Sa nga Akoto’m be yoli’n

27 Kɛ mɔ be waan bé fá e kɔ́ Itali’n ti’n,+ be fali Pɔlu nin bisuafuɛ wie mun ekun be wlali sonja ya su kpɛn kun i sa nun. Ɔ ti Ogisi i sonja akpasua’n i nunfuɛ. Be flɛ i kɛ Zilisi. 2 E fuli mmeli kun m’ɔ fin Adramiti’n nun. Ɔ fata kɛ mmeli sɔ’n jran mmeli jranwlɛ nga be o Azi mɛn’n i lika nga be o nzue nuan’n be su kunngunngun. Kɛ é kɔ́’n, Aristaki+ m’ɔ ti Maseduaninfuɛ’n, mɔ i klɔ’n yɛle Tesaloniki’n, ɔ nin e ɔli. 3 Kɛ aliɛ cɛnnin’n, e juli Sidɔn lɛ. Kɛ mɔ Zilisi sili Pɔlu i aunnvɔɛ dan’n ti’n, ɔ mɛnnin i atin kɛ ɔ wɔ i janvuɛ’m be wun lɔ naan be niɛn i lika.

4 Kɛ e fɛli i lɛ’n, e sannin Sipri klɔ’n i wun, afin aunmuan’n fin e ɲrun lɔ yɛ ɔ ba-ɔ. 5 I sin’n, e kpɛli jenvie ng’ɔ mantan Silisi nin Panfili’n, kpɛkun e jrannin mmeli jranwlɛ ng’ɔ o Mira m’ɔ o Lisi lɔ’n i su lɛ. 6 Sonja ya su kpɛn’n wunnin kɛ mmeli kun fin Alɛzandri ɔ su kɔ Itali. Ɔ yoli maan e fuli nun. 7 I sin’n, e fɛli i lɛ blɛblɛblɛ e juli Kinidi. E cɛli atin’n nun, yɛ e fɛli kpa. E sannin Salmonin m’ɔ o Klɛti lɔ’n i wun, afin aunmuan’n ti’n, e kwlá kɔman e ɲrun. 8 Cenje’n i wun sanlɛ’n w’a yoman pɔpɔ w’a manman e. Ɔ nin i sɔ ngba’n, e kwla juli lika nga be flɛ i Mmeli Jranwlɛ Kpa’n i nun lɛ. Lika sɔ’n mantan klɔ nga be flɛ i Laze’n.

9 Blɛ lɔuun kpa sinnin, yɛ siɛn’n mmeli nun lika kɔlɛ’n ti kekle. Afin nglɛmun cilɛ blɛ’n+ bɔbɔ w’a sin.* I sɔ’n ti’n, Pɔlu mannin be afɔtuɛ kun. 10 Ɔ seli be kɛ: “Nja mun, kɛ n niɛn i sa’n kɔlɛ nga é kɔ́ yɛ’n, lika’n wá yó tɛ. Afin mmeli’n nin i nun trɔ’m bé wá fí e sa. Yɛ e kwla wu bɔbɔ.” 11 Sanngɛ sonja ya su kpɛn’n w’a faman Pɔlu i ndɛ liɛ’n su. Mmeli kanfuɛ’n nin mmeli’n i fuɛ’n be ndɛ’n su yɛ ɔ fali-ɔ. 12 Ayrɛ blɛ nun’n, mmeli jranwlɛ sɔ’n timan lika kpa. I sɔ’n ti’n, sran’m be dan lika be waan be tu be bo lɛ be wɔ. I liɛ’n, sɛ ayrɛ blɛ’n tó be Fenisi lɔ-o. Fenisi sɔ’n wo Klɛti lɔ. I mmeli jranwlɛ’n i ɲin’n kpɛ wia afiliɛ lɔ.

