1 Famiɛn Mun

6 Kɛ Izraɛlifuɛ’m* be fin Ezipti mɛn’n nun fiteli’n,+ i afuɛ ya nnan ablaɔcuɛ (480) su’n, Zivu*+ anglo’n nun’n (yɛle kɛ anglo nɲɔn su’n nun’n), Salomɔn boli Zoova i sua’n i kplanlɛ bo.*+ Kɛ ɔ yoli famiɛn’n, i afuɛ nnan su-ɔ. 2 Sua nga Famiɛn Salomɔn kplan mannin Zoova’n i tɛnndɛn nun’n ti kude ablesiɛn (60), i tɛtrɛ nun’n ti kude* ablaɔn (20), yɛ i nglonglo su’n ti kude ablasan (30).+ 3 Ɲanmiɛn sua’n i ɲrun lɛ lika ng’ɔ ti fleiin kpa’n+ i tɛnndɛn nun’n* ti kude ablaɔn (20), ɔ nin sua’n i tɛtrɛ nun’n be sɛ.* Sua’n i ɲrun ala’n i tɛtrɛ nun’n ti kude blu.

4 Ɔ yoli sua’n i fenɛtri mun. Fenɛtri’m be ti dandan, sanngɛ kɛ bé wlú talɛ’n nun kɔ́’n, nn bé yó kaan kɔ́.*+ 5 Asa ekun’n, ɔ kplannin sua kun sua’n i talɛ’n i wun. Ɔ bo sin yia sua’n i talɛ mun, yɛle kɛ ɔ bo sin yia Sua Ba m’ɔ ti Ɲanmiɛn liɛ Klonglo’n* ɔ nin Sua Ba Ngunmin Kun m’ɔ ti Ɲanmiɛn liɛ Klonglo’n*+ be talɛ mun, ɔ kpɛkpɛli nun sua ba sua ba.+ 6 Sua ba ng’ɔ o ngua’n i tɛtrɛ nun’n ti kude nnun, ng’ɔ o afiɛn’n i tɛtrɛ nun’n ti kude nsiɛn, yɛ i nsan su m’ɔ o sua ba onga’m be ti su nglo’n i tɛtrɛ nun’n ti kude nso. Afin kɛ sua’n i wun talɛ’n ɔ́ fú kɔ́’n, nn ɔ́ yó fɛtɛfɛtɛ kɔ́, kɛ ɔ ko yo naan waka’m b’a wluman sua’n i talɛ’m be nun’n ti.+

7 Be dun mmua sɛli yɔbuɛ nga bé fá kplán sua’n.+ Ɔ maan sua’n i kplanlɛ nun’n, b’a timan maato annzɛ kpɛliɛ, annzɛ blalɛ wie mɔ be fa di junman’n i ngan lɔ. 8 Sua ba ng’ɔ o ngua’n i anuan’n o sua’n i bue ng’ɔ kpɛ ja ngua lɔ lika’n nun’n su,*+ yɛ asikalie kun fu kɔ sua ba ng’ɔ o afiɛn’n su lɔ, kpɛkun asikalie’n fɛ i lɛ fu kɔ sua ba nsan su m’ɔ o nglo lɔ’n su lɔ. 9 Ɔ kplannin sua’n lele ɔ wieli i kplan,+ yɛ ɔ fali sɛdri waka floloflolo nin sɛdri waka paplaapla m’ɔ siesieli be sɛsɛsɛ’n ɔ fa tuli sua’n su.+ 10 Ɔ yoli sua ba sua ba mun tɛɛn sin yiali sua’n,+ be nglonglo su’n ti kude nnun. Ɔ fali sɛdri waka fa siesieli sua ba sua ba mun be talɛ’n nin sua’n i talɛ’n be afiɛn.

