1 Samiɛli

26 Zifi lɔfuɛ’m+ be bali be wa toli Saili Gibea lɛ.+ Kpɛkun be seli kɛ: “Davidi fia Zesimɔn* i ɲrun ndɛnman su lɛ, Akila kpɔlɛ’n su lɔ.”+ 2 Yɛ Saili jasoli-ɔ. Ɔ nin sran akpi nsan (3.000) m’ɔ kpali be Izraɛli nvle’n nun’n, be ɔli Davidi i kunndɛlɛ Zifi aawlɛ flɛnnɛn’n nun.+ 3 Saili boli i nanmue atin’n i nuan lɛ Akila kpɔlɛ’n su, Zesimɔn i ɲrun ndɛnman su lɛ. Kɛ ɔ́ yó sɔ’n, nn aawlɛ flɛnnɛn’n nun lɔ yɛ Davidi tran-ɔn. Yɛ ɔ tili i kɛ Saili w’a bɛ i kunndɛlɛ aawlɛ flɛnnɛn’n nun. 4 I sɔ’n ti’n, Davidi sunmannin sran naan be ko nian sɛ Saili bali sakpa-o. 5 I sin’n, Davidi ɔli kan Saili boli i nanmue lɔ’n. Kpɛkun ɔ wunnin lika nga Saili nin Nɛɛ i wa Abnɛɛ+ m’ɔ ti i sonja’m be su kpɛn’n, be lali’n. Saili la afiɛn lɛ yɛ sonja’m be bo sin yiɛ i. 6 Davidi seli Aimelɛki m’ɔ ti Ɛtifuɛ’n+ nin Abisai+ m’ɔ ti Zeruya+ i wa’n, mɔ i kunngba’n ti Zoabu i niaan’n be kɛ: “?Wan yɛ ɔ nin min kɔ́ Saili i nanmue’n nun lɔ-ɔ?” Yɛ Abisai tɛli su kɛ: “E nin wɔ é kɔ́.” 7 Davidi nin Abisai be wluli nanmue’n nun kɔnguɛ. Bé nían-ɔn, Saili yɛ ɔ su lafi yɛ. Yɛ i cua’n kplan ase i ti bo lɛ. Abnɛɛ nin sonja’m be kusu be lala lɛ, be bo sin yia Saili.

8 Yɛ Abisai seli Davidi kɛ: “Ɲanmiɛn w’a fa ɔ kpɔfuɛ’n w’a wla ɔ sa nun andɛ.+ Yaci, man min atin maan n fa cua’n n fa kplɛn i nun kpɛ kunngba naan ɔ bo nun asiɛ wun. N su yomɛn i sɔ kpɛ nɲɔn.” 9 Sanngɛ Davidi seli Abisai kɛ: “Nán yo i like fi. ?Afin sɛ sran kun fɛ i sa’n kan Zoova i sran’n,+ ɔ́ ká sa ngbɛn?”+ 10 Davidi seli ekun kɛ: “N kan Zoova m’ɔ lafiman’n, Zoova bɔbɔ kún i,+ annzɛ i bɔbɔ wú i wulɛ cɛn kun,+ annzɛ ɔ́ kɔ́ alɛ kunlɛ kpɛkun ɔ́ wú lɔ.+ 11 Zoova dunman nun ti’n, n kwlá yoman sɔ. N kwlá faman min sa’n n kanman Zoova i sran’n.+ Ɔ maan fa cua ng’ɔ o i ti bo lɛ’n nin nzue towa’n naan e wɔ.” 12 Davidi fali cua’n nin nzue towa ng’ɔ o Saili i ti bo lɛ’n yɛ be ɔli-ɔ. Sran fi w’a wunman be,+ sran fi w’a sieman be nzɔliɛ, sran fi w’a tinngeman. Afin lafilɛ’n fali be ngba. Zoova bɔbɔ yɛ ɔ yoli maan lafilɛ’n fali be dan sɔ-ɔ. 13 Davidi kpɛli kongo’n kpɛkun ɔ ko jrannin kpɔlɛ’n i ti su nglo lɔ. Ɔ nin lika nga Saili wo’n be afiɛn’n ti nun kpa.

