2 Famiɛn Mun

13 Kɛ Akazia+ i wa Zoasi+ kacili Zida famiɛn’n i afuɛ ablaɔn-nin-nsan (23) su’n, Zei+ i wa Zoakazi kacili Izraɛli famiɛn Samari lɔ. Ɔ dili famiɛn afuɛ blu-nin-nso (17). 2 Ɔ yoli like ng’ɔ ti tɛ Zoova ɲrun’n titi, sa tɛ nga Nebati i wa Zeroboamun ti’n Izraɛlifuɛ’m be yoli’n, ɔ yoli wie titi.+ W’a kacimɛn i sin w’a simɛn i. 3 Ɔ maan Zoova fali Izraɛlifuɛ’m+ be wun ya+ dan kpa. Ɔ fali be wlali Famiɛn Azaɛli+ m’ɔ ti Siri famiɛn’n nin Azaɛli i wa Bɛnin-Adadi+ be sa nun cɛli kpa.

4 Kɛ ɔ́ kɔ́ i ɲrun’n, Zoakazi srɛli Zoova kɛ ɔ si be aunnvɔɛ, yɛ Zoova tieli i srɛlɛ’n. Afin ɔ wunnin yalɛ nga Siri famiɛn’n fa kle Izraɛlifuɛ mun’n.+ 5 Ɔ maan Zoova mannin Izraɛlifuɛ’m be defuɛ kun+ naan ɔ de be Sirifuɛ’m be sa nun. Kɛ ɔ yoli sɔ’n Izraɛlifuɛ’m be kwla trannin be awlo’m be nun kɛ laa’n sa.* 6 (Sanngɛ b’a yaciman sa tɛ nga Zeroboamun i awlo’n nunfuɛ’m be yoli mɔ Zeroboamun ti’n Izraɛlifuɛ’m be tɔli sa tɛ yolɛ nun’n i yolɛ.+ Be yoli sa tɛ sɔ’n titi, yɛ waka nga be sɔ be’n*+ be kali Samari klɔ’n nun titi.) 7 Nnɛn kpanngɔ su fufuɛ ablenun (50) nin kakaklolo blu, ɔ nin sonja akpiakpi blu (10.000) mɔ be nanti be ja’n be ngunmin yɛ be kali Zoakazi i sa nun-ɔn. Afin Siri famiɛn’n nunkunnin be onga mun,+ ɔ tiatiali be su kɛ be fa tiatia ndutre su like bowlɛ nun’n sa.+

8 Zoakazi i su ndɛ’n i onga’n, like kwlaa ng’ɔ yoli be’n nin i kwlalɛ’n, be klɛli be fluwa ng’ɔ kan Izraɛli famiɛn’m be ndɛ’n i nun. 9 I sin’n, Zoakazi wuli,* be sieli i Samari lɔ.+ Kpɛkun i wa Zoasi sinnin i osu kacili famiɛn.

10 Kɛ Famiɛn Zoasi kacili Zida famiɛn’n i afuɛ ablasan-nin-nso (37) su’n, Zoakazi i wa Zoasi+ kacili Izraɛli famiɛn Samari lɔ. Ɔ dili famiɛn afuɛ blu-nin-nsiɛn (16). 11 Ɔ yoli like ng’ɔ ti tɛ Zoova ɲrun’n titi, w’a yaciman sa tɛ nga Nebati i wa Zeroboamun yoli mɔ i ti’n Izraɛlifuɛ’m be tɔli sa tɛ yolɛ nun’n i yolɛ.+ Ɔ yoli sa tɛ sɔ mun titi.

12 Zoasi i su ndɛ’n i onga’n, like kwlaa ng’ɔ yoli be’n nin i kwlalɛ’n, ɔ nin alɛ ng’ɔ nin Famiɛn Amazia m’ɔ ti Zida famiɛn’n be kunnin’n,+ be klɛli be fluwa ng’ɔ kan Izraɛli famiɛn’m be ndɛ’n i nun. 13 I sin’n, Zoasi wuli,* kpɛkun Zeroboamun*+ trɛnnin i famiɛn bia’n su. Be sieli Zoasi Samari lɔ, kan be sie Izraɛli famiɛn’m be lɛ’n.+

