1 Famiɛn Mun

13 Ɲanmiɛn i sran kun+ fɛli i Zida lɛ ɔli Betɛli. Zoova yɛ ɔ sunmɛnnin i-ɔ. Kɛ ɔ́ jú lɔ’n nn Zeroboamun o tɛ yiwlɛ’n i wun lɛ,+ ɔ su yi tɛ naan i wunsrɛn’n fite. 2 I sin’n, ɔ mɛnnin i nɛn’n su kannin ndɛ nga Zoova seli i kɛ ɔ kan kle tɛ yiwlɛ’n. Ɔ seli kɛ: “Tɛ yiwlɛ, tɛ yiwlɛ, ndɛ nga Zoova kan’n yɛ: ‘Nian, bé wá wú ba yasua kun Davidi i awlo’n nun, bé flɛ́ i kɛ Zoziasi.+ Be nga be jran amuin’m be ɲrun lika nglonglo’m be su’n, mɔ be yi tɛ ɔ su mɔ i wunsrɛn’n fite’n, ɔ́ wá fá be ɔ́ yí tɛ ɔ su, yɛ ɔ́ wá yrá klɔ sran owie ɔ su.’”+ 3 Ɔ kleli nzɔliɛ kun* cɛn sɔ’n nun. Ɔ seli kɛ: “Nzɔliɛ nga* Zoova kleli’n yɛ: Nian, tɛ yiwlɛ’n i nun wá kpáci, yɛ nzuɛn* ng’ɔ o su’n ɔ́ gúa.”

4 Kɛ famiɛn’n tili ndɛ nga Ɲanmiɛn i sran’n kan kleli tɛ yiwlɛ m’ɔ o Betɛli lɔ’n, Zeroboamun yili i sa’n tɛ yiwlɛ’n su, kpɛkun ɔ tinngɛli nun yɛ ɔ seli kɛ: “Amun trɛ i!”+ Be ja nun lɛ’n, i sa ng’ɔ tinngɛli nun’n wuli kee.* I waan ɔ́ yí i sa’n niɔn, ɔ yoman ye.+ 5 Ɔ maan tɛ yiwlɛ’n i nun kpacili, yɛ i su nzuɛn’n guali. Nzɔliɛ nga* Zoova fa kleli Ɲanmiɛn Kpli i sran’n m’ɔ kɛnnin i ndɛ’n, ɔ yoli su sɛsɛsɛ.

6 Famiɛn’n seli Ɲanmiɛn Kpli i sran’n kɛ: “Yaci, kpata Zoova naan ɔ si min aunnvɔɛ, srɛ i man min naan min sa’n sɛ i sin i osu’n nun.”+ Kɛ ɔ kannin sɔ’n, Ɲanmiɛn Kpli i sran’n srɛli Zoova kɛ ɔ si i aunnvɔɛ, yɛ famiɛn’n i sa’n sɛli i sin i osu’n nun-ɔn. 7 I sin’n, famiɛn’n seli Ɲanmiɛn Kpli i sran’n kɛ: “Bla e wɔ awlo naan ko di like kan, yɛ maan n cɛ wɔ like kun.” 8 Sanngɛ Ɲanmiɛn Kpli i sran’n seli famiɛn’n kɛ: “Kannzɛ bɔbɔ a man min ɔ awlo’n i bue’n, e nin wɔ e su kɔman, n su diman like* yɛ n su nɔnman nzue lika nga nun wa. 9 Afin Zoova seli min kɛ: ‘Nán di like yɛ nán nɔn nzue, nán fa atin kunngba nga a fa bali’n su sa ɔ sin.’” 10 Ɔ maan ɔ fali atin uflɛ sɛli i sin, w’a faman atin kunngba ng’ɔ fa ɔli Betɛli’n su w’a sɛmɛn i sin.

