1 Famiɛn Mun
4 Famiɛn Salomɔn sieli Izraɛli mɛn wunmuan’n.+ 2 I junman difuɛ dandan mun* yɛ: Zadɔku+ i wa Azaria, ɔ ti Ɲanmiɛn ɲrun jranfuɛ. 3 Eliorɛfu nin Aia mɔ be ti Sisa i mma mun’n be ti fluwa klɛfuɛ,+ Ailidi i wa Zozafati+ yɛ ɔ klɛ nvle’n nun ndɛ mun sie-ɔ. 4 Zoyada i wa Benaya+ ti sonja’m be su kpɛn, yɛ Zadɔku nin Abiataa+ be ti Ɲanmiɛn ɲrun jranfuɛ. 5 Natan+ i wa Azaria ti famiɛn’n i junman su nianfuɛ’m be su kpɛn, yɛ Natan i wa Zabudi ti Ɲanmiɛn ɲrun jranfuɛ nin famiɛn’n i janvuɛ.+ 6 Aisa nian awlo’n nun ninnge’m be su, yɛ Abda i wa Adoniramun+ nian be nga be mian be mɔ be di junman’n be su.+
7 Salomɔn i junman sunianfuɛ’m be ti blu-nin-nɲɔn (12) Izraɛli mɛn wunmuan’n nun. Be yɛ be kunndɛ like be man famiɛn’n nin i awlofuɛ mun-ɔn. Anglo kun nun’n, be nun kun kunndɛ aliɛ fa ba, be yo i sɔ lele sin yia nun afuɛ kwlakwla.+ 8 Be dunman mun yɛ: Ur i wa’n, i lika liɛ’n yɛle Efraimun okaoka lika’n, 9 Dekɛɛ i wa’n, i lika liɛ’n yɛle Makazi, nin Salibimun,+ nin Bɛti-Semɛsi, nin Elɔnin-Bɛti-Anan. 10 Esɛdi i wa’n, i lika liɛ’n yɛle Arubɔti (ɔ sie Soko ɔ nin Efɛɛ mɛn’n kwlaa). 11 Abinadabu i wa’n, i lika liɛ’n yɛle Dɔɔ okaoka lika’n i kwlaa (Salomɔn i wa bla Tafati kacili i yi). 12 Ailidi i wa Baana, i lika liɛ’n yɛle Tanaki nin Megido+ ɔ nin Bɛti-Sean+ mɛn’n i kwlaa. Ɔ o Zaatan i wun lɔ, Zizreɛli i ja ngua lɔ. Ɔ fɛ i Bɛti-Sean lele ju Abɛli-Meola, yɛ ɔ fɛ i lɛ ju Zɔkumeamun+ lika’n nun lɔ. 13 Gebɛɛ i wa’n, i lika liɛ’n yɛle Ramɔtu-Galaadi+ (ɔ sie Manase i wa Zairi+ i klɔ mɔ be ti tannin sua ngunmin mɔ be o Galaadi+ lɔ’n, ɔ sie Aagɔbu+ lika m’ɔ o Basan+ lɔ’n: Be ti klɔ ablesiɛn (60), be sisili be wun, yɛ be anuan’m be sin jajalɛ like’m be ti aaba). 14 Ido i wa Ainadabu, i lika liɛ’n yɛle Maanaimun.+ 15 Aimaazi, i lika liɛ’n yɛle Nɛftali lika’n (ɔ fali Basimati m’ɔ ti Salomɔn i wa bla’m be nun kun’n fa yoli i yi). 16 Usai i wa Baana, i lika liɛ’n yɛle Azɛɛ nin Bealɔti. 17 Parua i wa Zozafati, i lika liɛ’n yɛle Isakaa. 18 Ela i wa Simei,+ i lika liɛ’n yɛle Bɛnzamɛn.+ 19 Uri i wa Gebɛɛ, i lika liɛ’n yɛle Galaadi+ mɛn’n, mɔ laa’n ɔ ti Siɔn+ m’ɔ ti Amɔɔfuɛ’m be famiɛn’n nin Ɔgu+ m’ɔ ti Basan famiɛn’n be mɛn’n. Asa ekun’n, famiɛn’n i junman sunianfuɛ kun o i junman sunianfuɛ onga’m be kwlaa nga be o nvle’n nun’n be su.
