1 Famiɛn Mun

22 Izraɛlifuɛ mun nin Sirifuɛ’m be dili afuɛ nsan b’a kunman alɛ. 2 I afuɛ nsan su’n nun’n, Famiɛn Zozafati+ m’ɔ ti Zida famiɛn’n ɔ ko wunnin Izraɛli famiɛn’n i wun.+ 3 I sin’n, Izraɛli famiɛn’n seli i sufuɛ mun kɛ: “?Amun si kɛ Ramɔtu-Galaadi+ ti e liɛ? Sanngɛ kɛ ɔ yo naan e ko fɛ i Siri famiɛn’n i sa nun’n, e sisi e bo.” 4 I sin’n, ɔ seli Zozafati kɛ: “?A nin min kɔ́ alɛ kunlɛ Ramɔtu-Galaadi lɔ?” Zozafati tɛli i su kɛ: “E nin wɔ e ti kun. Min sran mun nin ɔ sran mun be ti kun. Min nnɛn kpanngɔ mun nin ɔ nnɛn kpanngɔ’m be ti kun.”+

5 Sanngɛ Zozafati seli Izraɛli famiɛn’n kɛ: “Yaci, dun mmua usa+ Zoova ka.”+ 6 Ɔ maan Izraɛli famiɛn’n yiali Ɲanmiɛn nuan ijɔfuɛ mun. Be ti sran ya nnan (400). Ɔ usali be kɛ: “?N wɔ naan e nin Ramɔtu-Galaadi e ko kun annzɛ nán n wɔ?” Be tɛli i su kɛ: “Kɔ, Zoova wá fá klɔ’n wlá famiɛn’n i sa nun.”

7 I sin’n, Zozafati seli kɛ: “?Zoova i nuan ijɔfuɛ uflɛ nunman wa? Maan ɔ usa Ɲanmiɛn i sa wie man e.”+ 8 Yɛ Izraɛli famiɛn’n seli Zozafati kɛ: “Bian kun ekun te o lɛ m’ɔ kwla usa Zoova i sa man e-ɔ.+ Sanngɛ n kpɔ i,+ afin ɔ nin-a kanman min wun ndɛ kpa sa le. Min wun ndɛ ng’ɔ kan’n i kwlaa ti tɛ.+ Be flɛ i Mikaya, Imla i wa-ɔ.” Sanngɛ Zozafati seli kɛ: “Nán maan famiɛn’n kan sɔ.”

9 Ɔ maan Izraɛli famiɛn’n flɛli i awlo’n nun junman difuɛ kun naan w’a se i kɛ: “Kɔ ko fa Imla i wa Mikaya bla ndɛndɛ.”+ 10 Kɛ ɔ́ yó sɔ’n, nn Izraɛli famiɛn’n nin Zozafati m’ɔ ti Zida famiɛn’n be titi be famiɛn bia’m be su, famiɛn tralɛ wla be wun, yɛ be o Samari klɔ’n i anuan’n nun lɛ, kan be bo ble nin ɔɔzu lɛ’n. Yɛ Ɲanmiɛn nuan ijɔfuɛ’m be kwlaa be o be ɲrun lɛ be su kan Ɲanmiɛn nuan ndɛ.+ 11 Kpɛkun Kenaana i wa Sedesiasi fali blalɛ yoli nnɛn wɛ wie mun, yɛ ɔ seli kɛ: “Ndɛ nga Zoova kan’n yɛ: ‘Á wá fá nnɛn wɛ nga mun wɔ́wɔ́ Sirifuɛ mun* lele á núnnún be sekeseke.’” 12 Ɲanmiɛn nuan ijɔfuɛ onga’m be kwlaa be kannin ndɛ kunngba’n. Be seli kɛ: “Kɔ Ramɔtu-Galaadi, wɔ yɛ á kwlá-ɔ. Zoova wá fá klɔ’n wlá famiɛn’n i sa nun.”

