Sa nga Akoto’m be yoli’n

28 Kɛ e juli lɔ klanman mɔ sa fi w’a ɲanman e’n, e tili i kɛ be flɛ lika sɔ’n kɛ Malti.+ 2 Lika sɔ’n i nunfuɛ’m be yoli e ye dan kpa. Nzue m’ɔ tɔli’n nin ayrɛ’n ti’n, be trɔli sin, kpɛkun be sɔli e kwlaa e nun klanman. 3 Kɛ Pɔlu isali yie m’ɔ fa guɛli i sin nun’n, sin’n i ɲaan’n ti’n, ɔnda kun fiteli, kpɛkun ɔ sendeli i sa’n su. 4 Kɛ lika sɔ’n i nunfuɛ’m be wunnin kɛ wuo sɔ m’ɔ le bɔyre’n ɔ sende i sa’n su’n, be seli be wiengu kɛ: “Bian nga ti sran kunfuɛ sakpa. Afin w’a wuman jenvie’n nun lɔ, sanngɛ Sɛsɛfuɛ’n* w’a kplinman su kɛ ɔ tran nguan nun.” 5 Pɔlu kpɛntɛnnin wuo’n yili i sin’n nun, yɛ sa fi w’a yomɛn i. 6 Be buli i kɛ ɔ́ wá wláwlá, annzɛ ɔ́ ká lɛ tɔ́ naan ɔ́ wú. Sanngɛ kɛ be minndɛli lele mɔ like fi w’a ɲɛnmɛn i’n, be kacili be akunndan’n, yɛ be seli kɛ ɔ ti ɲanmiɛn kun.

7 Asiɛ wie mantan lɛ, ɔ ti lika sɔ’n i siefuɛ mɔ be flɛ i Pibliisi’n i liɛ. Bian sɔ’n sɔli e nun, ɔ sikeli e cɛn lele nsan. 8 Pibliisi i si timan juejue, ayrɛ w’a guɛ i wun, kpɛkun ɔ je mmoja. Ɔ maan w’a la. Pɔlu ɔli i wun lɔ, kpɛkun ɔ srɛli Ɲanmiɛn, ɔ fɛli i sa fuɛli i su naan w’a yo i juejue.+ 9 Kɛ ɔ yoli sɔ’n, lika sɔ’n i nunfuɛ nga be timan juejue’n be kwlaa be bɛli i wun lɛ, kpɛkun ɔ yoli be juejue.+ 10 Be dili e nɛnnɛn, be cɛli e ninnge kpanngban. Kɛ é kɔ́’n, be fali like kwlaa ng’ɔ mian e sa’n be mannin e.

11 Kɛ ɔ dili anglo nsan’n, e fuli mmeli kun nun. Mmeli sɔ’n, “Zesi i mma mun” be nzɔliɛ wo i ɲrun. Ɔ fin Alɛzandri, yɛ ayrɛ blɛ’n toli i lika sɔ’n nun lɛ. 12 Kɛ e juli klɔ nga be flɛ i Sirakisi’n i mmeli jranwlɛ’n nun lɛ’n, e dili cɛn ba nsan lɛ. 13 E fɛli i lɛ e ɔli, kpɛkun e juli Regiɔmun. Kɛ e dili cɛn ba kun’n, aunmuan kun m’ɔ fin mɛn’n i ngua lɔ’n fitali. Ɔ maan e fɛli i lɛ e ɔli, kpɛkun i cɛn nɲɔn su’n, e juli Piteoli. 14 E wunnin aniaan mun lɛ. Be srɛli e kpa kɛ e ka be wun lɛ cɛn ba nso. I sin’n, e kleli e ti Rɔmun. 15 Kɛ aniaan nga be o lɔ’n be tili e su ndɛ’n, be bali lele be juli Apiisi Gua Bo lɛ, ɔ nin lika nga be flɛ i Aofuɛ Sua Nsan’n i nun lɛ, be wa wunnin e wun. Kɛ Pɔlu wunnin be’n, ɔ lali Ɲanmiɛn ase, kpɛkun ɔ ɲannin wunmiɛn.+ 16 Kasiɛn su’n, kɛ e juli Rɔmun lɔ’n, be mannin Pɔlu i atin kɛ ɔ ɲɛn i bɔbɔ i sua naan ɔ nin sonja ng’ɔ niɛn i su’n, be tran.

