Zeremin

40 Kɛ Nebizaradan+ m’ɔ ti gladi difuɛ’m be su kpɛn’n yacili Zeremin nun Rama+ lɛ naan ɔ wɔ’n, Zoova kannin ndɛ kleli Zeremin. Jrɔkɔ ci Zeremin i sa yɛ ɔ fɛ i ɔli lɔ-ɔ. Zeremin o Zerizalɛmunfuɛ mun nin Zidafuɛ nga be trali be’n, mɔ be su wa fa be kɔ Babilɔnin’n be nun wie. 2 Yɛ gladi difuɛ’m be su kpɛn’n fali Zeremin naan w’a se i kɛ: “Ɲrɛnnɛn sa nga w’a tɔ lika nga su’n, Zoova m’ɔ ti ɔ Ɲanmiɛn’n dun mmua kɛnnin i ndɛ. 3 Yɛ Zoova fali sa sɔ’n yili amun su, kɛ ng’ɔ fa kannin’n sa. Afin amun fɔnnin Zoova i wun yɛ amun a nantimɛn i nuan ndɛ’n su. I sɔ’n ti yɛ sa nga w’a ɲan amun-ɔn.+ 4 Andɛ’n, ń má yí jrɔkɔ ng’ɔ o ɔ sa’n. Sɛ a klo kɛ a nin min kɔ́ Babilɔnin’n, maan e wɔ. Ń nían ɔ lika lɔ. Sanngɛ sɛ a kloman kɛ a nin min kɔ́ Babilɔnin’n, nán kɔ. Nian, lika’n yɛ ɔ nannan lɛ, a kwla ko tran lika nga a klo’n.”+

5 Kɛ mɔ Zeremin su sisi i bo’n ti’n, Nebizaradan seli i kɛ: “Sa ɔ sin Safan+ i wa Aikamun+ i klun ba liɛ Gedalia+ i wun lɔ. I yɛ Babilɔnin famiɛn’n fɛ i sieli Zida klɔ’m be su-ɔ. Kɛ i wun lɛ, nvlefuɛ’m be afiɛn. Annzɛ kusu lika kwlaa nga ɔ waan á kɔ́’n, kɔ.”

Gladi difuɛ’m be su kpɛn’n mɛnnin i like diwa kpɛkun ɔ cɛli i like kun. I sin’n, ɔ yacili i nun ɔli. 6 Ɔ maan Zeremin ɔli Aikamun i wa Gedalia i wun, Mizpa lɔ.+ Yɛ ɔ kɛli i wun lɛ, sran nga be yacili be nvle nun lɛ’n be afiɛn lɛ.

7 I sin’n, sonja’m be su kpɛn’m be kwlaa nga be nin be sonja’m be o blo lɔ’n, be tili i kɛ Babilɔnin famiɛn’n fali Aikamun i wa Gedalia sieli i nvle’n su, naan ɔ fali yalɛfuɛ nga be o nvle’n nun’n, i yasua-o, i bla-o, i ba-o, mɔ b’a faman be b’a ɔman Babilɔnin wie’n wlɛli i sa nun.+ 8 I sɔ’n ti’n, be bali Gedalia i sin Mizpa lɛ.+ Sran sɔ mun yɛle Netania i wa Ismaɛli,+ nin Zoanan+ ɔ nin Zonatan, Karea i wa yɛle be nɲɔn’n, ɔ nin Tanumɛti i wa Seraya, nin Efai m’ɔ ti Netofafuɛ’n i mma mun, yɛ Zezania+ mɔ i si’n ti Maakatifuɛ’n. Be nin be sonja mun yɛ be bali-ɔ. 9 Safan i wa Aikamun i klun ba liɛ Gedalia tali sonja’m be su kpɛn mun nin be sonja’m be nda. Yɛ ɔ seli be kɛ: “Nán Kaldefuɛ’m be sulɛ’n kun amun srɛ. Amun tran nvle’n nun, yɛ amun su Babilɔnin famiɛn’n. Sɛ amun yo sɔ’n, i bo’n gúa kpa mán amun.+ 10 Min liɛ’n, ń ká Mizpa wa naan kɛ Kaldefuɛ’m bé wá tó e wa’n, ń jrán amun ɲrun. Sanngɛ amun liɛ’n, amun yi duvɛn nin ngo. Yɛ amun ti waka mma mun, kpɛkun amun fa be sie i sɛ dandan’m be nun. Amun tran klɔ nga amun fali be’n be su.”+

11 Zifu’m be kwlaa nga be o Moabu, nin Amɔn lɔ’n, nin Edɔmun lɔ’n, nin be nga be o nvle onga’m be kwlaa be nun’n, be kusu be tili i kɛ Babilɔnin famiɛn’n yacili nvlefuɛ’m be nun wie mun Zida lɛ, naan ɔ fali Safan i wa Aikamun i klun ba liɛ Gedalia sieli be su kpɛn. 12 Yɛ Zifu’m be kwlaa be jasoli lika kwlaa nga be bo sanndili be nun’n be bali Zida nvle’n nun, Gedalia i wun lɛ, Mizpa lɔ. Be yili duvɛn yɛ be tili waka mma kpanngban kpa.

13 Karea i wa Zoanan nin sonja’m be su kpɛn nga be o blo lɔ’n, be kwlaa be wa toli Gedalia, Mizpa lɛ. 14 Be seli i kɛ: “?A si kɛ Baalisi m’ɔ ti Amɔnfuɛ’m+ be famiɛn’n ɔ sunmannin Netania i wa Ismaɛli kɛ ɔ wa kun wɔ?”+ Sanngɛ Aikamun i wa Gedalia w’a faman be ndɛ’n su.

15 Kɛ be o Mizpa lɔ’n, Karea i wa Zoanan ɔli blɛlɛlɛ ko seli Gedalia kɛ: “Min waan ń kɔ́ naan ń kó kún Netania i wa Ismaɛli. Sran fi su siman sɔ. ?Ngue ti yɛ é trán lɛ naan ɔ kun wɔ-ɔ? ?Yɛ ngue ti yɛ é trán lɛ naan Zidafuɛ kwlaa nga be o ɔ wun kpanngban yɛ’n be bo sanndi-ɔ? ?Yɛ ngue ti yɛ é trán lɛ naan Zidafuɛ nga be kali’n be wu sa ngbɛn-ɔn?” 16 Sanngɛ Aikamun i wa Gedalia+ tɛli Karea i wa Zoanan su kɛ: “Nán yo sɔ. Afin Ismaɛli i su ndɛ nga a kannin’n ti ato.”