1 Samiɛli

1 Bian kun tran Ramataimun-Zofimun.*+ Klɔ sɔ’n wo Efraimun i asa’n su lɔ okaoka lika’m+ be nun. Be flɛ i kɛ Ɛlkana.+ Ɔ ti Zeroamun i wa, Zeroamun kusu ti Elii i wa, Elii kusu ti Towu i wa. Yɛ Towu ti Zifi m’ɔ ti Efraimunfuɛ’n i wa. 2 Ɛlkana le bla nɲɔn. Kun suan Anin, yɛ kun’n suan Penina. Penina le ba, sanngɛ Anin liɛ’n, ɔ leman ba. 3 Afuɛ nuan kwlakwla’n, bian sɔ’n kɔ Silo,+ ɔ ko su Zoova m’ɔ ti sonja’m be su kpɛn’n, yɛ ɔ yi tɛ mɛn i. Lɔ yɛ Eli i wa yasua nɲɔn mun, Ɔfnin nin Fineasi+ mɔ be ti Zoova ɲrun jranfuɛ’n,+ be di junman-ɔn.

4 Cɛn kun’n, Ɛlkana ko yili tɛ. Kpɛkun ɔ fali nnɛn’n wie mannin i yi Penina ɔ nin i mma yasua mun nin i mma bla’m be kwlakwla.+ 5 Sanngɛ ɔ fali nnɛn’n i lika kpa kun mannin Anin, afin i yɛ ɔ klo i-ɔ. Sanngɛ Zoova w’a mɛnmɛn i ba.* 6 Yɛ i wla Penina kunndɛ kɛ ɔ́ yó i tɛtɛ. Ɔ yo i finfin cɛn kwlakwla, afin Zoova w’a mɛnmɛn i ba. 7 Afuɛ kwlakwla’n, kɛ ɔ yo sɔ-ɔ. Kɛ Anin kɔ Zoova i sua’n+ nun lɔ’n, i wla’n yo i finfin dan. Ɔ maan ɔ sun lele, yɛ ɔ diman like. 8 Sanngɛ i wun Ɛlkana seli i kɛ: “?Anin, ngue ti yɛ a sun mɔ a diman like-ɔ? ?Ngue ti yɛ ɔ ɲrun’n ti mlanwa sɔ-ɔ? ?Sɛ a wu ba yasua blu bɔbɔ’n, be nin min kwla sɛ?”

9 Kɛ be wieli like di Silo lɔ’n, Anin jasoli. Kɛ ɔ́ yó sɔ’n, nn Eli m’ɔ ti Ɲanmiɛn ɲrun jranfuɛ’n ti bia’n su, Zoova i sua’n*+ i anuan’n nun lɛ. 10 Anin i wla boli i wun dan. Ɔ srɛli Zoova.+ Kɛ ɔ́ yó sɔ’n, nn ɔ́ sún kpa liɛ su. 11 Ɔ tali nda kun. Ɔ seli kɛ: “Ee, Zoova, wɔ mɔ a ti sonja’m be su kpɛn’n, nian afɛ dan ng’ɔ o min su’n. Sɛ ɔ wla kpɛn min mɔ n ti ɔ sufuɛ’n su’n, yɛ sɛ ɔ wla w’a fiman ɔ sufuɛ’n su naan a man min ba yasua kun’n,+ ń fɛ́ i ń mán Zoova mlɔnmlɔnmlɔn. Yɛ be su yimɛn i ti’n le.”+

