Maan e tra e awlɛn e bo jasin fɛ’n kɛ Zezi sa
“E tra e anwlɛn e kɛnnin i jasin fɛ’n kleli amun.”—1 TƐSALONIKFUƐ MUN 2:2.
1. ?Ngue ti yɛ sran’m be konvi kwla sɔ Ɲanmiɛn i Sielɛ’n i su jasin fɛ’n niɔn?
NANWLƐ, kɛ e ti jasin fɛ’n, e klun jɔ! Jasin fɛ’n nga i fɛ liɛ’n tra be ngba’n, yɛle Ɲanmiɛn i Sielɛ jasin fɛ’n. Jasin fɛ’n sɔ’n fɔnvɔ e kɛ afɛ’n nin tukpacɛ’n nin awlaboe’n nin wie’n bé wíe. Ɔ yo maan e kwla ɲan anannganman nguan. Ɔ yi Ɲanmiɛn i klun sa’n i nglo. Yɛ ɔ kle e wafa nga e nin Ɲanmiɛn e afiɛn’n kwla sɛ’n. Amun kwla bu i kɛ sran kwlaa ng’ɔ ti jasin fɛ’n nga Zezi boli’n, i klun jɔ́ su. Sanngɛ, nɛ́n i sɔ ɔ.
2. ?Kɛ Zezi seli kɛ: ‘M bali ba yasua nin i si, nin ba bla nin i nin, ɔ nin sewi nin i sewi be afiɛn sacilɛ’n,’ i bo’n yɛle benin?
2 Zezi seli i sɔnnzɔnfuɛ’m be kɛ: “Nán an bu i kɛ anuansɛ yɛ n fa bali asiɛ’n su wa-a, min nin anuansɛ a ba-man, sanngɛ tokofi yɛ min nin i bali-ɔ. Afin m bali ba yasua nin i si, nin ba bla nin i nin, ɔ nin sewi nin i sewi be afiɛn sacilɛ, yɛ sran kun bɔbɔ i awlofuɛ’m be yɛ bé wá yó i kpɔfuɛ-ɔ.” (Matie 10:34-36) Kɛ ɔ yo naan sran’m be sɔ jasin fɛ’n nun klanman’n, be yoman sɔ. Be nun sunman be kpalo i. Sran wie’m be kaci jasin fɛ’n bofuɛ’m be kpɔfuɛ. Kannzɛ bɔbɔ be ti be osufuɛ’n sanngɛ be kpɔ be.
3. ?Ngue yɛ ɔ kwla uka e naan y’a di e jasin fɛ’n bolɛ junman’n niɔn?
3 Jasin fɛ’n kunngba nga Zezi boli’n yɛ e kusu e bo ɔ. Yɛ kɛ sran’m be ti’n, ajalɛ kunngba nga sran’m be fɛli i laa’n, yɛ be te fa ɔ. I sɔ’n boman e nuan. Afin Zezi seli i sɔnnzɔnfuɛ’m be kɛ: “Sran b’ɔ su sran’n ti-man kpa trɛ-mɛn i min’n. Sɛ be kleli n yalɛ’n, bé klé amun yalɛ wie.” (Zan 15:20) Nvle sunman nun’n, be tanndanman e ɲrun trele sa. Sanngɛ be yo e finfin, be buman e wie. I sɔ’n ti’n, ɔ nin i fata kɛ e lafi Ɲanmiɛn su kpa yɛ e yo yakpafuɛ, naan y’a kwla di e jasin fɛ’n bolɛ junman’n juejue su titi.—An kanngan 2 Piɛr 1:5-8 nun.
4. ?Ngue ti yɛ ɔ nin i fatali kɛ Pɔlu ‘trɛ i anwlɛn’ naan w’a kwla bo jasin fɛ’n niɔn?
