1 Famiɛn Mun

2 Kɛ Davidi i wie cɛn mantannin koko’n, ɔ kannin ndɛ nga mun kleli i wa Salomɔn: 2 “N su wa wu. I sɔ’n ti’n, jran kekle+ yɛ kle kɛ a ti yasua.+ 3 Yo like nga ɔ Ɲanmiɛn Zoova se ɔ kɛ a yo’n. Yɛle kɛ nanti i atin mun nin i mmla’m be su, fa ndɛ ng’ɔ kan’n su, niɛn i mmla fanunfanun nga be klɛ Moizi i Mmla fluwa’n nun’n be su nanti.+ Sɛ a yo sɔ’n, like kwlaa nga a yo’n nin lika kwlaa nga a kɔ’n, ɔ liɛ yó ye.* 4 Kpɛkun Zoova yía nda ng’ɔ tali min’n i nuan. Ɔ seli min kɛ: ‘Sɛ ɔ mma’m be nian be wun su naan be tu be klun be nanti klanman min ɲrun’n,+ bé ɲán sran tititi ɔ osu’n nun naan ɔ tran Izraɛli famiɛn bia’n su.’+

5 “Ɔ bɔbɔ a si sa nga Zeruya i wa Zoabu yoli min’n i kpa. Yɛ a si sa ng’ɔ fa yoli Izraɛli sonja su kpɛn’m be nun nɲɔn’n: Nɛɛ i wa Abnɛɛ+ nin Zetɛɛ i wa Amaza.+ Ɔ kunnin be. Blɛ mɔ be kunman alɛ’n, ɔ guali mmoja ase.+ Ɔ yoli maan mmoja guali kplo ng’ɔ ci i bo’n, ɔ nin i ja ngbabua’m be su. 6 Ɔ kusu fa ngwlɛlɛ nanti, nán yaci i lɛ naan ɔ fɛ i ti je’n jra Ndia’n* nun lɔ wɛtɛɛ su.+

7 “Sanngɛ yo Baazilai+ m’ɔ ti Galaadifuɛ’n i mma’m be ye. Maan be tran be nga be di like ɔ tabli’n i sin’n be nun wie. Afin blɛ mɔ ń wánndi ɔ niaan bian Absalɔmun i ɲrun’n,+ be suannin min bo.+

8 “Be nun kun ekun yɛle Simei m’ɔ ti Gera m’ɔ ti Bɛnzamɛnfuɛ’n, m’ɔ fin Baurimun’n i wa’n. I yɛ le kun mɔ ń kɔ́ Maanaimun’n,+ ɔ boli min sannzan tɛ kpa’n niɔn.+ Sanngɛ kɛ ɔ ko toli min Zurdɛn’n i nuan lɔ’n, n tɛli i nda Zoova ɲrun. N seli kɛ: ‘N su faman tokofi n kunman wɔ.’+ 9 I sɔ’n ti’n, nán yaci i lɛ sa ngbɛn.+ A ti ngwlɛlɛfuɛ yɛ a si like ng’ɔ fata kɛ a fa yo i’n. Nán yaci i lɛ naan ɔ wu i kpɛnngbɛn wie.”*+

10 Kɛ ɔ yoli sɔ’n, Davidi wuli* yɛ be sieli i Davidi Klɔ’n+ su lɛ. 11 Davidi yoli Izraɛli famiɛn afuɛ ablanan (40). Ɔ dili famiɛn Ebrɔn+ lɔ afuɛ nso, yɛ ɔ dili famiɛn Zerizalɛmun lɔ afuɛ ablasan-nin-nsan (33).+

12 Salomɔn trɛnnin i si Davidi i famiɛn bia’n su. Kpɛkun blɛblɛblɛ i famiɛn dilɛ’n wa takali kpa.+

13 Kɛ ɔ́ kɔ́ i ɲrun’n, Agiti i wa Adonia ɔ wa wunnin Salomɔn i nin Bati-Seba i wun. Bla’n usɛli i kɛ: “?Wɛtɛɛ su yɛ a ba-ɔ?” Ɔ tɛli i su kɛ: “Ɛɛn-ɛn, wɛtɛɛ su-ɔ.” 14 I sin’n, ɔ seli kɛ: “N kunndɛ kɛ ń kán ndɛ kun ń klé wɔ.” Yɛ bla’n seli kɛ: “Kan.” 15 Adonia kan guali su kɛ: “Ɔ bɔbɔ a si kpa kɛ min yɛ ɔ fata kɛ n yo famiɛn’n niɔn, yɛ Izraɛlifuɛ’m be kwlaa be kunndɛ kɛ n yo famiɛn.+ Sanngɛ b’a sieman min famiɛn, min niaan bian’n yɛ be sieli i famiɛn’n niɔn. Zoova bɔbɔ yɛ maan be sieli i famiɛn-ɔn.+ 16 Sanngɛ n kunndɛ kɛ ń srɛ́ ɔ like kun. Nán se kɛ a kplinman su.” Ɔ maan bla’n seli i kɛ: “Kan.” 17 Ɔ seli kɛ: “Yaci, se Salomɔn m’ɔ ti famiɛn’n kɛ ɔ fa Abisagi+ m’ɔ ti Sunɛmunfuɛ’n man min naan ɔ yo min yi. Afin n si kɛ ɔ liɛ’n sɛ a srɛ i’n, ɔ́ kplín su.” 18 Bati-Seba tɛli i su kɛ: “M’an ti! Ń má kó kán ɔ ndɛ’n ń klé famiɛn’n.”