20 Zidafuɛ mun nin Izraɛlifuɛ’m be sɔnnin kpa kɛ jenvie nuan aunɲan’n sa.+ Be di like, be nɔn nzan yɛ be di aklunjɔɛ.+
21 Salomɔn sieli famiɛn nga be o Nzue’n*+ i nuan lɛ’n, lele fa ju Filistifuɛ’m be mɛn’n nun ɔ nin Ezipti mɛn’n i tiwa su lɔ. Salomɔn i blɛ su’n, be suli lapo be mɛnnin i, yɛ be suli i titi.+
22 Like nga Salomɔn nin i awlofuɛ’m be di i cɛn ba kun nun’n yɛ: Sanmlɛn mlɛnnɛnnɛn kpa kɔɔ* ablasan (30), nin sanmlɛn kɔɔ ablesiɛn (60), 23 yɛ nannin blu mɔ b’a lo kpa’n, ɔ nin nannin nga be didi be wlan sin’n ablaɔn (20), nin bua ya kun (100), nin flete’n i wafa wie mun, nin wannzannin mun, ɔ nin anunman nga b’a lo kpa’n. 24 Salomɔn sie Nzue’n*+ i nuan lɔ lika’n kwlaa, ɔ fɛ i Tifsa lele fa ju Gaza.+ Ɔ sie famiɛn nga be o Nzue’n i nuan lɔ’n be kwlaa. Fɔundi o i mɛn’n i lika’n kwlaa nun.+ 25 Salomɔn blɛ su’n, Zidafuɛ mun nin Izraɛlifuɛ’m be dili alaje, yɛ kɛ ɔ fɛ i Dan lele m’ɔ́ fá jú Beɛ-Seba’n, be tinuntinun be o be bɔbɔ be viɲin waka mun, ɔ nin be figie waka’m be bo.
26 Sua ba nga Salomɔn i nnɛn kpanngɔ nga be cuɛn i kakaklolo mun’n be la nun’n, be ti akpi nnan (4.000).* Yɛ ɔ le nnɛn kpanngɔ* akpiakpi blu-nin-nɲɔn (12.000).+
27 Famiɛn’n i janunfuɛ sɔ’m be fa aliɛ blɛ Salomɔn nin be kwlaa nga be di like famiɛn Salomɔn i tabli’n su’n. Be tinuntinun be di be junman’n anglo kunngun, yɛ be nian nun kpa naan ninnge’m be kwlakwla be ti w’a yia.+ 28 Asa ekun’n, kan kwlaa ng’ɔ fata kɛ be man nnɛn kpanngɔ mun nin nnɛn kpanngɔ nga be cuɛn kakaklolo’m be aliɛ’n, be fa ɔɔzu nin ijre be ko man be. Be nian nga be kleli kɛ be fa man be’n su yɛ be fa man be-ɔ.
29 Ɲanmiɛn mannin Salomɔn i ngwlɛlɛ nin akunndan dan kpa, ɔ nin sa silɛ kpanngban kpa kɛ jenvie nuan aunɲan’n sa.+ 30 Salomɔn i ngwlɛlɛ’n ɔ tra wia afiliɛ lɔfuɛ’m be kwlaa be ngwlɛlɛ’n, nin Eziptifuɛ’m be ngwlɛlɛ’n i kwlaa.+ 31 Ɔ si ngwlɛlɛ tra sran kwlaa. Ɔ si ngwlɛlɛ tra Etan+ m’ɔ ti Ezrafuɛ’n, nin Eman,+ nin Kalkɔlu+ nin Daada mɔ be ti Maɔli i mma mun’n. I dunman’n fuli nvlenvle’m be kwlaa be nun.+ 32 Ɔ buli ɲanndra+ akpi nsan (3.000), yɛ ɔ kpɛli jue+ akpi kun nin nnun (1.005). 33 Ɔ kannin waka’m be ndɛ. Ɔ fɛ i Liban lɔ sɛdri waka’m be su lele fa ju izɔpu+ mɔ be fifi talɛ’m be su’n be su. Ɔ kannin nnɛn mun,+ nin anunman mun,*+ nin nnɛn nga be cuɛn be wun ase mun,*+ ɔ nin jue’m be ndɛ. 34 Sran’m be fin nvlenvle’m be kwlaa nun be ba Salomɔn i ngwlɛlɛ ndɛ’m be tielɛ. Famiɛn’m be bɔbɔ be fin asiɛ i lika’n kwlakwla be ba, afin be tili i ngwlɛlɛ’n i ngan.+