4 Atrɛkpa’n, ɔ ju wie’n jasin fɛ’n bolɛ’n ti kekle man amun. Annzɛ kusu i wafa wie o lɛ’n, ɔ kun amun srɛ. Sɛ ɔ ti sɔ’n, nán amun kunngba yɛ amun ti jasin fɛ’n bofuɛ kpa mɔ an bu i sɔ ɔ. Akoto Pɔlu trɛli i awlɛn boli jasin fɛ’n juejue su. Kusu ɔ si ndɛ nanwlɛ’n kpa. Sanngɛ ɔ juli wie’n, jasin fɛ’n bolɛ’n yoli kekle mɛnnin i. Pɔlu klɛli Klistfuɛ nga be o Tɛsaloniki lɔ’n be fluwa. Ɔ seli be kɛ: “An si kɛ be kleli ye nyrɛnnɛn, be yoli ye finfin Filip lɔ. Kɛ e juli amun wun lɔ, e fɛli dan kpa ekun, sanngɛ Nyanmiɛn maan e tra e anwlɛn e kɛnnin i jasin fɛ’n kleli amun.” (1 Tɛsalonikfuɛ Mun 2:2) Filipu lɔ’n, klɔ kpɛnngbɛn mun maan be boli Pɔlu nin Silasi nin ngble, be wlali be bisua yɛ be boli be kpanwun. (Sa Nga Be Yoli’n 16:16-24) I sɔ’n nun bɔbɔ’n, Pɔlu nin Silasi be ‘trali be anwlɛn’ be kannin jasin fɛ’n titi. ?Wafa sɛ yɛ e kwla yo kɛ be sa ɔ? Maan e nian like ng’ɔ ukali Ɲanmiɛn i sufuɛ mun laa mɔ be kwla trali be awlɛn be kannin Zoova su ndɛ nanwlɛ’n kleli sran mun’n. Yɛ e nian wafa nga e kwla yo kɛ be sa’n naan y’a tɛ kosan sɔ’n su.
Klistfuɛ klikli’m be trali be awlɛn be kpɔfuɛ’n be ɲrun
5. ?Ngue ti yɛ be nga be waan bé sú Zoova titi’n, ɔ nin i fatali kɛ be tra be awlɛn ɔn?
5 Yakpa yolɛ nin awlɛn tralɛ’n nun’n, sran ng’ɔ kleli ajalɛ kpafuɛ’n, yɛle Zezi Klist. I kpa’n, kɛ be fa boli klɔ sran lele andɛ’n, be kwlaa nga be waan bé sú Zoova seiin’n, ɔ nin i fatali kɛ be tra be awlɛn. ?Ngue ti ɔ? Kɛ be yoli ɲin kekle Edɛni fie’n nun lɔ’n, Zoova seli kɛ kpɔlɛ trɛ́n i sufuɛ mun nin Satan liɛ’m be afiɛn. (Bo Bolɛ 3:15) Abɛli m’ɔ ti sran kpa’n, kɛ i niaan bian kunnin i’n, yɛ kpɔlɛ sɔ’n i ɲin fiteli ɔ. I sin’n, ka naan nzue dan’n w’a tɔ’n, kpɔlɛ sɔ’n i ɲin wa fiteli Enɔku m’ɔ ti Ɲanmiɛn sufuɛ kpa’n i lika wie. Ɲanmiɛn maan Enɔku seli kɛ jɔlɛ nga Ɲanmiɛn dili sa tɛ yofuɛ mun’n, Ɲanmiɛn nin i anzi akpiakpi kpanngban kpa’m bé wá yó i nuan su sa. (Zid 14, 15) I ndɛ sɔ’n w’a jɔmɛn i blɛ sufuɛ’m be sunman lika be klun. I ti’n, be kpɔli i. Sɛ ɔ ti kɛ Zoova w’a fɛmɛn i’n, nn be kunnin i bɔbɔ. Nanwlɛ Enɔku trɛli i awlɛn sakpa!—Bo Bolɛ 5:21-24.
6. ?Ngue ti yɛ ɔ nin i fatali kɛ Moizi trɛ i awlɛn naan w’a kan ndɛ w’a kle Faraɔn?
