1 Famiɛn Mun

3 Salomɔn nin Faraɔn m’ɔ ti Ezipti famiɛn’n be trali aenguɛ, yɛle kɛ ɔ jali* Faraɔn i wa bla’n,+ kpɛkun ɔ fɛ i bali Davidi Klɔ+ lɛ. Ɔ kali lɛ lele Salomɔn wieli i bɔbɔ i sua’n+ nin Zoova i sua’n,+ ɔ nin Zerizalɛmun klɔ’n i wun talɛ’n+ be kplan. 2 Blɛ sɔ’n nun’n, nn sran’m be te yi tɛ mun lika nglonglo’m be su,+ afin lele m’ɔ́ fá jú blɛ sɔ’n nun’n, nn be nin-a kplanman sua kun mɔ Zoova i dunman o su-ɔ.+ 3 Salomɔn kloli Zoova titi, ɔ nantili ndɛ nga i si Davidi kan kleli i’n su. Sanngɛ ɔ yi tɛ lika nglonglo’m be su, ɔ yra be naan be wunsrɛn’n fite.+

4 Famiɛn’n ɔli Gabaɔn naan ɔ́ kó yí tɛ, afin lɔ yɛ lika nglonglo’m be nun danfuɛ’n wo-ɔ.+ Salomɔn fali nnɛn akpi kun (1.000) fa yili tɛ nga kɛ bé yí’n be yra nnɛn’n i kɔlikɔli’n tɛ yiwlɛ sɔ’n su.+ 5 Gabaɔn lɔ’n, kɔnguɛ’n, Zoova yili i wun nglo kleli Salomɔn laliɛ nun. Ɲanmiɛn seli kɛ: “Like nga a kunndɛ kɛ n fa man wɔ’n, kan kle min.”+ 6 Yɛ Salomɔn seli kɛ: “A kleli ɔ sufuɛ Davidi m’ɔ ti min si’n kɛ a klo i dan kpa. Afin ɔ nin wɔ nantili klanman, ɔ yoli sa kpa, yɛ ɔ nantili nanwlɛ su. Lele mɔ w’a fa ju andɛ yɛ’n a te yi klolɛ dan sɔ’n i nglo i lika, afin a mɛnnin i ba kun kɛ ɔ trɛn i famiɛn bia’n su.+ 7 Siɛn’n, min Ɲanmiɛn Zoova, w’a sie min mɔ n ti ɔ sufuɛ’n i famiɛn min si Davidi i osu, kusu n te yo gbanflɛn kan,* yɛ n siman sa.*+ 8 Ɔ sufuɛ’n wo ɔ sran mɔ a fali be’n be afiɛn.+ Ɔ nvlefuɛ’m be sɔnnin kpa, be kwlá siman be nuan yɛ be kwlá kaman be. 9 I sɔ’n ti’n, yo maan ɔ sufuɛ’n yo aɲinyiɛfuɛ* naan ɔ di ɔ nvlefuɛ’m be jɔlɛ,+ naan ɔ wun sa kpa’n nin sa tɛ’n be ngbaciɛ’n.+ ?Afin wan yɛ ɔ kwla di ɔ sran kpanngban nga’m* be jɔlɛ-ɔ?”

10 Like sɔ mɔ Salomɔn srɛli’n, ɔ yoli Zoova i fɛ.+ 11 Yɛ Ɲanmiɛn seli i kɛ: “Kɛ mɔ like nga yɛ a srɛli’n, mɔ w’a srɛman nguan tɛnndɛn* annzɛ aɲanbeun, annzɛ w’a srɛman kɛ ɔ kpɔfuɛ’m be wu mɔ sanngɛ a srɛli akunndan naan w’a kwla di jɔlɛ mun’n ti’n,+ 12 ń má yó like nga a srɛli’n.+ Ń má mán wɔ ngwlɛlɛ nin akunndan+ mɔ sran fi nin-a ɲɛnmɛn i wunsu le’n, yɛ sran fi su ɲɛnmɛn i wunsu kun le.+ 13 Asa ekun’n, like nga w’a srɛman bɔbɔ’n ń má fá mán wɔ,+ ń má mán wɔ aɲanbeun nin aɲrunɲan.+ Ɔ maan ɔ blɛ su* famiɛn uflɛ fi su yoman kɛ wɔ sa.+ 14 Yɛ sɛ a nanti min atin’m be su, yɛle kɛ sɛ a fa min mmla’m be su naan a fa ndɛ nga n kan’n su kɛ ɔ si Davidi fa yoli’n sa’n,+ ń má yó maan á cɛ́ nguan nun.”+

15 Kɛ Salomɔn tinngeli’n, ɔ wunnin kɛ laliɛ yɛ ɔ cɛnnin-ɔn. I sin’n, ɔ ɔli Zerizalɛmun, ɔ ko jrannin Zoova i aenguɛ’n i alaka’n i ɲrun lɛ. Ɔ yili tɛ nga kɛ bé yí’n be yra nnɛn’n i kɔlikɔli’n, ɔ nin bo kun yolɛ tɛ mun,+ kpɛkun ɔ nin i sufuɛ’m be kwlaa be dili cɛn.

