Fluwa klikli nga Pɔlu klɛli Tesalonikifuɛ mun’n
2 Aniaan mun, amun bɔbɔ amun si kpa kɛ amun osu mɔ e ko niannin’n, w’a yoman ngbɛn.+ 2 Amun si kɛ i klikli nun’n, e fɛli Filipu+ lɔ, yɛ sran’m be yoli e finfin. Kannzɛ be tanndannin e ɲrun kpa’n,* sanngɛ e Ɲanmiɛn’n yoli maan e trali e awlɛn e boli i jasin fɛ’n+ e kleli amun yakpa su. 3 Ndɛ nga e kan’n ɔ timan ato, ɔ timan tɛ, yɛ gblɛ nunman nun. 4 Kɛ mɔ Ɲanmiɛn i klun jɔ e wun’n, i ti yɛ ɔ fali jasin fɛ bolɛ junman’n wlali e sa nun-ɔn. Ɔ maan e kunndɛman kɛ é kán ndɛ naan sran’m be klun jɔ e wun. Sanngɛ Ɲanmiɛn m’ɔ si e awlɛn’n nun’n yɛ e kunndɛ kɛ i klun jɔ e wun-ɔn.+
5 Amun si kɛ y’a faman e nuan nun fɛ y’a lakaman amun le. Yɛ y’a yoman kɛ e ti sran kpa sa, kusu nn e ɲin blo amun ninnge’m be su.+ Sa sɔ’n nun’n, Ɲanmiɛn ti e lalofuɛ. 6 Asa ekun’n, y’a kunndɛman kɛ sran’m be manman e. Yɛle kɛ y’a kunndɛman kɛ amun manman e, annzɛ sran uflɛ manman e. Kusu nn kɛ mɔ e ti Klisi i akoto’n ti’n, e kwla kaci amun ti su trɔ.+ 7 Sanngɛ i nun nga e o amun wun lɔ’n, e yoli wɛtɛɛfuɛ kɛ bla ta wie m’ɔ niɛn i mma’m be lika kpa’n sa. 8 E klo amun kpa. I sɔ’n ti’n, e tuli e klun boli Ɲanmiɛn i jasin fɛ’n e kleli amun, kpɛkun e fali e wun e nannannin su bɔbɔ,+ afin amun ti e awlɛn su sran.+
9 Aniaan mun, junman kekle nga e dili’n nin fɛlɛ nga e fɛli’n, n si kɛ amun wla w’a fiman su. E dili junman kɔnguɛ nin wia nun naan kɛ é bó Ɲanmiɛn i jasin fɛ’n é klé amun’n, y’a kaciman amun nun wie fi i ti su trɔ.+ 10 Amun mɔ amun ti e Min’n i sran mun’n, i nun nga e o amun wun lɔ’n, e nin amun e nantili klanman, e yoli sa ng’ɔ ti kpa’n, yɛ sa tɛ fi w’a tranman e wun. I lɛ nun’n, amun nin Ɲanmiɛn amun ti e lalofuɛ. 11 Amun si kpa kɛ e mannin amun afɔtuɛ, e fɔnvɔli amun, yɛ e wlali amun tinuntinun amun fanngan titi.+ E yoli amun kɛ nga siɛ kun+ fa yo i mma mun’n sa. 12 E yoli sɔ naan wafa nga amún nánti’n, ɔ yo Ɲanmiɛn m’ɔ flɛli amun kɛ amun wa di famiɛn+ naan amun ɲan ɲrun’n,+ i liɛ’n su.+
13 I sɔ’n ti yɛ e la Ɲanmiɛn i ase titi’n niɔn.+ Afin kɛ amun tili Ɲanmiɛn i ndɛ nga e kannin’n, amun a bumɛn i kɛ ɔ fin klɔ sran. Sanngɛ amun buli i kɛ ɔ ti Ɲanmiɛn i ndɛ. Ɔ ti sɔ sakpa kusu, yɛ ɔ le ta amun mɔ amun ti e Min’n i sran mun’n, amun su. 14 Afin aniaan mun, amun niannin Ɲanmiɛn i asɔnun’n i nunfuɛ nga be nin Klisi Zezi be o nun mɔ be o Zide lɔ’n be ajalɛ’n su. Afin amun nvle’n nunfuɛ’m be kleli amun yalɛ+ kɛ nga Zifu’m be su kle be yalɛ’n sa. 15 Be kunnin e Min Zezi+ nin Ɲanmiɛn nuan ijɔfuɛ mun bɔbɔ, yɛ be kleli e yalɛ wie.+ Asa ekun’n, like nga be yo’n, ɔ jɔman Ɲanmiɛn klun. Yɛ like m’ɔ́ yó klɔ sran’m be kwlaa be ye’n, be saci i. 16 Afin be waan bé tánndan e ɲrun naan y’a kanman ndɛ’n y’a kleman be nga be timan Zifu’n naan b’a fite nun.+ I sɔ mɔ be yo’n ti’n, be sa tɛ’n uka su kɔ i ɲrun titi. Sanngɛ Ɲanmiɛn i ya’n w’a jaso be wun siɛn’n.+
17 Sanngɛ aniaan mun, kɛ be wa miannin e fii kɛ e wɔ’n, e afiɛn tili nun le nɲɔn kun. Ɔ maan y’a kwlá wunman e wun kun, sanngɛ e bu amun akunndan titi. Klolɛ mɔ e klo amun dan’n ti’n, e yo like kwlaa nga e kwla yo’n naan y’a kwla wun amun* ekun. 18 I sɔ’n ti’n, e waan é kɔ́ amun wun lɔ. Min bɔbɔ min Pɔlu n fɛli i sɔ’n i wun ajalɛ. M’an yoman sɔ kpɛ kunngba, n yoli sɔ kpɛ nɲɔn. Sanngɛ Satan tanndannin e ɲrun. 19 ?Kɛ e Min Zezi ko sɛ i sin’n,* wan mun yɛ é fá e wla é gúa be su i ɲrun-ɔn? ?Ngue yɛ ɔ́ mán e aklunjɔɛ-ɔ? ?Akatua benin yɛ é fá dí e nuan-ɔn? ?Nán amun-ɔn?+ 20 Amun ti yɛ é ɲán ɲrun-ɔn, yɛ amun ti yɛ é dí aklunjɔɛ-ɔ.