6 Maan e bu Moizi i awlɛn m’ɔ trali mɔ i ti yɛ ɔ kwla kannin ndɛ kleli Faraɔn’n, i akunndan e nian. Famiɛn sɔ’n i nvlefuɛ’m be bumɛn i kɛ ɔ ti amuin’m be janunfuɛ ngbɛn. Sanngɛ be waan i bɔbɔ ba’n, ɔ ti amuin kun. Naan ɔ ti amuin nga be flɛ i Ra’n m’ɔ ti wia’n i amuin’n, i wa. Atrɛkpa’n, i sɔ’n ti yɛ kɛ laa Faraɔn nga’m be sa’n, ɔ sɔli i bɔbɔ i nzɔliɛ like nga be yili’n niɔn. Faraɔn i nuan ndɛ’n ti mmla. Ɔ kpɛ mmla yɛ sran’m be nanti su ɔ. Faraɔn sɔ’n m’ɔ le kwlalɛ m’ɔ buman sran uflɛ wie mɔ i ɲin ti kekle’n, nán sran uflɛ yɛ ɔ́ sé i kɛ ɔ yo sa yo sa ɔ. I sɔ sran’n i ɲrun yɛ Moizi m’ɔ ti i bua kankanfuɛ kan wie’n, ɔ bali wa kannin ndɛ ɔ. B’a yiɛmɛn i bɔɔ ngbɛn. ?Kpɛkun ngue yɛ Moizi boli i jɔ ɔ? Ɔ kannin ɲrɛnnɛn nga bé wá tɔ́’n, be ndɛ. ?Yɛ ngue yɛ Moizi srɛli ɔ? I waan maan Faraɔn yaci Izraɛlifuɛ akpinngbin mɔ be ti i kanga’n, be nun naan be wɔ! ?Ɔ nin i fatali kɛ Moizi trɛ i awlɛn? Ɛɛn, ɔ nin i fatali sɔ!—Kalɛ 12:3; Ebre Mun 11:27.
7, 8. (a) ?Sa benin mun yɛ be juli laa Ɲanmiɛn sufuɛ kpa’m be su ɔ? (b) ?Ngue yɛ ɔ ukali sran sɔ mun naan b’a tra be awlɛn Ɲanmiɛn sulɛ kpafuɛ’n nun ɔn?
7 Lele m’ɔ́ fá jú Klistfuɛ klikli’m be blɛ su’n, Ɲanmiɛn nuan ijɔfuɛ nin Ɲanmiɛn sufuɛ kpa’m be yoli yakpa, naan b’a kwla ka sanwun Ɲanmiɛn i sulɛ’n nun. Satan i mɛn’n w’a kloman be. Pɔlu seli kɛ: “Be fin be yɛbuɛ, be wlan-wlan be, be fa si be kpaci be nun, yɛ be fa tokofi kun be. Be wla bua nin boli kplo be kɔ wa kɔ wa, be nyan-man like fi, be wun nyrɛnnɛn, yɛ be yo be tɛtɛ.” (Ebre Mun 11:37) ?Ngue yɛ ɔ ukali Ɲanmiɛn i sufuɛ kpa sɔ mun naan b’a jran kekle ɔ? Ka naan akoto Pɔlu w’a klɛ ndɛ ng’ɔ o lɛ’n, ɔ kannin like ng’ɔ mannin Abɛli nin Abraamu nin Sara yɛ Ɲanmiɛn sufuɛ kpa’m be fanngan’n i ndɛ. Ɔ seli kɛ: “B’a nyan-man ninnge nga i waan ɔ́ fá mán be’n. Be wunnin be mmua lɔ, ɔ maan be klun jɔli.” (Ebre Mun 11:13) Ka naan Klistfuɛ klikli’m be blɛ’n w’a ju’n, Ɲanmiɛn nuan ijɔfuɛ kɛ Eli nin Zeremi yɛ Ɲanmiɛn sufuɛ uflɛ wie’m be sa’n, be trali be awlɛn Ɲanmiɛn sulɛ kpafuɛ’n nun. Ɔ ti jrɛiin kɛ like kun yɛ ɔ ukali be ɔ. Like sɔ’n, yɛle ninnge nga Zoova waan ɔ́ yó be mɔ be ɲin trannin su’n.—Tit 1:2.
