Ezekiɛli

16 Zoova kannin ndɛ kleli min ekun. Ɔ seli min kɛ: 2 “Sran wa, kan tete sa nga Zerizalɛmun yo be’n be ndɛ kle i.+ 3 Ɔ fata kɛ a se kɛ: ‘Ndɛ nga Miɛn Zoova m’ɔ Sie Like Kwlakwla’n kan’n yɛ: “Ɔ nannan’m be fin Kanaanfuɛ’m be mɛn’n nun lɔ, kpɛkun lɔ yɛ be wuli wɔ-ɔ. Ɔ si’n ti Amɔɔfuɛ,+ yɛ ɔ nin’n ti Ɛtifuɛ.+ 4 Kɛ be wuli wɔ’n, cɛn nga i nun yɛ be wuli wɔ’n, b’a kpɛman ɔ kotua ɲanman’n, b’a faman nzue b’a wunnzinman wɔ naan w’a yo sanwun, b’a faman njin b’a kpakpaman ɔ wun, yɛ b’a faman tannin b’a ciciman ɔ wun. 5 Sran fi w’a siman ɔ aunnvɔɛ naan w’a yo ninnge sɔ’m be nun ba kun sa w’a man wɔ. Sran fi w’a siman ɔ aunnvɔɛ. I kpa bɔbɔ’n, kɛ be wuli wɔ’n be toli wɔ be yili i ijre’n nun lɔ, afin be kpɔ wɔ.

6 “‘“Kɛ ń sín’n, n wunnin wɔ, a su kplikpli ɔ mmoja’n nun. Kpɛkun kɛ a la ɔ mmoja’n nun lɛ’n, n seli ɔ kɛ: ‘Ka nguan nun!’ Nanwlɛ, kɛ a la ɔ mmoja’n nun lɛ’n n seli ɔ kɛ: ‘Ka nguan nun!’ 7 N yoli maan a trɛli kpa, a yoli kɛ fie su lɔ waka mɔ be fɛfɛ’n sa. A ɲinnin yɛ a yoli kpa, kpɛkun a wlali be wun klanman yolɛ ninnge kpakpa mun. A ɲannin wunflɛn, ɔ ti ndrɛ’n fuli, sanngɛ ɔ wun ti kplɛn, like fi nunman ɔ wun.”’

8 “‘Kɛ ń sín mɔ n wunnin wɔ’n, n wunnin i wlɛ kɛ w’a ɲin naan be klo wɔ-ɔ, ɔ yo ye. Ɔ maan n trɛli min tralɛ’n nun n fa katali ɔ wun,+ afin ɔ wun ti kplɛn. Kpɛkun n tali nda, yɛ e nin wɔ trali aenguɛ. Ɔ maan a kacili min liɛ.’ Ndɛ nga Miɛn Zoova m’ɔ Sie Like Kwlakwla’n ɔ kan’n yɛ ɔ o lɛ-ɔ. 9 Asa ekun’n, n fali nzue n wunnzinnin wɔ, kpɛkun n saloli ɔ wun mmoja’n, yɛ n fali ngo n guali ɔ wun.+ 10 I sin’n, n fali tralɛ mɔ be yili nun desɛn’n n wlali ɔ wun, kpɛkun n fali ngbabua mɔ be fali kplo kun m’ɔ ti kpa yɛ be yoli’n, n mannin wɔ. N fali lɛn kplɔkɔɔ n katali ɔ wun. Kpɛkun n fali tralɛ mɔ be le gua kpa’n n wlali ɔ wun. 11 N fali be wun klanman yolɛ ninnge mun n wlawlali ɔ wun, n fali nga mun n wlali ɔ sa, yɛ n fali kɔmin ɲanman kun n wlali ɔ kɔmin. 12 Asa ekun’n, n fali nga kun n wlali ɔ bue’n nun, yɛ n fali asunmanndi n wlali ɔ su’n nun. Kpɛkun n fali famiɛn kle klanman kun n wlali ɔ ti. 13 A wla sika ɔkwlɛ nin sika fa di talua, yɛ be fa lɛn kplɔkɔɔ, ɔ nin ninnge nga be le gua’n be fa yo ɔ tralɛ mun, kpɛkun be yi be nun desɛn. Sanmlɛn mlɛnnɛnnɛn nin awɛma nzue, nin ngo yɛ a di-ɔ. A yoli klanman kpa,+ ɔ maan a nin wlengbi bla yolɛ fata.’”