14 Kɛ tukpacɛ ng’ɔ́ wá kún Elize’n+ ɔ tɔli i su’n, Zoasi m’ɔ ti Izraɛli famiɛn’n ɔli ko wunnin i wun, ɔ kluli i su kpɛkun ɔ sunnin. Ɔ seli kɛ: “Min si, min si! Izraɛli kakaklolo’n nin i nnɛn kpanngɔ su fufuɛ mun!”+ 15 Elize seli i kɛ: “Fa ta kun ɔ nin ta mma mun.” Ɔ maan ɔ fali ta kun ɔ nin ta mma mun. 16 I sin’n, ɔ seli Izraɛli famiɛn’n kɛ: “Fa ɔ sa’n sie i ta’n su.” Ɔ maan ɔ fɛli i sa’n sieli i ta’n su, kpɛkun Elize fɛli i sa mun sieli famiɛn’n i sa’m be su. 17 Ɔ seli kɛ: “Tike fenɛtri’n wia afiliɛ lɔ.” Yɛ ɔ tikeli-ɔ. Elize seli i kɛ: “To!” Yɛ ɔ toli-ɔ. Kpɛkun ɔ seli kɛ: “Zoova i ta mma m’ɔ kwla’n yɛ ɔ o lɛ-ɔ, ta mma m’ɔ́ kwlá Sirifuɛ mun’n yɛ ɔ o lɛ-ɔ! Á wá kwlá Sirifuɛ mun Afɛki+ lɔ lele á núnnún be.”

18 Ɔ seli i ekun kɛ: “Fa ta mma mun.” Yɛ ɔ fali be-ɔ. I sin’n ɔ seli Izraɛli famiɛn’n i kɛ: “Fa fin asiɛ’n.” Ɔ fa finnin asiɛ’n kpɛ nsan, kpɛkun ɔ jrannin. 19 Kɛ ɔ yoli sɔ’n, Ɲanmiɛn Kpli i sran’n fɛli i wun ya yɛ ɔ seli i kɛ: “Sɛ ɔ ti kɛ a fa finnin asiɛ’n kpɛ nnun annzɛ kpɛ nsiɛn sa’n, nn ɔ ti kpa! I liɛ’n, á kwlá Sirifuɛ mun lele á núnnún be mlɔnmlɔn, sanngɛ kpɛ nsan cɛ yɛ á wá kwlá be-ɔ.”+

20 I sin’n Elize wuli, kpɛkun be sieli i. Afuɛ nuan kwlaa kɛ afuɛ’n bo i bo’n, Moabufuɛ wie mɔ be wua sran’m be ninnge mun’n+ be ba nvle’n nun. 21 Cɛn kun mɔ sran wie’m be ɔli sran kun i sielɛ’n, be wunnin awiefuɛ sɔ mun. Ɔ maan be toli sran’n i fuɛn’n be yili i Elize i asieliɛ’n nun ndɛndɛ naan b’a wanndi. Kɛ sran’n i fuɛn’n kannin Elize i owie mun’n, sran’n ɲannin nguan ekun,+ kpɛkun ɔ jaso jrannin.

22 Zoakazi i blɛ su’n, Famiɛn Azaɛli+ m’ɔ ti Siri famiɛn’n kleli Izraɛlifuɛ’m be yalɛ.+ 23 Sanngɛ Zoova sili be aunnvɔɛ yɛ ɔ yoli be ye,+ ɔ kleli kɛ be ndɛ lo i, afin ɔ nin Abraamun+ nin Izaaki+ nin Zakɔbu+ be trali aenguɛ. W’a kunndɛman kɛ ɔ́ núnnún be, yɛ lele nin andɛ’n w’a yiman be blo.* 24 Kɛ Famiɛn Azaɛli m’ɔ ti Siri famiɛn’n wuli’n, i wa Bɛnin-Adadi sinnin i osu kacili famiɛn. 25 Klɔ nga Azaɛli fɛli i Zoasi i si Zoakazi i sa nun alɛ kunlɛ nun’n, Zoasi wa deli be Azaɛli i wa Bɛnin-Adadi i sa nun. Zoasi kwlɛli i kpɛ nsan,+ kpɛkun ɔ deli Izraɛli klɔ mun.