8 Ka naan Klistfuɛ klikli’m be blɛ’n w’a ju’n, sran kpa sɔ’m be fali be wla guɛli i be ɲrun lɔ like kpa su. Kɛ be ko cɛn be’n, bé kwlá ɲán nguan mɔ fɔ’n nunman nun’n. Yɛ Klist Zezi nin sran 144.000 mɔ be ti Ɲanmiɛn ɲrun jranfuɛ’n be junman’n ti’n “bé nyán be ti, be su saci-man kun.” (Rɔmfuɛ Mun 8:21) Asa kusu’n, sɛ Zeremi nin laa Ɲanmiɛn sufuɛ yakpafuɛ’m be kwla trali be awlɛn’n, ɔ fin nda nga Zoova tali Zeremi’n. Ɔ seli kɛ: “Be nin wɔ bé kún, sanngɛ be su kwla-man wɔ, afin n jin ɔ sin, ń dé wɔ. Anannganman’n yɛ ɔ kan sɔ-ɔ.” (Zeremi 1:19) Andɛ kusu’n, kɛ e bu Ɲanmiɛn i nda ng’ɔ tali be mɔ bé wá kpɛ́n su’n, ɔ nin nda ng’ɔ tɛli i kɛ ɔ́ sásá e i ninnge’m be nun’n be akunndan’n, e kwla tra e awlɛn wie.—Nyanndra Mun 2:7; An kanngan 2 Korɛntfuɛ Mun 4:17, 18 nun.
Klolɛ’n maan Zezi trɛli i awlɛn boli jasin fɛ’n
9, 10. ?Wafa sɛ yɛ Zezi trɛli i awlɛn (a) Zuifu’m be Ɲanmiɛn sulɛ wafa’n be su kpɛnngbɛn’m be ɲrun ɔn? (b) sonja’m be ɲrun ɔn? (c) Ɲanmiɛn ɲrun jranfuɛ’m be su kpɛn’n i ɲrun ɔn? (d) Pilati ɲrun ɔn?
9 E ajalɛ klefuɛ Zezi trɛli i awlɛn sa fanunfanun wie’m be nun. I wie yɛle kɛ kannzɛ be nga be le ɲrun’n, ɔ nin kwlalɛ’n be kpɔli i’n, sanngɛ ndɛ nga Ɲanmiɛn kunndɛ kɛ sran’m be si i’n, w’a fiaman wie su. Kɛ Zuifu’m be Ɲanmiɛn sulɛ wafa’n be su kpɛnngbɛn’m be bu be wun sran kpa, mɔ be kle ato ninnge mun’n, yakpa su ɔ yiyili be bo. Kɛ Zezi bú sran sɔ’m be fɔ’n, ɔ tuli ndɛ’n i ɲin weiin kleli be. Le kun’n, ɔ seli kɛ: “Amun mmla klefuɛ mun nin Farizifuɛ mun bɔ amun ti dunman klofuɛ mun, an yako! Yɛlɛ kɛ an ti kɛ ndia su sua bɔ b’a kɛn i ayre ufue’n sa, i talɛ’n yo klanman, sanngɛ i klun lɔ’n ti sran owie nin ninnge tɛtɛ wafa’n kwlaa. Amun kusu kɛ an ti sɔ-ɔ. Kɛ sran’m be wun amun’n, an fa sran kpa, sanngɛ dunman klolɛ’n nin sa tɛtɛ’n kwlaa be o amun anwlɛn’n nun.”—Matie 23:27, 28.
10 Kɛ sonja’m be ɔli Zezi i tralɛ Zɛtsemane lika’n nun lɔ’n, yakpa su ɔ yili i wun kleli be. (Zan 18:3-8) I sin’n, be fɛ i ɔli Jɔlɛ difuɛ dandan’m be ja su. Kpɛkun Ɲanmiɛn ɲrun jranfuɛ’m be su kpɛn’n usɛli i kosan. Zezi si kɛ ɔ su kunndɛ i kunlɛ. Sanngɛ yakpa su ɔ kannin kɛ ɔ ti Klist nin Ɲanmiɛn Wa. Ɔ kan guali su kɛ bé wá wún i ‘kɛ ɔ ti Nyanmiɛn i fama su, yɛ bé wún i ɔ wo nyanmiɛn ble’n su ɔ su ba.’ (Mark 14:53, 57-65) Kɛ ɔ yoli kan’n, be cili Zezi be fɛ i jrannin Pilati ɲrun lɛ. Pilati kwla yaci i nun. Sanngɛ kɛ bé tɔ́n i suɛn’n w’a tɛman be su. (Mark 15:1-5) Sran ng’ɔ timan yakpa’n, ɔ kwlá yoman ngalɛ’n.
