Zeremin

32 Kɛ Sedesiasi yoli Zida famiɛn’n i afuɛ blu su’n, m’ɔ ti Nebikadnezaa*+ i famiɛn dilɛ liɛ’n i afuɛ blu-nin-mɔcuɛ (18) su’n, Zoova kan ndɛ kleli Zeremin. 2 Kɛ ɔ́ yó sɔ’n, nn Babilɔnin famiɛn’n i sonja’m b’a bo b’a sin b’a yia Zerizalɛmun klɔ’n. Yɛ Zeremin kusu o bisua Gladi Difuɛ’m be Awlo Klun’n+ nun lɔ, Zida famiɛn’n i awlo lɔ. 3 Afin Sedesiasi m’ɔ ti Zida famiɛn’n wlɛli i bisua.+ Ɔ seli i kɛ: “?Ngue ti yɛ a kan ndɛ kɛ ngalɛ’n sa’n niɔn? A se kɛ: ‘Zoova waan yoo: “Ń má fá klɔ nga ń wlá Babilɔnin famiɛn’n i sa nun. Kpɛkun ɔ́ útu klɔ’n.+ 4 Yɛ Sedesiasi m’ɔ ti Zida famiɛn’n su ɲɛnmɛn i ti Kaldefuɛ’m be sa nun. Afin saan bé trɛ́ i wlá Babilɔnin famiɛn’n i sa nun. Bé nían be wiengu ɲrun, be ɲinma tá be wiengu yɛ ɔ́ kán ndɛ klé i-ɔ.”’+ 5 Zoova waan yoo: ‘Ɔ́ fá Sedesiasi kɔ́ Babilɔnin, yɛ ɔ́ ká lɔ lele naan m’an ko niɛn i lika. Kannzɛ bɔbɔ amun nin Kaldefuɛ’m be kun sɛ’n, amun su kwlaman be.’”+

6 Zeremin waan yoo: “Zoova kannin ndɛ kleli min. Ɔ seli min kɛ: 7 ‘Ɔ si i niaan bian Salɔmun i wa Anamɛli wá wún ɔ wun, kpɛkun ɔ́ sé ɔ kɛ: “To min fie ng’ɔ o Anatɔtu+ lɔ’n, afin wɔ yɛ ɔ fata kɛ a to-ɔ.”’”+

8 Kɛ nga Zoova fa kannin’n sa’n, min si i niaan bian’n i wa Anamɛli wa wunnin min wun Gladi Difuɛ’m be Awlo Klun’n nun lɔ, kpɛkun ɔ seli min kɛ: “Yaci, to min fie ng’ɔ o Anatɔtu m’ɔ o Bɛnzamɛn i asa’n su lɔ’n. Afin wɔ yɛ ɔ fata kɛ a fa-ɔ, yɛ wɔ yɛ ɔ fata kɛ a to-ɔ. To naan fa.” Ɔ maan n wunnin i wlɛ kɛ Zoova yɛ i waan n yo sɔ-ɔ.

9 I sɔ’n ti’n, n toli fie ng’ɔ o Anatɔtu lɔ’n min si i niaan bian’n i wa Anamɛli i sa nun. Sika nga n sunnzun+ mɛnnin i’n, ɔ ti sikli* nso nin sika mma blu. 10 I sin’n, n yoli fie mɔ n toli’n i wun fluwa.+ Kpɛkun n fali nzɔliɛ n sieli su. N flɛli lalofuɛ mun,+ kpɛkun n sunnzunnin sika ng’ɔ fata kɛ n tannin’n toe kun su. 11 N fali fie nga n toli’n i wun fluwa’n (fluwa nga be sieli su nzɔliɛ kɛ nga mmla’n fa kleli’n sa’n, ɔ nin nga b’a sieman su nzɔliɛ’n.) 12 Kpɛkun n fa mannin Bariki+ m’ɔ ti Maseya i wa Neria+ i klun ba’n. Kɛ ɔ́ yó sɔ’n, nn min si i niaan bian’n i wa Anamɛli nin lalofuɛ nga be klɛli fie’n i wun fluwa’n su’n, ɔ nin Zifu’m be kwlaa nga be titi Gladi Difuɛ’m be Awlo Klun’n+ nun lɔ’n be o lɛ.

13 Kpɛkun be kwlaa be ɲrun lɛ’n, n seli Bariki kɛ: 14 “Zoova m’ɔ ti sonja’m be su kpɛn’n, m’ɔ ti Izraɛli Ɲanmiɛn’n waan yoo: ‘Fa fluwa sɔ mun, nga be sieli su nzɔliɛ’n ɔ nin nga b’a sieman su nzɔliɛ’n, kpɛkun fa be wlɛ i sɛ kun mɔ be fali ufa be yoli’n nun, kɛ ɔ ko yo naan b’a cɛ kpa’n ti.’ 15 Zoova m’ɔ ti sonja’m be su kpɛn’n, m’ɔ ti Izraɛli Ɲanmiɛn’n waan yoo: ‘Bé wá tó sua nin fie nin viɲin fie nvle nga nun wa ekun.’”+

