Fluwa klikli nga Pɔlu klɛli Korɛntifuɛ mun’n

16 Sika mɔ amun su bobo ko man Ɲanmiɛn i sran mun’n,+ i su ndɛ nga n kan’n yɛ: An nian nga n kleli asɔnun nga be o Galasi lɔ’n su yo. 2 Lemɔcuɛ kwlaa i cɛn ba klikli’n nun’n,* maan sran kun fa like nga ɔ kwla fa man’n, ɔ sie. I liɛ’n, sɛ n ju lɔ’n, amun su boboman sika min ɲrun lɛ. 3 Kɛ ń má tó amun lɔ’n, sran nga amun lafi be su mɔ amun kannin be ndɛ fluwa nga amun klɛli’n be nun’n,+ ń fá like nga amun waan amún fá mán’n ń wlá be sa nun naan be fa ɔ Zerizalɛmun. 4 Sanngɛ sɛ ɔ fata kɛ n wɔ wie’n, e nin be é kɔ́.

5 Ń sín Maseduanin lɔ naan m’an to amun lɔ. Afin Maseduanin lɛ yɛ ń sín-ɔn.+ 6 Sɛ n ju amun wun lɔ’n, atrɛkpa’n ń dí le nɲɔn kun, annzɛ ń ká amun wun lɛ lele ayrɛ blɛ’n sín bɔbɔ. I liɛ’n, kɛ ń jáso amun lɔ ń kɔ́ lika uflɛ’n, amún kó gúa min atin. 7 Afin n kunndɛman kɛ ń wún amun wun naan ń kpé nun ń kɔ́ lika uflɛ. Sɛ Zoova* di su’n, ń dí le nɲɔn kun amun wun lɔ.+ 8 Sanngɛ ń ká Efɛzi+ wa lele Pantekɔtu cɛn’n fá wíe. 9 Afin b’a man min atin,* ɔ maan n kwla di junman kpa.+ Sanngɛ be nga be tanndan min ɲrun’n be sɔnnin.

10 Sɛ Timote+ to amun lɔ’n, amun yo maan i wla gua ase. Afin ɔ su di Zoova* junman+ kɛ min sa. 11 I sɔ’n ti’n, nán amun nun wie fi guɛ i ɲin ase. Amun guɛ i atin klanman, naan w’a kwla to min wa. Afin min nin aniaan mun e ɲin o i sin.

12 E niaan bian Apolɔsu+ liɛ’n, n wlɛli i fanngan kpa kɛ ɔ nin aniaan’m be wɔ amun wun lɔ. W’a sunnzunman kɛ ɔ́ kɔ́ amun wun lɔ dɔ nga su. Sanngɛ sɛ ɔ ɲɛn i wun atin’n, ɔ́ wá kɔ́ amun wun lɔ.

13 Maan amun ɲin tran su,+ yɛ amun lafi Ɲanmiɛn su kpa titi,+ an yo yakpafuɛ,*+ yɛ maan amun awlɛn’n sɔ.+ 14 Like kwlaa nga amún yó’n, an yo i klolɛ su.+

15 Aniaan mun, siɛn’n maan n kan ndɛ yɛ’n n kle amun: An si kɛ Stefanasi i awlofuɛ mun yɛ be dun mmua fali ndɛ’n su* Akai mɛn’n nun lɔ-ɔ. Yɛ an si kɛ be tuli be klun dili junman mannin Ɲanmiɛn i sran mun. 16 Maan amun lo amun wun man sran kɛ ngalɛ sa mun, nin sran kwlaa ng’ɔ ti amun wiengu junman difuɛ’n, ɔ nin be kwlaa nga be di junman kekle’n.+ 17 Kɛ mɔ Stefanasi+ nin Fɔtinatisi nin Akaikisi be o wa’n ti’n, min klun ti jɔwa kpa. Afin be sinnin amun osu be ukali min kpa. 18 Be yoli maan e nin amun e wla guali ase. I sɔ’n ti’n, maan an bu sran kɛ ngalɛ sa’m be sran.

19 Asɔnun nga be o Azi mɛn’n nun’n be nunfuɛ’m bé yó amun like. Akila nin Priska nin asɔnunfuɛ nga be yia be awlo lɔ’n+ mɔ be ti e Min’n i sɔnnzɔnfuɛ kɛ amun sa’n, bé yó amun like lelele. 20 Aniaan’m be kwlaa bé yó amun like. Maan amun yo amun wiengu like aklunjɔɛ su.

21 Min bɔbɔ min Pɔlu mɔ n su fa min sa n klɛ fluwa yɛ’n, ń yó amun like.

22 Sran ng’ɔ kloman e Min’n, maan be bo i sannzan. E Min, yaci bla! 23 Maan e Min Zezi yo amun ye. 24 N klo amun kwlaa, afin amun ti Klisi Zezi i sɔnnzɔnfuɛ.