14 “‘Ɔ dunman’n fuli nvlenvle’m be nun,+ ɔ klanman’n ti. Ɔ klanman’n yoli dan, afin n fali min aɲrunɲan’n n sieli ɔ su.’+ Ndɛ nga Miɛn Zoova m’ɔ Sie Like Kwlakwla’n ɔ kan’n yɛ ɔ o lɛ-ɔ.”

15 “‘Sanngɛ a fali ɔ wla guali klanman mɔ a ti’n su.+ Kpɛkun a boli tekle, ɔ dunman m’ɔ fuli’n ti.+ Be kwlaa nga be sin lɛ’n, a nin be lali,+ yɛ ɔ klanman’n yoli be liɛ. 16 A fali ɔ tralɛ’m be nun wie mun fa yoli lika nglonglo nga a bo tekle lɛ’n+ be klanman. Ninnge sɔ mun’n, ɔ fataman kɛ be yo be, ɔ fataman kɛ be yo be mlɔnmlɔn. 17 Asa ekun’n, a fali njuaba nglanman nga be fali sika ɔkwlɛ nin sika be yoli be mɔ n fa mannin wɔ’n, a fa be yoli yasua’m be nzɔliɛ kpɛkun a nin be boli tekle.+ 18 Kpɛkun a fali ɔ tralɛ mɔ be yili be nun desɛn’n a fa katali be* su. A fali min ngo’n nin min ansan’n mannin be.+ 19 Kpɛkun kpanwun nga n fa mannin wɔ’n, mɔ be fali sanmlɛn mlɛnnɛnnɛn, nin awɛma nzue, nin ngo be yoli mɔ n fa mannin wɔ kɛ a di’n, a fa mannin be wie naan ɔ bɔn be bue nun fannin.*+ Sa bɔbɔ ba ng’ɔ juli’n yɛ ɔ o lɛ-ɔ.’ Ndɛ nga Miɛn Zoova m’ɔ Sie Like Kwlakwla’n ɔ kan’n yɛ ɔ o lɛ-ɔ.”

20 “‘Ɔ mma yasua nin ɔ mma bla nga a wuli be mannin min’n,+ a fali be yili tɛ mannin amuin mun naan be di be.+ ?Tekle nga a bo’n ɔ juman wɔ? 21 A kunnin min mma mun, a fali be yili i sin nun fa yili tɛ.+ 22 Kɛ á fá ɔ wun wlá tete sa’m be yolɛ’n nun mɔ á bó tekle’n, ɔ wla w’a kpɛnman ɔ kaan nun. Blɛ sɔ’n nun nn ɔ wun ti kplɛn, like fi nunman ɔ wun, yɛ a kondo ɔ mmoja’n nun. 23 Sa tɛtɛ kwlaa sɔ mɔ a yoli be’n ti’n, ɔ yako, ɔ yako!’+ Ndɛ nga Miɛn Zoova m’ɔ Sie Like Kwlakwla’n ɔ kan’n yɛ ɔ o lɛ-ɔ. 24 A yoli kpɔlɛ nin lika nglonglo mun gua dandan’m be kwlaa be su. 25 A kplannin ɔ lika nglonglo mun akpɔ’m be kwlaa be lika nga be wun be kpa lɛ’n be su. A yoli maan ɔ klanman’n kacili like tɛ, afin a fali ɔ wun mannin* be kwlaa nga be sin lɛ’n.+ Ɔ tekle bolɛ’n yoli dan.+ 26 A nin Eziptifuɛ’m+ be mma yasua mɔ be ti ɔ mantanfuɛ’n,* mɔ be wun blibli be bla kunndɛlɛ nun’n be boli tekle. A fali ɔ tekle bolɛ dan’n fa fɔkɔli min awlɛn. 27 Ń má tínngɛ min sa’n nun ɔ wun, kpɛkun ń kpɛ́ aliɛ nga a di’n su.+ Ń má yí wɔ ń mán bla nga be kpɔ wɔ’n+ naan be yo wɔ like nga be klo’n, ń yí wɔ ń mán Filisti talua mɔ tete sa nga a yo’n ɔ sanngan be akunndan’n.+

