2 Famiɛn Mun

5 Naaman m’ɔ ti Siri famiɛn’n i sonja’m be su kpɛn’n, ɔ le ɲrun kpa, yɛ i min’n klo i sa kpa. Afin Zoova sinnin i lika ɔ fali kwlalɛ mannin* Sirifuɛ mun. Sanngɛ alɛ kunfuɛ dan sɔ’n ti kokowefuɛ.* 2 Cɛn kun mɔ Siri sonja’m be ɔli alɛ kunlɛ’n, be trali ba bla kaan kun Izraɛli mɛn’n nun be ɔli, kpɛkun ɔ kacili Naaman i yi’n i sufuɛ. 3 Ba bla kan’n seli i min bla’n kɛ: “Sɛ min min’n ko wun Ɲanmiɛn nuan ijɔfuɛ+ ng’ɔ o Samari lɔ’n i wun’n, ɔ́ yó maan i kokowe’n wíe.”+ 4 Ndɛ nga ba bla kan m’ɔ fin Izraɛli’n kannin’n, ɔ* ko kannin kleli i min’n.

5 Siri famiɛn’n seli kɛ: “Kɔ icra’n! Ń má klɛ́ fluwa ń kó mán Izraɛli famiɛn’n.” Ɔ maan ɔ ɔli. Kɛ ɔ́ kɔ́’n ɔ fali sika talan blu* nin sika ɔkwlɛ sikli akpi nsiɛn (6.000),* ɔ nin be wun kacilɛ tralɛ blu. 6 Ɔ fali fluwa’n ko mannin Izraɛli famiɛn’n. I nun ndɛ’n yɛ: “Ń fá fluwa nga ɔ nin min sufuɛ Naaman ń blɛ́ wɔ naan a yo naan i kokowe’n wie.” 7 Kɛ Izraɛli famiɛn’n kanngannin fluwa’n nun cɛ’n, ɔ titili i wun tralɛ’m be nun kpɛkun ɔ seli kɛ: “?Ɲanmiɛn yɛle min mɔ n kwla yo maan sran wu annzɛ ɔ ɲan nguan-ɔn?+ Afin ɔ fali bian nga blɛli min, i waan n yo maan i kokowe’n wie! Amun bɔbɔ amun wun kɛ ɔ su klɔklɔ min.”

8 Sanngɛ kɛ Elize m’ɔ ti Ɲanmiɛn Kpli i sran’n tili i kɛ Izraɛli famiɛn’n w’a titi i wun tralɛ’m be nun’n, ɔ ka lɛ sunmannin sran famiɛn’n i sin naan be ko se i kɛ: “?Ngue ti yɛ a titili ɔ wun tralɛ’m be nun-ɔn? Yaci, mɛn i atin naan ɔ bla min sin. I liɛ’n ɔ́ sí kɛ Ɲanmiɛn nuan ijɔfuɛ kun o Izraɛli wa.”+ 9 Ɔ maan Naaman fɛli i nnɛn kpanngɔ mun nin i alɛ kunlɛ kakaklolo mun kpɛkun ɔ wa jrannin Elize i sua’n i anuan’n nun lɛ. 10 Sanngɛ Elize sunmannin sran kun kɛ ɔ ko se i kɛ: “Kɔ ko wunnzin Zurdɛn’n nun+ kpɛ nso.+ Kpɛkun ɔ wunnɛn’n sɛ́ i sin i osu’n nun, yɛ á yó sanwun.” 11 Kɛ ɔ yoli sɔ’n, Naaman fali ya ɔli, ɔ seli kɛ: “N seli min wun kɛ: ‘Ɔ́ wá fíte bá min wun wa, ɔ́ jrán wa kpɛkun ɔ́ bó i Ɲanmiɛn Zoova i dunman’n, yɛ ɔ́ fɛ́ i sa sínsín min kokowe’n su naan ɔ wie.’ 12 ?Nzue nga be o Damasi+ lɔ’n, Abana nin Faapaa’n, be kpa traman Izraɛli nzue mun? ?N kwlá wunnzinman be nun naan m’an yo sanwun?” Yɛ ɔ kpɛli i wun ɔli-ɔ, kɛ ɔ́ yó sɔ’n nn w’a fa ya kpa.

13 I sufuɛ’m be wunngeli i wun lɔ, be seli i kɛ: “?Min si, sɛ ɔ ti kɛ Ɲanmiɛn nuan ijɔfuɛ’n seli wɔ kɛ a yo like kekle wie’n a su yoman? ?Yɛ sɛ a yo ng’ɔ kannin’n nin? Like nga i waan a yo’n ɔ timan kekle, i waan a ko wunnzin naan a yo sanwun.” 14 Kɛ ɔ yoli sɔ’n, ɔ ɔli ko tɔli* Zurdɛn’n nun kpɛ nso, kɛ nga Ɲanmiɛn Kpli i sran’n fa kannin’n sa.+ Ɔ maan i wunnɛn’n sɛli i sin i osu’n nun kɛ bakan wie i wunnɛn’n sa,+ yɛ ɔ yoli sanwun.+

