24 Kɛ Moabufuɛ’m be juli Izraɛlifuɛ’m be nanmue’n nun lɔ’n, Izraɛlifuɛ’m be jasoli, kpɛkun be boli be kunlɛ bo. Moabufuɛ’m be wanndili be ɲrun.+ Izraɛlifuɛ’m be suli Moabufuɛ’m be su lele be juli Moabu mɛn’n nun lɔ. Kɛ bé kɔ́’n nn bé kún be. 25 Be bubuli klɔ mun, yɛ be tinuntinun be toli yɔbuɛ kun yili i fie nga be ti kpa’n be nun, ɔ maan yɔbuɛ’n truli fie’m be nun. Be tanninnin nzue ti’m be kwlaa.+ Be kpɛkpɛli waka kpakpa’m be kwlaa.+ Saan talɛ ng’ɔ o Kii-Aresɛti+ lɔ’n mɔ be fali yɔbuɛ be yoli’n, i ngunmin yɛ ɔ kali lɛ-ɔ. Sanngɛ kpafloko tofuɛʼm be bo sin yiɛli i, yɛ be bubuli i.