28 “‘Kɛ mɔ like nga a yo’n ɔ juman wɔ’n ti’n, a nin Asirifuɛ’m be mma yasua mun boli tekle wie.+ Sanngɛ kɛ a nin be boli tekle wieli’n, w’a juman wɔ ekun. 29 Ɔ maan a boli tekle ekun, a boli tekle aata difuɛ’m be mɛn’n nun lɔ,* ɔ nin Kaldefuɛ’m be mɛn’n nun lɔ.+ Sanngɛ ɔ nin i sɔ’n ngba’n w’a juman wɔ ekun. 30 Kɛ á yó ninnge kwlaa sɔ mun’n, mɔ á yó kɛ tekle bofuɛ kun m’ɔ siman ɲannzuɛn’n sa’n,+ blɛ sɔ’n nun’n w’a kwlá traman ɔ awlɛn kaan sa!* Ndɛ nga Miɛn Zoova m’ɔ Sie Like Kwlakwla’n ɔ kan’n yɛ ɔ o lɛ-ɔ. 31 Sanngɛ kɛ a yoli ɔ kpɔlɛ mun akpɔ’m be kwlaa be lika nga be wun be kpa lɛ’n be su’n, mɔ a yoli ɔ lika nglonglo mun gua dandan’m be kwlaa be su’n, blɛ sɔ’n nun’n nn a timan tekle bofuɛ, afin a kplinman su kɛ be tua ɔ kalɛ. 32 A ti bla kun m’ɔ kunndɛ bian i wun bo-ɔ, a yaci ɔ wun’n i lɛ a ko fa aofuɛ mun.+ 33 Sran’m be man tekle bofuɛ’m be kwlaa be like.+ Sanngɛ ɔ liɛ’n, ɔ bɔbɔ yɛ a cɛ be nga be wun blibli be kɛ be nin wɔ bé lá’n be like-ɔ.+ A man be like naan be fin lika’n kwlaa nun be bla naan be nin wɔ be wa bo tekle.+ 34 Like nga bla nga be bo tekle’n be yo’n i asabesin’n yɛ a yo-ɔ. Sran fi boman tekle kɛ nga a fa yo i lɛ’n sa! A tua sran’m be kalɛ, sanngɛ be tuaman wɔ kalɛ wie. Like nga ɔ wiengu’m be yo’n i asabesin’n yɛ a yo-ɔ.’

35 “Ɔ maan tekle bofuɛ,+ tie ndɛ nga Zoova kan’n. 36 I sɔ’n ti’n, ndɛ nga Miɛn Zoova m’ɔ Sie Like Kwlakwla’n kan’n yɛ: ‘A fali ɔ wun wlɛli i tekle bolɛ’n nun, yɛ kɛ a nin be mɔ be klo wɔ’n, ɔ nin ɔ amuin mɔ be ti tete like nin like kain’n* amún bó tekle’n,+ a fali ɔ wun kplɛn’n kleli. A guali ɔ mma’m be mmoja’n i ase fa sɔli be bɔbɔ.+ 37 I sɔ’n ti’n, ń má yía be kwlaa nga be klo wɔ mɔ a mannin be aklunjɔɛ’n, ń yía be kwlaa nga a kloli be’n, ɔ nin be kwlaa nga a kpɔli be’n. Ń má fá be lika’n kwlaa nun ń bá naan be nin wɔ yia nun. Kpɛkun ń fá ɔ wun kplɛn’n ń klé be, yɛ bé wún ɔ wun kplɛn’n.+

