1 Famiɛn Mun
5 Kɛ Iramun m’ɔ ti Tir+ famiɛn’n tili i kɛ b’a sie Salomɔn famiɛn i si i osu’n, ɔ sunmɛnnin i sufuɛ wie mun Salomɔn sin. Afin Iramun nin Davidi be ti janvuɛ.*+ 2 Salomɔn kusu sunmannin sran naan be ko se Iramun+ kɛ: 3 “Ɔ bɔbɔ a si kpa kɛ min si Davidi w’a kwlá kplanman sua kun mɔ i Ɲanmiɛn Zoova i dunman o su-ɔ. Afin i kpɔfuɛ nga be bo sin yiɛ i’n be fali alɛ wlɛli i sin lele naan Zoova w’a yo naan w’a ɲan kwlalɛ be su.*+ 4 Sanngɛ siɛn’n, min Ɲanmiɛn Zoova w’a yo maan m’an ɲan min ti min kpɔfuɛ nga be bo sin yia min’n be sa nun.+ Sran fi jasoman min wun yɛ sa tɛ fi juman e su.+ 5 Ɔ maan n kunndɛ kɛ ń kplán sua kun naan min Ɲanmiɛn Zoova i dunman’n tran su, kɛ nga Zoova fa tali min si Davidi i nda’n sa. Ɔ seli i kɛ: ‘Ɔ wa nga ń fɛ́ i ń síe ɔ osu m’ɔ́ trán ɔ famiɛn bia’n su’n, i yɛ ɔ́ kplán sua nga min dunman’n ɔ́ trán su’n niɔn.’+ 6 I sɔ’n ti’n, se ɔ sran mun naan be ko kpɛ Liban lɔ sɛdri waka+ be man min. Min sufuɛ’m be nin ɔ sufuɛ’m bé dí junman’n likawlɛ. Yɛ like nga a kle’n yɛ ń fá túa ɔ sufuɛ’m be kalɛ-ɔ. Afin ɔ bɔbɔ a si kɛ e nvle’n nunfuɛ’m be nun wie fi siman waka kpɛ kɛ Sidɔnfuɛ’m be sa.”+
7 Kɛ Iramun tili Salomɔn i ndɛ’n, i klun jɔli kpa. Ɔ seli kɛ: “Maan be manman Zoova. Afin ɔ mannin Davidi i ba ngwlɛlɛfuɛ kun naan ɔ sie sran kpanngban nga mun.”+ 8 Ɔ maan Iramun ko mannin Salomɔn i ngaliɛ. Ɔ seli i kɛ: “N tili ɔ ngaliɛ’n. Ń má fá sɛdri nin zenevrie waka nga a kunndɛ’n i kwlaa ń mán wɔ.+ 9 Min sufuɛ’m bé wá fá waka mun Liban oka’m be su bé fá kɔ́ jenvie’n su lɔ. Kpɛkun ń cící be ń fá yí jenvie’n i ɲin su, yɛ ń fá be ń kɔ́ lika nga a kle min’n nun lɔ. Kɛ be ko ju lɔ’n, ń ɲánji be, kpɛkun a su ba be falɛ. Yɛ ɔ kusu, á fá aliɛ nga n srɛli wɔ’n á mán e nin min awlofuɛ mun.”+
10 Ɔ maan Iramun fali sɛdri nin zenevrie waka nga Salomɔn srɛli i’n i kwlaa ko mɛnnin i. 11 Salomɔn kusu fali ble kɔɔ* akpiakpi ablaɔn (20.000), ɔ nin olivie ngo klanman kpa* kɔɔ ablaɔn (20) ko mannin Iramun nin i awlofuɛ mun. Like nga Salomɔn fa man Iramun afuɛ nuan kwlaa nun’n yɛ ɔ o lɛ-ɔ.+ 12 Zoova mannin Salomɔn i ngwlɛlɛ, kɛ ng’ɔ fa tɛli i nda’n sa.+ Ɔ maan Iramun nin Salomɔn be afiɛn sɛli kpa. Be nɲɔn’n be trali aenguɛ.
13 Famiɛn Salomɔn fali sran wie mun Izraɛlifuɛ’m be afiɛn kpɛkun ɔ miannin be kɛ be di junman wie mun. Ɔ fali sran akpiakpi ablasan (30.000).+ 14 Anglo kwlaa nun’n, ɔ sunman sran akpiakpi blu (10.000) Liban lɔ. Be di anglo kun Liban lɔ kpɛkun be sa be sin be wa di anglo nɲɔn be awlo. Adoniramun+ yɛ ɔ nian be nga be di junman’n be su-ɔ. 15 Salomɔn le junman difuɛ* akpiakpi ableso (70.000). Yɛ ɔ le yɔbuɛ sɛfuɛ+ akpiakpi ablaɔcuɛ (80.000), be di junman oka’m be su.+ 16 Asa ekun’n, Salomɔn le junman sunianfuɛ+ akpi nsan ya nsan (3.300). Be yɛ be nian junman difuɛ’m be su-ɔ. 17 Famiɛn’n seli be kɛ be yiyi yɔbuɛ dandan mun, yɔbuɛ nga be le gua mun,+ naan be sɛ be+ fa wla sua’n i bo ase.+ 18 Salomɔn i junman difuɛ mun nin Iramun i junman difuɛ mun, ɔ nin Gebalifuɛ’m+ be sɛ yɔbuɛ mun. Kpɛkun be yiayia waka nin yɔbuɛ’m be nuan naan be fa kplan sua’n.