2 Be Ɲoliɛ

31 Kɛ be wieli i kwlaa sɔ’n i yo cɛ’n, Izraɛlifuɛ’m be kwlaa nga be o lɛ’n, be ɔli Zida klɔ’m be su. Be fufuli yɔbuɛ nga sran’m be takali be mɔ be sɔ be’n be nun,+ be kpɛkpɛli waka nga sran’m be sɔ be’n* be bo,+ be sacili lika nglonglo mun+ nin tɛ yiwlɛ+ nga be o Zida nin Bɛnzamɛn akpasua’m be su’n, nin nga be o Efraimun nin Manase+ be akpasua’m be su’n. Be nunnunnin be sekeseke. I sin’n, Izraɛlifuɛ’m be kwlaa be sali be sin be klɔ’m be su. Be ɔli be tranwlɛ’m be nun sɛsɛsɛ.

2 Kɛ ɔ yoli sɔ’n, Ezekiasi siesieli Ɲanmiɛn ɲrun jranfuɛ mun be akpasua’m be nun,+ yɛ ɔ siesieli Levifuɛ mun be akpasua’m be nun.+ Ɔ le akpasua kun nin i junman m’ɔ di-ɔ.+ Ɔ siesieli be sɔ naan be yi tɛ nga kɛ bé yí’n be yra nnɛn’n i kɔlikɔli’n, nin bo kun yolɛ tɛ mun, naan be di junman mun, yɛ be la Ɲanmiɛn i ase, be mɛnmɛn i, Zoova i awlo klun’m* be anuan’m be nun.+ 3 Famiɛn’n fɛli i bɔbɔ i ninnge’m be wie mannin naan be fa yi tɛ nga kɛ bé yí’n be yra nnɛn’n i kɔlikɔli’n.+ Be yi tɛ sɔ’n nglɛmun nin nnɔsua,+ nin Wunmiɛn-lolɛ-cɛn’n nun,+ nin anglo le kun+ nin cɛn dilɛ onga’m be nun,+ kɛ ng’ɔ ti klɛwa Zoova i Mmla’n nun’n sa.

4 Asa ekun’n, ɔ seli be nga be tran Zerizalɛmun’n kɛ ninnge ng’ɔ fata kɛ be fa man Ɲanmiɛn ɲrun jranfuɛ nin Levifuɛ mun’n, be yi man be,+ kɛ ɔ ko yo naan b’a nanti Zoova i mmla’n su trele’n* ti. 5 Kɛ ɔ kannin sɔ cɛ’n, Izraɛlifuɛ’m be fali be ble nin be ɔɔzu mma klikli’n, nin be duvɛn uflɛuflɛ’n i klikli nga be ɲɛnnin i’n, nin ngo klikli nga be ɲɛnnin i’n,+ nin awɛma nzue klikli nga be ɲɛnnin i’n, ɔ nin be fie su ninnge kwlaa nga be ɲɛnnin i’n i klikli’n+ i sɔ kpanngban kpa be mannin. Be fali be ninnge kwlaa i blusu’n be bali kpanngban kpa.+ 6 Yɛ Izraɛlifuɛ nin Zidafuɛ nga be tran Zida klɔ’m be su’n, be kusu be fali be nannin mun nin be bua mun i blusu’n be bali. Be fali ninnge nga be sieli be ngunmin mɔ be yoli be sanwun+ fa mannin Zoova m’ɔ ti be Ɲanmiɛn’n, be bali wie. Be fɛli i kwlaa sɔ’n bali, kpɛkun be tiɛntiɛnnin i nuan kwlekwle. 7 I anglo nsan su’n,+ be boli ninnge nga be fa bali’n i nuan tiantianlɛ bo. I anglo nso su’n,+ be wieli i nuan tiantian. 8 Kɛ Ezekiasi nin sran dandan’m be bali mɔ be wunnin ninnge nga b’a tiantian be nuan’n, be manmannin Zoova. Kpɛkun be boli muae mannin Izraɛlifuɛ mɔ be ti i sran’n.

9 Ezekiasi usali Ɲanmiɛn ɲrun jranfuɛ mun nin Levifuɛ mun ninnge sɔ mɔ be tiantiannin be nuan’n i su sa. 10 Yɛ Azaria m’ɔ ti Ɲanmiɛn ɲrun jranfuɛ’m be su kpɛn’n m’ɔ fin Zadɔku i awlo’n nun’n, ɔ seli kɛ: “Kɛ ɔ fin cɛn mɔ sran’m be boli ninnge’m be fa balɛ bo Zoova i sua’n nun+ wa’n, be di like lele be ku yi. I kpanngban kpa bɔbɔ ka lɛ. Afin Zoova yrɛli i sran’m be su. Yɛ ng’ɔ ka’n, yɛle i kwlaa ng’ɔ o yɛ’n.”+

