2 Famiɛn Mun

6 Cɛn kun’n, Ɲanmiɛn nuan ijɔfuɛ’m be mma’m+ be seli Elize kɛ: “Nian, lika nga e nin wɔ e tran nun’n ti kaan dan. 2 Yaci, maan e wɔ Zurdɛn’n i nuan lɔ. Maan e tinuntinun e fa waka kunngun naan e fa kplan sua kun lɔ e tran nun.” Ɔ seli be kɛ: “Amun wɔ.” 3 Be nun kun seli kɛ: “?Yaci, a nin ɔ sufuɛ mun kwla kɔ?” Ɔ tɛli i su kɛ: “Ɛɛn-ɛn, ń má kɔ́ wie.” 4 Ɔ maan ɔ nin be ɔli. Be ɔli Zurdɛn’n i nuan lɔ, yɛ be boli waka’m be bulɛ bo-ɔ. 5 Kɛ be nun kun kpɛ́ waka kun’n, i kpɛliɛ ba’n tɔli nzue’n nun, yɛ ɔ kpan seli kɛ: “Ee, min min, n ko srɛli kpɛliɛ sɔ’n sran sa nun!” 6 Ɲanmiɛn Kpli i sran’n seli kɛ: “?Nin yɛ ɔ tɔli-ɔ?” Ɔ kleli i lika’n. Kpɛkun ɔ kpɛli waka sin kun fa yili lika sɔ’n nun lɛ, yɛ ɔ yoli maan kpɛliɛ ba’n fiteli nzue’n i ɲin su. 7 Elize seli kɛ: “Yi fite.” Ɔ maan ɔ tinngɛli i sa’n nun kpɛkun ɔ fali kpɛliɛ ba’n.

8 Cɛn kun’n, Siri famiɛn’n fali alɛ wlali Izraɛlifuɛ’m be sin.+ Ɔ wunnin i sufuɛ’m be wun, kpɛkun ɔ seli be kɛ: “Ń má kó bó nanmue lika nga sa annzɛ lika nga sa nun, e nin amun yɛ é kɔ́-ɔ.” 9 Ɔ maan Ɲanmiɛn Kpli i sran’n+ sunmannin sran Izraɛli famiɛn’n i sin naan be ko se i kɛ: “Nian ɔ wun su, nán sin lika nga nun, afin lɛ yɛ Sirifuɛ’m bé wá bó be nanmue’n niɔn.” 10 Ɔ maan Izraɛli famiɛn’n mannin ngaliɛ lika nga Ɲanmiɛn Kpli i sran’n kɛnnin i ndɛ kleli i’n nun lɔ. Elize kannin ndɛ sɔ’n kleli i titi, ɔ maan kpɛ sunman’n w’a ɔman lika sɔ’n nun lɔ.*+

11 I sɔ’n ti’n, Siri famiɛn’n fali ya.* Ɔ maan ɔ yiɛli i sufuɛ mun kpɛkun ɔ usali be kɛ: “?E afiɛn wa’n waan yɛ ɔ o Izraɛli famiɛn’n i sin-ɔn? An kan kle min!” 12 I sufuɛ’m be nun kun seli kɛ: “Min min, famiɛn, nán e nun wie fi-ɔ! Elize m’ɔ ti Ɲanmiɛn nuan ijɔfuɛ Izraɛli lɔ’n yɛ ɔ kan ndɛ nga a kɛn i ɔ sua ba’n nun lɔ’n kle Izraɛli famiɛn’n niɔn.”+ 13 Ɔ seli kɛ: “An wɔ ko kunndɛ i. I liɛ’n ń súnman sran mun naan be ko trɛ i.” Kɛ ɔ cɛli kan’n, be wa seli i kɛ: “Ɔ o Dotan lɔ.”+ 14 Ɔ ka lɛ fali nnɛn kpanngɔ mun nin alɛ kunlɛ kakaklolo mun nin sonja kpanngban kpa ɔli lika sɔ’n nun lɔ. Be ɔli kɔnguɛ kpɛkun be ko bo sin yiali klɔ’n.

15 Kɛ Ɲanmiɛn Kpli i sran’n i sufuɛ’n jasoli nglɛmun ndɛ kpa m’ɔ fiteli’n, ɔ wunnin kɛ sonja wie mun nin nnɛn kpanngɔ mun nin alɛ kunlɛ kakaklolo mun b’a sin b’a yia klɔ’n. Ɔ maan ɔ seli Elize kɛ: “?Ee, min min, é yó i sɛ?” 16 Ɔ tɛli i su kɛ: “Nán srɛ kun wɔ!+ Afin be nga be o e sin’n be sɔnnin tra be nga be o be sin’n.”+ 17 I sin’n, Elize srɛli Ɲanmiɛn seli kɛ: “Ee Zoova, yaci, tike i ɲin naan ɔ wun ase.”+ Zoova ka lɛ tikeli Elize i sufuɛ’n i ɲin yɛ ɔ wunnin ase. Kpɛkun ɔ́ nían-ɔn, nnɛn kpanngɔ mun nin alɛ kunlɛ kakaklolo mɔ be ti sin ngunmin’n+ b’a de okaoka lika’n, be sin yia Elize.+