15 I sin’n, ɔ nin i sran’m be kwlaa be sali be sin Ɲanmiɛn Kpli i sran’n i wun lɔ,+ ɔ ko jrɛnnin i ɲrun lɛ kpɛkun ɔ seli kɛ: “Siɛn’n, m’an wun kɛ asiɛ wunmuan’n su’n, Ɲanmiɛn fi nunman lika uflɛ, saan Izraɛli wa.+ I sɔ’n ti’n, min min, yaci, sɔ like kan nga nun.” 16 Sanngɛ Elize seli kɛ: “N kan Zoova mɔ n su i’n,* n su sɔman nun.”+ Ɔ jrɛnnin i wun kɛ ɔ sɔ nun, sanngɛ w’a kplinman su. 17 I agualiɛ su’n, Naaman seli kɛ: “Sɛ ɔ ti sɔ’n, yaci, maan be man min nvle nga nun fa’n wie. Maan ɔ ju nga milɛ nɲɔn be kwla sua’n. Afin n su yiman tɛ nga kɛ bé yí’n be yra nnɛn’n i kɔlikɔli’n nin tɛ uflɛ n manman ɲanmiɛn wie fi kun, saan Zoova yɛ ń yí mɛ́n i-ɔ. 18 Sanngɛ min min, maan Zoova yaci sa kunngba nga cɛ min: Kɛ min min’n wlu Rimɔn i sua’n nun lɔ m’ɔ koto’n, ɔ kisa min sa’n su. Ɔ maan ɔ fata kɛ n koto Rimɔn i sua’n nun lɔ. Sɛ n koto Rimɔn i sua’n nun lɔ’n, maan Zoova yaci sa sɔ’n cɛ min.” 19 Yɛ Elize seli i kɛ: “Kɔ, maan ɔ wun jɔ wɔ fɔuun.” Kɛ ɔ ɔli m’ɔ juli mmua kan’n, 20 kpɛkun Geazi+ m’ɔ ti Elize m’ɔ ti Ɲanmiɛn Kpli i sran’n+ i sufuɛ’n seli i wun kɛ: ‘Min min’n w’a yaci Sirifuɛ Naaman+ i nun w’a wɔ, w’a sɔman like ng’ɔ fa bali’n nun. N kan Zoova, ń má wánndi ń sú i su naan ń kó fá like kun i sa nun.’ 21 Yɛ Geazi suli Naaman su-ɔ. Naaman nían-ɔn, sran kun su wanndi su i su. Ɔ fin i kakaklolo’n nun jrali ko kpɛli i atin, ɔ usɛli i kɛ: “?Ndɛ kan-ɔn?” 22 Ɔ tɛli su kɛ: “Ndɛ fi. Min min’n yɛ ɔ sunmannin min-ɔn. I waan: ‘Nian! Icra’n gbanflɛn nɲɔn mɔ be ti Ɲanmiɛn nuan ijɔfuɛ’m be mma mun’n, be fin Efraimun lɔ okaoka lika’n nun lɔ b’a ba. I sɔ’n ti’n, yaci, man be sika talan kun nin be wun kacilɛ tralɛ nɲɔn.’”+ 23 Naaman seli kɛ: “Be yɛ, fa talan nɲɔn.” Ɔ jrɛnnin i wun kpa,+ ɔ maan ɔ cicili sika talan nɲɔn wun fa sieli bajɛ nɲɔn nun, ɔ nin be wun kacilɛ tralɛ nɲɔn. Ɔ fa be mɛnnin i sufuɛ nɲɔn naan b’a fa dun Geazi i ɲrun mmua.

24 Kɛ ɔ juli Ofɛli* lɛ’n, ɔ fali ninnge mun be sa nun, ɔ fa be sieli i sua’n nun lɔ, kpɛkun ɔ mannin sran sɔ’m be atin naan be sa be sin. Kɛ be ɔli’n, 25 ɔ wluli i min’n i sin lɔ ko jrɛnnin i wun lɛ. Yɛ Elize usɛli i kɛ: “?Geazi, nin yɛ a fin-ɔn?” Ɔ tɛli i su kɛ: “Ɔ sufuɛ’n w’a ɔman lika fi.”+ 26 Yɛ Elize seli i kɛ: “?Kɛ bian’n fin i kakaklolo’n nun jrali m’ɔ ko kpali wɔ atin’n, a bu i kɛ m’an wunman wɔ? ?Blɛ nga nun yɛ ɔ fata kɛ be sɔ sika annzɛ tralɛ annzɛ olivie fie annzɛ viɲin fie annzɛ bua annzɛ nannin annzɛ junman difuɛ yasua annzɛ junman difuɛ bla nun-ɔn?+ 27 Nian, Naaman i kokowe’n+ wá ká wɔ nin ɔ osu’n nunfuɛ mun amun wun tititi.” Ɔ ka lɛ fiteli, ɔ nin i wun kokowe’n, ɔ fɛn fuaii kɛ laglasi ng’ɔ fin nglo lɔ gua munkɛnmunkɛn’n sa.+