11. ?Wafa sɛ yɛ yakpa yolɛ’n nin Ɲanmiɛn nin sran klolɛ’n, be kɔ likawlɛ ɔ?
11 Sanngɛ Zezi seli Pilati kɛ: “Nian sa ti bɔ be wu min’n, sa ti bɔ m bali mɛn’n nun’n yɛ: m bali kɛ ń kán ndɛ ng’ɔ ti nanwlɛ’n klé sran mun.” (Zan 18:37) Zoova sunmannin Zezi kɛ ɔ wa bo jasin fɛ’n. Junman sɔ’n i dilɛ’n yoli Zezi i fɛ kpa, afin ɔ kloli i Si m’ɔ o ɲanmiɛn su lɔ’n kpa. (Lik 4:18, 19) Zezi kloli sran’m be wie kusu. Ɔ si kɛ lika’n ti kekle be su. I kunngba’n, klolɛ mɔ e klo Ɲanmiɛn nin e wiengu mun’n, i ti yɛ e bo jasin fɛ’n i yakpa su e kle be ɔ.—Matie 22:36-40.
Ɲanmiɛn wawɛ’n uka e maan e tra e awlɛn e bo jasin fɛ’n
12. ?Ngue ti yɛ Zezi i sɔnnzɔnfuɛ klikli’m be dili aklunjuɛ ɔ?
12 Kɛ be kunnin Zezi m’ɔ dili le mɔcuɛ nɲɔn kun’n, i akoto’m be dili aklunjuɛ. Yɛle kɛ Zoova maan sran uflɛ’m be wa kacili Zezi i sɔnnzɔnfuɛ. Cɛn ba kunngba nun’n, be yoli sran ko ju 3.000 mɔ be bali Zerizalɛmu lɛ pantekɔtu dilɛ’n, be batɛmu! Sran sɔ’m be nun wie’m be timan Zuifu. Nanwlɛ, kɛ e niɛn i sa’n sran’m be kannin sa sɔ’n i ndɛ kpa! Biblu’n waan: “Abonuan sa bɔ be bɔ Zezi sunmannin be’n be yo’n nin atrɛ bɔ be yi’n, ɔ yo sran’n kwlaa be sro.”—Sa Nga Be Yoli’n 2:41, 43.
13. ?Ngue ti yɛ aniaan’m be srɛli Ɲanmiɛn kɛ ɔ yo naan be yo yakpa ɔ? ?Yɛ i sɔ’n i bo’n guali sɛ?
13 I sɔ’n yoli Zuifu’m be Ɲanmiɛn sulɛ wafa’n be su kpɛnngbɛn’m be ya kpa. Ɔ maan be trali Piɛli nin Zan be wlali be bisua lele aliɛ fa cɛnnin be. Kpɛkun be wlali be su nun kɛ nán be kan Zezi i ndɛ kun. Kɛ be yacili be nun’n, be ɔli aniaan’m be sin naan b’a kan sa ng’ɔ juli be su’n b’a kle be. Kpɛkun be kwlaa be kannin be ɲrun mɔ be tanndan’n i ndɛ kleli Ɲanmiɛn. Be seli kɛ: “Nannan Nyanmiɛn [...] yo maan ɔ sran’m be kan ɔ ndɛ’n yakpa su.” ?I sɔ’n i bo’n guali sɛ? “Nyanmiɛn wawɛ’n yili i wun nglo be kwlaa be nun, naan b’a kan Nyanmiɛn ndɛ’n yakpa su.”—Sa Nga Be Yoli’n 4:24-31.
14. ?E jasin fɛ’n i bolɛ’n nun’n, wafa sɛ yɛ Ɲanmiɛn wawɛ’n suan e bo ɔ?
14 Maan e sie i nzɔliɛ kɛ Zoova i wawɛ’n ti yɛ Zezi i sɔnnzɔnfuɛ’m be kwla kannin Ɲanmiɛn Ndɛ’n juejue su ɔ. Nán e bɔbɔ yɛ maan e kwla kan ndɛ nanwlɛ’n e kle e wiengu mun yakpa su ɔ. Sɛ e se Zoova kɛ ɔ fɛ i wawɛ’n man e’n, ɔ kwla fa man e. Yɛ ɔ́ fá mán e kusu. Zoova fanngan nun’n, e kusu e kwla yo yakpafuɛ naan be nga be tanndan e ɲrun’n, y’a jran be ɲrun kekle.—An kanngan Jue Mun 138:3 nun.