11 Ɲanmiɛn nuan ijɔfuɛ kpɛnngbɛn kun tran Betɛli lɔ. Kɛ i mma’m be bali awlo’n, sa kwlaa nga Ɲanmiɛn Kpli i sran’n yoli i cɛn sɔ’n nun Betɛli lɔ’n, ɔ nin ndɛ ng’ɔ kan kleli famiɛn’n, be boli su be kleli i. Kɛ be boli ndɛ sɔ’n su be kleli be si’n, 12 be si usali be kɛ: “?Atin benin yɛ ɔ fa ɔli-ɔ?” Ɔ maan i mma’m be kleli i atin nga Ɲanmiɛn Kpli i sran m’ɔ fin Zida’n ɔ fali’n. 13 Ɔ seli i mma mun kɛ: “Amun tanndan aflunmun kun be man min.” Ɔ maan be tanndannin aflunmun kun mɛnnin i, kpɛkun ɔ fuli su.

14 Ɔ suli Ɲanmiɛn Kpli i sran’n su. Kɛ ɔ́ wún i’n, ɔ ti waka dan kun bo. Ɔ usɛli i kɛ: “?Wɔ yɛ a ti Ɲanmiɛn Kpli i sran m’ɔ fin Zida’n niɔn?”+ Ɔ tɛli i su kɛ: “Ɛɛn-ɛn, min-ɔn.” 15 Ɔ seli i kɛ: “Bla e wɔ awlo naan e ko di like.” 16 Sanngɛ ɔ seli kɛ: “E nin wɔ e kwlá kɔman, yɛ n su kplinman su kɛ ń kɔ́ ɔ awlo lɔ. E nin wɔ e su diman like, yɛ e nin wɔ e su nɔnman nzue lika nga nun. 17 Afin Zoova seli min kɛ: ‘Nán di like yɛ nán nɔn nzue lɔ. Atin nga a fa su ɔli’n, nán fa atin kunngba’n sa wɔ sin.’” 18 Kɛ ɔ kannin sɔ’n, ɔ tɛli i su kɛ: “N kusu n ti Ɲanmiɛn nuan ijɔfuɛ kɛ wɔ sa wie. Zoova fali ndɛ wlali anzi kun nuan kɛ ɔ kan kle min. Ɔ seli min kɛ: ‘Yo maan a nin i be sa be sin wɔ awlo lɔ naan ɔ di like yɛ ɔ nɔn nzue.’” (Ɔ su lɛkɛ i.) 19 Ɔ maan ɔ nin i be sali be sin naan ɔ́ kó dí like, yɛ ɔ́ nɔ́n nzue i awlo lɔ.

20 Kɛ be titi tabli’n i sin’n, Zoova kannin ndɛ kleli Ɲanmiɛn nuan ijɔfuɛ m’ɔ fɛli i sɛli i sin’n. 21 Ɔ maan ɔ kpan kannin ndɛ’n kleli Ɲanmiɛn Kpli i sran m’ɔ fin Zida’n. Ɔ seli i kɛ: “Ndɛ nga Zoova kan’n yɛ: ‘W’a faman ndɛ nga Zoova kan kleli wɔ’n su, yɛ w’a nantiman mmla nga ɔ Ɲanmiɛn Zoova mannin wɔ’n su. 22 A sali ɔ sin kɛ á kó dí like yɛ á nɔ́n nzue lika nga be kɛnnin i ndɛ kleli wɔ’n nun. Be seli wɔ kɛ: “Nán di like yɛ nán nɔn nzue.” I sɔ’n ti’n, be su sieman ɔ fuɛn’n ɔ nannan’m be asieliɛ’n nun.’”+