13 Aunmuan fɛfɛ kun fin mɛn’n i ngua lɔ lika’n nun fitali. Ɔ maan be buli i kɛ sunnzunlɛ nga be sunnzunnin’n, i bo gúa kpa mán be. I sɔ’n ti’n, be mannin like nga be fa tra mmeli’n i ase’n* su, kpɛkun be sinnin Klɛti’n i wun koko be ɔli. 14 Sanngɛ i osu w’a cɛman bɔbɔ, kpɛkun aunmuan dan kpa kun fitali. Aunmuan sɔ’n suan Erakilɔn. 15 Aunmuan’n kejeli mmeli’n tɛtɛ kpa. Ɔ maan y’a kwlá jranman kekle i ɲrun. I sɔ’n ti’n, e yacili i nun ɔ fa e ɔli. 16 I sin’n, e ɔli e ko fiali klɔ kaan kun mɔ jenvie’n bo sin yiɛ i’n i sin lɔ. Be flɛ klɔ sɔ’n kɛ Koda. E fɛli kpa naan y’a kwla yi alie kaan ng’ɔ o mmeli’n i sin lɔ’n. 17 Kɛ e mannin su mɔ e fa sieli i mmeli’n nun’n, be fali ɲanman be fa cicili mmeli’n i wun kpa. Asa kusu’n, kɛ ɔ ko yo naan y’a ko kaman Siti* aunɲan’n nun’n ti’n, e kannin waka nin ɲanman nga be tratra mmeli’n i tannin dan’n nun’n be ase. 18 Aunmuan’n fitali dan kpa. Ɔ fa e kɔ wa kɔ wa. I sɔ’n ti’n, kɛ aliɛ cɛnnin’n, be toli trɔ nga be o mmeli’n nun’n guɛli i jenvie’n nun. 19 I le nsan su’n, be yili mmeli’n i wun ninnge wie’m be guali be nzue’n nun.

20 Kɛ cɛn kpanngban sinnin mɔ wia’n nin nzraama’m b’a fiteman’n, mɔ kusu aunmuan dan kpa kun su fita e kekle kpa’n ti’n, y’a lafiman su kun kɛ é fíte nun. 21 Kɛ be dili le nɲɔn kun mɔ aliɛ w’a kanman be nuan’n, Pɔlu jaso jrannin be afiɛn naan w’a se kɛ: “Nja mun, sɛ ɔ ti kɛ amun fali ndɛ nga n kan kleli amun su’n yɛ y’a tuman e bo Klɛti lɔ’n, nn ninnge’m b’a saciman e sa nun.+ 22 Sanngɛ siɛn’n, ń srɛ́ amun kpa, amun tra amun awlɛn, afin amun nun kun sa su wuman. Mmeli’n ngunmin yɛ ɔ́ sáci-ɔ. 23 Andɛ kɔnguɛ’n, Ɲanmiɛn nga n ti i liɛ mɔ n su i’n, i anzi kun+ wa jrannin min wun lɛ, 24 kpɛkun ɔ seli min kɛ: ‘Pɔlu, nán srɛ kun wɔ. Ɔ fata kɛ a jran Sezaa ɲrun.+ Asa kusu’n, Ɲanmiɛn w’a fa be kwlaa nga be nin wɔ o mmeli’n nun’n w’a wla ɔ sa nun.’ 25 I sɔ’n ti’n, nja mun, nán amun sa sin bubu amun, afin n lafi Ɲanmiɛn su. Yɛ n si kɛ ɔ́ wá yó kɛ nga i bɔbɔ fa kan kleli min’n sa sɛsɛsɛ. 26 Sanngɛ e mmeli’n wá sáci jenvie’n i afiɛn lɔ lika kun nun.”+

27 Kɛ i kɔnguɛ blu-nin-nnan (14) su’n juli mɔ e o Adria Jenvie’n su’n, nzue’n fa e kɔ wa kɔ wa. Kɔnguɛ afiɛn’n, ɔ yoli mmeli’n i kanfuɛ’m be kɛ be su mantan asiɛ wie sa. 28 Be fali like wie cicili ɲanman kun su. Be to yili i jenvie’n nun be fa sunnzunnin nzue’n i bo’n. Kpɛkun be wunnin kɛ ɔ ti mɛtri ablasan-nin-nsiɛn (36).* Kɛ be ɔli be ɲrun lɔ kan’n, be yoli i kunngba’n. Kpɛkun be wunnin kɛ ɔ ti mɛtri ablaɔn-nin-nso (27). 29 Srɛ kunnin be, afin be seli be wun kɛ atrɛkpa’n mmeli’n kó sí yɔbuɛ wie. I sɔ’n ti’n, like nnan nga be fa tra mmeliʼn i aseʼn, be to be yili i mmeliʼn i sin lɔ bue liɛʼn su, jenvieʼn nun. Kpɛkun be kunndɛli kɛ aliɛ cɛn ndɛndɛ. 30 Mmeli’n i kanfuɛ’m be waan bé wánndi. I sɔ’n ti’n, be yoli kɛ be su to ninnge nga be fa tra mmeliʼn i aseʼn be yi be mmeliʼn i ɲrun lɔ bue liɛʼn su, jenvieʼn nun sa. Kusu nn alie kaan’n yɛ be su jrɛ i jenvie’n nun-ɔn. 31 Yɛ Pɔlu seli sonja ya su kpɛn’n ɔ nin sonja’m be kɛ: “Sɛ sran nga mun b’a kaman mmeli’n nun’n, amun su kwlá fiteman nun.”+ 32 Ɔ maan sonja’m be kpɛkpɛli ɲanman nga be fa cicili alie kaan’n, kpɛkun ɔ tɔli nzue’n nun.

