2 Samiɛli

17 I sin’n, Aitofɛli seli Absalɔmun kɛ: “Yaci, maan n fa sran akpiakpi blu-nin-nɲɔn (12.000) naan andɛ kɔnguɛ’n, e su Davidi su. 2 Kɛ n ko wun kɛ w’a fɛ m’ɔ leman wunmiɛn kun’n, ń kó fú i nun.+ Kpɛkun ń wlɛ́ i ɲin nglonglo. Kɛ ɔ ko yo sɔ’n, sran nga be o i wun lɛ’n, bé wánndi. Kpɛkun famiɛn’n i kunngba cɛ yɛ ń kún i-ɔ.+ 3 I sin’n, ń fɛ́ i sran’m be kwlaa ń bá ɔ sin. Saan sran nga a su kunndɛ i’n w’a wu yɛ be kwlaa bé bá ɔ sin-ɔn. Kpɛkun nvle’n wunmuan’n nun tɔ́ fɔuun.” 4 Kɛ Absalɔmun nin Izraɛli kpɛnngbɛn’m be kwlaa be tili ndɛ sɔ’n, ɔ yoli be fɛ.

5 Sanngɛ Absalɔmun seli kɛ: “Amun yaci, amun flɛ Usai+ m’ɔ ti Aakifuɛ’n wie naan e ti i nuan ndɛ liɛ’n.” 6 Usai ko toli Absalɔmun lɔ. Absalɔmun seli i kɛ: “Ndɛ nga Aitofɛli kannin’n yɛ. ?E fa su? Sɛ ɔ fataman kɛ e fa su’n, kle e like nga ɔ fata kɛ e yo’n.” 7 Yɛ Usai seli Absalɔmun kɛ: “Andɛ liɛ’n, afɔtuɛ nga Aitofɛli mannin’n timan kpa.”+

8 Usai seli ekun kɛ: “Ɔ bɔbɔ a si kpa kɛ ɔ si nin i sran’m be ti safuɲrɛn.+ Yɛ dɔ nga su’n, be awlɛn’n be be klun kɛ nnɛn ngble nga be flɛ i ursu’n mɔ i mma’m b’a mlin blo lɔ’n sa.+ Asa ekun’n, ɔ si ti alɛ kunfuɛ.+ Ɔ maan kɔnguɛ’n, ɔ nin i sran’m be su laman likawlɛ. 9 Dɔ nga su bɔbɔ’n, sɛ w’a fiaman yɔbuɛ buɛ* wie nun’n, nn w’a fia lika uflɛ.+ Kusu sɛ i yɛ ɔ dun mmua fa alɛ wla e sin naan sran’m be ti’n, bé kán sín kɛ: ‘B’a kwla Absalɔmun i sran mun-o!’ 10 Kpɛkun sran ng’ɔ ti yakpafuɛ, m’ɔ le awlɛn kɛ asɔmɔli’n sa+ bɔbɔ’n, srɛ m’ɔ́ kún i’n ti’n i wawɛ tɔ́ blo. Afin Izraɛlifuɛ’m be kwlaa be si kɛ ɔ si ti safuɲrɛn+ naan i sran’m be ti yakpafuɛ. 11 I sɔ’n ti’n, afɔtuɛ nga n ko man’n yɛ: Yiayia Izraɛlifuɛ’m be kwlaa, kɛ ɔ fɛ i Dan lele m’ɔ fa ju Beɛ-Seba’n,+ naan be to ɔ wa. Maan be sɔn kpanngban kpa kɛ jenvie nuan aunɲan’n sa+ naan fa be kɔ alɛ kunlɛ. 12 Lika kwlaa ng’ɔ fia lɛ’n, saan é tó i lɔ. Kpɛkun é kó tɔ́ i su kɛ bɔlɛ’n fa gua asiɛ’n su’n sa. Ɔ maan i bɔbɔ-o, i sran mun-o, be wie fi su fiteman nun. 13 Sɛ ɔ wanndi ko fia klɔ wie su’n, Izraɛlifuɛ’m be kwlaa bé kó búbú i. Kpɛkun é fá ɲanman é cúɛn klɔ sɔ’n é kó gúɛ i kongo’n nun lɔ. Ɔ maan yɔbuɛ ba kun sa su kaman lɛ.”  

14 Absalɔmun nin Izraɛlifuɛ nga be o i wun lɛ’n be kwlaa be seli kɛ: “Usai m’ɔ ti Aakifuɛ’n i afɔtuɛ’n ti kpa+ tra Aitofɛli liɛ’n.” Zoova siesieli i sɔ liɛ’n naan sran’m b’a faman Aitofɛli i afɔtuɛ m’ɔ ti kpa’n su.+ Zoova yoli sɔ naan ɔ́ fá ɲrɛnnɛn yí i Absalɔmun su.+

