2 Be Ɲoliɛ

30 Ezekiasi sunmannin sran naan be wɔ Izraɛli+ nin Zida akpasua’m be kwlaa be su. Ɔ klɛli fluwa ko mannin Efraimunfuɛ mun nin Manasefuɛ mun bɔbɔ.+ Ɔ seli be kɛ be bla Zoova i sua’n nun Zerizalɛmun lɛ naan be di Delɛ Cɛn’n be man Zoova m’ɔ ti Izraɛli Ɲanmiɛn’n.+ 2 Sanngɛ famiɛn’n, nin i sran dandan mun, nin be kwlaa nga be yiali Zerizalɛmun lɔ’n, be waan anglo’n i nɲɔn su’n nun yɛ bé dí Delɛ Cɛn’n niɔn.+ 3 Afin b’a kwlá diman cɛn sɔ’n cɛn nga i nun yɛ be di i titi’n.+ Afin Ɲanmiɛn ɲrun jranfuɛ nga be yoli be wun sanwun’n b’a sɔnman,+ yɛ sran’m b’a yiaman Zerizalɛmun lɔ. 4 Ajalɛ sɔ’n yoli famiɛn’n nin be nga be yiali lɛ’n be kwlaa be fɛ. 5 I sɔ’n ti’n, be waan bé fɛ́ i Beɛ-Seba lɛ lele fá jú Dan+ naan bé bó i jɔ Izraɛli nvle wunmuan’n nun kɛ sran’m be bla Zerizalɛmun lɛ, naan be wa di Delɛ Cɛn’n man Zoova m’ɔ ti Izraɛli Ɲanmiɛn’n. Afin be nin-a diman cɛn sɔ’n i likawlɛ, kɛ nga be fa klɛli i mmla’n nun sa.+

6 Ngaliɛ kanfuɛ’m* be fali famiɛn’n nin i nvle’n nun sran dandan’m be fluwa mun sinnin Izraɛli nin Zida akpasua’m be kwlaa be su kɛ nga famiɛn’n kannin’n sa. Be seli kɛ: “Izraɛlifuɛ mun, amun sa amun sin Zoova m’ɔ ti Abraamun, nin Izaaki, nin Izraɛli Ɲanmiɛn’n i wun. I liɛ’n, ɔ kwla sɛ i sin be nga be ɲannin be ti Asiri famiɛn’m be sa nun mɔ be kali lɛ’n, be wun ekun.+ 7 Nán amun yo kɛ amun nannan mun nin amun niaan’m be sa. Be liɛ’n, be nin Zoova m’ɔ ti be nannan’m be Ɲanmiɛn’n, b’a nantiman klanman. Ɲanmiɛn kusu yoli maan be kacili kɛ ɲrɛnnɛnfuɛ sa, kɛ nga amun bɔbɔ amun ɲinma fa tɛ i yɛ’n sa.+ 8 I sɔ’n ti’n, nán amun yo ɲin kekle kɛ amun nannan mun sa.+ Amun lo amun wun man Zoova yɛ amun blɛ i lika+ ng’ɔ yoli i sanwun titi’n nun naan amun su Zoova m’ɔ ti amun Ɲanmiɛn’n. I liɛ’n, amun wun ya dan ng’ɔ fali’n, ɔ́ gúɛ i ase.+ 9 Sɛ amun sa amun sin Zoova wun’n, be nga be trali amun niaan mun nin amun mma mun ɔli’n, bé sí be aunnvɔɛ.+ Kpɛkun bé mán be atin kɛ be sa be sin mɛn nga nun wa.+ Afin Zoova m’ɔ ti amun Ɲanmiɛn’n ti aunnvɔɛ sifuɛ dan, ɔ yaci sa nga be yo i’n cɛ.+ Sɛ amun sa amun sin i wun’n, ɔ su kacimɛn i sin siman amun.”+

10 Ngaliɛ kanfuɛ’m* be sinsinnin Efraimun nin Manase mɛn’n nun lɔ klɔ’m be su.+ Be ɔli lele be juli Zabilɔn mɛn’n nun lɔ bɔbɔ. Sanngɛ sran’m be yoli be finfin, be toli be mma.+ 11 Sran wie mɔ be fin Azɛɛ mɛn’n nin Manase mɛn’n nin Zabilɔn mɛn’n be nun’n, be kannin be wun ase. Kpɛkun be bali Zerizalɛmun lɛ.+ 12 Asa ekun’n, Ɲanmiɛn Kpli i sa’n trannin Zidafuɛ’m be su naan be bo yo kun* be yo ndɛ nga famiɛn’n nin nvle’n nun sran dandan’m be kannin’n, i nuan su like. Ndɛ sɔ’n fin Zoova.