38 “‘Ń má tú ɔ fɔ kɛ ng’ɔ fata kɛ be fa tu bla nga be kunndɛ bian be wun bo’n,+ ɔ nin bla nga be gua sran mmoja ase’n+ be fɔ’n sa. Kɛ mɔ m’an fa ya dan, mɔ kusu n si kwla’n ti’n, ń má gúa ɔ mmoja’n i ase.+ 39 Ń má fá wɔ ń wlá be sa nun, kpɛkun bé sáci ɔ kpɔlɛ mun, yɛ bé búbú ɔ lika nglonglo mun.+ Bé dé ɔ wun tralɛ mun,+ bé fá ɔ wun klanman yolɛ ninnge nglanman mun,+ kpɛkun bé yáci ɔ wun kplɛn, like fi su kaman ɔ wun. 40 Bé wá yó maan sran kpanngban bé wá tɔ́ ɔ su,+ bé fínfín ɔ yɔbuɛ,+ kpɛkun bé fá be tokofi mun bé kún wɔ.+ 41 Bé fá sin bé wɔ́ ɔ sua’m be nun,+ yɛ bé tú ɔ fɔ bla kpanngban be ɲin bo lɛ. Kpɛkun ń yó maan ɔ tekle bolɛ’n ɔ́ wíe,+ a su tuaman sran’m be kalɛ kun. 42 Ń má gúa ya nga n fɛli i ɔ wun’n i ase,+ n su faman ɔ wun ya kun.+ Ń má gúa min wla ase, n su faman ya kun.’

43 “‘Kɛ mɔ ɔ wla w’a kpɛnman ɔ kaan nun’n+ su mɔ a yoli ninnge kwlaa sɔ mun fa fɔkɔli min awlɛn’n ti’n, ń má fá ɔ ayeliɛ’n i nuan like’n ń mán wɔ. A su yoman ɲannzuɛn sa nin tete sa kwlaa sɔ’m be kun. Ndɛ nga Miɛn Zoova m’ɔ Sie Like Kwlakwla’n ɔ kan’n yɛ ɔ o lɛ-ɔ.

44 “‘Nian! Be kwlaa nga be bu ɲanndra’n, bé wá bú ɔ wun ɲanndra nga: “Kɛ niɛn’n fa ti’n, yɛ i wa bla’n fa ti-ɔ!”+ 45 A ti ɔ nin’n i wa bla sakpa, ɔ bumɛn i wun’n nin i mma’m be like fi. Yɛ a ti ɔ niaan bla’m be niaan bla sakpa, be buman be wun mun nin be mma’m be like fi. Ɔ nin’n ti Ɛtifuɛ, yɛ ɔ si’n ti Amɔɔfuɛ.’”+

46 “‘Ɔ ɲrun kpɛn bla’n yɛle Samari,+ ɔ tran ɔ lika’n i nglo lɔ,* ɔ nin i mma bla mun.*+ Ɔ sinma bla m’ɔ tran ɔ lika’n i ngua lɔ’n,* yɛle Sodɔmun+ nin i mma bla mun.+ 47 Amun fali be atin’m be su, yɛ amun yoli be tete sa mun wie. Sanngɛ nɛ́n i ngba-ɔ, blɛ kpe kan nun’n, amun ayeliɛ’n ɔ wa yoli tɛ kpa trali be liɛ’n.+ 48 Ndɛ nga Miɛn Zoova m’ɔ Sie Like Kwlakwla’n kan’n yɛ: ‘N wo lɛ sakpa. Nanwlɛ, ɔ niaan bla Sodɔmun nin i mma bla’m b’a yoman like nga a nin ɔ mma bla mun amun yoli i lɛ’n. 49 Nian! Ɔ niaan bla Sodɔmun i sa tɛ ng’ɔ yoli’n yɛ: Ɔ nin i mma bla’m+ be tuli be wun.+ Be ɲannin aliɛ kpanngban,+ yɛ be trannin fɔun nun,+ like fi kunman be srɛ. Ɔ nin i sɔ’n ngba’n, b’a suanman be mɔ be leman wie’n, ɔ nin yalɛfuɛ’m be bo.+ 50 B’a yaciman be wun tulɛ.+ Be yoli tete sa mun min ɲrun.+ Ɔ maan n wunnin i wlɛ kɛ ɔ fata kɛ n nunnun be.+

