Zeremin
41 Anglo nso su’n, Ismaɛli+ m’ɔ ti Netania i wa’n, mɔ i kusu ti Elisama i wa’n, m’ɔ ti famiɛn’n i osu’n nunfuɛ’n, ɔ nin famiɛn’n i sran cinnjin’m be nun kun, ɔ nin sran blu ekun be wa toli Aikamun i wa Gedalia, Mizpa lɛ.+ Kɛ bé dí like Mizpa lɛ’n, 2 Netania i wa Ismaɛli ɔ nin sran blu nga be o lɛ’n be jasoli, kpɛkun be fali be tokofi’n be kunnin Gedalia m’ɔ ti Safan i wa Aikamun i klun ba’n. Kɛ ɔ kunnin sran nga Babilɔnin famiɛn’n fɛ i sieli i nvle’n su’n kɛ ngalɛ’n sa. 3 Asa ekun’n, Ismaɛli kunnin Zifu kwlaa nga be nin Gedalia be o Mizpa lɛ’n ɔ nin Kaldefuɛ’m be sonja nga be o lɛ’n wie.
4 Kɛ be kunnin Gedalia’n, i cɛn nɲɔn su’n, mɔ sran fi nin-a siman sɔ’n 5 yasua ablaɔcuɛ (80) be fin Sisɛmun+ nin Silo+ nin Samari+ be bali. Be yili be akanza’n, be wun tralɛ’m be ti titiwa yɛ be boboli be wun kannin.+ Be fali ɔɔzu nin ble ɔ nin ansan ufue+ be bali naan bé fá kɔ́ Zoova i sua’n nun lɔ. 6 Yɛ Netania i wa Ismaɛli fin Mizpa lɛ fiteli naan ɔ́ kó kpá be atin. Kɛ ɔ́ nánti kɔ́’n, nn ɔ́ sún. Kɛ ɔ nin be yiali’n, ɔ seli be kɛ: “Amun wa nian Aikamun i wa Gedalia.” 7 Sanngɛ kɛ be wluli klɔ’n nun’n, Netania i wa Ismaɛli ɔ nin i sran mun be kunnin be, kpɛkun be fali be guali kunman’n nun.
8 Sran sɔ’m be nun blu be seli Ismaɛli kɛ: “Yaci, nán kun e. Afin e fali ble nin ɔɔzu nin ngo nin awɛma nzue e fiɛli i blo lɔ.” Ɔ maan w’a kunman be kɛ be niaan’m be sa. 9 Yɛ Ismaɛli fali be ng’ɔ kunnin be’n be fuɛn’n guali kunman dan kun nun-ɔn. Baasa m’ɔ ti Izraɛli famiɛn’n+ i ti yɛ Famiɛn Aza kpɛli kunman sɔ’n niɔn. Netania i wa Ismaɛli fali sran ng’ɔ kunnin be’n yili kunman sɔ’n piɛ.
10 Ismaɛli trali be kwlaa nga be kali Mizpa+ lɛ’n. Famiɛn’n i wa bla mun-o, sran kwlaa nga be kali Mizpa lɛ mɔ Nebizaradan m’ɔ ti gladi difuɛ’m be su kpɛn’n fa be wlali Aikamun i wa Gedalia+ i sa nun’n mun-o, ɔ trali be kwlaa. Netania i wa Ismaɛli trali be. Kpɛkun ɔ fali be ɔli Amɔnfuɛ’m be sin.+
11 Kɛ Karea i wa Zoanan+ ɔ nin sonja’m be su kpɛn’m be kwlaa nga be o lɛ’n, be tili klunwi sa nga Netania i wa Ismaɛli yoli’n, 12 be fali be sonja’m be kwlaa naan be nin Netania i wa Ismaɛli bé kó kún. Be toli i nzue dan* ng’ɔ o Gabaɔn lɛ’n i nuan lɛ.
13 Kɛ be kwlaa nga be nin Ismaɛli be o lɛ’n, be wunnin Karea i wa Zoanan’n ɔ nin sonja’m be su kpɛn’m be kwlaa ng’ɔ nin be bali’n, be klun jɔli dan. 14 Kɛ ɔ yoli sɔ’n, be kwlaa nga Ismaɛli trali be Mizpa+ lɛ ɔli’n, be kaci ɔli Karea i wa Zoanan sin. 15 Sanngɛ Netania i wa Ismaɛli nin i sran’m be nun mɔcuɛ be wanndili Zoanan i ɲrun, kpɛkun be ɔli Amɔnfuɛ’m be wun lɔ.
16 Karea i wa Zoanan ɔ nin sonja’m be su kpɛn’m be kwlaa nga be nin i be o lɛ’n, be fali Mizpa lɔ sran onga mɔ be deli be Netania i wa Ismaɛli i sa nun’n. Kɛ ɔ́ yó sɔ’n, nn w’a kun Aikamun i wa Gedalia.+ Be fali yasua mun, nin sonja mun, nin bla mun, nin ba mun, ɔ nin famiɛn i awlo lɔ junman difuɛ mun Gabaɔn lɛ be ɔli. 17 Kɛ bé kɔ́’n be jrannin Kimamun i sikewlɛ’n nun lɛ, Bɛtleɛmun+ i wun lɛ, afin be waan bé kɔ́ Ezipti,+ 18 Kaldefuɛ’m be ti. Afin kɛ mɔ Netania i wa Ismaɛli kunnin Aikamun i wa Gedalia mɔ Babilɔnin famiɛn’n sieli i nvle’n su kpɛn’n ti’n, srɛ kunnin be Kaldefuɛ’m be wun.+