16 Kɛ n fali fie’n i wun fluwa’n n mannin Neria i wa Bariki’n, n srɛli Zoova. N seli i kɛ: 17 “Ee, min Min Zoova, wɔ mɔ a Sie Like Kwlakwla’n, a fali ɔ tinmin dan’n+ nin ɔ sa mɔ wunmiɛn o nun’n yili ɲanmiɛn m’ɔ la nglo lɔ plaii’n nin asiɛ’n. Like fi timan dan ngboko ɔ ɲrun. 18 A kle kɛ a klo sran akpiakpi, sanngɛ a yaci ba’m be lɛ naan be wun sa tɛtɛ nga be si’m be yoli be laa’n be sin afɛ’n.+ A ti Ɲanmiɛn Kpli, a ti dan, a le tinmin. Ɔ dunman’n yɛle Zoova m’ɔ ti sonja’m be su kpɛn’n. 19 Sa nga ɔ waan á yó be’n be ti dandan.* Yɛ sa nga a yo be’n be yo sro.+ Ɔ ɲinma ta like kwlaa nga sran’m be yo’n,+ kɛ ɔ ko yo naan w’a fa sran kun i nzuɛn’n nin i ayeliɛ’n i nuan su like’n w’a mɛn i’n ti.+ 20 A yoli sa sroesroe mun nin abonuan sa mun Ezipti lɔ. Yɛ andɛ nin andɛ’n, sran’m be wla te kpɛn su. A yoli maan ɔ dunman’n fuli Izraɛli lɔ nin klɔ sran’m be afiɛn,+ kɛ andɛ liɛ’n sa. 21 A fali ɔ sa mɔ tinmin nin wunmiɛn dan o nun’n, a yoli sa kekleekle mun, nin abonuan sa mun, nin sa sroesroe mun naan w’a fa Izraɛlifuɛ mɔ be ti ɔ nvle’n Ezipti lɔ w’a fite.+

22 “I sin’n, mɛn nga a tali be nannan’m+ be nda kɛ á fá mán be’n a fa mannin be. Nɔnnɔn nin awɛma nzue be sonji mɛn sɔ’n nun.+ 23 Kpɛkun be ɔli be ko fali mɛn sɔ’n. Ɔ nin i sɔ ngba’n, b’a faman ɔ nuan ndɛ’n su, yɛ b’a nantiman ɔ mmla’n su. Like nga a seli be kɛ be yo’n, b’a yoman wie fi. I sɔ’n ti yɛ a fali ɲrɛnnɛn kwlaa nga mun fa yili be su-ɔ.+ 24 Nian! Sran wie’m be bali, be kplannin like fleiin wie mun klɔ’n i talɛ’n i wun naan bé útu klɔ’n.+ Yɛ alɛ’n*+ nin awe’n nin tukpacɛ m’ɔ sa ndɛndɛ’n+ ti’n, saan klɔ’n tɔ́ Kaldefuɛ mɔ be bali alɛ kunlɛ’n be sa nun. Ndɛ kwlaa nga a kannin’n, ɔ kpɛnnin su kɛ nga a fa wun i andɛ yɛ’n sa. 25 Ɔ nin i sɔ ngba’n, min Min Zoova, wɔ mɔ a Sie Like Kwlakwla’n, a seli min kɛ: ‘Fa sika naan to fie’n. Yɛ flɛ lalofuɛ naan be trɛn i bo.’ Kusu nn klɔ’n su wa tɔ Kaldefuɛ’m be sa nun. Saan bé fá.”

26 Yɛ Zoova kannin ndɛ kleli Zeremin-ɔn. Ɔ seli i kɛ: 27 “N bɔbɔ Zoova mɔ n ti klɔ sran’m be kwlakwla be Ɲanmiɛn’n, min yɛ n o yɛ. ?Sa benin yɛ ɔ ti dan ngboko mɔ i ti yɛ n kwlá yoman-ɔn? 28 N bɔbɔ Zoova, min waan yoo: ‘Ń fá klɔ nga ń wlá Kaldefuɛ mun nin Nebikadnezaa* m’ɔ ti Babilɔnin famiɛn’n i sa nun, yɛ ɔ́ útu klɔ’n.+ 29 Yɛ Kaldefuɛ mɔ be su fa alɛ wla klɔ nga i sufuɛ’m be sin’n, bé wlú klɔ’n nun, kpɛkun bé fá sin yí nun. Bé wɔ́ klɔ’n nun,+ yɛ bé wɔ́ sua nga sran’m be fu be ti su nglo lɔ be ko yi tɛ man Baali’n, kpɛkun be gua nzan fa man be amuin mun be fa fɔkɔ min awlɛn’n be nun.’+