15 I sin’n, Usai seli Zadɔku nin Abiataa+ mɔ be ti Ɲanmiɛn ɲrun jranfuɛ’n be kɛ: “Afɔtuɛ nga Aitofɛli mannin Absalɔmun nin Izraɛli kpɛnngbɛn mun’n yɛ. N kusu afɔtuɛ nga n mannin’n yɛ. 16 I sɔ’n ti’n, amun sunman sran ndɛndɛ naan ɔ ko se Davidi kɛ: ‘Andɛ kɔnguɛ’n, nán ka aawlɛ flɛnnɛn’n nun lɔ lika nga be kpɛ nzue ba’n be ja nun lɛ’n* nun. Sanngɛ kpɛ nzue ba’n. Sɛ w’a yoman sɔ’n, ɔ cɛman naan b’a kun* wɔ mɔ a ti famiɛn’n nin sran kwlaa nga be o ɔ wun lɔ’n.’”+

17 Zonatan+ nin Aimaazi+ be kali An-Rogɛli+ lɛ. Junman difuɛ talua kun fiteli naan w’a ko kan ngaliɛ’n w’a kle be. Be kusu be ko kan kleli Famiɛn Davidi. Afin kɛ ɔ ko yo naan sran’m b’a wunman be’n ti’n, b’a wluman klɔ’n nun lɔ. 18 Sanngɛ gbanflɛn kun wunnin be naan w’a ko kan kle Absalɔmun. I sɔ’n ti’n, Zonatan nin Aimaazi be ɔli ndɛndɛ. Be ko toli bian kun Baurimun+ lɔ. Nzue gbo kun o bian sɔ’n i awlo’n nun. Be nɲɔn’n be jrali gbo sɔ’n nun. 19 Bian sɔ’n i yi’n fali tannin kun sɛli gbo sɔ’n su, kpɛkun ɔ fali ble* mma m’ɔ sili’n fa guali su. Sran fi siman sɔ. 20 Kɛ Absalɔmun i sufuɛ’m be juli bla’n i awlo lɔ’n be usɛli i kɛ: “?Aimaazi nin Zonatan be o nin?” Bla’n tɛli be su kɛ: “Be sinnin wa, sanngɛ be toli be ti nzue’n i nuan lɔ.”+ Be ɔli be ko kunndɛli be lele ngbɛn naan b’a sa be sin Zerizalɛmun.

21 Kɛ Absalɔmun i sran’m be ɔli’n, Aimaazi nin Zonatan be fin gbo’n nun fiteli. Be ko kannin ndɛ’n kleli Famiɛn Davidi. Be seli i kɛ: “Jaso naan kpɛ nzue’n ndɛndɛ, afin like nga Aitofɛli waan be yo wɔ’n yɛ.”+ 22 Be ja osu nun lɛ’n, Davidi nin i sran’m be kwlaa be jasoli naan b’a kpɛ Zurdɛn’n. Kɛ aliɛ fá cɛ́n’n, nn be kwlaa b’a kpɛ nzue’n. Sran ba kun sa w’a kaman lɛ.

23 Kɛ Aitofɛli wunnin i kɛ b’a fɛmɛn i afɔtuɛ liɛ’n su’n, ɔ fuli aflunmun kun su, kpɛkun ɔ ɔli i klɔ lɔ.+ Kɛ ɔ juli i awlo lɔ’n, ɔ kannin ndɛ wie mun kleli i awlofuɛ mun.+ Kpɛkun ɔ ko boli i kɔmin.+ Ɔ wuli naan b’a ko sie i kan be sieli i nannan’m be lɔ’n.

24 Kɛ ɔ́ yó sɔ’n, nn Davidi w’a ɔ Maanaimun+ lɔ. Absalɔmun kusu ɔ nin Izraɛli lɔ yasua’m be kwlakwla be kpɛli Zurdɛn’n. 25 Absalɔmun fali Amaza+ sieli i sonja’m be su kpɛn Zoabu+ i osu. Amaza ti Izraɛli bian kun i wa, ɔ suan Itra. Bian sɔ’n ɔ nin Nasasi i wa bla Abigaili+ be sili sua. Abigaili sɔ’n ti Zeruya i niaan bla, yɛ Zeruya ti Zoabu i nin. 26 Izraɛlifuɛ’m be nin Absalɔmun be boli be nanmue Galaadi+ asa’n su lɔ.

27 Kɛ Davidi juli Maanaimun lɔ’n, Nasasi i wa Sobi m’ɔ fin Amɔnfuɛ’m be klɔ nga be flɛ i kɛ Raba’n+ su lɔ’n, nin Amiɛli i wa Makii+ m’ɔ fin Lo-Debaa’n, ɔ nin Baazilai+ m’ɔ ti Galaadifuɛ m’ɔ fin Rogelimun’n 28 be blɛli i bɛ, nin kpongbo dandan mun, nin sɛ mun, nin ble mma, nin ɔɔzu mma, nin ble sanmlɛn, nin ble kɛɛnwa, nin alowa wafa wie mun, nin lantii, nin ble nin ɔɔzu mma kee, 29 nin awɛma nzue, nin bɛli, nin bua mun, ɔ nin fromazi.* Be fɛli i kwlaa sɔ’n blɛli Davidi nin i sran mun naan be di.+ Afin be seli be wun kɛ: “Awe nin nzuewe kun sran mun, yɛ b’a fɛ dan aawlɛ flɛnnɛn’n nun.”+