2 Be Ɲoliɛ
5 Zoova i sua’n i su junman kwlaa ng’ɔ fata kɛ Salomɔn di’n, ɔ wieli i di.+ Kɛ ɔ yoli sɔ’n, ɔ fali ninnge nga i si Davidi yoli be sanwun’n bali.+ Ɔ fali sika’n nin sika ɔkwlɛ’n, nin ninnge onga’m be kwlaa sieli i Ɲanmiɛn Kpli i sua’n nun lɔ ninnge siewlɛ’m be nun.+ 2 Blɛ sɔ’n nun’n, Salomɔn yiali Izraɛli kpɛnngbɛn mun, yɛle kɛ akpasua’m be su kpɛnngbɛn’m be kwlaa, nin Izraɛlifuɛ’m be si’m be awloboawlobo’m be su kpɛn mun. Be bali Zerizalɛmun lɛ naan bé kó fá Zoova i aenguɛ’n i alaka’n Davidi Klɔ lɔ,+ yɛle kɛ Siɔn+ lɔ. 3 Kɛ bé dí cɛn* nga be di i anglo nso su’n nun’n, Izraɛli lɔ sran’m be kwlaa be yiali famiɛn’n i ɲrun lɛ.+
4 Izraɛli kpɛnngbɛn’m be kwlaa be bali. Kpɛkun Levifuɛ’m be mannin Alaka’n su.+ 5 Be suali Alaka’n, nin tannin sua mɔ Ɲanmiɛn yi i wun nglo nun’n,+ nin ninnge kwlaa nga be o tannin sua’n nun mɔ be ti Ɲanmiɛn liɛ klonglo’n. Ɲanmiɛn ɲrun jranfuɛ mun nin Levifuɛ mun* yɛ be suali ninnge sɔ mun-ɔn. 6 Famiɛn Salomɔn nin Izraɛlifuɛ’m be kwlaa nga be yiali be kɛ be wɔ i wun lɔ’n, be jrannin Alaka’n i ɲrun lɛ. Bua nin nannin nga be fa yili tɛ’n, be sɔnnin dan+ ti’n, b’a kwlá kaman be. 7 I sin’n, Ɲanmiɛn ɲrun jranfuɛ’m be fali Zoova i aenguɛ’n i alaka’n be ko sieli i lika ng’ɔ fata kɛ be sie i lɛ’n. Be tɛkɛli i sua ba ng’ɔ o Ɲanmiɛn sua’n i klun lɔ mmuammua kpa’n i nun lɔ, yɛle kɛ Sua Ba Ngunmin Kun m’ɔ ti Ɲanmiɛn liɛ Klonglo’n nun lɔ, seribɛn’m be ndɛwa’m be bo lɛ.+ 8 Seribɛn’m be ndɛwa’m be nun ti trɛwa, yɛ be o lika nga Alaka’n taka lɛ’n i ti su nglo. Ɔ maan seribɛn’m be kata Alaka’n nin i waka floloflolo’m+ be ti su nglo. 9 Waka floloflolo’m be ti tɛnndɛn ti’n, sran ng’ɔ o Sua Ba m’ɔ ti Ɲanmiɛn liɛ Klonglo’n nun’n, ɔ wun be ti mun. Sua ba sɔ’n wo Sua Ba Ngunmin Kun m’ɔ ti Ɲanmiɛn liɛ Klonglo’n i ɲrun lɛ. Sanngɛ sran ng’ɔ o gua su lɔ’n, ɔ wunman be. Andɛ nin andɛ’n waka sɔ’m be te o lɔ. 10 Like fi nunman Alaka’n nun, saan yɔbuɛ paplaapla nɲɔn nga Moizi fa be sieli nun Orɛbu lɔ’n.+ I nun mɔ Izraɛlifuɛ’m be fin Ezipti lɔ fiteli+ mɔ Zoova nin be trali aenguɛ’n,+ yɛ Moizi fa be sieli nun-ɔn.
11 Kɛ Ɲanmiɛn ɲrun jranfuɛ’m be fin lika m’ɔ ti Ɲanmiɛn liɛ klonglo’n nun fiteli’n (afin Ɲanmiɛn ɲrun jranfuɛ kwlaa nga be o lɛ’n, kannzɛ akpasua+ nga be o nun’n ti sɛ ti sɛ’n, sanngɛ be yoli be wun sanwun),+ 12 tralɛ nga Levifuɛ kwlaa nga be ti jue tofuɛ+ mɔ Azafu,+ nin Eman,+ nin Zeditɛn,+ nin be mma mun, nin be niaan mun yɛ be dun be ɲrun’n be wlali’n, jese ɲanman plilili yɛ be fa yoli-ɔ. Sɛnbali nin miziki bolɛ ninnge nga be le ɲanman’n nin jru o Levifuɛ sɔ’m be sa nun. Yɛ be jranjrannin Alaka’n i wia afiliɛ lɔ bue liɛ’n su. Kɛ ɔ́ yó sɔ’n, nn Ɲanmiɛn ɲrun jranfuɛ ya kun ablaɔn (120) nga be o be wun lɛ’n, bé bó awɛ.+ 13 Awɛ bofuɛ mun nin jue tofuɛ’m be manmannin Zoova, yɛ be lɛli i ase likawlɛ. Kɛ bé yó sɔ mɔ awɛ nin sɛnbali nin miziki bolɛ ninnge onga’m bé tɛ́’n, mɔ bé mánmán Zoova’n, “afin ɔ ti kpa, yɛ i sran klolɛ dan’n wieman le,”+ ɲanmiɛn ble’n yili Ɲanmiɛn sua’n, yɛle kɛ Zoova i sua’n.+ 14 Ɲanmiɛn ble sɔ’n ti’n, Ɲanmiɛn ɲrun jranfuɛ’m b’a kwlá diman be junman’n kun. Nanwlɛ, Zoova i ɲrun ɲanɲan’n deli Ɲanmiɛn Kpli i sua wunmuan’n.+