa man be’n, nán maan be usa be i su ndɛ, afin be ti sran mɔ be kwla lafi be su-ɔ.”+
8 Kɛ ɔ cɛli kan’n, Ilkia m’ɔ ti Ɲanmiɛn ɲrun jranfuɛ dan’n seli Safan m’ɔ ti fluwa klɛfuɛ’n+ kɛ: “N wunnin Mmla fluwa’n+ Zoova i sua’n nun lɔ.” Ɔ maan Ilkia fali fluwa’n mannin Safan, kpɛkun ɔ kanngannin nun.+ 9 I sin’n, Safan m’ɔ ti fluwa klɛfuɛ’n ɔli famiɛn’n i wun lɔ, kpɛkun ɔ seli i kɛ: “Ɔ sufuɛ’m be fali sika ng’ɔ o sua’n nun lɔ’n be mannin be nga be sieli be kɛ be nian Zoova i sua’n nun lɔ junman’n su’n.”+ 10 Safan m’ɔ ti fluwa klɛfuɛ’n seli famiɛn’n i ekun kɛ: “Ɲanmiɛn ɲrun jranfuɛ Ilkia fali fluwa nga+ mannin min.” Kpɛkun Safan boli fluwa’n i nun kannganlɛ bo famiɛn’n i ɲrun lɛ.
11 Kɛ famiɛn’n tili Mmla fluwa’n i nun ndɛ’n cɛ’n, ɔ titili i wun tralɛ’m be nun.+ 12 I sin’n, famiɛn’n kannin ndɛ kleli Ɲanmiɛn ɲrun jranfuɛ Ilkia, ɔ nin Safan i wa Aikamun+ nin Mikaya i wa Akbɔɔ, nin Safan m’ɔ ti fluwa klɛfuɛ’n, ɔ nin Asaya m’ɔ ti famiɛn’n i sufuɛ’n. Ɔ seli be kɛ: 13 “Amun wɔ ko usa Zoova i sa min bɔbɔ nin nvlefuɛ mun, ɔ nin Zidafuɛ’m be kwlaa be dunman nun, naan ɔ kan fluwa nga be wunnin i m’ɔ o yɛ’n i su ndɛ kle e. Afin e wun ya nga Zoova w’a fa’n, ɔ ti dan.+ E nannan’m b’a nantiman fluwa nga i nun ndɛ’m be su, b’a nianman ndɛ kwlaa nga be klɛli m’ɔ ti e liɛ’n i su b’a nantiman.”
14 Ɔ maan Ɲanmiɛn ɲrun jranfuɛ Ilkia nin Aikamun nin Akbɔɔ nin Safan, ɔ nin Asaya be ɔli Ilda m’ɔ ti Ɲanmiɛn nuan ijɔfuɛ bla’n+ i sin. Arasi i wa Tikva i wa liɛ Salɔmun m’ɔ nian tralɛ’m be su’n, i yi yɛle bla sɔ’n. Ilda tran Zerizalɛmun klɔ’n i lika nga b’a kplɛn i uflɛuflɛ’n su lɔ, lɔ yɛ be kannin ndɛ’n be kleli i-ɔ.+ 15 Bla’n seli be kɛ: “Ndɛ nga Zoova m’ɔ ti Izraɛli Ɲanmiɛn’n kan’n yɛ: ‘Amun se sran ng’ɔ sunmannin amun min sin’n kɛ: 16 “Ndɛ nga Zoova kan’n yɛ: ‘Ɲrɛnnɛn kwlaa nga be kɛn i ndɛ fluwa nga Zida famiɛn’n kanngannin nun’n i nun’n, ń má fá yí i lika nga nin i nunfuɛ’m be su.+ 17 Afin be yacili min lɛ, kpɛkun be yili tɛ mannin ɲanmiɛn uflɛ+ mun yɛ i wunsrɛn’n fite lukuu. Be yoli i kwlaa sɔ’n naan bé fá fɔ́kɔ min awlɛn.+ I sɔ’n ti’n, min ya’n wá júe kɛ sin sa lika nga wun, yɛ ɔ su nuanman.’”+ 18 Ndɛ ng’ɔ fata kɛ amun kan kle Zida famiɛn m’ɔ sunmannin amun kɛ amun wa usa Zoova i sa’n yɛ. Amun se i kɛ: “Ndɛ nga a tili’n i su ndɛ nga Zoova m’ɔ ti Izraɛli Ɲanmiɛn’n kan’n yɛ: 19 ‘Kɛ a tili lika nga nin i nunfuɛ’m be wun ndɛ nga n kannin’n, a sɔli nun klanman, a kannin ɔ wun ase+ Zoova ɲrun. Afin n seli kɛ ń bó be sannzan, yɛ sa ng’ɔ́ ɲán be’n ti’n sran’m be nuan bó be wun. Kɛ a tili ndɛ sɔ’n, a titili ɔ wun tralɛ’m be nun,+ yɛ a sunnin min ɲrun. I sɔ’n ti’n, n kusu n sieli min su ɔ nuan bo, ndɛ nga Zoova kan’n yɛ ɔ o lɛ-ɔ. 20 I sɔ’n ti’n, ń má yó maan a nin ɔ nannan’m bé yía likawlɛ.* Yɛ bé lá wɔ ɔ ndia’n nun lɔ diin, ɔ ɲinma su wunman ɲrɛnnɛn kwlaa nga ń má fá yí i lika nga su’n.’”’” I sin’n, be ko kannin ndɛ sɔ’n be kleli famiɛn’n.