13 Sran ng’ɔ ɔli Mikaya i flɛlɛ’n ɔ seli i kɛ: “Nian! Ndɛ nga Ɲanmiɛn nuan ijɔfuɛ’m be kwlaa be kan kle famiɛn’n, ɔ ti ndɛ fɛ. Yaci, maan ɔ ndɛ liɛ’n nin be ndɛ liɛ’n yo kun, kan ndɛ fɛ.”+ 14 Sanngɛ Mikaya seli kɛ: “N kan Zoova m’ɔ lafiman’n. Ndɛ nga Zoova se min kɛ n kan’n yɛ ń kán-ɔn.” 15 I sin’n, ɔ ko toli famiɛn’n lɔ, yɛ famiɛn’n usɛli i kɛ: “?Mikaya, e wɔ naan e nin Ramɔtu-Galaadi e ko kun annzɛ nán e wɔ?” Ɔ ka lɛ tɛli i su kɛ: “Kɔ, wɔ yɛ á kwlá-ɔ. Zoova wá fá klɔ’n wlá famiɛn’n i sa nun.” 16 Kɛ ɔ yoli sɔ’n, famiɛn’n seli i kɛ: “?Kpɛ nɲɛ yɛ ń sé wɔ kɛ a ta min nda Zoova dunman nun kɛ ndɛ ng’ɔ ti nanwlɛ’n i ngunmin cɛ yɛ a kan kle min-ɔn?” 17 Ɔ seli kɛ: “N wun Izraɛlifuɛ’m be kwlaa, b’a bo b’a sanndi oka’m be su+ kɛ bua mɔ be leman sunianfuɛ’n sa. Zoova seli kɛ: ‘Sran nga mun be leman sran nianman be su. Maan be tinuntinun be sa be sin be awlo wɛtɛɛ su.’”

18 Yɛ Izraɛli famiɛn’n seli Zozafati kɛ: “?M’an seman wɔ kɛ ɔ su kanman min wun ndɛ kpa naan min wun ndɛ ng’ɔ́ kán’n i kwlaa yó tɛ?”+

19 I sin’n, Mikaya seli kɛ: “I sɔ’n ti’n, sie ɔ su tie Zoova i nuan ndɛ’n. N wunnin Zoova, ɔ ti i famiɛn bia’n+ su. Ɲanmiɛn su lɔ sonja’m be kwlaa be jinjin i wun lɛ. Wie’m be o i sa fama su, yɛ wie’m be o i sa bɛ su.+ 20 Kpɛkun Zoova seli kɛ: ‘?Wan yɛ ɔ́ láka Akabu naan w’a ɔ Ramɔtu-Galaadi w’a ko wu lɔ-ɔ?’ Nga kɛn i liɛ, nga kusu kɛn i liɛ. 21 I sin’n, anzi kun*+ wa jrannin Zoova i ɲrun lɛ, kpɛkun ɔ seli kɛ: ‘N bɔbɔ ń lɛ́kɛ i.’ Yɛ Zoova usɛli i kɛ: ‘?Á yó sɛ naan w’a lɛkɛ i?’ 22 Ɔ tɛli su kɛ: ‘Ń kɔ́, kpɛkun ń yó maan i sran nga be waan be ijɔ Ɲanmiɛn nuan’n bé búa ato.’*+ Yɛ ɔ seli kɛ: ‘Á lɛ́kɛ i, i kpa bɔbɔ’n á ɲɛ́n i. Kɔ ko yo nga a kannin’n.’ 23 Ɔ maan Zoova yoli maan ɔ sran nga be waan be ijɔ Ɲanmiɛn nuan’n, be kwlaa be buali ato.*+ Sanngɛ Zoova waan ɲrɛnnɛn yɛ á wá wún i-ɔ.”+