Andɛ Klistfuɛ’m be tra be awlɛn be bo jasin fɛ’n
15. ?Wafa sɛ yɛ ndɛ nanwlɛ’n bubu sran’m be nun ɔn?
15 Kɛ laa’n sa’n, andɛ’n ndɛ nanwlɛ’n te bubu sran’m be nun. Wie’m be sɔ nun klanman. Wie’m be kusu be wunmɛn i wlɛ yɛ be buman e Ɲanmiɛn sulɛ’n i like fi. Kɛ nga Zezi fa kannin’n sa’n, sran wie’m be kan e wun ndɛ tɛ, be yo e finfin annzɛ be kpɔ e. (Matie 10:22) Ɔ ju blɛ wie’n, be tɔn e suɛn aladio nin televiziɔn nin zronali’m be nun. (Jue Mun 109:1-3) Ɔ nin i sɔ ngba’n, asiɛ wunmuan’n su’n, Zoova i sran’m be bo jasin fɛ’n yakpa su.
16. ?Ngue ndɛ yɛ ɔ kle kɛ yakpa yolɛ’n ti’n, be nga e bo jasin fɛ’n e kle be’n, be kwla kaci be akunndan’n niɔn?
16 Yakpa mɔ e ti’n, ɔ yo maan sran’m be kaci wafa nga be bu Ɲanmiɛn Sielɛ’n i ndɛ’n. Aniaan bla kun m’ɔ o nvle nga be flɛ i Kyrgyzstan i nun lɔ’n se kɛ: “Kɛ n ɔli jasin fɛ’n i bolɛ’n, awlofuɛ kun seli min kɛ: ‘N lafi Ɲanmiɛn su. Sanngɛ nán Klistfuɛ’m be Ɲanmiɛn liɛ’n niɔn. Sɛ a ba min anuan nga nun wa ekun’n, ń yáci min alua’n nun naan ɔ kaka ɔ!’ Kɛ ɔ́ yó sɔ’n alua dan kpa kun minndɛ i sin lɛ. Sanngɛ kɛ e Sielɛ Blɛ’n i nganniɛn fluwa 37 su nga be flɛ i ‘Ɲanmiɛn sulɛ tɛ’n i awieliɛ’n w’a mantan koko!’ i cɛcɛlɛ blɛ’n juli’n, n fali ajalɛ kɛ ń sá min sin sua sɔ nun lɔ. Min waan sɛ atrɛkpa’n ń tó sran uflɛ awlo sɔ’n nun o. Sanngɛ bian kunngba’n yɛ ɔ tikeli anuan’n niɔn. N srɛli Zoova ndɛndɛ kpa, kpɛkun n seli i kɛ: ‘Nja aɲin o, ndɛ nga e kɛnnin i anunman sin’n, n wla nin a fiman su. Kusu n wla nin a fiman ɔ alua’n su wie. Sanngɛ n kunndɛ kɛ ń fá fluwa nga ń blɛ́ wɔ. Afin kɛ ɔ sa’n, n lafi Ɲanmiɛn kunngba su. Ɔ cɛ kaan sa Ɲanmiɛn tú Ɲanmiɛn sulɛ wafa nga be saci i dunman’n be fɔ. Sɛ a kanngan fluwa nga nun’n, a kwla wun i sɔ’n su ndɛ wie mun ekun.’ Bian fali Sielɛ Blɛ’n i nganniɛn fluwa sɔ’n. I sɔ’n boli min nuan. Yɛ n wɔli sua uflɛ nun ɔn. W’a cɛman bian wanndi toli min lɛ. Fluwa’n o i sa nun. Ɔ seli min kɛ: ‘N kanngannin nun. ?Ngue yɛ n kwla yo naan Ɲanmiɛn w’a tumɛn i klunngbɔ min su wie ɔ?’” Be boli Biblu’n nun like suanlɛ bo. Kpɛkun bian boli Klistfuɛ aɲia’m be bo kɔlɛ bo.