17 Kɛ ɔ dili cɛn ba nsan’n, ɔ flɛli Zifu’m be kpɛnngbɛn mun. Kɛ be yiali’n, ɔ seli be kɛ: “Nja mun, aniaan mun, m’an yoman nvle’n nunfuɛ’m be like fi. Asa kusu m’an kpaloman e nannan’m be nzuɛn’n.+ Sanngɛ sran’m be fali min mannin Rɔmunfuɛ mun Zerizalɛmun lɔ, ɔ maan be wlali min bisua.+ 18 Kɛ be usausali ndɛ’n nun kpa’n,+ be waan bé yáci min nun, afin m’an yoman sa mɔ i ti’n ɔ fata kɛ be kun min-ɔn.+ 19 Sanngɛ Zifu’m be waan be kplinman su. Kɛ mɔ n lemɛn i yowlɛ’n ti’n, n seli kɛ be wa di min jɔlɛ Sezaa i ja su.+ Sanngɛ nán kɛ min waan ń sánman min nvle’n nunfuɛ mun ti-ɔ. 20 I sɔ’n ti yɛ n srɛli amun kpa kɛ ń wún amun wun’n niɔn. Afin like nga Izraɛlifuɛ’m be lafi su’n, i ti yɛ b’a ci min nin jrɔkɔ yɛ’n niɔn.”+ 21 Be seli i kɛ: “Zidefuɛ’m b’a klɛman ɔ wun fluwa b’a blɛman e. Asa kusu’n, aniaan nga be fin lɔ be bali’n, be nun wie fi w’a kanman ɔ wun ndɛ tɛ. 22 Sanngɛ e bu i kɛ sɛ e ti ɔ nuan ndɛ naan e si akunndan nga a bu’n ɔ ti kpa. Afin nanwlɛ, Ɲanmiɛn sulɛ wafa sɔ’n,+ e si kɛ sran’m be kɛn i wun ndɛ tɛtɛ lika kwlaa.”+

23 Be nuan sɛli cɛn kun su kɛ sɛ cɛn sɔ’n ju’n, bé kó wún i wun. Kɛ cɛn sɔ’n juli’n, be nun kpanngban be ko wunnin i wun kan ɔ tran lɛ’n. Be sɔnnin kpa trali i klikli’n nun’n. Kɛ ɔ fɛ i nglɛmun lele nnɔsua’n, ɔ kannin Ɲanmiɛn Sielɛ’n i su ndɛ’n i kwlaa kleli be. Ɔ jrannin Moizi i Mmla’n+ nin Ɲanmiɛn nuan ijɔfuɛ’m be ndɛ’n+ su kannin Zezi i ndɛ+ weinwein kleli be. 24 Wie’m be lafili ndɛ ng’ɔ kannin’n su, sanngɛ wie’m b’a lafiman su. 25 Kɛ mɔ be nuan w’a sɛman’n ti’n, be boli sanndilɛ bo. I sɔ’n ti’n, Pɔlu kannin ndɛ kun. Ɔ seli kɛ:

“Ndɛ nga Ɲanmiɛn wawɛ’n seli Ɲanmiɛn nuan ijɔfuɛ Ezai kɛ ɔ kan kle amun nannan mun’n, ɔ ti su. 26 Ɔ seli kɛ: ‘Kɔ nvle sɔ’n i nunfuɛ’m be sin naan se kɛ: “I tielɛfuɛ’n, amún tíe, sanngɛ amun su wunmɛn i wlɛ mlɔnmlɔn. Yɛ i nianlɛfuɛ’n amún nían, sanngɛ amun su wunman like fi mlɔnmlɔn.+ 27 Afin nvle nga nunfuɛ’m be awlɛn’n w’a kete. Ndɛ’n gua be su nun sanngɛ be yomɛn i nuan sa. Be muanmuan be ɲinma naan b’a wunman ase, yɛ be tannintannin be su naan b’a timan sa. I sɔ’n ti’n, like nga be se be kɛ be yo’n, be wunmɛn i wlɛ. Ɔ maan be saman be sin be baman min sin naan m’an yo be juejue.”’+ 28 Maan amun si kɛ wafa nga Ɲanmiɛn dé sran mun’n, be su kɛn i su ndɛ be kle be nga be timan Zifu’n.+ Be liɛ’n, saan bé tíe.”+ 29 *——

30 Ɔ trannin sua mɔ i bɔbɔ lue’n+ nun afuɛ klonglo nɲɔn. Be nga be bɛli i wun lɛ’n, ɔ sɔli be kwlaa be nun klanman. 31 Ɔ kannin Ɲanmiɛn Sielɛ’n i ndɛ kleli be. Asa ekun’n, ɔ kleli be e Min Zezi Klisi i su like yakpa su,+ yɛ sran fi w’a tɛnndɛnmɛn i ɲrun.