24 Kenaana i wa Sedesiasi wunngeli Mikaya i wun lɔ, ɔ kpacili i ɲrun, kpɛkun ɔ seli i kɛ: “?Nin yɛ Zoova i wawɛ m’ɔ o min su’n ɔ sinnin m’ɔ ko kannin ndɛ kleli wɔ-ɔ?”+ 25 Mikaya tɛli i su kɛ: “Cɛn nga á wá kó fía sua ba ng’ɔ o sua’n i klun mmua kpa lɔ nun’n, yɛ á wá wún lika ng’ɔ sinnin’n niɔn.” 26 Yɛ Izraɛli famiɛn’n seli kɛ: “Amun fa Mikaya ko wla Amɔn m’ɔ ti klɔ’n i su kpɛn’n, ɔ nin Zoasi m’ɔ ti famiɛn’n i wa’n be sa nun. 27 Amun se be kɛ: ‘Ndɛ nga famiɛn’n kan’n yɛ: “Amun wla bian nga bisua.+ Kpɛkun amun mɛn i kpanwun kaan sa ɔ nin nzue kaan sa lele naan m’an sa min sin wɛtɛɛ su.”’” 28 Sanngɛ Mikaya seli kɛ: “Sɛ a sa ɔ sin wɛtɛɛ su’n, nn Zoova w’a kanman ndɛ w’a kleman min.”+ Kpɛkun ɔ kan guali su kɛ: “Nvlefuɛ mun, amun kwlaa, nán amun wla fi ndɛ nga n kannin’n su.”

29 Yɛ Izraɛli famiɛn’n nin Zozafati m’ɔ ti Zida famiɛn’n be ɔli Ramɔtu-Galaadi lɔ-ɔ.+ 30 Izraɛli famiɛn’n seli Zozafati kɛ: “Ń má wláwlá min wun wafa kun naan b’a wunman min wlɛ naan ń kɔ́ alɛ’n i kunlɛ. Sanngɛ ɔ liɛ’n, wla ɔ famiɛn tralɛ’n.” Ɔ maan Izraɛli famiɛn’n wlɛwlɛli i wun wafa kun naan b’a wunman i wlɛ,+ kpɛkun ɔ ɔli alɛ kunlɛ. 31 Sanngɛ Siri famiɛn’n seli i kakaklolo su kpɛn ablasan-nin-nɲɔn (32) mun be kɛ:+ “Sonja nga be le ɲrun-o, nga be leman ɲrun-o, nán amun nin be nun wie fi be kun. Saan Izraɛli famiɛn’n i kunngba cɛ yɛ amun nin i be kun-ɔn.” 32 Kɛ kakaklolo su kpɛn’m be wunnin Zozafati cɛ’n, be seli be wun kɛ: “Izraɛli famiɛn’n cɛ yɛ ɔ o lɛ-ɔ.” Ɔ maan be ɔli i su naan be nin i bé kó kún. Sanngɛ Zozafati kpan kunndɛli ukalɛ. 33 Kɛ kakaklolo su kpɛn’m be wunnin kɛ nán Izraɛli famiɛn’n, be ka lɛ yacili i su sulɛ.

34 Sanngɛ sran kun toli i ta’n sran kun wun sa ngbɛn. Ta mma’n wluli like kokloko nga Izraɛli famiɛn’n wlali m’ɔ sɛsɛ i wue lika’n i aɲialiɛ’n nun, kpɛkun ɔ wɔli famiɛn’n. Yɛ famiɛn’n seli i kakaklolo tinngɛfuɛ’n kɛ: “Kpɛ ɔ wun naan fa min jaso alɛ kunwlɛ’n* nun wa. Afin b’a yo min like yaya kpa.”+ 35 Cɛn sɔ’n nun’n, alɛ’n jrannin kpa. Be trali famiɛn’n i nun naan w’a kwla jran nglo kakaklolo’n nun naan i ɲin kpɛ Sirifuɛ’m be su lɔ. I mmoja’n sonji guali alɛ kunlɛ kakaklolo’n nun. Ɔ maan ɔ wuli nnɔsua.+ 36 Kɛ wia wá tɔ́’n, be kpannin nanmue’n nun seli kɛ: “Maan sran kun sɛ i sin i klɔ! Maan sran kun sɛ i sin i mɛn’n nun!”+ 37 Famiɛn’n wuli, be fɛ i ɔli Samari, yɛ be sieli i Samari lɔ. 38 Kɛ be wunnzinnin alɛ kunlɛ kakaklolo’n Samari nzue’n i nuan lɛ’n, alua’m be tafili i mmoja’n yɛ tekle bla’m be wunnzinnin lɛ,* kɛ nga Zoova fa kannin’n sa.+