11 Blɛ sɔ’n nun’n, Zoova kannin ndɛ kleli Salomɔn, ɔ seli kɛ: 12 “Sua nga a su kplɛn i yɛ’n, sɛ a nanti ndɛ nga n kan’n su’n, sɛ a fa min atin’m be su’n, yɛ sɛ a fa min mmla’m be su naan a nian be su nanti’n,+ ń yía nda nga n tali ɔ si Davidi’n i nuan ń mán wɔ.+ 13 Yɛ ń trán Izraɛlifuɛ’m be afiɛn,+ n su yiman Izraɛli m’ɔ ti min nvle’n i ase.”+

14 Salomɔn kplannin sua’n lele ɔ wieli i kplan. 15 Ɔ fali sɛdri waka paplaapla wie mun fa yoli sua’n i klun lɔ talɛ mun. Yɛ ɔ fali waka fa katali sua’n i klun lɔ talɛ’m be wun, ɔ fɛ i bo ngua lele fa ju i ti lɔ, yɛ ɔ fali zenevrie waka paplaapla fa katali sua’n i klun lɔ asiɛ ba’n su.+ 16 Ɔ fali sɛdri waka paplaapla wie mun yoli sua ba kun sua’n i klun mmua lɔ, ɔ ti kude ablaɔn (20), ɔ fɛ i asiɛ wun lele fa ju i ti lɔ. Kɛ ɔ kplannin sua ba ng’ɔ o sua’n i klun mmua lɔ’n+ kɛ ngalɛ’n sa. I yɛ ɔ ti Sua Ba Ngunmin Kun m’ɔ ti Ɲanmiɛn liɛ Klonglo’n+ niɔn. 17 Ɲanmiɛn sua’n,*+ yɛle kɛ sua ba ng’ɔ o sua ba kun’n i ɲrun lɛ’n, ɔ ti kude ablanan (40). 18 Sɛdri waka nga be fa yoli sua’n i klun lɔ talɛ’n, be yili towa+ nin waka nɲrɛ mɔ b’a kpuke’n+ be desɛn su. Talɛ’n kwlaa ti sɛdri waka ngunmin, yɔbuɛ fi nunman nun.

19 Ɔ siesieli sua ba ng’ɔ o sua’n i klun mmua lɔ’n,+ naan ɔ́ fá Zoova i aenguɛ’n i alaka’n fá síe nun.+ 20 Sua ba ng’ɔ o sua’n i klun mmua lɔ’n i tɛnndɛn nun’n ti kude ablaɔn (20), i tɛtrɛ nun’n ti kude ablaɔn (20), yɛ i nglonglo su’n ti kude ablaɔn (20).+ Ɔ fali sika ɔkwlɛ jrɛiin fa katali talɛ’n i wun. Kpɛkun ɔ fali sɛdri waka fa katali tɛ yiwlɛ’n+ i wun. 21 Salomɔn fali sika ɔkwlɛ jrɛiin fa katali sua’n i klun lɔ talɛ’n i wun.+ Ɔ fali sika ɔkwlɛ jrɔkɔ wie mun fa kpɛli sua ba ng’ɔ o sua’n i klun mmua lɔ+ mɔ be fali sika ɔkwlɛ kɛtɛli i wun’n, i ɲrun lɛ. 22 Ɔ fali sika ɔkwlɛ katali sua’n i klun lɔ talɛ wunmuan’n i wun. Asa ekun’n, tɛ yiwlɛ+ ng’ɔ o sua ba m’ɔ o sua’n i klun mmua lɔ’n i wun lɛ’n, ɔ fali sika ɔkwlɛ kɛtɛli i wun.

