Jue Mun
Ɔ ti jue tofuɛ’m be su kpɛn’n i liɛ. Maalati* su. Maskili* su. Davidi i jue-ɔ.
53 Sinnglinfuɛ’n se i klun lɔ kɛ:
“Zoova nunman lɛ.”+
Sa nga be yo’n be timan kpa, yɛ be ayeliɛ’n ti tɛ.
Be nun wie fi yoman sa kpa.+
2 Sanngɛ kɛ Ɲanmiɛn o nglo lɔ’n, ɔ nian klɔ sran mun+
naan ɔ́ nían sɛ be nun kun ti akunndanfuɛ-o, sɛ be nun kun kunndɛ Zoova-o.+
3 Be kwlaa b’a fa atin uflɛ,
be kwlaa b’a saci,
be nun wie fi yoman sa kpa,
ɔ leman be nun kun sa m’ɔ yo sa kpa-ɔ.+
4 ?Be nga be yo sa tɛ’n, be nun kun sa wunman sa wlɛ?
Be di min nvle’n nunfuɛ’m be lufle kɛ aliɛ wie yɛ be su di sa.
Be kpan flɛman Zoova.+
5 Sanngɛ srɛ dan kpa wá kún be,
srɛ dan kɛ ngalɛ’n sa’n nin-a kunman be le.*
Afin Ɲanmiɛn wá trú be nga be fa alɛ wla ɔ sin’n be owie’m be nun.
Á wá gúa be ɲin ase, afin Zoova w’a yi be blo.
6 Ee, maan Izraɛli i delɛ’n fin Siɔn!+
Kɛ Zoova ko fɛ i nvle’n nunfuɛ nga be trali be ɔli’n ko ba’n,
maan Zakɔbu i klun jɔ, maan Izraɛli di aklunjɔɛ.