Akunndanfuɛ’n
3 Like kwlaa le i yolɛ blɛ,
junman kwlaa nga be di i ɲanmiɛn’n i bo wa’n, ɔ le kun nin i yolɛ blɛ:
2 Ɔ le blɛ kun mɔ be fa wu ba-ɔ, yɛ ɔ le blɛ kun mɔ
be wu-ɔ.
Ɔ le blɛ kun mɔ be fa ta waka-ɔ, yɛ ɔ le blɛ kun mɔ be fa tu waka nga be tali’n i bo-ɔ.
3 Ɔ le blɛ kun mɔ be fa kun like-ɔ, yɛ ɔ le blɛ kun mɔ be fa yo like juejue-ɔ.
Ɔ le blɛ kun mɔ be fa bubu like-ɔ, yɛ ɔ le blɛ kun mɔ be fa kplan like-ɔ.
4 Ɔ le blɛ kun mɔ be fa sun-ɔn, yɛ ɔ le blɛ kun mɔ be fa sri-ɔ.
Ɔ le blɛ kun mɔ be fa yi ngwlɛ-ɔ, yɛ ɔ le blɛ kun mɔ be fa si able-ɔ.*
5 Ɔ le blɛ kun mɔ be fa to yɔbuɛ-ɔ, yɛ ɔ le blɛ kun mɔ be fa tian yɔbuɛ nuan-ɔn.
Ɔ le blɛ kun mɔ be fa tɔ sran nun-ɔn, yɛ ɔ le blɛ kun mɔ be se kɛ be tɔman sran nun-ɔn.
6 Ɔ le blɛ kun mɔ be fa kunndɛ like-ɔ, yɛ ɔ le blɛ kun mɔ be se kɛ like kun w’a mlin mlɔnmlɔn mɔ be yaci i kunndɛlɛ-ɔ.
Ɔ le blɛ kun mɔ be fa yia like su-ɔ, yɛ ɔ le blɛ kun mɔ be fa yi like blo-ɔ.
7 Ɔ le blɛ kun mɔ be fa titi like nun-ɔn,+ yɛ ɔ le blɛ kun mɔ be fa kpa like nun-ɔn.
Ɔ le blɛ kun mɔ be fa muan be nuan-ɔn,+ yɛ ɔ le blɛ kun mɔ be fa ijɔ-ɔ.+
8 Ɔ le blɛ kun mɔ be fa klo like-ɔ, yɛ ɔ le blɛ kun mɔ be fa kpɔ like-ɔ.+
Ɔ le blɛ kun mɔ be fa kun alɛ-ɔ, yɛ ɔ le blɛ kun mɔ be fa di fɔundi-ɔ.
9 ?Ngue yɛ junman difuɛ’n ɲɛn i i ɲin m’ɔ mian di junman’n nun-ɔn?+ 10 N wunnin junman nga Ɲanmiɛn fa mannin klɔ sran mun naan b’a di junman titi’n. 11 Ɔ yoli like kwlaa klanman blɛ ng’ɔ ti i su’n i nun.+ Ɔ fali nguan m’ɔ leman awieliɛ’n bɔbɔ wlali be awlɛn’n nun. Sanngɛ klɔ sran’m be su kwlá siman like nga Ɲanmiɛn Kpli yoli’n guɛmɛn i ti nin i bo.
12 N wunnin kɛ like ng’ɔ ti kpa man be’n, yɛle kɛ be di aklunjɔɛ yɛ be yo sa kpa be nguan blɛ’n nun.+ 13 Yɛ n wunnin kɛ ɔ fata kɛ sran kwlaa di like, ɔ nɔn nzan, yɛ ɔ di aklunjɔɛ junman kekle kwlaa ng’ɔ di’n ti. Ɔ ti like mɔ Ɲanmiɛn fa cɛ i-ɔ.+
14 N ma wunnin kɛ like kwlaa nga Ɲanmiɛn Kpli yo’n, ɔ́ ká lɛ tititi. Ɔ nunman nun kɛ be fa like uka su, annzɛ be yi su. Ɲanmiɛn Kpli yoli i sɔ naan sran’m be sro i.+
15 Sa kwlaa ng’ɔ ju’n w’a dun mmua w’a ju laa, yɛ sa kwlaa ng’ɔ́ wá jú’n, w’a dun mmua w’a ju laa.+ Sanngɛ Ɲanmiɛn Kpli kunndɛ like nga be kpɛli i sin atin’n.*
16 N wunnin sa nga ekun ɲanmiɛn’n i bo wa: Lika ng’ɔ fata kɛ sa nuan su sɛsɛ yolɛ’n tran lɛ’n, klunwi’n yɛ ɔ o lɛ-ɔ, yɛ lika ng’ɔ fata kɛ sa kpa yolɛ’n tran lɛ’n, klunwi’n yɛ ɔ o lɛ-ɔ.+ 17 Ɔ maan n seli min klun lɔ kɛ: “Ɲanmiɛn Kpli wá dí sran kpa’n nin klunwifuɛ’n be jɔlɛ,+ afin junman kwlaa nin sa kwlaa be le be yolɛ blɛ.”
18 N seli min klun lɔ kɛ Ɲanmiɛn Kpli wá sá klɔ sran mun nían, yɛ ɔ́ klé be kɛ be ti kɛ nnɛn mun sa. 19 Afin sran’m be le agualiɛ, yɛ nnɛn’m be le agualiɛ. Be kwlaa be agualiɛ’n ti kun.+ Kɛ kun fa wu’n, yɛ kun’n kusu fa wu wie-ɔ. Wunmiɛn nga Ɲanmiɛn fa man sran mun mɔ i ti yɛ be o nguan nun’n, i kunngba’n yɛ ɔ fa man nnɛn mun-ɔn.+ Ɔ maan sran’n i kpa traman nnɛn’n, afin i kwlaa ti afɛ ngbɛn. 20 Be kwlaa be kɔ lika kunngba’n nun.+ Be kwlaa be fin ndutre nun,+ yɛ be sa be sin ndutre nun.+ 21 ?Wan yɛ ɔ kwla se kɛ wunmiɛn ng’ɔ o klɔ sran nun mɔ i ti yɛ ɔ o nguan nun’n, ɔ fu kɔ nglo, naan wunmiɛn ng’ɔ o nnɛn’m be nun’n ɔ jra asiɛ’n bo lɔ-ɔ?+ 22 Yɛ n wunnin kɛ like ng’ɔ ti kpa man sran’n yɛle kɛ ɔ di aklunjɔɛ i junman’n nun,+ afin i sɔ’n yɛ ɔ ti i akatua’n niɔn.* ?Afin kɛ ɔ ko wɔ’n, wan yɛ ɔ kwla yo naan w’a si sa nga bé jú i sin wa’n niɔn?+