23 Ɔ fali pɛn waka* fa yoli seribɛn+ nɲɔn, ɔ fa be sieli sua ba ng’ɔ o sua’n i klun mmua lɔ’n nun. Be nglonglo su’n ti kude blu.+ 24 Seribɛn’n i ndɛwa kun ti kude nnun, yɛ i ndɛwa kun’n ti kude nnun. Kɛ ɔ fɛ i i ndɛwa kun i ti m’ɔ́ fá jú i ndɛwa kunfuɛ’n i ti lɔ’n, ɔ ti kude blu. 25 Seribɛn nɲɔn su’n ti kude blu wie. Seribɛn nɲɔn’n be sɛ, yɛ be wafa’n ti kun. 26 Seribɛn’m be tinuntinun be nglonglo su’n ti kude blu. 27 I sin’n, ɔ fali seribɛn mun+ sieli be Sua Ba Ngunmin Kun m’ɔ ti Ɲanmiɛn liɛ Klonglo’n nun. Seribɛn’m be ndɛwa’m be nun ti trɛwa. Seribɛn kun i ndɛwa’n kan talɛ’n kun, yɛ seribɛn kun ekun’n i ndɛwa’n kan talɛ ng’ɔ o bue kun lɔ’n, yɛ be ndɛwa’m be kan be wiengu sua ba’n i afiɛn lɛ. 28 Ɔ fali sika ɔkwlɛ katali seribɛn’m be wun.

29 Ɔ yili seribɛn+ nin nglesia,+ ɔ nin waka nɲrɛ mɔ b’a kpuke’n+ be desɛn mun sua ba nɲɔn’m be talɛ’m be kwlaa be wun.* 30 Ɔ fali sika ɔkwlɛ katali sua ba nɲɔn’n be klun lɔ asiɛ’n su. 31 Ɔ fali pɛn waka fa yoli sua ba ng’ɔ o sua’n i klun mmua lɔ’n i anuan mun, ɔ nin i ja mlomlo mun, ɔ nin anuan’n i kadri mun. Sɛ be kpɛkpɛ talɛ’n nun nnun’n, ɔ fɛ i bue kun.* 32 Ɔ fali pɛn waka yɛ ɔ fa yoli anuan nɲɔn mun-ɔn. Kpɛkun ɔ yili seribɛn nin nglesia nin waka nɲrɛ mɔ b’a kpuke’n be desɛn su. Ɔ fali sika ɔkwlɛ katali be wun. Ɔ fali maato boli sika ɔkwlɛ fa katali seribɛn mun nin nglesia mun be lika kwlaa. 33 Ɲanmiɛn sua’n* i anuan’m be kadri mɔ be fali pɛn waka yɛ be yoli be’n, ɔ yoli be sɔ wie. Sɛ be kpɛkpɛ talɛ’n nun nnan’n, ɔ fɛ i bue kun.* 34 Ɔ fali zenevrie waka yoli sinwlɛ nɲɔn. Sinwlɛ kun nun anuan’m be ti nɲɔn, be kpɛ be wun. Yɛ sinwlɛ kunfuɛ’n i nun anuan’m be ti nɲɔn wie, yɛ be kpɛ be wun.+ 35 Ɔ yili seribɛn nin nglesia, ɔ nin waka nɲrɛ mɔ b’a kpuke’n be desɛn anuan’m be su, kpɛkun ɔ fali sika ɔkwlɛ katali be wun.

36 Ɔ fali yɔbuɛ wie mɔ be sɛli be’n, ɔ fa siesieli be wiengu su. Ɔ yoli i sɔ ɲanman nsan, ɔ fa yoli sua’n i awlo klun kaan’n.+ Kpɛkun ɔ fali sɛdri waka floloflolo wie mun fa siesieli yɔbuɛ’m be su. Ɔ yoli i sɔ ɲanman kun.+

37 Kɛ Salomɔn yoli famiɛn’n i afuɛ nnan su’n, Zivu anglo’n* nun’n yɛ be wlali Zoova i sua’n i bo ase-ɔ.+ 38 Yɛ i afuɛ blu-nin-kun (11) su’n, Buli anglo’n* nun’n (yɛle kɛ anglo mɔcuɛ su’n) be wieli sua’n i kwlaa kplan. Be niannin sua’n i jajalɛ nga be jajali’n su.+ Salomɔn fali afuɛ nso yɛ ɔ fa kplannin sua’n niɔn.