Zeremin
42 Yɛ sonja su kpɛn’m be kwlaa, nin Karea i wa Zoanan,+ nin Osaya i wa Zezania, nin nvlefuɛ’m be kwlakwla, be nga be le ɲrun-o, be nga be leman ɲrun-o, be bali. 2 Yɛ be seli Ɲanmiɛn nuan ijɔfuɛ Zeremin kɛ: “Yaci, sie ɔ su tie e ngbata’n naan srɛ Zoova m’ɔ ti ɔ Ɲanmiɛn’n man e bɔbɔ nin be kwlaa nga be kali lɛ’n. Afin kɛ nga a fa wun i yɛ’n sa’n, y’a sɔnman kun,+ kusu nn laa’n e sɔnnin kpa. 3 Maan Zoova m’ɔ ti ɔ Ɲanmiɛn’n ɔ kle e atin ng’ɔ fata kɛ e fa su’n, ɔ nin like ng’ɔ fata kɛ e yo’n.”
4 Ɲanmiɛn nuan ijɔfuɛ Zeremin tɛli be su kɛ: “N tili. Ń má srɛ́ Zoova m’ɔ ti amun Ɲanmiɛn’n ń mán amun kɛ nga amun kannin’n sa. Yɛ ndɛ kwlaa nga Zoova kán klé min’n, n kusu ń kán klé amun. N su fiaman wie fi su.”
5 Be seli Zeremin kɛ: “Sɛ y’a nianman like nga Zoova m’ɔ ti ɔ Ɲanmiɛn’n seli ɔ kɛ a kan kle e’n su sɛsɛsɛ y’a yoman’n, maan Zoova yo lalofuɛ nanwlɛfuɛ kun naan ɔ nin e kan. 6 Kannzɛ ndɛ ng’ɔ́ kán’n ɔ́ yó e fɛ-o annzɛ ɔ su yoman e fɛ-o, é fá Zoova m’ɔ ti e Ɲanmiɛn’n, mɔ e sunmannin wɔ i sin’n i nuan ndɛ’n su. I liɛ’n, é fíte nun. Afin é fá e Ɲanmiɛn Zoova i nuan ndɛ’n su.”
7 Kɛ cɛn ba blu sinnin’n, Zoova kannin ndɛ kleli Zeremin. 8 Ɔ maan Zeremin flɛli Karea i wa Zoanan ɔ nin sonja su kpɛn’m be kwlaa nga be nin i o lɛ’n nin nvlefuɛ’m be kwlaa, be nga be le ɲrun-o, be nga be leman ɲrun-o.+ 9 Ɔ seli be kɛ: “Zoova m’ɔ ti Izraɛli Ɲanmiɛn’n, mɔ amun sunmannin min kɛ n kpɛtɛ i man amun’n i waan yoo: 10 ‘Sɛ amun ka nvle nga nun’n, ń kplán amun, yɛ n su bubuman amun. Ń tá amun, yɛ n su tuman amun bo. Afin ɲrɛnnɛn sa nga n fa yili amun su’n, ɔ́ yó min nsisɔ.*+ 11 Nán maan Babilɔnin famiɛn mɔ amun sro i’n ti’n, srɛ kun amun.’+
“‘Nán maan i ti’n srɛ kun amun, afin n jin amun sin naan ń dé amun. Ń dé amun i sa nun.’ Zoova yɛ ɔ kan sɔ-ɔ. 12 Ń sí amun aunnvɔɛ.+ Ɔ maan amún yó i annvɔ. Yɛ ɔ́ yó maan amún sá amun sin amun bɔbɔ amun nvle’n nun.
13 “‘Sanngɛ sɛ amun se kɛ: “Cɛcɛ, e su kaman nvle nga nun,” naan amun a faman Zoova m’ɔ ti amun Ɲanmiɛn’n i nuan ndɛ’n su’n, 14 naan amun se kɛ: “Cɛcɛ, Ezipti lɔ yɛ é kɔ́-ɔ.+ Lɔ liɛ’n, e su wunman alɛ, e su timan nnɛn wɛ’n i tɛlɛ, e su mianman kpanwun wun, naan lɔ yɛ é trán’n,” 15 Zidafuɛ nga b’a ka’n, amun tie ndɛ nga Zoova kan’n. Zoova m’ɔ ti sonja’m be su kpɛn’n, m’ɔ ti Izraɛli Ɲanmiɛn’n waan yoo: “Sɛ amun waan san fii amún kɔ́ Ezipti naan amún kó trán lɔ’n,* 16 alɛ* mɔ amun sro i’n, ɔ́ tɔ́ amun su Ezipti nvle’n nun lɔ. Yɛ awe mɔ amun su wanndi i’n, ɔ́ sú amun su Ezipti lɔ, yɛ amún wú lɔ.+ 17 Yɛ be kwlaa nga be waan san fii bé kɔ́ Ezipti bé kó trán lɔ’n, alɛ’n annzɛ awe’n annzɛ tukpacɛ m’ɔ sa ndɛndɛ’n, ɔ́ kún be. Ɲrɛnnɛn nga ń má fá yí be su’n, be nun wie fi su finman nun fiteman.”’
18 “Afin Zoova m’ɔ ti sonja’m be su kpɛn’n, m’ɔ ti Izraɛli Ɲanmiɛn’n waan yoo: ‘Kɛ nga n fali min ya’n n guali Zerizalɛmunfuɛ’m+ be su’n sa’n, i kunngba’n, sɛ amun kɔ Ezipti’n, ń fá amun wun ya dan kpa. Sran’m bé fá amun dunman bó sannzan. Yɛ ɲrɛnnɛn nga bé wá tɔ́ amun su’n ti’n, srɛ dan kpa kún be. Amun su ɲanman ye le. Bé yó amun finfin.+ Yɛ amun su wunman lika nga kun le.’
19 “Amun mɔ amun ti Zidafuɛ’m be onga mun’n, Zoova w’a kan ndɛ w’a kle amun. Nán amun wɔ Ezipti. Amun sie amun su be tie i kpa. M’an dun mmua m’an kan kle amun kɛ 20 amun sa tɛ’n ti’n, amún wú. Afin amun seli min kɛ n usa Zoova m’ɔ ti amun Ɲanmiɛn’n i sa. Amun seli min kɛ: ‘Srɛ e Ɲanmiɛn Zoova man e, yɛ like kwlaa nga e Ɲanmiɛn Zoova se e kɛ e yo’n, kan kle e, é yó.’+ 21 Andɛ kusu, m’an kan kle amun. Sanngɛ amun su faman amun Ɲanmiɛn Zoova i nuan ndɛ’n su. Yɛ like ng’ɔ seli amun kɛ amun yo m’ɔ kan kleli min’n, amun su yoman wie fi.+ 22 I sɔ’n ti’n, maan n di amun nanwlɛ. Lika nga amun waan amún kɔ́ naan amún kó trán lɔ lɛ’n, tokofi’n annzɛ awe’n annzɛ tukpacɛ m’ɔ sa ndɛndɛ’n, ɔ́ kún amun lɔ.”+