16 Blɛ sɔ’n nun’n, tekle bla nɲɔn be ɔli famiɛn’n i ja su. 17 Bla klikli’n seli kɛ: “Min min, yaci, e nin bla nga e tran sua kunngba’n nun, kpɛkun n wuli ba. Kɛ ɔ́ yó sɔ’n nn ɔ o sua’n nun lɛ wie. 18 Kɛ n wuli ba m’ɔ dili cɛn nsan’n, bla nga kusu wuli i wa liɛ. E sran nɲɔn cɛ yɛ e o lɛ-ɔ, sran uflɛ fi nunman sua’n nun lɛ. 19 Kɔnguɛ’n, bla nga i wa yasua’n wuli, afin ɔ lɛli i su. 20 Ɔ jasoli kɔnguɛ afiɛn, ɔ fali min wa liɛ m’ɔ la min wun lɛ’n ɔ fa lɛli i ku bo. Kɛ ɔ́ yó sɔ’n nn ɔ sufuɛ bla’n su lafi. Kpɛkun ɔ fɛli i wa liɛ mɔ w’a wu’n ɔ fa lɛli i min ku bo lɛ. 21 Kɛ n jasoli nglɛmun naan ń mán min wa’n i wunflɛn’n, n wunnin kɛ w’a wu. N niɛnniɛnnin i kpa yɛ n wunnin kɛ nán min wa mɔ n wuli i’n niɔn.” 22 Sanngɛ bla kun’n seli kɛ: “Cɛcɛ, min wa’n yɛle ng’ɔ o nguan nun’n, yɛ ɔ wa liɛ’n yɛle ng’ɔ wuli’n.” Bla klikli’n kusu seli kɛ: “Cɛcɛ, ɔ wa’n yɛle ng’ɔ wuli’n, yɛ min wa liɛ’n yɛle ng’ɔ o nguan nun’n.” Kɛ bla nɲɔn sɔ’m be sili akplowa famiɛn’n i ɲrun kɛ ngalɛ’n sa.

23 Kasiɛn su’n, famiɛn’n seli kɛ: “Nga waan: ‘Min wa’n yɛle ng’ɔ o nguan nun’n, yɛ ɔ wa liɛ’n yɛle ng’ɔ wuli’n!’ Nga kusu waan: ‘Cɛcɛ, ɔ wa liɛ’n yɛle ng’ɔ wuli’n, yɛ min wa liɛ’n yɛle ng’ɔ o nguan nun’n!’” 24 Famiɛn’n seli kɛ: “An fa tokofi kun be blɛ min.” Ɔ maan be fali tokofi kun be blɛli famiɛn’n. 25 I sin’n, famiɛn’n seli kɛ: “An kpɛ ba ng’ɔ o nguan nun’n i nun nɲɔn, an fɛ i bue kun be man bla kun, yɛ an fɛ i bue kun be man bla kunfuɛ’n.” 26 Kɛ famiɛn’n seli sɔ cɛ’n, bla nga i liɛ yɛle ba ng’ɔ o nguan nun’n ɔ kpatali famiɛn’n, afin i wa’n yoli i annvɔ. Ɔ seli kɛ: “Min min, yaci! Fa ba ng’ɔ o nguan nun’n mɛn i! Nán be kun i!” Sanngɛ bla kun’n seli kɛ: “Ba’n su yoman min liɛ, yɛ kusu ɔ su yoman ɔ liɛ! Maan be kpɛ i nun nɲɔn!” 27 Kɛ ɔ yoli sɔ’n, famiɛn’n seli kɛ: “Nán amun kun ba’n! An fɛ i be man bla klikli’n, afin i yɛ ɔ ti ba’n i nin’n niɔn.”

28 Kɛ Izraɛlifuɛ’m be kwlaa be tili wafa nga famiɛn’n kpɛli ndɛ sɔ’n nun’n, be ɲin yili famiɛn’n dan.*+ Afin be wunnin kɛ Ɲanmiɛn mɛnnin i ngwlɛlɛ naan ɔ fa di jɔlɛ.+