2 Famiɛn Mun

3 Kɛ Famiɛn Zozafati kacili Zida famiɛn’n i afuɛ blu-nin-mɔcuɛ (18) su’n, Akabu i wa Zoramun+ yoli Izraɛli famiɛn Samari lɔ. Ɔ dili famiɛn afuɛ blu-nin-nɲɔn (12). 2 Ɔ yoli sa tɛ Zoova ɲrun titi, sanngɛ i sa tɛ liɛ’n w’a toman i si nin i nin be liɛ’n. Afin ɔ bubuli Baali i yɔbuɛ mɔ i si takali mɔ be sɔ i’n.+ 3 Sanngɛ sa tɛ nga Nebati i wa Zeroboamun ti’n Izraɛlifuɛ’m be yoli’n, ɔ yoli wie.+ W’a yacimɛn i yolɛ.

4 Mesa m’ɔ ti Moabu famiɛn’n ta bua. Ɔ su lapo man Izraɛli famiɛn’n. Ɔ mɛn i bua ba akpiakpi ya kun (100.000), ɔ nin bua ɲin akpiakpi ya kun (100.000) mɔ b’a kpɛkpɛman be wun ndrɛ’n. 5 Kɛ Akabu wuli cɛ’n,+ Moabu famiɛn’n jasoli Izraɛli famiɛn’n i wun.+ 6 Blɛ sɔ’n nun’n Famiɛn Zoramun jasoli Samari lɛ, ɔ yiali Izraɛlifuɛ’m be kwlaa. 7 Asa ekun’n, ɔ ko toli Famiɛn Zozafati m’ɔ ti Zida famiɛn’n i ngaliɛ. Ɔ seli i kɛ: “Moabu famiɛn’n w’a jaso min wun. ?A nin min kɔ́ naan e nin Moabufuɛ mun e ko kun alɛ?” Ɔ tɛli i su kɛ: “E nin wɔ é kɔ́.+ E nin wɔ e ti kun. Min sran mun nin ɔ sran mun be ti kun. Min nnɛn kpanngɔ mun nin ɔ nnɛn kpanngɔ’m be ti kun.”+ 8 I sin’n ɔ usɛli i kɛ: “?Atin benin yɛ ɔ fata kɛ e fa-ɔ?” Ɔ tɛli i su kɛ: “Maan e sin Edɔmun aawlɛ flɛnnɛn’n nun.”

9 Ɔ maan Izraɛli famiɛn’n nin Zida famiɛn’n ɔ nin Edɔmun+ famiɛn’n be ɔli. Kɛ be ɔli m’ɔ dili cɛn nso’n, nzue nga sonja mun nin klɔ nnɛn nga be nin be ɔli’n be ko nɔn’n ɔ wieli. 10 Izraɛli famiɛn’n seli kɛ: “?Ngue sa yɛle nga? Zoova w’a flɛ famiɛn nsan nga mun naan ɔ́ fá be wlá Moabufuɛ’m be sa nun!” 11 Kɛ ɔ yoli sɔ’n, Zozafati usali kɛ: “?Zoova i nuan ijɔfuɛ kun nunman wa mɔ e kwla sin i lika e usa Zoova i sa-ɔ”?+ Izraɛli famiɛn’n i sufuɛ’m be nun kun tɛli su kɛ: “Safati i wa Elize+ mɔ laa’n ɔ gua Eli i sa su nzue’n ɔ o wa.”*+ 12 I sin’n Zozafati seli kɛ: “Zoova kwla sin i lika kan ndɛ kle e.” Ɔ maan Izraɛli famiɛn’n nin Zozafati ɔ nin Edɔmun famiɛn’n be ɔli i sin.