39 Akabu i su ndɛ’n i onga’n, like kwlaa ng’ɔ yoli be’n, nin sua* ng’ɔ fali sui je+ kplannin’n, ɔ nin klɔ kwlaa ng’ɔ kplannin be’n, be klɛli be fluwa ng’ɔ kan Izraɛli famiɛn’m be ndɛ’n i nun. 40 Akabu wuli,*+ i wa Akazia+ sinnin i osu kacili famiɛn.

41 Kɛ Famiɛn Akabu kacili Izraɛli famiɛn’n, i afuɛ nnan su’n Aza i wa Zozafati+ kacili Zida famiɛn. 42 Kɛ Zozafati káci famiɛn’n nn ɔ le afuɛ ablasan-nin-nnun (35). Ɔ dili famiɛn afuɛ ablaɔn-nin-nnun (25) Zerizalɛmun lɔ. Be flɛ i nin’n kɛ Aziba, Sili i wa-ɔ. 43 Ɔ niɛnnin i si Aza+ i ajalɛ’n su nantili titi. W’a faman ajalɛ uflɛ. Ɔ yoli sa ng’ɔ ti kpa Zoova ɲrun’n.+ Sanngɛ lika nglonglo’m be kali lɛ. Izraɛlifuɛ’m be yili tɛ lika nglonglo’m be su titi, yɛ be yo maan wunsrɛn fin lika nglonglo’m be su fite.+ 44 Zozafati nin Izraɛli famiɛn’n be trannin klanman titi.+ 45 Zozafati i su ndɛ’n i onga’n, i kwlalɛ’n, ɔ nin alɛ ng’ɔ kunnin be’n, be klɛli be fluwa ng’ɔ kan Zida famiɛn’m be ndɛ’n i nun. 46 Yasua nga be bo tekle amuin sua’m be nun+ mɔ be kali lɛ i si Aza i blɛ su’n, ɔ yili be lɛ.+

47 Blɛ sɔ’n nun’n famiɛn nunman Edɔmun+ mɛn’n nun. Famiɛn’n i janunfuɛ kun yɛ ɔ di famiɛn junman’n niɔn.+

48 Zozafati yoli Taasisi mmeli* wie mun naan be ko fa sika ɔkwlɛ Ofii lɔ.+ Sanngɛ b’a kwlá juman lɔ, afin mmeli’m be sacili Ɛziɔn-Gebɛɛ+ lɛ. 49 Ɔ maan Akabu i wa Akazia seli Zozafati kɛ: “Maan ɔ sufuɛ mun nin min sufuɛ mun be fa mmeli likawlɛ.” Sanngɛ Zozafati w’a kplinman su.

50 I sin’n, Zozafati wuli.*+ Be sieli i Davidi Klɔ’n su lɔ, i nannan’m be wun lɛ. Yɛ i wa Zoramun+ sinnin i osu kacili famiɛn-ɔn.

51 Kɛ Famiɛn Zozafati kacili Zida famiɛn’n i afuɛ blu-nin-nso (17) su’n, Akabu i wa Akazia+ kacili Izraɛli famiɛn Samari lɔ. Ɔ yoli Izraɛli famiɛn afuɛ nɲɔn. 52 Ɔ yoli sa ng’ɔ ti tɛ Zoova ɲrun’n titi, ɔ nantili i si+ nin i nin+ be atin’n su, yɛ ɔ nantili Nebati i wa Zeroboamun m’ɔ yoli maan Izraɛlifuɛ’m be yoli sa tɛ’n i atin’n su.+ 53 Ɔ sɔli Baali+ titi, ɔ kotoli i bo yɛ ɔ fɔkɔli Zoova m’ɔ ti Izraɛli Ɲanmiɛn’n i awlɛn,+ kɛ nga i si fa yoli’n sa.