18 Kɛ Sirifuɛ’m bé kɔ́ Elize i wun lɔ’n, Elize srɛli Zoova seli kɛ: “Yaci, yo maan sran nga mun be ɲinma’n si.”+ Yɛ ɔ yoli maan be ɲinma’n sili, kɛ nga Elize fa srɛli’n sa. 19 I sin’n, Elize seli be kɛ: “Nán atin’n niɔn, yɛ nán klɔ’n yɛle nga. Amun su min su, maan n fa amun n wɔ sran nga amun su kunndɛ i’n i wun lɔ.” Sanngɛ ɔ fa be ɔli Samari.+

20 Kɛ be juli Samari lɔ’n, Elize seli kɛ: “Ee Zoova, tike be ɲin naan be wun ase.” Ɔ maan Zoova tikeli be ɲin, yɛ be wunnin kɛ be o Samari klɔ’n i afiɛn. 21 Kɛ Izraɛli famiɛn’n wunnin be’n, ɔ usali Elize kɛ: “?Min si, n kun be? ?N kun be?” 22 Sanngɛ ɔ seli kɛ: “Nán kun be. ?Kɛ a fa ɔ tokofi’n nin ɔ ta’n kɔ alɛ kunlɛ’n be nga a tra be’n, a kun be? Man be aliɛ naan be di, ɔ nin nzue naan be nɔn,+ naan be sa be sin be min’n i wun lɔ.” 23 Famiɛn’n yoli maan be tɔnnin aliɛ kaka kpa mannin be. Be dili yɛ be nɔnnin nzue. I sin’n, ɔ mannin be atin naan be sa be sin be min’n i wun lɔ. Kɛ ɔ fɛ i lɛ’n, Sirifuɛ nga be fɛn sran’m be bo ninnge mun’n,+ b’a baman Izraɛli mɛn’n nun kun.

24 Cɛn kun’n, Bɛnin-Adadi m’ɔ ti Siri famiɛn’n yiɛli i sonja’m be kwlaa, kpɛkun be ko boli nanmue Samari klɔ’n i wun lɛ.+ 25 Ɔ maan awe kpɛnnin+ Samari lɔ dan kpa. Sirifuɛ’m be kali lɛ lele maan aflunmun ti kun+ i gua’n juli sika mma ablaɔcuɛ (80). Yɛ auble sewie kabu kun* mɔ be bubu nun nnan’n i bue kun i gua’n juli sika mma nnun. 26 Cɛn kun mɔ Izraɛli famiɛn’n sín klɔ’n i wun talɛ’n su’n, bla kun kpan seli i kɛ: “Ee, min min, famiɛn, uka e!” 27 Ɔ tɛli i su kɛ: “?Sɛ Zoova w’a ukaman wɔ’n, nin yɛ ń ɲán like ń fá úka wɔ-ɔ? ?Like bowlɛ’n nun lɔ yɛ ń ɲɛ́n i-ɔ? ?Annzɛ duvɛn yiwlɛ’n nun lɔ annzɛ ngo yiwlɛ’n nun lɔ yɛ ń ɲɛ́n i-ɔ?” 28 Famiɛn’n usali bla’n kɛ: “?Ngue sa yɛ ɔ o ɔ su-ɔ?” Bla’n tɛli i su kɛ: “Bla nga seli min kɛ: ‘Fa ɔ wa yasua’n bla naan e di i andɛ, ainman’n é dí min wa yasua liɛ’n.’+ 29 Ɔ maan n tɔnnin min wa yasua’n kpɛkun e dili.+ Kɛ i aliɛ cɛnnin’n, n seli i kɛ: ‘Fa ɔ wa yasua’n bla naan e di i.’ Sanngɛ ɔ fɛli i wa yasua’n fiali.”

30 Kɛ famiɛn’n tili bla’n i ndɛ’n cɛ’n, ɔ titili i wun tralɛ’m be nun.+ Kɛ ɔ́ sín klɔ’n i wun talɛ’n su’n, sran’m be wunnin kɛ bajɛ tralɛ wlɛ i tralɛ’m be bo. 31 I sin’n, ɔ seli kɛ: “Sɛ m’an kpɛman Safati i wa Elize i ti’n andɛ’n, maan Ɲanmiɛn tu min fɔ kekle kpa!”*+

32 Kɛ ɔ́ yó sɔ’n, nn Elize ti i sua’n nun lɔ yɛ kpɛnngbɛn’m be titi i wun lɛ. Famiɛn’n sunmannin sran kun naan ɔ dun mmua i ɲrun. Sanngɛ ka naan sran ng’ɔ sunmɛnnin i’n w’a ju lɔ’n, Elize seli kpɛnngbɛn’m be kɛ: “?Amun si kɛ sran kunfuɛ’n i wa+ sɔ’n w’a sunman sran kɛ ɔ wa kpɛ min ti’n? Sɛ amun wun kɛ sran ng’ɔ sunmɛnnin i’n su ba’n, amun ɲin anuan’n, yɛ amun tin su kpa naan w’a wluman wa. ?Amun timɛn i min m’ɔ su i su’n i ja bo’n i ngan?” 33 Kɛ Elize kán ndɛ’n klé be’n, yɛ sran nga be sunmɛnnin i’n bali-ɔ, kpɛkun famiɛn’n seli kɛ: “Ɲrɛnnɛn sa nga fin Zoova. ?Ngue ti yɛ ɔ fata kɛ n minndɛ Zoova ekun-ɔn?”