17. ?Wafa sɛ yɛ aniaan bla kun i yakpa yolɛ’n wlali Biblu’n nun like suanfuɛ kun i fanngan ɔn?
17 E yakpa yolɛ’n kwla yo maan e wiengu’m be yo yakpa wie. Nvle nga be flɛ i Risi lɔ’n, aniaan bla kun m’ɔ o loto nun su kɔ lika’n, ɔ fali periodiki kun mannin bla kun. Kɛ ɔ yoli sɔ’n bian kun jasoli kpɛ kunngba. Ɔ deli periodiki’n aniaan bla’n i sa nun. Ɔ ɲɔnɲɔnnin i kpɛkun ɔ yili i ase. Ɔ boli aniaan bla’n i sannzan, kpɛkun ɔ usɛli i kan ng’ɔ tran’n. Yɛ ɔ seli i kɛ nán ɔ bo jasin fɛ’n klɔ nun kun. Aniaan bla’n srɛli Zoova naan ɔ ukɛ i. Kpɛkun i wla kpɛnnin Zezi i ndɛ nga su: “Nán an sro be nga be kun sran bɔ be kwlá kun-man like ng’ɔ maan be flɛ sran i sran’n.” (Matie 10:28) Blɛlɛlɛ ɔ jasoli yɛ ɔ seli bian’n kɛ: “N su kleman wɔ kan nga n tran’n, kusu ń bó jasin fɛ’n klɔ nun lɔ ekun.” Kpɛkun yɛ ɔ fin loto nun jrali ɔ. Kɛ ɔ́ yó sɔ’n, aniaan bla’n siman kɛ be ng’ɔ kle be Biblu’n nun like’n, be nun kun o loto sɔ’n nun. Sran’m be wun srɛ ti’n, bla sɔ’n kɔman aɲia’m be bo. Sanngɛ kɛ ɔ wunnin kɛ aniaan bla’n yoli yakpa’n, ɔ fali ajalɛ kɛ ɔ́ kɔ́ aɲia’m be bo siɛn’n.
18. ?Ngue yɛ ɔ kwla uka amun naan amun a bo jasin fɛ’n yakpa su kɛ Zezi sa ɔ?
18 Mɛn nga mɔ i nunfuɛ’m be buman Ɲanmiɛn like yɛ nun’n, sɛ sran kun waan ɔ́ bó jasin fɛ’n, ɔ fata kɛ ɔ yo yakpafuɛ kɛ Zezi sa. ?Ngue yɛ ɔ kwla uka amun naan amun a yo sɔ ɔ? Amun fa amun ɲin sie i ninnge nga be o amun ɲrun lɔ’n be su. Amun klo Ɲanmiɛn nin sran kpa. Yɛ amun srɛ Zoova naan ɔ wla amun fanngan. Kpɛkun nán amun wla fi su kɛ nán amun ngunmin yɛ amun o lɛ ɔ. Afin Zezi nin amun o nun. (Matie 28:20) Ɲanmiɛn wawɛ’n wlá amun fanngan. Kpɛkun Zoova rá amun su yɛ ɔ́ súan amun bo. I ti’n, e tra e awlɛn e kan ndɛ yɛ’n: “E Min Nyanmiɛn’n yɛ ɔ ti n ukafuɛ-ɔ, srɛ kun-man min. ?Nzu yɛ sran kwla yo min-ɔn?”—Ebre Mun 13:6.
?Amún tɛ́ su sɛ?
• ?Ngue ti yɛ ɔ nin i fata kɛ Ɲanmiɛn i sufuɛ’m be yo yakpafuɛ ɔ?
• ?Yakpa yolɛ’n nun’n, ajalɛ benin yɛ [...]
Ɲanmiɛn sufuɛ kpa nga be bali ka naan Klist i blɛ’n w’a ju’n, be kle e ɔ?
Zezi Klist kle e ɔ?
Klistfuɛ klikli’m be kle e ɔ?
andɛ e wiengu Klistfuɛ’m be kle e ɔ?
[Foto, bue 23]
Zezi yiyili Zuifu’m be Ɲanmiɛn sulɛ wafa’n be su kpɛnngbɛn’m be bo yakpa su.
[Foto, bue 25]
Zoova wla e fanngan naan y’a kwla bo jasin fɛ’n.