12 Anin srɛli Zoova cɛli kpa. Kɛ ɔ́ yó sɔ’n, nn Eli níɛn i nuan’n siin. 13 Anin kannin ndɛ’n i klun lɔ. I nuan bui’n yɛ ɔ keje-ɔ, sanngɛ be timɛn i nɛn’n. I sɔ’n ti’n, Eli buli i kɛ w’a nɔn nzan w’a bo. 14 Eli seli i kɛ: “?Cɛn onin ko naan nzan’n w’a titi ɔ ɲin su? Yaci duvɛn nɔnlɛ’n.” 15 Anin tɛli i su kɛ: “Cɛcɛ, min min, nɛ́n i sɔ-ɔ. Kɛ be se kɛ bla kun i awlɛn w’a kpɔtɔ i klun’n, yɛle min liɛ’n. M’an nɔnman duvɛn annzɛ nzan kekle wie fi. Sa ng’ɔ o min su’n yɛ n su koko n kle Zoova-ɔ.+ 16 Nán bu i kɛ ɔ sufuɛ’n ti bla finfinfuɛ. Awlabɔɛ nin afɛ dan nga be o min su’n ti yɛ m’an srɛ lele m’an cɛ sa-ɔ.” 17 Eli tɛli i su kɛ: “Gua ɔ wla ase naan kɔ. Maan Izraɛli i Ɲanmiɛn’n fa like nga a srɛli i’n man wɔ.”+ 18 Ɔ tɛli Eli su kɛ: “Bu ɔ sufuɛ’n i wun akunndan kpa sɔ titi.” Kɛ ɔ yoli sɔ’n, ɔ jaso ɔli, ɔ dili like yɛ i ɲrun m’ɔ ti mlanwa’n ɔ titili.

19 Be jasoli nglɛmun ndɛ kpa’n, kpɛkun be kotoli Zoova i bo. I sin’n, be sali be sin ɔli be awlo, Rama lɔ.+ Ɛlkana nin i yi Anin be wa sili sua, yɛ Zoova buli i akunndan.*+ 20 I afuɛ nuan m’ɔ́ yía’n,* Anin wunnzɛli, yɛ ɔ wuli ba yasua kun. Ɔ seli kɛ: “N srɛli i Zoova sa nun.” I sɔ’n ti’n, ɔ tɔnnin i dunman+ kɛ Samiɛli.*

21 I sin’n, Ɛlkana nin i awlofuɛ’m be ngba be ɔli tɛ nga be yi man Zoova afuɛ nuan kwlakwla’n i yilɛ,+ kpɛkun ɔ́ fá nda ng’ɔ tali’n i nuan like mán. 22 Sanngɛ Anin w’a ɔman wie.+ Ɔ seli i wun’n kɛ: “Kɛ n ko kpɛ ba’n i wunflɛn’n, ń fɛ́ i ń kɔ́ naan ɔ tran Zoova i sua’n nun lɔ mlɔnmlɔnmlɔn.”+ 23 I wun Ɛlkana seli i kɛ: “Nga a bu i kɛ ɔ ti kpa’n, yo. Ka awlo wa lele saan w’a kpɛ ba’n i wunflɛn. Maan Zoova yo naan ndɛ nga a kannin’n kpɛn su.” Ɔ maan ɔ kali awlo lɛ, ɔ niannin ba’n i lika lele naan w’a kpɛ i wunflɛn.

24 Kɛ ɔ kpɛli ba’n i wunflɛn cɛ’n, ɔ fɛli i ɔli Silo lɔ. Kɛ ɔ́ kɔ́’n, ɔ fali nannin tola kun mɔ w’a ɲan afuɛ nsan’n, nin sanmlɛn efa kun,* ɔ nin duvɛn sɛ dan kun.+ Yɛ ɔ fali ba’n ɔli Zoova i ɲrun Silo+ lɔ-ɔ. 25 Be kunnin nannin tola’n, kpɛkun be fali ba’n kleli Eli. 26 Kɛ ɔ yoli sɔ’n, Anin seli kɛ: “Min min, yaci! Min min, maan n di ɔ nanwlɛ. Bla nga le kun’n, ɔ wa jrannin lika nga nun wa m’ɔ srɛli Zoova’n, yɛle min.+ 27 Ba yasua nga ti yɛ n srɛli’n yɛ ɔ o yɛ. Yɛ Zoova mannin min like nga n srɛli i’n.+ 28 N kusu, m’an fɛ i m’an man Zoova. Lele mɔ wie’n fá kún i’n, ɔ ti Zoova liɛ.”

Yɛ ɔ* kotoli Zoova i bo lɛ-ɔ.