14 Davidi kpan flɛli sonja mun nin Nɛɛ i wa Abnɛɛ.+ Ɔ seli kɛ: “?Abnɛɛ, naan a su tɛman min su?” Yɛ Abnɛɛ tɛli su kɛ: “?Wan li yɛ ɔ kpan famiɛn’n i su nun sɔ-ɔ?” 15 Davidi seli Abnɛɛ kɛ: “?Nán yasua yɛle wɔ? ?Wan yɛ ɔ nin wɔ sɛ Izraɛli nvle’n nun-ɔn? ?Ɔ yo sɛ ti yɛ w’a kwlá nianman ɔ min’n m’ɔ ti famiɛn’n i su-ɔ? Afin sonja kun wluli nanmue’n nun lɔ naan ɔ́ kó kún famiɛn’n.+ 16 Nanwlɛ, like nga a yoli i lɛ’n timan kpa mlɔnmlɔn. N kan Zoova m’ɔ lafiman’n, a nin kunlɛ fata. Afin w’a nianman ɔ min’n, m’ɔ ti Zoova i sran’n+ su. Niannian lɔ! ?Famiɛn’n i cua’n nin i nzue towa+ nga be o i ti bo lɛ’n, be o nin?”

17 Kɛ Saili tili sran’n i nɛn’n, ɔ wunnin i wlɛ kɛ Davidi-ɔ. Ɔ maan ɔ seli kɛ: “?Min wa Davidi, ɔ nɛn’n yɛ n tili i lɛ-ɔ?”+ Yɛ Davidi tɛli su kɛ: “Ɛɛn-ɛn, min min, min-ɔn.” 18 Ɔ seli ekun kɛ: “?Min min, ngue ti yɛ a su wanndi fuan min-ɔn?+ ?Ngue yɛ n yoli-ɔ? ?Sa tɛ benin yɛ n yoli-ɔ?+ 19 Min min, yaci, fa ɔ su sie min mɔ n ti ɔ sufuɛ’n, min nuan bo. Sɛ Zoova bɔbɔ yɛ ɔ seli wɔ kɛ a fa ɔ ɲin ci min’n, ń srɛ́ i kɛ ɔ sɔ ble annzɛ i wunsu like nga ń fá mɛ́n i’n nun. Sanngɛ sɛ klɔ sran mun yɛ be wlawla wɔ+ kɛ a yo sɔ’n, maan Zoova bo be sannzan. Afin be kannin min bo naan e nin Zoova i nvle nunfuɛ mun* e afiɛn ti nun.+ Ɔ ti kɛ be su se min kɛ n ko su ɲanmiɛn uflɛ sa. 20 Nán yo naan n wu Zoova i wun mmua. Sɔsɔwa kɛ min sa’n yɛ Izraɛli famiɛn’n bɛli i kunndɛlɛ-ɔ.+ Ɔ su min su kɛ cindalo wie yɛ ɔ su di i wun koniɛn okaoka’m be nun sa.”

21 Yɛ Saili seli kɛ: “N yoli ɔ tɛ.+ Min wa Davidi, sa ɔ sin. N su yoman ɔ tɛ kun. Afin andɛ’n, a buli min nguan’n i like cinnjin.+ Nanwlɛ, n dili sinnzin, n fɔnnin tɛ kpa.” 22 Davidi tɛli su kɛ: “Famiɛn, ɔ cua’n yɛ ɔ o yɛ. Maan ɔ gbanflɛn’m be nun kun bla wa fa. 23 Sɛ sran kun ti kpa yɛ ɔ ti nanwlɛfuɛ’n, Zoova nían su yó i mo.+ Afin Zoova fali ɔ wlali min sa nun andɛ. Sanngɛ m’an seman kɛ ń fá min sa’n ń kán Zoova i sran’n.+ 24 Nian, n buli ɔ nguan’n i like cinnjin andɛ. Maan Zoova bu min nguan’n i like cinnjin wie, naan ɔ de min ɲrɛnnɛn kwlaa nun.”+ 25 Saili tɛli Davidi su kɛ: “Min wa Davidi, maan Ɲanmiɛn yra ɔ su. Á wá yó sa dandan mun, yɛ á wá kwlá.”+ I sin’n, Davidi fɛli i atin’n ɔli. Saili kusu sɛli i sin i awlo.+