11 Kɛ ɔ yoli sɔ’n, Ezekiasi seli be kɛ be siesie ninnge’m be guawlɛ*+ Zoova i sua’n nun lɔ. Yɛ be siesieli be-ɔ. 12 Kɛ ɔ fin lɛ’n, be fali be ninnge mun, nin be blusu mun,+ nin ninnge nga be fa su Ɲanmiɛn’n be bali tititi. Konania m’ɔ ti Levifuɛ’n, yɛ be sieli i kɛ ɔ nian ninnge kwlaa sɔ’m be su-ɔ. Sran ng’ɔ mɛntɛn i’n yɛle i niaan bian Simei. 13 Kɛ nga Famiɛn Ezekiasi fa kannin’n sa’n, Konania nin i niaan bian Simei be ukafuɛ mun yɛle Zeiɛli, nin Azazia, nin Naati, nin Azaɛli, nin Zerimɔtu, nin Zozabadi, nin Eliɛli, nin Isimakia, nin Maati, nin Benaya. Azaria yɛ ɔ nian Ɲanmiɛn Kpli i sua’n su-ɔ. 14 Imna i wa Kɔre m’ɔ ti Levifuɛ’n m’ɔ nian anuan ng’ɔ o wia afiliɛ’n lɔ’n su’n+ yɛ ɔ sɔ ninnge nga sran’m be klun klo su be fa man+ Ɲanmiɛn Kpli’n nun-ɔn. Asa ekun’n, ninnge nga be fa mannin Zoova’n+ ɔ nin ninnge nga be ti i liɛ klonglo’n, i yɛ ɔ cɛcɛ nun-ɔn.+ 15 Kɔre sɔ’n yɛ ɔ nian Edɛnin nin Miniamin nin Zesua nin Semaia nin Amaria nin Sekania mɔ be o Ɲanmiɛn ɲrun jranfuɛ’m be klɔ’m be su’n,+ be junman’n su-ɔ. Sran sɔ’m be ti sran mɔ be kwla lafi be su-ɔ. Be yɛ be cɛcɛ ninnge’m be nun sɛsɛsɛ man be niaan nga be ti kanngan nin nga be ti kpɛnngbɛn mɔ be o be akpasuaakpasua’m+ be nun’n mun-ɔn. 16 Asa ekun’n, be cɛcɛli ninnge sɔ mun mannin be nga be klɛli be dunman be awlobo’m be fluwa’m be nun’n. Sran sɔ mun yɛle be nga be ba Zoova i sua’n nun junman dilɛ cɛn kwlakwla’n mɔ be di be junman’n be akpasua fanunfanun’m be nun’n, ɔ nin be mma nga b’a ɲan afuɛ nsan nin nga b’a tra afuɛ nsan’n.

17 Kɛ bé klɛ́ Levifuɛ nga be le afuɛ ablaɔn (20) nin nga b’a tra afuɛ ablaɔn’n,+ nin Ɲanmiɛn ɲrun jranfuɛ’m be dunman be awlobo’m+ be fluwa’m be nun’n, be niannin awlo nga i nun yɛ be fin’n nun, nin junman nga be fa mannin be akpasua’n be su naan b’a klɛ.+ 18 Kɛ bé klɛ́ be dunman sɔ’n, be klɛli be mma yasua mun, nin be yi mun, nin be wa bla mun, yɛle kɛ be akpasua’n nunfuɛ’m be kwlaa be dunman wie. (Kɛ ɔ ko yo naan b’a di be junman m’ɔ ti Ɲanmiɛn liɛ klonglo’n, be yoli be sanwun titi. Afin be ti sran mɔ be kwla lafi be su-ɔ.) 19 Ɲanmiɛn ɲrun jranfuɛ nga be tran be klɔ’m be sin lɛ nnɛn didiwlɛ’m be nun’n,+ mɔ be fin Aarɔn i osu’n nun’n, be klɛli be dunman be awlobo’m be fluwa’m be nun wie. Klɔ dandan’m be kwlaa be su’n, be boli sran wie’m be dunman yɛ be seli be kɛ be nian Ɲanmiɛn ɲrun jranfuɛ’m be nun naan be cɛcɛ ninnge mun man yasua mun, nin be kwlaa nga be klɛli be dunman Levifuɛ’m be awlobo’m be fluwa’m be nun’n.

20 I sɔ yɛ Ezekiasi yoli i Zida wunmuan’n nun-ɔn. Ɔ yoli sa ng’ɔ ti kpa’n nin like ng’ɔ ti su’n Zoova m’ɔ ti i Ɲanmiɛn’n i ɲrun, yɛ ɔ nin i be nantili klanman titi. 21 Ɔ tuli i klun kunndɛli i Ɲanmiɛn’n. Maan ɔ wie Ɲanmiɛn Kpli i sua’n nun lɔ junman dilɛ’n nun-o,+ annzɛ Mmla’n nin Ɲanmiɛn ndɛ’n be su nantilɛ’n nun-o, w’a cuɛncuɛnmɛn i ja ase kaan sa. Yɛ like kwlaa yoli ye i sa nun.