13 Elize seli Izraɛli famiɛn’n kɛ: “?Ngue yɛ a bɛli i yolɛ min wun wa-ɔ?+ Kɔ ɔ si i ɲanmiɛn nuan ijɔfuɛ mun, ɔ nin ɔ nin i ɲanmiɛn nuan ijɔfuɛ’m be sin.”+ Sanngɛ Izraɛli famiɛn’n tɛli i su kɛ: “Cɛcɛ, afin Zoova yɛ ɔ fali famiɛn nsan nga mun bali naan ɔ́ fá be wlá Moabufuɛ’m be sa nun-ɔn.” 14 Kɛ ɔ yoli sɔ’n Elize seli kɛ: “N kan Zoova m’ɔ ti sonja’m be su kpɛn’n mɔ n su i’n,* sɛ min ɲin yiman Famiɛn Zozafati+ m’ɔ ti Zida famiɛn’n, nn n su nianman amun lɔ naan se kɛ ń wún amun.+ 15 Amun fa jru bofuɛ kun be blɛ min.”+ Kɛ jru bofuɛ’n bali m’ɔ́ bó jru’n, Zoova i wawɛ’n* jrɛli i su.+ 16 Yɛ ɔ seli kɛ: “Ndɛ nga Zoova kan’n yɛ: ‘Amun kpɛ kunman kpanngban kongo nga nun. 17 Afin ndɛ nga Zoova kan’n yɛ: “Amun su wunman kɛ aunmuan su fita, yɛ amun su wunman kɛ nzue su tɔ. Sanngɛ nzue wá yí kongo nga,+ yɛ amun nin amun nnɛn mun amún nɔ́n nzue’n.”’ 18 I sɔ yolɛ’n ti pɔpɔ Zoova sa nun.+ I kpa bɔbɔ’n ɔ́ wá fá Moabufuɛ mun wlá amun sa nun.+ 19 Maan amun bubu klɔ kwlaa nga be sisili be wun’n,+ ɔ nin klɔ nga be le ɲrun’n be kwlaa. Amun kpɛkpɛ waka kpakpa’m be kwlaa, amun tannin nzue ti’m be kwlaa, yɛ amun fa yɔbuɛ be gua fie nga be ti kpa’n be kwlaa be nun naan amun saci be.”+

20 Nglɛmun’n, kɛ ble annzɛ i wunsu like mɔ be fa man Ɲanmiɛn nglɛmun’n i manlɛ dɔ’n juli’n,+ bé nían-ɔn, nzue yɛ ɔ́ fín Edɔmun mɛn’n nun sónji bá yɛ. Nzue’n deli lika’n.

21 Moabufuɛ’m be kwlaa be tili i kɛ famiɛn’m b’a ba kɛ be nin be kún alɛ. Ɔ maan be yiali yasua kwlaa nga be kwla tra alɛ kunlɛ like nun’n,* kpɛkun be ko jrannin awɛ’n su lɔ. 22 Be jasoli nglɛmun ndɛ kpa, kɛ ɔ́ yó sɔ’n nn wia’n su bo nzue’n su. Kɛ Moabufuɛ mɔ be o bue kun lɔ’n be nian nzue’n, ɔ blo kɛ mmoja sa. 23 Be seli kɛ: “Mmoja-ɔ. Famiɛn’m b’a fa tokofi b’a kun be wiengu. Moabufuɛ mun, maan e ko fɛn be bo ninnge mun!”+ 24 Kɛ Moabufuɛ’m be juli Izraɛlifuɛ’m be nanmue’n nun lɔ’n, Izraɛlifuɛ’m be jasoli, kpɛkun be boli be kunlɛ bo. Moabufuɛ’m be wanndili be ɲrun.+ Izraɛlifuɛ’m be suli Moabufuɛ’m be su lele be juli Moabu mɛn’n nun lɔ. Kɛ bé kɔ́’n nn bé kún be. 25 Be bubuli klɔ mun, yɛ be tinuntinun be toli yɔbuɛ kun yili i fie nga be ti kpa’n be nun, ɔ maan yɔbuɛ’n truli fie’m be nun. Be tanninnin nzue ti’m be kwlaa.+ Be kpɛkpɛli waka kpakpa’m be kwlaa.+ Saan talɛ ng’ɔ o Kii-Aresɛti+ lɔ’n mɔ be fali yɔbuɛ be yoli’n, i ngunmin yɛ ɔ kali lɛ-ɔ. Sanngɛ kpafloko tofuɛʼm be bo sin yiɛli i, yɛ be bubuli i.

26 Kɛ Moabu famiɛn’n wunnin kɛ b’a kwla be’n, ɔ fali sran ya nso (700) mɔ tokofi o be sa nun’n naan be kunndɛ atin be to Edɔmun famiɛn’n+ i lɔ, sanngɛ w’a yoman ye. 27 Ɔ maan ɔ fɛli i wa klikli m’ɔ́ wá sín i osu dí famiɛn’n, ɔ fɛ i yili tɛ nga kɛ bé yí’n be yra nnɛn’n i kɔlikɔli’n+ talɛ’n su. I sɔ’n ti’n, sran’m be fali Izraɛlifuɛ’m be wun ya dan. Yɛ be jasoli Moabufuɛ’m be mɛn’n nun, be sali be sin.