19 Bati-Seba ɔli Famiɛn Salomɔn i wun lɔ naan ɔ́ kó kán Adonia i ndɛ’n klé i. Salomɔn ka lɛ jasoli, ɔ ɔli ko kotoli i bo. I sin’n, ɔ ko trɛnnin i famiɛn bia’n su. Ɔ yoli maan be fali famiɛn bia kun be blɛli i nin naan ɔ trɛn i sa fama su. 20 I sin’n, i nin’n seli i kɛ: “N kunndɛ kɛ ń srɛ́ ɔ like kaan kun. Nán se kɛ a kplinman su.” Famiɛn’n seli i kɛ: “Min nin, srɛ like’n. N su seman kɛ n kplinman su.” 21 Ɔ seli i kɛ: “Maan be fa Abisagi m’ɔ ti Sunɛmunfuɛ’n man ɔ niaan bian Adonia naan ɔ yo i yi.” 22 Salomɔn tɛli i nin su kɛ: “?Ngue ti yɛ a su srɛ kɛ be fa Abisagi m’ɔ ti Sunɛmunfuɛ’n be man Adonia-ɔ? Kpɛ i kpo se kɛ be sie i famiɛn,+ afin ɔ ti min ɲrun kpɛn yasua.+ Yɛ Abiataa m’ɔ ti Ɲanmiɛn ɲrun jranfuɛ’n nin Zeruya+ i wa Zoabu be o i sin.”+

23 Kɛ ɔ yoli sɔ’n, Famiɛn Salomɔn tali nda Zoova ɲrun kɛ: “Like nga Adonia srɛli i lɛ’n ti’n, sɛ w’a wuman’n, maan Ɲanmiɛn tu min fɔ kekle kpa.* 24 N kan Zoova m’ɔ lafiman’n, m’ɔ fali min sieli min si Davidi i famiɛn bia’n su’n, m’ɔ yoli maan min famiɛn dilɛ’n takali kpa’n,+ m’ɔ fali famiɛn dilɛ’n mannin e osu’n+ kɛ ng’ɔ fa tali nda’n sa’n. Andɛ’n, saan Adonia wú.”+ 25 Famiɛn Salomɔn ka lɛ sunmannin Zoyada i wa Benaya,+ ɔ ɔli ko kunnin Adonia.* Kɛ ɔ wuli kɛ ngalɛ’n sa.

26 I sin’n, famiɛn’n seli Abiataa+ m’ɔ ti Ɲanmiɛn ɲrun jranfuɛ’n kɛ: “Kɔ Anatɔtu+ lɔ ɔ asiɛ’n su lɔ. A nin kunlɛ fata, sanngɛ andɛ’n n su kunman wɔ. Afin a suali e Min Zoova m’ɔ Sie Like Kwlakwla’n i Alaka’n min si Davidi i blɛ su.+ Yɛ i nun mɔ afɛ tɔli min si’n su’n a nin i yɛ be fɛli-ɔ.”+ 27 Salomɔn fuannin Abiataa, w’a yoman Zoova i ɲrun jranfuɛ kun. Ɔ maan Eli i osu’n nunfuɛ nga be o Silo+ lɔ’n be su ndɛ nga Zoova kannin’n, ɔ kpɛnnin su.+