33 Kɛ ɔ ka kan aliɛ cɛ́n’n, Pɔlu wlali sran’m be kwlaa be fanngan kɛ be di like. Ɔ seli be kɛ: “I cɛn ba blu-nin-nnan (14) yɛ, amun su minndɛ, yɛ amun klun titi amun. Kpɛkun amun a faman like fi b’a kanman amun nuan. 34 I sɔ’n ti’n, ń srɛ́ amun, amun di like kan naan amun wun kpaja amun. Like fi su yoman amun nun wie fi.” 35 Kɛ ɔ kannin sɔ wieli’n, ɔ fali kpanwun, ɔ jrannin be kwlaa be ɲrun ɔ lali Ɲanmiɛn ase. Ɔ buli nun, kpɛkun ɔ boli i dilɛ bo. 36 Ɔ maan be kwlaa be ɲannin fanngan, kpɛkun be kusu be boli like dilɛ bo wie. 37 E kwlaa nga e o mmeli’n nun’n, e ti sran ya nɲɔn ableso-nin-nsiɛn (276). 38 Kɛ be dili like mɔ be ku yili’n, be fali ble’n be guɛli i jenvie’n nun naan mmeli’n yo fokofoko.+

39 Kɛ aliɛ cɛnnin’n, be wunman lika’n i wlɛ.+ Sanngɛ be wunnin cenje kun. Aunɲan o su kpa. Ɔ maan be waan bé nían, sɛ be fa mmeli’n be si i cenje sɔ’n su ɔ yo ye-o. 40 Be kpɛli ninnge nga be tra mmeliʼn i aseʼn be ɲanman’m be nun, ɔ maan be guali nzue’n nun. Kpɛkun be ɲannjili tɛbua dandan mɔ be fa kan mmeli’n be ɲanman mun. Kɛ be mannin mmeli’n i tannin kaan m’ɔ o i ɲrun lɔ’n su’n, be kpɛli mmeli’n i ti’n aunɲan’n su lɔ. 41 Be yoli maan mmeli’n fuli aunɲan’n su. Jenvie’n bo gua aunɲan sɔ’n i bue nɲɔn’m be su. Kɛ be fali mmeli’n sili aunɲan’n su’n, mmeli’n i ɲrun lika’n mlɔnnin. Ɔ maan mmeli’n kwlá kɔmɛn i ɲrun, kusu ɔ kwlá bɛmɛn i sin. Jenvie’n i bolɛ m’ɔ bo kekle’n ti’n, mmeli’n i sin lika’n sacili.+ 42 Kɛ sonja’m be wunnin i sɔ’n, be seli kɛ bé kún bisuafuɛ mun, i liɛ’n be nun wie fi su wɛman nzue’n naan w’a wanndi. 43 Sanngɛ sonja ya su kpɛn’n w’a kplinman su kɛ be yo sɔ. Afin ɔ kunndɛman kɛ sa fi ɲan Pɔlu. I sɔ’n ti’n, ɔ seli kɛ be nga be si nzue wɛ’n be jra nun naan be dun mmua cenje’n su lɔ, 44 naan be onga’m be su be su. Maan be nun wie’m be tran waka buebue’m be su, naan wie’m be fu mmeli’n i buebue’m be su. Ɔ maan be kwlaa be juli asiɛ ba’n su lɔ, like fi w’a yoman be.+