51 “‘Sa tɛ kpanngban nga a yo be’n, Samari+ liɛ’n ɔ jumɛn i bue. A yoli tete sa kpanngban trali be liɛ’n. I sɔ’n ti’n, be buli ɔ niaan bla’m be sran kpa, tete sa kwlaa nga a yoli be’n ti.+ 52 Siɛn’n, ɔ fata kɛ a sua ɔ ɲannzuɛn’n, afin a jrannin ɔ niaan bla’m be sin. Kɛ mɔ a yoli sa tɛ dan trali be liɛ’n ti’n, be ti kpa tra wɔ. Ɔ maan siɛn’n, maan ɲannzuɛn kun wɔ, sua ɔ ɲannzuɛn’n, afin a yoli maan be buli ɔ niaan bla’m be sran kpa.’

53 “‘Kpɛkun ń má yíayía be sran nga be trali be ɔli’n, ń yíayía Sodɔmun nin i mma bla mun be sran nga be trali be ɔli’n, yɛ ń yíayía Samari nin i mma bla mun be sran nga be trali be ɔli’n. Asa ekun’n, ń yíayía ɔ sran nga be tra be ɔli’n, ɔ nin be liɛ mun likawlɛ,+ 54 kɛ ɔ ko yo naan w’a kwla sua ɔ ɲannzuɛn’n ti. Sa nga a yoli’n ti’n, ɲannzuɛn kún wɔ, afin a fɔnvɔli be. 55 Ɔ niaan bla Sodɔmun nin i mma bla mun bé wá sá be sin be osu’n nun. Yɛ ɔ niaan bla Samari nin i mma bla mun bé wá sá be sin be osu’n nun. Ɔ kusu a nin ɔ mma bla mun amún wá sá amun sin amun osu’n nun.+ 56 I nun mɔ á tú ɔ wun’n, ɔ niaan bla Sodɔmun i ndɛ kanlɛ nin wɔ fataman. 57 Blɛ sɔ’n nun’n, nn ɔ klunwi’n nin-a fiteman nglo.+ Siɛn’n, Siri i mma bla mun, ɔ nin i mantanfuɛ mun be kpɛ ɔ nzowa. Kpɛkun Filistifuɛ’m+ be mma bla mun, be mɔ be bo sin yia wɔ’n, be yo ɔ finfin. 58 Ɲannzuɛn sa nin tete sa nga a yoli be’n, á wá wún be su afɛ’n.’ Ndɛ nga Zoova kan’n yɛ ɔ o lɛ-ɔ.”

59 “Afin ndɛ nga Miɛn Zoova m’ɔ Sie Like Kwlakwla’n kan’n yɛ: ‘Like nga a yoli’n, i kunngba’n yɛ ń má fá yó wɔ siɛn’n niɔn.+ Afin a sacili min aenguɛ’n, afin w’a buman nda nga n tali’n i like fi.+ 60 Sanngɛ min liɛ’n, ɔ kaan nun aenguɛ nga e nin wɔ e trali’n, min wla wá kpɛ́n su. Kpɛkun e nin wɔ é wá trá aenguɛ kun m’ɔ́ ká lɛ tititi-ɔ.+ 61 Kɛ á wá sɔ́ ɔ ɲrun kpɛn bla mun, nin ɔ sinma bla’m be nun’n, ɔ wla wá kpɛ́n ɔ ayeliɛ’n su, kpɛkun ɲannzuɛn kún wɔ.+ Ń má fá be ń mán wɔ naan be kaci ɔ wa bla, sanngɛ nán ɔ aenguɛ’n ti-ɔ.’

62 “‘N bɔbɔ e nin wɔ é wá trá aenguɛ. Kpɛkun á wá sí jrɛiin kɛ n ti Zoova. 63 Kpɛkun kɛ ń má yáci sa nga a yoli’n i kwlaa ń cɛ́ wɔ’n, ɔ wla wá kpɛ́n su, yɛ ɲannzuɛn dan m’ɔ́ wá kún wɔ’n ti’n,+ a su kwlá ukeman ɔ nuan. Afin ɔ ɲin wá gúa ase.’+ Ndɛ nga Miɛn Zoova m’ɔ Sie Like Kwlakwla’n ɔ kan’n yɛ ɔ o lɛ-ɔ.”