28 Kɛ Zoabu tili ndɛ sɔ’n, ɔ wanndi ɔli Zoova i tannin sua’n nun lɔ.+ Kpɛkun ɔ ko toli i sa blali nnɛn wɛ nga be o tɛ yiwlɛ’n su’n. Afin kannzɛ w’a suanman Absalɔmun bo’n,+ sanngɛ ɔ suannin Adonia bo.+ 29 Be wa seli Famiɛn Salomɔn kɛ: “Zoabu w’a wanndi w’a ko fia Zoova i tannin sua’n nun lɔ, ɔ o tɛ yiwlɛ’n i wun lɔ.” Ɔ maan Salomɔn sunmannin Zoyada i wa Benaya, ɔ seli i kɛ: “Kɔ ko kun i!” 30 Benaya ɔli Zoova i tannin sua’n nun lɔ, kpɛkun ɔ seli i kɛ: “Famiɛn’n waan a fite!” Ɔ tɛli i su kɛ: “Cɛcɛ, ń wú wa.” Benaya ko kannin ndɛ’n kleli famiɛn’n, i waan: “Ndɛ nga Zoabu kannin’n yɛ, yɛ wafa ng’ɔ tɛli min su’n yɛ.” 31 Famiɛn’n seli i kɛ: “Yo ng’ɔ kan kleli wɔ’n. Kun i naan sie i. Kɛ ɔ ko yo sɔ’n, nn mmoja nga Zoabu guɛli i ase abɔlɛ su’n w’a tu e nin min si i awlo’n nunfuɛ mun e su.+ 32 Zoova wá yó maan i mmoja’n ɔ́ kɛ́ i bɔbɔ i ti su. Afin ɔ fali tokofi kunnin sran nanwlɛfuɛ nɲɔn mɔ be kpa trɛ i’n, kusu nn w’a boman su w’a kleman min si Davidi: Ɔ kunnin Nɛɛ i wa Abnɛɛ+ m’ɔ ti Izraɛli sonja’m be su kpɛn’n,+ ɔ nin Zetɛɛ i wa Amaza+ m’ɔ ti Zida sonja’m be su kpɛn’n.+ 33 Be mmoja’n ɔ́ ká Zoabu nin i mma’m be ti su tititi.+ Sanngɛ maan Zoova yo maan Davidi nin i mma mun nin i awlo’n be ɲan aunjɔɛ, yɛ maan i famiɛn dilɛ’n taka kpa tititi.” 34 Ɔ maan Zoyada i wa Benaya ɔli ko kunnin Zoabu. Be sieli i i sua’n i wun lɛ, aawlɛ flɛnnɛn’n nun lɔ. 35 I sin’n, famiɛn’n fali Zoyada i wa Benaya+ sieli i Zoabu i osu, ɔ sieli i sonja’m be su kpɛn. Yɛ ɔ fali Zadɔku+ sieli i Abiataa i osu, ɔ sieli i Ɲanmiɛn ɲrun jranfuɛ.

36 I sin’n, famiɛn’n flɛli Simei+ kpɛkun ɔ seli i kɛ: “Kplan ɔ sua kun Zerizalɛmun wa yɛ tran wa. Nán fin klɔ’n nun fite kɔ lika uflɛ. 37 Cɛn nga a fite a kpɛ Sedrɔn Kongo’n,+ saan á wú. Ɔ mmoja’n ɔ́ ká ɔ bɔbɔ ɔ ti su.” 38 Simei tɛli famiɛn’n su kɛ: “Ndɛ nga a kannin’n ti kpa. Ɔ sufuɛ’n nían ndɛ nga i min m’ɔ ti famiɛn’n kannin’n su ɔ́ yó.” Ɔ maan Simei kali Zerizalɛmun lɛ cɛn kpanngban.

39 Kɛ afuɛ nsan sinnin’n, Simei i kanga’m be nun nɲɔn be wanndi ɔli Maaka i wa Akisi+ m’ɔ ti Gati famiɛn’n i sin. Be kan kleli Simei, be seli i kɛ: “Nian, ɔ kanga’m be o Gati lɔ.” 40 Simei ka lɛ fuli i aflunmun’n su ɔli Akisi i wun wunlɛ Gati lɔ naan ɔ́ fɛ́ i kanga mun. Kɛ Simei nin i kanga’m be fin Gati lɔ bali’n, 41 be kan kleli Salomɔn. Be seli i kɛ: “Simei fɛli i Zerizalɛmun wa ɔli Gati, w’a sɛ i sin w’a ba.” 42 Kɛ ɔ yoli sɔ’n, famiɛn’n flɛli Simei kpɛkun ɔ seli i kɛ: “?Nán wɔ yɛ n yoli maan a tali nda Zoova ɲrun mɔ n seli wɔ kɛ cɛn kwlaa nga a fin klɔ’n nun fite naan a kɔ lika uflɛ’n, saan á wú’n niɔn? ?Yɛ w’a seman min kɛ ndɛ nga n kannin’n ti kpa naan á nían su yó?+ 43 ?Ngue ti yɛ w’a diman nda nga a tɛli i Zoova ɲrun’n i su-ɔ? ?Yɛ ngue ti yɛ w’a faman ndɛ nga n kan kleli wɔ’n su-ɔ?” 44 Famiɛn’n seli Simei kɛ: “Ɔ bɔbɔ a si sa tɛ nga a fa yoli min si Davidi’n.+ Zoova wá fá ɔ sa tɛ nga a yoli’n i akatua’n ɔ́ mán wɔ.+ 45 Sanngɛ Famiɛn Salomɔn liɛ’n, ɔ́ ɲán ye tititi.+ Yɛ Davidi i famiɛn dilɛ’n ɔ́ táka kpa tititi Zoova ɲrun.” 46 Kɛ ɔ yoli sɔ’n, famiɛn’n sunmannin Zoyada i wa Benaya, ɔ ɔli ko kunnin Simei. Kɛ Simei wuli kɛ ngalɛ’n sa.+

Ɔ maan Salomɔn i famiɛn dilɛ’n takali kpa.+