23 Kɛ Ɲanmiɛn Kpli i sran’n dili like m’ɔ nɔnnin nzue wieli’n, Ɲanmiɛn nuan ijɔfuɛ kpɛnngbɛn’n tanndannin aflunmun’n mannin Ɲanmiɛn nuan ijɔfuɛ m’ɔ fɛli i bali’n. 24 I sin’n, ɔ fali atin’n, sanngɛ asɔmɔli kun nin i ko yiali nun atin’n su, kpɛkun asɔmɔli’n kunnin i.+ I fuɛn’n nannan akpɔ’n su, aflunmun’n jin i wun lɛ. Asɔmɔli’n kusu jin i fuɛn’n i wun lɛ wie. 25 Sran wie mɔ be su sin’n be wunnin i fuɛn m’ɔ nannan akpɔ’n su’n, ɔ nin asɔmɔli m’ɔ jin i fuɛn’n i wun lɛ’n. Be wluli klɔ’n nun, kpɛkun be ko kannin ndɛ sɔ’n klɔ nga Ɲanmiɛn nuan ijɔfuɛ kpɛnngbɛn’n tran su’n nun.

26 Kɛ Ɲanmiɛn nuan ijɔfuɛ m’ɔ ko fɛli i atin’n nun bali’n tili ndɛ sɔ’n, ɔ ka lɛ seli kɛ: “Ɲanmiɛn Kpli i sran mɔ w’a faman Zoova i ndɛ’n su’n niɔn.+ Zoova fɛli i mannin asɔmɔli’n naan ɔ titi i nun naan ɔ kun i, kɛ nga Zoova kan kleli i’n sa.”+ 27 I sin’n, ɔ seli i mma’m be kɛ: “An tanndan aflunmun’n be man min.” Yɛ be tɛnndɛnnin i-ɔ. 28 Kpɛkun ɔ fali atin’n. Ɔ ko wunnin fuɛn m’ɔ nannan akpɔ’n su’n. Aflunmun’n nin asɔmɔli’n be o i wun lɛ. Asɔmɔli’n w’a diman fuɛn’n, yɛ w’a kunman aflunmun’n kusu. 29 Ɲanmiɛn nuan ijɔfuɛ’n mannin Ɲanmiɛn Kpli i sran’n i fuɛn’n su, ɔ fɛ i sieli i aflunmun’n su, yɛ ɔ fɛ i ɔli i bɔbɔ i klɔ’n su naan ɔ́ yó i sɛ naan ɔ́ síe i. 30 Ɔ maan ɔ fɛli i fuɛn’n sieli i i bɔbɔ i asieliɛ’n nun, be sunnin i. Be se kɛ: “Yako min niaan bian!” 31 Kɛ be sieli i’n, ɔ seli i mma’m be kɛ: “Cɛn nga n wu’n, amun sie min lika nga be sieli Ɲanmiɛn Kpli i sran’n i lɛ’n. An sie min owie mun i owie liɛ’m be wun lɛ.+ 32 Ndɛ nga Zoova fa wlɛli i nuan m’ɔ kan kleli tɛ yiwlɛ ng’ɔ o Betɛli lɔ’n,+ ɔ nin Samari klɔ’m be nun Ɲanmiɛn sulɛ sua mɔ be o lika nglonglo’m be su’n, saan ɔ́ kpɛ́n su.”+

33 Sa ng’ɔ juli lɛ’n, w’a kleman Zeroboamun kɛ ɔ yaci i atin tɛ’n. Ɔ fali sran ngbɛn wie mun nvlefuɛ’m be nun titi, ɔ sieli be Ɲanmiɛn ɲrun jranfuɛ lika nglonglo’m be su.+ Sran kwlaa ng’ɔ klo kɛ ɔ́ yó Ɲanmiɛn ɲrun jranfuɛ’n, ɔ sie i Ɲanmiɛn ɲrun jranfuɛ. Ɔ se kɛ: “Maan ɔ kaci Ɲanmiɛn ɲrun jranfuɛ be nun kun lika nglonglo’m be su.”+ 34 Sa tɛ sɔ mɔ Zeroboamun i awlo’n nunfuɛ’m be yoli’n+ ti’n be kunnin be, yɛ be nunnunnin mlɔnmlɔnmlɔn asiɛ’n su.+