30 “‘Afin sa ng’ɔ ti tɛ min ɲrun’n yɛ Izraɛlifuɛ mun nin Zidafuɛ’m be yo-ɔ. Kɛ ɔ fɛ i be kaan nun lele’n, i sɔ yɛ be yo-ɔ.+ Sa nga Izraɛlifuɛ’m be yo be titi’n, be fɔkɔ min awlɛn.’ Zoova yɛ ɔ kan sɔ-ɔ. 31 ‘Afin kɛ ɔ fɛ i cɛn nga be kplannin klɔ nga’n, b’a klɔklɔ min lele yɛ b’a fɔkɔ min awlɛn lele yɛ w’a fa ju yɛ.+ Ɔ maan ɔ fata kɛ be nunnun be min ɲin bo lɛ,+ 32 sa tɛtɛ kwlaa nga Izraɛlifuɛ mun nin Zidafuɛ’m be yoli fa fɔkɔli min awlɛn’n ti. Be bɔbɔ nin be famiɛn mun,+ nin be nvle’n nun sran dandan mun,+ nin be Ɲanmiɛn ɲrun jranfuɛ mun, nin be Ɲanmiɛn nuan ijɔfuɛ mun,+ nin Zidafuɛ mun nin Zerizalɛmunfuɛ’m be fɔkɔli min awlɛn. 33 Be kacili be sin sili min titi, b’a nianman min lɔ.+ Kannzɛ n kleli be like lelele’n,* sanngɛ be nun kun sa w’a siemɛn i su bɔbɔ naan se kɛ ɔ́ sɔ́ fɔ nga n tu be’n nun.+ 34 Kpɛkun be fa be amuin mɔ be ti like kain’n be fa sie i sua nga min dunman o su’n i nun naan bé fá yó i fiɛn.+ 35 Asa ekun’n, be kplannin Baali i lika nglonglo mun Inɔmun i Wa’n i Kongo’n*+ nun lɔ naan bé yrá be mma yasua mun nin be mma bla mun* mán Molɛki.+ Kusu nn m’an seman be kɛ be yo i sɔ tete like’n.+ Yɛ i sɔ akunndan’n bɔbɔ nin-a baman min ti* nun le. Be tete like sɔ’n ti’n, be yoli maan Zidafuɛ’m be fɔnnin.’

36 “I sɔ’n ti’n klɔ nga amun waan alɛ nin awe nin tukpacɛ m’ɔ sa ndɛndɛ’n ti’n ɔ́ tɔ́ Babilɔnin famiɛn’n i sa nun’n, i su ndɛ nga Zoova m’ɔ ti Izraɛli Ɲanmiɛn’n kan’n yɛ: 37 ‘Kɛ n fali ya mɔ min awlɛn beli min klun’n, nvle kwlaa nga n yoli maan be bo sanndili nun’n, ń kó yíayía be lɔ naan be bla.+ Ń fá be ń sá be sin lika nga nun wa ekun, kpɛkun bé trán nun fɔuun.+ 38 Bé yó min sran, yɛ n kusu, ń yó be Ɲanmiɛn.+ 39 Yɛ ń yó maan be akunndan’n* yó kun.+ Ń yó maan bé fá atin kunngba’n su, kɛ ɔ ko yo naan b’a sro min naan be bɔbɔ b’a ɲan ye, naan be mma nga bé wá bá be sin’n b’a ɲan ye wie’n ti.+ 40 Yɛ e nin be é trá aenguɛ kun m’ɔ́ ká lɛ tititi-ɔ.+ N su yaciman be ye yolɛ le.+ Yɛ ń yó maan min srolɛ’n tran be awlɛn’n nun. I liɛ’n, be su kaciman be sin siman min.+ 41 Be ye yolɛ’n yó min fɛ dan.+ Yɛ ń fá min wunmiɛn kwlaa nin min awlɛn’n kwlaa ń síe be nvle nga nun+ naan be tran nun tititi.’”

42 “Zoova waan yoo: ‘N fali ɲrɛnnɛn dan nga n yili i nvle nga su. I kunngba’n, ye nga n seli be kɛ ń yó be’n,* ń yó.+ 43 Yɛ nvle nga amun kɛnnin i ndɛ seli kɛ w’a tɔ srolo naan sran fi nin nnɛn fi nunman su’n, naan be fa mannin Kaldefuɛ mun’n, sran’m bé wá tó i su fie mun ekun.”’+

44 “‘Bé fá sika bé tó fie mun, bé yó be wun fluwa, yɛ bé fá nzɔliɛ síe be su. Yɛ bé flɛ́ lalofuɛ mun naan be trɛn i bo. Afin ń fá be sran nga be trali be ɔli’n ń sá be sin.+ Sa nga bé yó i Bɛnzamɛn+ akpasua’n su lɔ’n, nin Zerizalɛmun asa’n su lɔ’n, nin Zida+ klɔ’m be su’n, nin klɔ nga be o okaoka lika’m be nun’n, nin klɔ nga be o lika kpɛtɛkplɛɛ’n+ nun lɔ’n, nin klɔ nga be o ngua lɔ lika’n nun’n, yɛ ɔ o lɛ-ɔ.’ Zoova yɛ ɔ kan sɔ-ɔ.”