13 I anglo nɲɔn’n su’n,+ sran kpanngban kpa be yiali Zerizalɛmun lɛ naan bé dí Kpanwun mɔ Levii Nunman nun’n i ti Cɛn’n.+ Sran’m b’a sɔnman aɔwi. 14 Be ɔli be ko yili tɛ yiwlɛ nga be o Zerizalɛmun lɛ’n,+ yɛ be yili ansan yrawlɛ’m be kwlaa.+ Kpɛkun be ko guali be blo Sedrɔn Kongo’n nun lɔ. 15 I sin’n, be kunnin nnɛn nga bé fá dí Delɛ Cɛn’n anglo nɲɔn su’n, i cɛn ba blu-nin-nnan’n (14) su. Ɲannzuɛn kunnin Ɲanmiɛn ɲrun jranfuɛ mun nin Levifuɛ mun. Ɔ maan be ko yoli be wun sanwun. Kpɛkun be fali nnɛn nga be fa yi tɛ nga kɛ bé yí’n be yra nnɛn’n i kɔlikɔli’n be bali Zoova i sua’n nun. 16 Kɛ nga be klɛli i Moizi m’ɔ ti Ɲanmiɛn Kpli i sran’n i Mmla’n nun’n sa’n, be ɔli kan nga be siesieli be lɛ’n. I sin’n, Ɲanmiɛn ɲrun jranfuɛ’m be fa mmoja nga Levifuɛ’m be fa man be’n, be kpɛntɛnkpɛntɛnnin i tɛ yiwlɛ’n su.+ 17 Be nga be yiali lɛ’n, be sunman lika b’a yoman be wun sanwun. Be seli Levifuɛ mun kɛ be jran be kwlaa nga be ti fiɛn’n be ja nun, naan be kun nnɛn nga bé fá dí Delɛ Cɛn’n,+ naan be yo be sanwun Zoova ɲrun. 18 Afin nvle’n nunfuɛ’m be sunman lika b’a yoman be wun sanwun. I li be nga be fin Efraimun, nin Manase,+ nin Isakaa, nin Zabilɔn’n, yɛ be sɔnnin kpa-ɔ. Ɔ nin i sɔ ngba’n, be dili Delɛ Cɛn’n. Kusu nn mmla’n waan nán sran’m be yo sɔ. Sanngɛ Ezekiasi srɛli Ɲanmiɛn mannin be. Ɔ seli kɛ: “Maan Zoova, m’ɔ ti kpa’n+ si 19 sran kwlaa ng’ɔ fuali* kɛ ɔ́ kpɛ́ Ɲanmiɛn Kpli Zoova m’ɔ ti i nannan’m be Ɲanmiɛn’n, i sin atin’n+ i aunnvɔɛ. Kannzɛ bɔbɔ i sɔfuɛ’n w’a yomɛn i wun sanwun kɛ nga mmla’n fa kan’n sa’n, maan ɔ si i aunnvɔɛ.”+ 20 Zoova sieli i su tieli Ezekiasi i nuan ndɛ’n, kpɛkun ɔ yaci cɛli* nvle’n nunfuɛ mun.

21 Izraɛlifuɛ nga be o Zerizalɛmun lɛ’n, be fali cɛn ba nso be dili Kpanwun mɔ Levii Nunman nun’n i ti Cɛn’n.+ Aklunjɔɛ’n yoli dan.+ Kɛ ɔ́ yó sɔ’n, nn Levifuɛ mun nin Ɲanmiɛn ɲrun jranfuɛ’m bé mánmán Zoova cɛn kwlakwla. Yɛ miziki bolɛ ninnge nga be bo’n, be tɛ kekle kpa. Be yoli sɔ fa manmannin Zoova.+ 22 Asa ekun’n, Ezekiasi kannin ndɛ wie mun fa wlali Levifuɛ nga be su Zoova ngwlɛlɛ su’n be fanngan.* Kɛ bé dí cɛn sɔ’n, be dili like lele cɛn ba nso.+ Be yili bo kun yolɛ tɛ mun+ yɛ be lali Zoova m’ɔ ti be nannan’m be Ɲanmiɛn’n i ase.

23 I sin’n, be kwlaa nga be yiali lɛ’n, be nuan sɛli su kɛ bé fá cɛn ba nso ekun bé dí cɛn sɔ’n. Ɔ maan be fali cɛn ba nso ekun be dili cɛn sɔ’n aklunjɔɛ su.+ 24 Ezekiasi m’ɔ ti Zida famiɛn’n mannin be nga be yiali lɛ’n be nannin tola akpi kun (1.000) nin bua akpi nso (7.000). Kpɛkun nvle’n nun sran dandan’m be mannin be nannin tola akpi kun (1.000) ɔ nin bua akpiakpi blu (10.000).+ Kɛ ɔ́ yó sɔ’n, nn Ɲanmiɛn ɲrun jranfuɛ kpanngban kpa bé yó be wun sanwun.+ 25 Zidafuɛ nga be yiali’n, nin Ɲanmiɛn ɲrun jranfuɛ mun, nin Levifuɛ mun, nin be nga be yiali mɔ be fin Izraɛli lɔ’n,+ nin aofuɛ+ nga be fin Izraɛli’n, ɔ nin nga be tran Zida’n, be kwlaa be klun jɔli. 26 Sran’m be klun jɔli dan Zerizalɛmun lɔ. Kɛ ɔ fɛ i Davidi i wa Salomɔn m’ɔ yoli Izraɛli famiɛn’n i blɛ su lele’n, sa kɛ ngalɛ’n sa nin-a juman Zerizalɛmun lɛ le.+ 27 I agualiɛ su’n, Levifuɛ nga be ti Ɲanmiɛn ɲrun jranfuɛ’m be jasoli, kpɛkun be boli muae mannin sran mun.+ Ɲanmiɛn tili be nɛn’n. Yɛ srɛlɛ nga be srɛli i’n, ɔ ɔli lele juli i tranwlɛ m’ɔ ti i liɛ klonglo’n nun lɔ, yɛle kɛ ɲanmiɛn su lɔ.